ಯಾಕೊಬ್ 1 - गवली उनाई नियम

शुभकामनानौर

¹ इंज याकूब, परमेश्वर एठा प्रभु यीशु मसीह गा भाग्य, इनी पत्र डी यहूदी मसीही कुरकू गा बारह कोंकूके जो दुनिया भोरेन इंगान-हुगन के होय, दिकुके ओल लक्के मेना, एठा दिकुके इंजा नमस्कार।

अंदजोनौर गा महत्व

² हे इंजा विश्वासी डाईचो, जब आपे लिंजेन हरेक रोंगो गा कष्टनौर हेजेवा, मेटे इनिके खाट खुशी गा बातो समझतिंजे,

³ चोयाकी आपे हाडाई का होय, कि जब आपेगा विश्वास गा कष्टनौर डाऊवा होय, मेटे मुसीबतनौर के सहेसेन दडा गा द्वारा आपेगा आराम्बो ओटबा होय।

⁴ आपेन आपेगा अंदजोनौर गेन आराम्बो जरुरी होय, कि आम आत्मिक रुपोटे एठाभी पक्कायु होना, एठा ताकी आपेगा अच्छा स्वाभव गेन तुनिकाभी बातो गा कमी बाकी डायु।

⁵ पेनो अगर आपे तालाटे जेकान का बुद्धि गा कमी होय, मेटे परमेश्वर टे आसे, जो बिना कल्ला गा जे सेबाई खुल्ला दिल टे जेबा होय, एठा डीचके डी जेबा।

⁶ जब आपे आसे, मेटे बिना शक धोटे विश्वास टे आसे एठा चोच्का शक बाकी दोडो। चोयाकी शक मिठाच समुद्र गा लापा गा रेंगो होलेंज मिनी होय, जो कोयो टे टूवा एठा टूलेवा होय।

^7-8 अगर आपे डी रोंगोंटे गा कोरो होय, मेटे आपे आपेगा मन बान आरु सकतावा एठा आपे पक्का रुपोटे भरोसा बान दडा साकतावा। इनिघल्जी परमेश्वर टे इनी उम्मीद बाकी दडा कि डीच आपेके चोच्का जेबा।

डामा कोरो एठा गिरबो

⁹ जो विश्वासी गिरबो होय दिकुके खुशिऊ होना चोयाकी परमेश्वर दिकुके ऊँचा पद जेबा।

¹⁰ जो विश्वासी लकपति होय दिकुके खुशिऊ होना कि परमेश्वर नी दिकुके नम्र हारुकेकू होय। चोयाकी डी डोंगार गा फुल गा रोंगो मिटतिंजूवा।

¹¹ सूर्या हेजा काळाक्को गर्मी गा सेंग्गोन वोट्बा होय एठा रोपोनौर के जुलेबा होय, एठा रोपोनौर गा फुल बोचोवा होय, एठा डेगा सोबा नाशोऊवा होय। डीका रोंगो लकपति हेजा कामयनौर गा सेंग्गोन स्यागुवा।

परमेश्वर अंदजो बान सा

¹² धन्य होय डी कोरो, जो अंदजो गेन पक्का थंदळवा होय। चोयाकी डीच इनी रोंगो गा अंदजो पासो टे हमेशा गा जीवन गा ईनाम हासिलेवा, डेगा वादा परमेश्वर नी डी कुरकू टे डाके होय, जो परमेश्वर टे प्यार दडावा होय।

¹³ जब जेका गा अंदजो डाऊवा, मेटे डीच इनी बाकी मंडी, कि इंजा अंदजो परमेश्वर गा कोनेटे डाऊवा होय। चोयाकी परमेश्वर जेका गा अंदजो न मेटे बुरा बातो टे एठा न आम दडावा होय।

¹⁴ लेकिन कुरकू इकुका बुरा इच्छानौर गा वाजाटे गलत कामय दडावा होय, एठा खुद अंदजो गेन बोचोवा होय।

