ಯೊಹಾನ್ 18 - गवली उनाई नियमबगिचान यीशु गा उठाऊ 1 जब यीशु नी प्रार्थना दडा स्याके, हेजा चेलाकू सेंग्गोन किद्रोन बल्लाके पारके। डी जगान म्या बगीचा डा डेन डीच एठा दिया चेलाकू ओले। 2 दियागा उठामिठाच यहूदा इस्करियोती भी डी जगा हाडाई डा, चोयाकी यीशु हेजा चेलाकू गा सेंग्गोन देटेन सेने लक्कू डा। 3 मेटे यहूदा इस्करियोती सैनिककु गा भागो के एठा मुख्यायाजककु एठा फरीसि कुरकू गा कोनेटे मंदिर गा सिपाईकु दिवा एठा मशाल एठा हथियार के साटे देटेन हेन। 4 मेटे यीशु डी सेबाई बातो के जो दिया सेंग्गोन डाऊ मिनी डा, चिनाटे सम्मान ओलेडो कोम्बाराके, “आपे जेका घगाटा लक्के होय?” 5 दिकुनी डीचके जवाब जीके, “नासरत पूरा गा थंदळ यीशु के।” यीशु नी दिकुटे मंडीके, “इंज मेना।” एठा दियागा उठामिठाच यहूदा इस्करियोती भी दिकुगा सेंग्गोन टेंगेनके डा। 6 यीशु इनी मंडीटेका, “इंज मेना,” दिकु टाउन ओसोर जेडो ओटेन बोचोएन। 7 मेटे डीचनी डाबोलटे दिकुटे कोम्बाराके, “आपे जेके घगाटा लक्के होय।” दिकु मंडीके, “नासरत पूरा गा थंदळ यीशु के।” 8 यीशु नी जवाब जीके, “इंज्नी आपेटे मंडीके मेना, कि इंज मेना, अगर इंज्के घगाटावा मेना, इनी दूसरा कुरकू के सेंडाए।” 9 येनेगो इनिघल्जी डाएन, कि ताकी यीशु नी जो पेला मंडीके डा, देटेन सच्चोयु: “दिकुके आमनी इंज्के जिलेकु दिकु तलाटे म्याखोम के भी बान आटडुका।” 10 शमौन पतरस नी तलवार, जो दियागा मेरान डा, ओळके एठा खाटयाजक गा भाग्य लिंजेन सेंदराटे, दियागा डाखुरी कोने लुटूर गेटके, डी भाग्य जीमू मलखुस डा। 11 मेटे यीशु नी पतरस टे मंडीके, “अमा तलवार लेंक्कीने जो कटोरी बाटे नी इंज्के जिले होय, इंजेन डीके नुनू जरुरी होय।” हन्ना गा मेरान यीशु 12 मेटे सिपाईकु एठा दिकुगा मेन अधिकारी एठा यहूदी कुरकू गा सिपाईकुनी यीशु के उठाटे टोलकेनेच, 13 एठा पेला डीचके हन्ना गा मेरान साईय्येनेच चोयाकी देटेन डी साल गा खाटयाजक कैफा गा कुंजकर टे डा। 14 येटेन डीका कैफा डा, डीचनी यहूदी कुरकू के सलाह जीके डा, कि आलेगा कुरकू गा घल्जी म्या कोरो गा गुजू अच्छा होय। पतरस गा यीशु के चिचानाटे बान मेन्बा 15 शमौन पतरस एठा म्या दूसरा चेला भी यीशु गा टाऊटे ओले। येटेन चेलानी खाटयाजक गा जान-पहचान डा एठा यीशु गा सेंग्गोन खाटयाजक गा दरोमेन ओले। 16 पेनो पतरस बल्लान दरोजोनका टेंगेनके, मेटे देटेन दूसरा चेला जो खाटयाजक गा जान-पहचान डा, बाल्लन ओटजे डो एठा जो दारोजोन ठहरातिंज्के भागनी टे मंडीटे, पतरस के तलान सालेनेच। 17 दारोजोन कलमके डी भागनी नी पतरस टे मंडीके, “चोच आम भी इनी चेलाकू गा तलाटे म्याखोम होय?” डीचनी मंडीके, “इंज बाऊ होय।” 18 भाग्य एठा सिपाईकु रराम गा वोजीटे कोल्जा गा ढागा-ढागा सिंगेलेन सेकौऊ लक्के डा एठा पतरस भी दिकु सेंग्गोन टेंगेनटे सिंगेलेन सेकौऊ लक्के डा। खाटयाजक गा मेरान यीशु ( मत्ती 26:59-66 ; मरकुस 14:55-64 ; लूका 22:66-71 ) 19 मेटे खाटयाजककु नी यीशु टे दियागा चेलाकू गा बारेन एठा दियागा शिक्षा गा बारेन कोम्बाराके। 20 यीशु नी डीचके जवाब जीके, “इंज्नी सेबाईकु सम्मान बातोवे, इंज्नी आराधना जगा एठा यरूशलेम गा मंदिर गेन येटेन यहूदी कुरकू जमाऊ डा, देटेन शिक्षा जीके एठा उखुटे चोलाकाभी चोचका मंडीडुका। 21 आम इंजाटे इनी प्रश्न चोया कोकाम्बरा लक्के होय? जो कुरकू नी इंजा शिक्षा आजुम्के होय, दिकुटे प्रश्न कोम्बाराए कि इंज्नी दिकुटे चोच मंडीके? डोगे दिकु हाडाई कि इंज्नी चोच-चोच मंडीके।” 