ಇಬ್ರಿಯ 7 - गवली उनाई नियम

मेलिकिसिदक याजक

^1-3 इनी मेलिकिसिदक शालेम शहर गा राजा एठा सर्वोच्चा परमेश्वर गा याजक डा। दियागा जीमू गा मतलब होय, “धार्मिकता गा राजा” एठा चोयाकी डीच शालेम गा राजा डा, मेटे दियागा जीमू गा इनी भी मतलब होय, “शांती गा राजा”। पवित्र ग्रंथ गेन दियागा बाटे, आंटे, दियागा जुना सनाकु या दियागा जनम या गुजू गा बारेन चोच्काभी बान ओलडुका मेना होय। डीच हमेशा गा घल्जी म्या याजक होय। इनिघल्जी डीच परमेश्वर गा कोण गा खिजा होय। जब अब्राहम नी म्या लड़ाई गेन उफुन राजाकु के घोच्टे हिरा लक्के डा, मेटे मेलिकिसिदक दियाटे मिलातिंजे एठा परमेश्वर टे अब्राहम के आशीर्वाद जिऊ गा घल्जी मंडीके। अब्राहम के डी युध्द गेन जीत हासिल गा बादोन जो चोच्काभी घाटाएन डा, डीचनी डी सेबाई चीजो गा गेलजा हिसा दान जीके।

⁴ नका आपे इनी बातो लिंजेन बिचार डाए कि मेलिकिसिदक चोटो महान होय! डीचके आलेगा खान्दान गा याजक अब्राहम नी लड़ाई गेन हासिलके मिनी चीजोनौर गा सेबाई टे अच्छा गेलजा हिसा दान के भेट जीके।

⁵ मूसा गा नियम लेवी गा खान्दान के इथूवा होय, जो याजक आरुवा होय, कि दिकुके इस्राएल गा अलग्गो कुरकू, मतलब दिकुगा इकुगा कुरकू गा मेरान जो होय, डे तालाटे गेलजा हिसा दान सा होना। एठा डी याजक एठा डाईचो गा खिजा होय, चोयाकी दिकु सेबाईकु अब्राहम गा खान्दान होय।

⁶ पेनो इनी कोरो, मेलिकिसिदक जो लेवी गा खान्दान भी बाऊ डा डीचनी अब्राहम टे गेलजा हिसा दान सावे। हालाकी अब्राहम के परमेश्वर गा कोनेटे करार घाटाके डा, एठा मेलिकिसिदक नी डीचके आशीर्वाद जीके।

⁷ आले पक्का रुपोटे हाडाई होय, कि जो आशीर्वाद जेबा होय, डीच आशीर्वाद घाटाऊ मिठाच टे खाट डाऊवा होय।

⁸ एठा लेवी गा खान्दान गा याजक जो गेलजा हिसा दान सावे डा, डीच डीचका डा जो म्या दिन घोयुवा। पेनो इनी याजक मेलिकिसिदक डीचनी अब्राहम टे दान सावे डा, दियागा बारेन पवित्र ग्रंथ गेन गवाही जीके मेना होय, कि आए भी जीटाका होय।

⁹ मेटे आले इनी भी मंडी सकतावा होय, लेवी जो कुरकू टे गेलजा हिसा दान सा डा, डीच अब्राहम गा खान्दान डा। इनिघल्जी जब अब्राहम मेलिकिसिदक टे मिलातिंजके एठा डीचके गेलजा हिसा दान जीके, मेटे लेवी नी भी अब्राहम गा द्वारा गेलजा हिसा दान जीके।

¹⁰ चोयाकी जो टेमो अब्राहम नी मेलिकिसिदक के भेट जीके, मेटे लेवी गा जनम बान दडुका बनकी आपना जुना सना अब्राहम गा कोम्बोर गेन डा।

म्या उनाई याजक गा जारूरी

¹¹ कुरकू के डी याजककु गा आधार लिंजेन मूसा गा नियम जीके मेना, जो लेवी खान्दान गा हारून टे हेन डा, पेनो दिकुके डी समूह गा द्वारा पक्का बान आरुडुका। इनिघल्जी म्या एठा याजक गा हेजे गा जरुरत डा, म्या येनोगो याजक गा खिजा बाने बनकी मेलिकिसिदक गा खिजा होय।

¹² चोयाकी जब याजक गा पद बदलाऊवा होय, मेटे मूसा गा नियम गा भी बादलाऊ जरुरी होय।

¹³ आले इनी बातो मसीह गा बारेन मंडी लक्के होय, जो म्या अलग्गो पीढी टे डा। डी पीढी टे चोलाकाभी भी जेकानी म्या याजक गा रुपोन वेदी लिंजेन सेवा बान दडुका डा।

