ಯಾಕೊಬ್ 3 - गवली उनाई नियम

लांज म्या सिगेल

¹ हे इंज विश्वासी डाईचो, आपे कुरकू तलाटे घोनेच गुरूजी बाकी आरु, चोयाकी आपे हाडाई होय, कि आले गुरूजीकु गा एठाभी कळाक्को टे न्याय डाएवा।

² आले सेबाईकु घोनेच बार गलती डाएवा होय, पेनो अगर तुनिका कोरो जो मंडेबा होय डेनेन गेन चोलाकाभी गलती बान दडा, डीका मेटे सही कोरो सेबाई रुपोटे हेजा गा स्वाभव लिंजेन काबुएवा होय।

³ जब आले घुळगीकु गा चाबून दिकुके काबून सा गा घल्जी लाघम येंडाएवा होय, मेटे आले दिकुगा सेबाई कोम्बोरके भी काबुएवा होय।

⁴ डोगे, खाट डोंगा भी, डी चोटोकाभी खाट डायु, एठा तेज हवा टे भला भी टू लक्के टासो, तोभी म्या सानी पटली गा द्वारा डोंगा चाचुलू मिठाच गा इच्छा गा रोंगो इखाडेवा होय।

⁵ डेनोगोका लांज भी म्या सानीचा सिंगेल होय, फिरभी डी खापेट-खापेट बातो मंडीवा होय। तुनी रोंगो टे, थोळासा सिंगेल गा फुल्गी टे चोटो खाट डोंगोरेन सिंगेल घौवा होय।

⁶ लांज भी म्या सिंगेल गा रोंगो होय। जो कोम्बोर गा हिस्सा होय डेन बुराई टे व्यवहार भेट्टिके होय जो आमगा पूरा कोम्बोर एठा पूरा जीवन के बर्बाद डाए सकतावा होय, इनी डी सिगेंल जो नरक टे हेजेवा होय।

⁷ हरेक रोंगो गा डोंगोर गा जानवरकु, भूरिकु, एठा गोसोरमिंकू जंतुकू एठा समुद्र गा जिऊ जंतुकू जो कुरकू जाटो गा काबू गेन हेजेवा होय, एठा हेन भी होय।

⁸ पेनो लांज के कुरकू तलाटे जेका काबू गेन बान सेगे। डी म्या येनोगो भला होय जो चोलाकाभी रुकातिंजू बाने। डी बिंज गा जेहर गा रोंगो भेबाव हानिकारक होय।

⁹ लांज टे आले प्रभु एठा परमेश्वर बाटे गा स्तुति दडावा होय, एठा जो परमेश्वर गा रुपो गेन आरुके होय डीच कुरकू के सरापो भी जिऊवा होय।

¹⁰ म्याका चाभु टे स्तुति एठा सरापो बाएरा भी ओठ्बा होय। हे इंजा विश्वासी डाईचो, येनेगो बाकी डाऊ होना।

¹¹ डा आडी गा म्याका चाबुटे सिंबिल एठा खारा डा बाएरा भी बान ओट होय।

¹² हे इंजा विश्वासी डाईचो, अंजीर गा सिंज गेन जैतून बान जौऊ, एठा न मेटे अंगूर गा ईलीन अंजीर बान जौऊवा होय। डेनोगोका खारा डा आडीटे सिंबिल डा बान ओट होय।

सच्चो विवेक

¹³ आपे कुरकू गेन जो ज्ञानमिठाच एठा समझादार मेन गा दावा दडावा होय। दिकु इकुगा स्वाभव गा द्वारा, इकुगा नम्र यानेकी दिमागदार व्यवहार द्वारा इनी बातो गा साबुत जे।

¹⁴ पेनो अगर आपे आपना मन गेन घोनेच जुलू एठा घमंड दोडोवा होय, मेटे खापेट मंडी बाकी एठा नका सच्चो गा खिलाफबेन लाबाळ मंडी।

¹⁵ इनी ज्ञान डी बाऊ, जो स्वर्ग टे आगुरुवा होय, पेनो दुनिया गा, एठा कोम्बोर गा, एठा भूतो गा कोनेटे होय।

¹⁶ इनिघल्जी कि येटेन जुलू एठा घमंड डाऊवा होय, देटेन झगडा एठा हरेक रोंगो गा बुरा कामय भी डाऊवा होय।

¹⁷ पेनो जो ज्ञान स्वर्ग टे हेजेवा होय, डीच पेला मेटे चोखरा थंदळवा होय, डाबोलटे मिलनसार, नेरोम एठा नम्र स्वाभव एठा दया एठा अच्छा कामय टे भेट्टिके मिनी, पक्षपात एठा कपट दियेन बान थंदळ होय।

¹⁸ इनिघल्जी जो बेबाल्ला मिठाच होय, दिकु शांती गा बीजो बिबीटवा एठा धार्मिकता गा आनाजो हिरेवा।