ಯೊಹಾನ್ 13 - गवली उनाई नियम

प्रभु भोज

¹ फसह गा तिवार टे पेला जब यीशु नी चिनाये, कि डी टेमो हेन होय, कि दुनिया के आराटे बाटे गा मेरान सेंजू। मेटे डीच दुनिया गेन थंदळ मिंकू हेजा कुरकू के जैसा प्यार दडा डा, आखरी टाएन डेनेगोका प्यार दडा लक्के।

² यीशु एठा दियागा चेलाकू रातो गा आटाजोम लक्के डा। शैतान नी पेलाटेका यीशु के धोका जिऊ घल्जी शमौन गा कोणटे यहूदा इस्करियोती गा मनेन येंडाके डा, कि डीचके उठाएच।

³ यीशु इनी मालूम डा, कि बाटे परमेश्वर नी सेबाईका दियागा टी गेन जीके होय। एठा येटेन कि देटेन परमेश्वर गा मेराटे हेन होय एठा परमेश्वर गा मेरान चेल्के होय।

⁴ आटा जोमटे बिटजे हेजा कुर्ता आगुरुके एठा दुपट्टा साटे हेजा मयांग गेन टोल्के।

यीशु गा चेलाकू गा नंगा अबुंज

⁵ मेटे चेलाकू गा नंगा अबुंज घल्जी बर्तन गेन डा भेट्टी टे एठा भाग्य गा रोंगो मयांग गें दुपट्टा टोलटे दिकुगा नंगा अबुंज टे ओजो लज्जे।

⁶ जब देटेन शमौन पतरस गा मेरान हेन मेटे डीचनी यीशु टे मंडीके, “हे प्रभु, चोच आम इंजा नंगा आबुंजबा होय?”

⁷ यीशु नी डीचके जवाब जीके, “जो इंज दडावा मेना, आमेन येनेगा मतलब आए बान समझातिंजू, पेनो येनेगा बादोन समझातिंजुवा।”

⁸ पतरस नी दियाटे मंडीके, “आम इंजा नंगा चोलाका बान अबुंज।” इनी आजुमटे यीशु नी दियाटे मंडीके, “अगर इंज आमके बान अबुंजकी, मेटे आपे इंजा चेला बाऊ होय।”

⁹ शमौन पतरस नी दियाटे मंडीके, “हे प्रभु, मेटे इंजा नंगा भी बाने बनकी टी एठा कापार भी अबुंजकी।”

¹⁰ यीशु नी डीचके मंडीके, “जो अगुंच्के होय, डीचके हेजा नंगा गा अलावा एठा चोच्का अबुंज गा जरुरी बाऊ होय, दियागा सेबाई कोम्बोर सापा होय। सिर्फ म्याखोम आराटे आपे सेबाई चोखरा होय।”

¹¹ देटेन नी हेजा उठामिठाच के हाडाई डा इनिघल्जी डीचनी मंडीके, सिर्फ म्याखोम आराटे आपे सेबाई चोखरा होय।

नंगा अबुंज गा अर्थ

¹² जब यीशु दिकुगा नंगा अबुंज्के मेटे हेजा गा कुर्ता उरीटे सुबांजे डाबोलटे दिकुटे मंडी लज्जे, “चोच आपेन समझातिंजे कि इंज्नी आपे सेंग्गोन चोच डाके?

¹³ आपे इंज्के गुरु एठा प्रभु मेंबा होय, जो आपे मेंबा होय, डी साही होय, चोयाकी इंज आपेगा गुरु एठा प्रभु मेना।

¹⁴ अगर इंज्नी प्रभु एठा गुरु भी माका आपेगा नंगा अबुंज्के, मेटे आपेन भी आपे खुदके नम्र आरुटे इनिज दियागा नंगा अबुंज होना।

¹⁵ चोयाकी इंज्नी आपेके नमूना टिपीके होय, कि जैसा इंज्नी आपेगा सेंग्गोन डाके होय, आपे भी डेनेगोका डाए लक्कू।

¹⁶ इंज आपेटे सच्चो-सच्चो मंडीवा मेना, भाग्य हेजा स्वामी टे खाट बाऊ। एठा न कुल्केमिठाच हेजा कुकूल मिठाच टे खाट होय।

¹⁷ नका जबकी आपे इनी बातो के हाडाई होय, मेटे डीके डाए, ताकी आपे धन्य आरुयु।

¹⁸ इंज आपे सेबाईकु बारेन बान मंडी: दिकुके इंज्नी कलाम्जेकु होय, दिकुके इंज हाडाई मेना। पेनो येनेगो इनिघल्जी डाऊ लक्के होय, ताकी पवित्र ग्रंथ गेन जो ओल्के होय, देटेन पुरायुवा होय। ‘जो इंजा सेंग्गोन सोकळा जोवे होय, डीचनी इंज्के धोका जिले होय।’

¹⁹ नका इंज इनी सेबाई डाऊटे पेला इंज आपेके घालेवा मेना, ताकी जब इनी डाएन मेटे आपे विश्वास डाए कि ‘इंज डीचका मेना।’”