22 जब डीचनी इनी मंडीके, मेटे यरूशलेम मंदिर गा सिपाईकु तलाटे म्याखोम नी जो मेरान टेंगेनके डा यीशु के थापळा मुंडाटे मंडीके, “चोच आम खाटयाजक के इनी रोंगो जवाब जीके होय?” 23 यीशु नी दियाटे कोम्बाराके, “अगर इंज्नी बुरा मंडीके टासो, मेटे इंज्के घाले कि चोच बुरा डा पेनो अगर भला मंडीके टासो, मेटे इंज्के चोया मुमंडावा होय?” 24 यीशु आए भी टोलके डा, एठा हन्ना नी डीचके खाटयाजक कैफा गा मेरान कुल्केनेच। पतरस गा यीशु के चिचानाटे एठा:बाणमेन्बा ( मत्ती 26:71-75 ; मरकुस 14:69-72 ; लूका 22:58-62 ) 25 शमौन पतरस टेंगेनके डो सिंगेलेन सेको लक्के डा। मेटे दिकुनी दियाटे मंडीके, “चोच आम भी दिया चेलाकू तलाटे होय?” डीचनी मंडीके, “इंज बाऊ मेना।” 26 खाटयाजक गा भाग्यकु तलाटे म्याखोम जो दियागा सगाकु तलाटे डा, दियागा लुटूर पतरस नी गेटके डा, डीचनी कोम्बाराके, “चोच इंज्नी आमके यीशु गा सेंग्गोन बागिचान बान दोडुका डा?” 27 पतरस नी डाबोलटे बान मेंके एठा तुरुटो कोम्बाराके। यीशु गा पिलातुस गा सम्मान सालेनेच ( मत्ती 27:1-2 , 11-31 ; मरकुस 15:1-20 ; लूका 23:1-25 ) 28 दिकु यीशु के कैफा गा मेराटे रोमी सम्राट पिलातुस गा किल्लान साईय्येनेच एठा येटेन आंगु गा टेमो डा। पेनो डीच खुद किल्ला तलान बान सेंडुका। ताकी बिसोटोयु बाकी पेनो फसह तिवार गा आटा जोमजा होना। वाजा इनी डा, अगर दिकु तलाटे जेकाभी तलान सेने डा मेटे डीच बिसोटाऊ डा, एठा दियेन फसह गा आटाजोम गा अनुमति बान घटाऊ। 29 मेटे पिलातुस दिकु मेरान बल्लान ओटके एठा मंडीके, “आपे इनिकोरो लिंजेन तुनी बातो गा आनोवा तोटाकावा होय?” 30 दिकुनी डीचके जवाब जीके, “अगर देटेन अपराधी बान धारे मेटे आले अमा मेरान बान सा डा।” 31 पिलातुस नी दिकुटे मंडीके, “आपेका इनिज्के साईय्येकेच डो आपेगा नियम रोंगो दियागा न्याय डाए।” यहूदी अगुवाकु नी दियाटे मंडीके, “आलेगा मेरान जेकाकेका जान सा गा दण्डो गा हाक बाऊ होय।” 32 येटेन इनिघल्जी डाएन कि यीशु गा डी बातो पुरायु जो डीचनी इनी दर्शातिंजटे मंडीके डा, कि दियागा गुजू टोनोगो टे डाऊवा। 33 मेटे पिलातुस डाबोलटे किल्ला तलान ओले एठा यीशु के किल्ला तलान हाकोटे दियाटे कोम्बराके, “चोच आपे यहूदी कुरकू गा राजा होय?” 34 यीशु नी जवाब जीके, “चोच आम इनी बातो आम कोंटे होय या दूसराकु नी इंजा बारेन अमाटे मंडीके?” 35 पिलातुस नी जवाब जीके, “आमेन मालूम होय कि इंज यहूदी कुरकू बान होय, अमाका कुरकू नी एठा मुख्यायाजक कुनी आमके इंजा टीन जीलेमी होय। आमनी चोच डाके होय?” 36 यीशु नी जवाब जीके, “इंजा राज्य इनी दुनिया गा बाऊ, अगर इंजा राज्य इनी दुनिया गा धारे मेटे इंजा टाऊटे सेंदरा कुरकू लडाईवा ताकी इंज यहूदी अगुवाकु द्वारा गिरफ्तार बाकी होना। पेनो सच्चाई मेटे इनी होय कि इंजा राज्य इंगा गा बाऊ होय।” 37 पिलातुस नी दियाटे मंडीके, “मेटे चोच आम राजा होय?” यीशु नी जवाब जीके, “आम मंडीवाकी कि इंज राजा मेना?” इंजा जनम सा एठा दुनिया गेन हेजे वाजा इनी होय कि इंज सत्य गा बारेन इथूकोम्बा। सत्य गा पालन दडामिंकू सेबाईकु इंजा बातो आजोम्बा होय। 38 पिलातुस नी दियाटे कोम्बाराके, “सत्य चोच होय?” इनी मंडीटे देटेन डाबोलटे यहूदी अगुवाकु मेरान ओले एठा दिकुटे मंडीके, “इंज्नी दिया लिंजेन तुनिकाभी आनोवा बान घटाऊ। यीशु या बरअब्बा 39 पेनो आपेगा इनी रितो होय, कि इंज फसह गा तिवार गेन आपे घल्जी म्या कोरो के आराकेच। मेटे चोच आपे चाहतावा होय, कि इंज आपे घल्जी यहूदी कुरकू गा राजा के आराकेच?” 40 मेटे दिकुनी चिल्लातिंजटे मंडीके, “इनिजके बाने पेनो आले घल्जी बरअब्बा के आराकेच।” बरअब्बा म्या डाकु डा। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation