ಯೊಹಾನ್ 16 - गवली उनाई नियम

¹ “इनी बातो इंज्नी आपेटे इनिघल्जी घालके कि आम जेका गा द्वारा आपमानजू बाकी।”

² दिकु आपेके आराधना जगानौर टे ओठ्कोम्बा, बनकी डी टेमो हेजे लक्के होय, कि जो जेकाभी आपेके घोचकोम्बा देटेन इनी समझातिंजेवा कि येनेगो दडा टे देटेन परमेश्वर गा सेवा दडावा होय।

³ एठा येटेन दिकु आपे सेंग्गोन इनिघल्जी डाएवा, चोयाकी दिकुनी न बाटे के हाडाई होय एठा न इंज्के हाडाई होय।

⁴ पेनो इनी बातो इंज्नी इनिघल्जी आपेटे मंडीके, कि जब डी बातो गा पुराऊ गा टेमो हेन मेटे आपेन यादो हेयु, कि इंज्नी आपेटे पेलाका मंडीके डा। जब आपे सुरुवात डेन इंजा चेला आरोएन मेटे इनी बातो इनिघल्जी बान घालडुका, चोयाकी इंज आपेगा सेंग्गोन डा।

पवित्र आत्मा गा कामय

⁵ नका इंज इंजागा कुकूल मिठाच गा मेरान चेल्के मेना एठा आपे तलाटे जेका चोचका बान कोकाम्बरा, कि आम तुंगान चेल्के होय?

⁶ पेनो इंज्नी जो इनी बातो आपेटे मंडीके होय, इनिघल्जी आपे ठायका उदासो के।

⁷ फिरभी इंज आपेटे सच्चो मंडीवा होय, कि इंजा सेने आपे घल्जी अच्छा होय चोयाकी अगर इंज बान सेने मेटे देटेन मदत मिठाच आपेगा मेरान बान हेजे। पेनो अगर इंज सेनेवा मेटे डीचके आपे मेरान कुलेच्बा।

⁸ मदत मिठाच हेजेवा। देटेन दुनिया कुरकू के पापी, एठा धार्मिकता दडावा एठा परमेश्वर गा न्याय गा बारेन यकीन जेबा, कि डी गलत बाने होय।

⁹ पापो गा बारेन दिकुके इनिघल्जी यकीन जेबा, चोयाकी दिकु इंजा लिंजेन विश्वास डा टे इंकारेवा,

¹⁰ परमेश्वर गा सेंग्गोन साही आरुका थंदळ घल्जी यकीन जेबा चोयाकी इंज बाटे गा मेरान सेनेवा मेना एठा आपे इंज्के डाबोलटे बान दोडो,

¹¹ एठा परमेश्वर न्याय गा बारेन यकीन जेबा, चोयाकी दुनिया गा हाकिम कोरो दोषी ठहरातिंज्के होय।

¹² “इंज आपेके घोनेचका बातो गघाल चाहतावा मेना पेनो आए येटेन आमगा समाजोटे जादाऊवा।”

¹³ पेनो देटेन आत्मा होय जो परमेश्वर गा बारेन सत्य के ओडेवा होय, देटेन हेजेवा मेटे आपेके परमेश्वर बारेन जो सत्य होय समझातिंजकोम्बा, चोयाकी देटेन हेजा हाक टे बान मंडी, पेनो देटेन परमेश्वर गा कोंटे आजुमेबा डीका मंडेबा एठा हेजे मिनी बातो आपेके घालेवा।

¹⁴ देटेन इंजागा महिमा डाएवा, चोयाकी जो इंज कोनेटे घटाएन होय, देटेन आपेके डीचका घालेवा।

¹⁵ जो चोचकाभी बाटे परमेश्वर गा होय, देटेन सेबाई इंजा होय। जो चोच्काभी पवित्र आत्मा नी इंजाटे घाटाये होय, देटेन आपे लिंजेन ओडेवा।

जाम खुशी गेन बदला तिंजेबा

¹⁶ “आपे इंज्के थोळा टेमोन बादोन बान दोडो एठा डाबोलटे थोळा टेमोन डोकोम्बा।”

¹⁷ मेटे दियागा चेलाकूनी इकुका मंडीके, “इनी चोच होय जो देटेन आलेटे मंडीवा होय, आपे इंज्के थोळा टेमोन बादोन बान दोडो एठा डाबोलटे थोळा टेमोन डोकोम्बा? एठा दियागा मंडी मतलब चोच होय कि इंज बाटे गा मेरान सेनेवा मेना?”