¹⁵ डाबोलटे जो बुरा कामय दडा गा इच्छा दडावा होय, डेगा वाजाटे दिकु पापो डाटे सुबान्बा होय, एठा जो कोरोकु पापो दडा लक्कूवा होय, डेगा नतीजा दिकुगा घल्जी हमेशा गुजू डाऊवा होय।

¹⁶ हे इंजा विश्वासी डाईचो, धोका बाकी जोम।

¹⁷ चोयाकी हर म्या अच्छा वरदान एठा हर म्या घोनेच अच्छा दान स्वर्ग टेका होय, एठा उजालानौर के आरुमिठाच परमेश्वर बाटे गा कोनेटे घाटौवा होय, चोयाकी परमेश्वर हमेशा म्या रोंगो होय एठा देटेन साहली गा रेंगो बान बदलाऊ होय।

¹⁸ डीचनी हेजाका इच्छाटे आलेके सच्चो गा वचन गा द्वारा हेजा गा कोंकु हारुकेमी होय। ताकी आले दियागा हारुके मिनी सेबाई जानवरकु गा तालान पेला फल गा रोंगोंटे महत्वपूर्ण ठहरातिंजे।

एठा डे लिंजेन सेंद्रा

¹⁹ हे इंजा विश्वासी डाईचो, इनी बातो आपे चिनाया, हर कोरो ध्यान टे आजोम होना एठा मंडीन आराम्बो दोडो होना एठा खीजो गेन कामती होना।

²⁰ जब म्या कोरो गा खिजोऊवा होय, डीच अच्छा कामय बान दडावा, जो कामय परमेश्वर चाहतावा होय कि डीच डाए।

²¹ इनिघल्जी आपे कुरकू सेबाई बुराई एठा सेबाई बुराई टे व्यवहार आदतनौर के लेंक्कीनटे, डी परमेश्वर गा वचन के नम्र टे मनेन केच, जो दिल गेन बिटके मेना होय एठा जो आपेगा उध्दार डाए सकतावा होय।

²² सिर्फ परमेश्वर गा वचन मिंकू का बाकी आरु, जो आपना खुदके धोका जेबा होय, पेनो डेगा पालन दडामिंकू आरोए।

²³ चोयाकी जो जेकाभी परमेश्वर गा वचन गा आजोम मिठाच होय, एठा डे रोंगो जीवन बिबातातिंज मिठाच बाकी होना, मेटे डीच डी कोरो गा रोंगो होय, जो आपना बस सोबा म्वार के आएना गेन दोडोवा होय।

²⁴ इनिघल्जी कि डीच हेज खुदके धोटे सेनेवा, एठा तुरुटो रिनरींजुवा होय कि डीच टोनोगो डा,

²⁵ पेनो डी कोरो जो परमेश्वर गा डी सच्चो नियम गा जो कुरकू के आझाद कुवा होय, डेगा ध्यान टे पपाळातिंज्बा होय, एठा डी जो डीचनी आजुम्के होय बान भुल्लाऊ, पेनो दियागा शिक्षा गा पालन दडावा होय, एठा येनेगो दडा गा वोजीटे परमेश्वर डीचके आशीर्वाद जेबा।

भक्ति गा सच्चो कोरा

²⁶ अगर जेका हेज खुदके परमेश्वर गा भक्त समझातिंजेवा होय, लेकिन हेजा गा लांज के काबून बान दोडो, मेटे डीच खुदके धोका जेबा होय एठा दियागा भक्ति वोयाका होय।

²⁷ आलेगा परमेश्वर बाटे गा मेरान चोखरा एठा निर्मल भक्ति इनी होय, कि अनाथकु एठा विधवाकु गा मुसीबातनौरेन दिकुगा ध्यान डोएबा, एठा खुदके दुनिया गेन डाऊ मिनी बुरा व्यवहार टे खुद लिंजेन बाकी हेजडाए।