²⁰ इंज आपेटे सच्चो-सच्चो मंडीवा मेना, जो इंजागा कुलकेमिंकूके मनेन कुवा होय, देटेन इंज्के मनेन कोम्बा एठा जो इंज्के मनेन कोम्बा होय, देटेन इंजा कुकूल मिठाच के मनेन कोम्बा होय।

धोका जिऊ गा कोनेन इसरा

²¹ इनी बातो मंडी गा बादोन यीशु गा आत्मा देटेन भेबाव परेशान जे एठा हेजा चेलाकूके घाल्के, “इंज आपेटे सच्चो-सच्चो मंडीवा मेना, कि आपे तलाटे म्याखोम इंज्के उठाकोम्बा।”

²² चेलाकू इनी शक दाटेका, कि देटेन जेगा बारेन मंडीवा होय, इनिज डीनिज के दोडो लज्जे।

²³ दियागा चेलाकू तलाटे म्याखोम दियाटे यीशु प्यार दोडो डा, यीशु गा बाजुन सुबांके डा।

²⁴ मेटे शमौन पतरस नी दियागा कोनेन मेट टे इशारा डाटे कोम्बाराके, “घालेनी मेटे देटेन जेगा बारेन मंडी लक्के होय?”

²⁵ मेटे डीचनी मेरान ओलेडो कोम्बराके, “हे प्रभु, देटेन जे होय?” यीशु नी जवाब जीके, “डीचके इंज चिटनीन सोकळा गा तुकळा नामुजटे जेबा डीचका होय।”

²⁶ डीचनी सोकळा तुकळा के नामुजटे शमौन गा कोंटे यहूदा इस्करियोती जीके।

²⁷ जैसा यहूदा नी सोकळा गा तुकळा जोवे, यीशु नी दियाटे मंडीके, “आम जो दडा चेल्के होय, डीके तुरुटो डाए।” एठा डाबोलटे शैतान दिया तलान मोएन।

²⁸ टेबाल गेन सुबानमिंकू दूसराकु तलाटे जेका बान हाडाई डा कि यीशु नी दियाटे येनोगो चोया मंडीके।

²⁹ यहूदा इस्करियोती गा मेरान झोरा थंदळ डा, इनिघल्जी जेका-जेकानी समझातिंज्के, कि यीशु दियाटे मंडीवा होय, जो चोचकाभी आबुन तिवार गा घल्जी होना डीके मोलाटे सेगे या येटेन कि गिरबोकूके अदा जे।

³⁰ सोकळा तुकळा जोम गा बादोन यहूदा इस्करियोती तुरुटो बल्लान ओले, मेटे रातो टेमो डा।

म्या उनाई हुकूम

³¹ जब देटेन बल्लान ओले मेटे यीशु नी मंडीके, “नका कोरो गा कोण गा महिमा डाएन होय एठा दियागा द्वारा परमेश्वर गा महिमा डाएन।

³² अगर दियागा द्वारा परमेश्वर गा महिमा डाएन, मेटे परमेश्वर हेजा कोणटे गा महिमा डाएवा एठा तुरुटो डाएवा।

³³ हे प्रियो, इंज एठा थोळा टेमो आपेगा सेंग्गोन मेना। डाबोलटे इंज्के घटाकोम्बा एठा जैसा इंज्नी यहूदी कुरकू टे मंडीके, ‘तोटेन इंज सेनेवा मेना देटेन आपे बान हेजु,’ डेनेगोका इंज नका आपेटे भी मंडीवा मेना।

³⁴ इंज आपेके म्या उनाई हुकूम जेबा मेना, कि इनिज दियाटे प्यार डोए डीका रोंगो टे जैसा इंज आपेटे प्यार दडावा मेना, डेनेगोका आपे भी इनिज दियाटे प्यार डोए।

³⁵ अगर आपे इनिज दियाटे प्यार दडावा, मेटे हार जेकाभी चिनाएवा कि आपे इंजा चेलाकू होय।”

यीशु द्वारा पतरस गा बान मेन गा भविष्यवाणी

³⁶ शमौन पतरस नी दियाटे कोम्बाराके, “हे प्रभु, आम तुंगान सेनेवा होय?” यीशु नी जवाब जीके, “तोटेन इंज सेनेवा मेना, देटेन आम नका इंजा टाऊटे बान हेजु, पेनो येनेगा बादोन इंजा टाऊटे हेजेवा।”

³⁷ पतरस नी दियाटे मंडीके, “हे प्रभु, आए इंज अमा टाऊटे चोया बान हेजे? इंज अमा घल्जी गुजू घल्जी भी तैयार मेना।”

³⁸ यीशु नी जवाब जीके, “चोच आम इंजा घल्जी गुजूवा? इंज अमाटे सच्चो-सच्चो मंडीवा मेना, कोम्बा राँ टे पेला आम आफाई बार मंडेबा कि आम इंज्के बान हाडाई।”