¹⁸ मेटे दिकुनी मंडीके, येटेन “थोळा टेमो” जो देटेन मंडीवा होय, चोच मतलब होय? आले बान हाडाई कि चोच मेंबा होय।

¹⁹ यीशु नी इनी चिनाटे कि दिकु इंजाटे इनी बातो गा मतलब कोकाम्बरा चाहतावा होय, दिकुटे कोम्बाराके, “चोच आपे आपेका इंजा इनी बातो गा बारेन पूछताछ दडावा होय, कि आपे इंज्के थोळा टेमोन बान दोडो एठा डाबोलटे थोळा टेमोन डोकोम्बा?”

²⁰ इंज आपेटे सच्चो-सच्चो मंडीवा मेना, इंजा गुजू बादोन आपे जाम्बा एठा कासून थंदळवा, पेनो दुनिया कुरकू खुशी ममानातिंज्बा। आपेन कासु डाऊवा पेनो आपेगा कासु जब आपे इंज्के डाबोलटे डोकोम्बा खुशी गेन बदलाऊवा।

²¹ जब जापाए गा जनम जिऊ गा टेमो हेजेवा होय, मेटे देटेन भेबाव ताखलिफबेन थंदळवा। चोयाकी दियागा कासु टेमो हेन होय, पेनो जब देटेन सानी के जेबा मेटे देटेन इनी सोचातिंजटे खुशीऊवा होय कि दुनिया गेन म्या सानी डाएन डी ताखलिफ के डाबोलटे यादो बाने।

²² इनिका रिती टे आपेन नका कासु होय, पेनो इंज आपेटे डाबोलटे मिलातिंजुवा एठा आपे खुशीवा। एठा आपेगा खुशी आपेटे जेका बान सा।

²³ डी टेमो आपे इंजाटे चोचका बान कोकाम्बरा। इंज आपेटे सच्चो-सच्चो मंडीवा मेना, अगर आपे इंजा जीमू गेन बाटे टे चोचकाभी आसेवा, मेटे देटेन आपेके जेबा।

²⁴ आए टाएन आपेनी इंजा हाक टे चोचका बान आसीडुका, आसिकी घाटाऊवा ताकी आपेगा खुशी पुरायु होना।

दुनिया लिंजेन जीटाऊ

²⁵ “इंज्नी इनी बातो आपेटे उदहारण गेन मंडीके होय, पेनो डी टेमो हेजेवा होय। कि इंज आपेटे उदहारण गेन एठा बान मंडी पेनो खुल्लाटे आपेके बाटे गा बारेन घालेवा।

²⁶ डी टेमो आपे इंजा जीमू टे आसेवा एठा इंज आपेटे मंडीवाकी मेना कि इंज आपे कोनेटे बाटे टे प्रार्थना बान दडा।

²⁷ चोयाकी बाटे नी खुद का आपेटे प्यार दोडोवा होय, इनिघल्जी कि आपेनी इंजाटे प्यार डोके होय एठा इनी भी विश्वास डाके कि इंज बाटे कोंटे हेन।

²⁸ इंज बाटे कोंटे दुनिया गेन हेन मेना, डाबोलटे दुनिया के आराटे बाटे गा मेरान डाबोलटे सेनेवा।”

²⁹ यीशु गा चेलाकूनी मंडीके, “आजोमे, नका मेटे आम खुल्लाटे मंडेबा होय एठा तुनिका उदहारण बान मंडी।

³⁰ नका आले चिनाये होय कि आम सेबाईका हाडाई होय एठा जेकाकेका आमेन प्रश्न दडा गा जरुरत बाऊ, कि जेका अमाटे प्रश्न कोम्बाराए। एनेटे आले विश्वास दडावा होय कि आम परमेश्वर गा कोंटे हेन होय।”

³¹ इनी आजुमटे यीशु नी दिकुटे मंडीके, “आपेन आए विश्वास डाऊ लक्के होय!

³² डोगे, देटेन टेमो हेजेवा होय बनकी हेन होय कि आपे सेबाई चिगळ-बिगळ टे आपे-आपेगा कोरा दोडोवा एठा इंज्के एकलाका आराकोम्बा फिरभी इंज एकला बाने चोयाकी इंजा बाटे इंजा सेंग्गोन होय।

³³ इंज्नी इनी बातो आपेटे इनिघल्जी मंडीके होय कि आपेन इंजा वोजीटे शांती घटायु। दुनिया गेन आपेन ताखलिफ सेहसेन होना पेनो हिम्मत डोए, इंज्नी दुनिया खाट कोरो शैतान के हरातिंज्केनेच होय।”