ಇಬ್ರಿಯ 9 - गवली उनाई नियम

आत्मिक एठा दुनिया आराधना जगा

¹ परमेश्वर नी मूसा गा द्वारा इस्राएलकु के जीकेमिनी पेला करार गेन आराधना दडा गा अदा नियम डा कि दिकु टोनोगो आराधना डाए, एठा दिकुगा मेरान आराधना दडा गा घल्जी म्या जगा डा, जो कोरोकु द्वारा आरुके मेना डा।

² म्या डेरा टेगेंनेवा, डेन बरी खुली डा। डेरा गा पेला खुलीन दिवा, आटाजोम गा टेबाल, एठा डी आटाजोम गा टेबाल लिंजेन परमेश्वर के पेळेचके मिनी सोकळानौर डा, एठा डी खुली चोखरा जगह मेंटो मंडेबा होय।

³ एठा दूसरा पर्दा गा टाऊ गा भागो परम चोखरा जगा मंडीवा डा।

⁴ देटेन धुपो जुजूल गा घल्जी धुपोदान गा वेदी डा एठा उफुन भी कोनेन सोना टे लेपोके परमेश्वर गा द्वारा जीकेमिनी पेला करार गा पिटी डा। इनी पिटी गा तालान आफाई चीजो डा, सेबाई टे पेला सोना गा कुप्पी डा डेनेन कास आटा डा, डीके “मन्ना” मंडे डा। एठा हारून गा छळी भी डा डेनेन ताजा पालानौर हेन डा, एठा घोटा गा ओल्के मिनी डा, डे लिंजेन परमेश्वर गा गेल हुकूमनौर ओल्के मेना डा जो डीचनी मूसा के जीके डा।

⁵ सोना गा पिटी गा मठान, बरी काफा मिनी उजाला टे भेट्टिके करुब मिनी चित्रनौर डा। जो इनी बातो गा इशारा जेबा होय कि परमेश्वर गा थंदळ देटे जगान होय, दिकुगा खुल्लाके मिनी कफा पिटी गा मठा गा हिसा उगुरे डा, डीके पास्ताव गा जगा मंडेबा मेना होय। एनेगा का म्या-म्या डाटे घागल दडा गा आए भी मौका बाऊ होय।

दुनिया सेवा गा धुरा

⁶ इनिका तरीका टे डेरा गेन हर म्या चीजो आपना जगा लिंजेन डोके डा। मेटे यहूदी याजककु हर दिन डेरा गा सम्मा मिनी खुलीन हेजे डा एठा इकुगा विधीनौर के पुराए डा।

⁷ पेनो दूसरा खुली परम चोखरा जगान बस खाटयाजक साल गेन म्याका बार, डेरा गा पेला भागोन डी जनवार गा पचना साटे सेने डा, डीके डीच हेजा कुरकू गा पापो गा घल्जी पास्ताव गा रुपोन पेळेचके जो दिकुनी अंजान गेन डाके डा।

⁸ इनी विधीनौर गा द्वारा पवित्र आत्मा आलेके इनी इथू चाहतावा होय, कि जब टाएन डेरा गा दूसरा खुली भागो टेंगेनके होय जो कि महा चोखरा जगा होय, मेटे टाएन परमेश्वर गा परम चोखरा जगा का, कोरा खुल्लाके बाऊ होय।

⁹ इनी डेरा आए टेमो घल्जी म्या निशानी होय कुरकू जब भेंट एठा बलिदान परमेश्वर के पेळेजे डा, डी चीजोनौर कुरकू गा दिल के पूरा रिती टे सापागे बाने डा।

¹⁰ चोयाकी इनी जुना नियम गा रिती-रिवाज बस जोजोम-कखाफ एठा चोखाराऊ गा रेंग्गो-रेंग्गो विधीनौर लिंजेन आधारित होय, जैसा चोच जोमे सकतावा होय एठा चोच नोए सकतावा होय एठा अच्छा चोखाराऊ तरीका टे कोम्बोरके चोखारा डोकी। इनी जरुरी डा, कि इनी मेटे टाएन पुरायु होना जब टाएन परमेश्वर नी कुरकू गा सेंग्गोन उनाई वादा बान दडुका।

स्वर्गीय तम्बू

¹¹ पेनो मसीह पेलाटेका येटेन टाकूमिनी अच्छा चीजो गा खाटयाजक गा रुपोन हेन मेना होय। डीचनी म्या येनोगो महान एठा पक्का तम्बून मोएन होय, जो कोरोकु गा टी टे बान आरुडुका एठा नका इनी पृथ्वी गा होय।

¹² एठा डीचनी कोणकु एठा बकराकु गा बाने, बनकी हेजा पचना साटे हमेशा गा घल्जी म्याका बार चोखरा जगान मुके एठा इनिजगा द्वारा डीचनी आलेके पापो टे हमेशा गा घल्जी आराकेमी।

¹³ याजक मेटे बकराकु एठा डोबाकु गा पचना एठा कलोर गा होप बिसोटो कुरकू लिंजेन चेरसेवा होय एठा इनी खिजाटे इनी कामय चोखराऊ गा रितो गा रेंगो दिकुके बाल्ला तौर टे चोखारा दडावा होय।