¹⁴ सेबाईकु हाडाई होय कि आलेगा प्रभु यीशु यहूदा गा पीढी होय। एठा मूसानी यहूदा गा तुनिकाभी पीढी गा याजक आरु गा बारेन चोच्का बान घालडुका।

¹⁵ इनिघल्जी इनी येठाभी सपा होय, कि मूसा गा नियम एठा याजककु के बदलातिंज्केकु मेना होय, चोयाकी आलेगा खाटयाजक जो आए हेन होय, डीच मेलिकिसिदक गा रोंगो याजक होय।

¹⁶ यीशु तुनिका कास कोरो मतलब लेवी गा पीढी आरुवा एठा मूसा गा नियमनौर एठा विधीनौर गा वोजीटे याजक बान आरुडुका। पेनो डीच चोलाकाभी बान स्यागु मिनी जीवन गा शक्तीगा वोजीटे याजक आरोएन जो चोलाकाभी स्यागु बाने।

¹⁷ चोयाकी दियागा बारेन परमेश्वर पवित्र ग्रंथ गेन गवाही जिऊवा होय, “आम मेलिकिसिदक गा रोंगो हमेशा गा याजक होय।”

¹⁸ इनी खिजा जुना हुकूम बिना शक्ती एठा बिनासफल थंदळ गा वोजीटे जुना हुकूम रद्दके होय।

¹⁹ चोयाकी मूसा गा नियम चोच्काभी पूर्णता टाएन बान आदिरडुका। आलेके एनेटे महान आसा जिले मेना होय एठा येनेगा आसरा टे आले परमेश्वर गा मेरान आदिरु सकतावा होय।

उनाई खाटयाजक गा बळाई

²⁰ जब परमेश्वर नी यीशु के याजक गा रुपोन कलाम्जेनेच, मेटे डीचनी म्या उनाई करार डाके।

²¹ चोयाकी लेवी गा पीढी मेटे बिना कसोम यहूदी याजक ठहरातिंजे पेनो यीशु कसोम गा सेंग्गोन परमेश्वर गा कोनेटे कलामकेनेच मेना दिकुगा बारेन पवित्र ग्रंथ गेन इनी ओल्के मेना होय, “प्रभु नी इनी कसोम जोवे, आम हमेशा गा घल्जी याजक थंदळवा एठा डीच दियाटे डाबोलटे बान पास्ताव।।”

²² इनिघल्जी यीशु डीच होय, जो म्या अच्छा वादा गा पूरा डाऊ गा वाजा आरुवा होय।

²³ एनेगा बेदला पेला गा यहूदी याजककु खाट संख्यान कलामुका लक्के होय, चोयाकी गुजू गा वोजीटे एठाभी टेमो टाएन पादरी पद लिंजेन आरुका थंदळ दिकुगा घल्जी संभव बाऊ डा।

²⁴ पेनो यीशु हमेशा थंदळवा होय, इनी वोजीटे दियागा याजक गा पद हमेशा थंदळवा।

²⁵ इनिका वाजा होय, कि जो कुरकू यीशु गा द्वारा परमेश्वर गा नंगा सुबा सब्बा होय, डीच दिकुके पूर्णता टे बचातिंजू गेन शक्ती होय, चोयाकी डीच दिकुगा कोनेन निवेदान दडा गा घल्जी हमेशा जीटाका होय।

²⁶ यीशु डी खिजा गा खाटयाजक होय, दियागा आलेन जरुरत होय। डीच चोखरा होय, बिना पापो होय, चोखरा होय, पापीकु टे काबू बाने एठा स्वर्ग टे भी मठान डीचके टूलजेनेच होंगा।

²⁷ डी खाटयाजक जो हारून गा पीढी टे डा पेला इकुगा पापो एठा बादोन प्रजा गा पापो गा घल्जी हरेक दिन बलिदान पेळेजे चाले डा। यीशु के येनेगा जरुरत बान डाऊ, चोयाकी डीचनी इनी कामय हमेशा गा घल्जी म्याका बारेन पूरा डाके, जब डीचनी खुदके बलि पेळेच्के।

²⁸ चोयाकी मूसा गा नियम मेटे ताखत बाऊ कोरोकु के खाटयाजक कलामकुबा होय, पेनो डी उनाई करार जो मूसा गा नियम गा बादोन हेन, डीचनी परमेश्वर गा कोंटे के खाटयाजक गा रुपोन कलामकेनेच। येटोका बाने, बनकी डीच हमेशा गा घल्जी म्या पक्का खाटयाजक आरोएन।