¹⁴ मेटे डाबोलटे मसीह गा पचना, डीचनी हेज खुदके बिना पापो गा आत्मा गा द्वारा निर्दोष बलिदान गा रुपोन परमेश्वर के पेळेचके, आलेगा ताला गा जान गोएन मिंकू कामयनौर टे जरुर चोखरा डाएवा ताकी आले जीटा परमेश्वर गा सेवा जरुर डाए सके।

¹⁵ इनिका वोजीटे मसीह, परमेश्वर एठा हेजा कुरकू के म्या उनाई करार गा तालाबिचो गा द्वारा मिलातिंजकेकु होय। जो कुरकू के परमेश्वर नी हाकोलेमी होय, दिकु नका दिकुगा द्वारा जीकेमिनी आशीर्वाद के हासिलेवा होय, जो हमेशा गा घल्जी डाऊवा। चोयाकी मसीह नी परमेश्वर गा द्वारा जीकेमिनी पेला करार गा थंदळ टेमो का कुरकू के पापो टे बचातिंजू गा घल्जी हेजा जान जीके।

¹⁶ आले हाडाई होय कि अगर तुनिका कोरो गोएन लिंजेन हेजा संपत्ति गा वितरण टे संबंधित हेजा गा आखरी इच्छानौर के ओल्बा होय, मेटे इनी जरुरी होय कि डीचके घोगेच होना, ताकी दियागा निर्देशनौर के पुराकी होना।

¹⁷ मेटे विरासत डीचका हासिल सकतावा जो दियागा हात टाल्लेन डोकेनेच मेना डा। चोयाकी अगर वसीयतकर्ता आए भी जीटाका होय, मेटे इनी संभव बाऊ होय कि दियागा निर्देशनौर के लागूएवाका।

¹⁸ इनिघल्जी परमेश्वर गा द्वारा जीकेमिनी पेला करार भी जानवर गा पचना आडी गा द्वारा का आसार डाएन।

¹⁹ चोयाकी जब मूसा गा नियम नी सेबाई प्रजा गा सम्मान परमेश्वर गा सेबाई नियम के पाळातिंजटे घाल्के कि सेबाई हुकूमनौर के पपाळातिंजटे घल्के डा, मेटे डीचनी मेंडा कोंटे गा पचना सावे एठा डीके डा गेन बेल्लाके, डाबोलटे डीचनी इनिके नियम गा पुस्तक एठा सेबाई कुरकू लिंजेन चेचेरसी गा घल्जी राटा सीटोम एठा रेठा जीमू सिंज गा डंगोलनौर गा इस्तामाल डाके।

²⁰ एठा डीचनी मंडीके, “इनी डी करार गा पचना होय, डीके परमेश्वर नी आपे कुरकू गा घल्जी ठहरातिंज्के होय।”

²¹ इनी तरीका टे मूसानी डेरा एठा आराधना गेन इस्तामाल सेबाई पत्रनौर लिंजेन भी डी पचना चेरसीके मेना डा।

²² मूसा गा नियम गा रोंगो, अंदजोटे हर चीजो के पचना टे चोखाराएवा होय। चोयाकी पचना आडीके बिना, परमेश्वर कुरकू के दिकुगा पापो गा घल्जी मापोकु बाने।

मसीह गा बलिदान द्वारा पापो गा मापो

²³ इनिघल्जी दुनिया डेरा एठा डेन टाकु हर चीजो के जानवरकु गा पचना टे चोखरा दडा बोचो डा। इनी स्वर्ग गा चीजो गा खिजा होय। लेकिन स्वर्ग गेन टाकु चीजो के जानवरकु गा पचना टे चोटोका जादा अच्छा बलिदान गा सेंग्गोन चोखरा डाकी होना डा।

²⁴ पृथ्वी लिंजेन परम चोखरा जगा स्वर्ग गेन सच्चो परम चोखरा जगा गा कुंजी होय। मसीह कोरोकु द्वारा आरुके मिनी परम चोखरा जगा गा तालान बान सेंडुका। लेकिन नका आलेगा कोनेटे, स्वर्गेन सेने गा बादोन डीच परमेश्वर गा सम्मान टेंगेनके डा।

²⁵ खाटयाजक के म्या जानवर गा बलिदान गा पचना साटे तम्बू गा पेला भागोन हर साल गेन म्या बार सेने बोचोवा होय। लेकिन मसीह नी येनोगो बान दडुका।

²⁶ अगर येनोगो धारे, मेटे दुनिया आरु गा टेमो साटे डीच टाऊ लगी चोटोका बार बलिदान डाऊवा। लेकिन नका जमाना गा आखिरी गा टेमोन डीच म्या बार सेबाईकु गा घल्जी हेन, ताकी खुदके बलिदान डाटे, डीच आलेगा पापो के लेंक्कीन होना।

²⁷ जो खिजा कोरोकु गा घल्जी म्याका बार गुजू एठा येनेगा बादोन दिकुगा न्याय डाऊ ठहरातिंज्के मेना होय।

²⁸ डीका खिजा मसीह घोनेचकु गा पापो सा गा घल्जी म्याका बार बलिदान डाएन। पेनो दूसरा बार ओटबा पापो गा वोजीटे बाने, बनकी डी कुरकू के उध्दार जिऊ गा घल्जी, जो दियागा राह दडावा होय।