ಇಬ್ರಿಯ 5 - गवली उनाई नियम

खाटयाजक गा घल्जी लायको

¹ परमेश्वर हर म्या खाटयाजक के इस्राएल गा कुरकू तालाटे ककालाम्बा होय, एठा डी कोरोकु गा भलाई गा घल्जी परमेश्वर गा सेवा दडा गा घल्जी कलामकुबा होय। डीच इनिघल्जी भार एठा बलिदान पेपेळेच्बा होय, ताकी परमेश्वर कुरकू गा पापो के मापोएबा।

² न समज एठा भटकातिंजू मिंकू कुरकू टे डीच कोमलता टे व्यवहार डाए सकतावा होय, चोयाकी डीच खुद भी कमजोरनौर गा हात टाल्लेन होय,।

³ दियागा घल्जी इनी जरुरी होय, कि डीच बस कुरकू गा पापो गा प्रायश्चित दडा घल्जी बलिदान बान पेळेचडुका, बनकी आपना पापो के लेंक्कीन गा घल्जी भी बलिदान पेळेजे।

⁴ तुनिका कोरो खुद खाटयाजक बान आरु सकता। हरेक खाटयाजक हारून गा खिजा परमेश्वर द्वारा हकोएच्बा होय।

हमेशा गा घल्जी खाटयाजक

⁵ डीका खिजाटे, मसीह नी खुदके खाटयाजक आरु गा सम्मान बान साडुका। बनकी, परमेश्वर नी मसीह टे इनी मंडी लठ्ठाका डीचके कलामकेनेच एठा सम्मान जीके, जो कि पवित्र ग्रंथ गेन भजनसंहित ओलमिठाच नी ओल्के होय, “आम इंजा कोण होय, इंज घोषण दडावा मेना कि टाइंज इंज्नी आमगा बाटे आरोएन मेना।”

⁶ इनी पवित्र ग्रंथ गेन परमेश्वर नी म्या एठा जगा लिंजेन डाबोलटे मंडीके होय, “आम मेलिकिसिदक गा रिती लिंजेन, हमेशा म्या याजक आरुका थंदळवा।”

⁷ मसीह नी इनी पृथ्वी लिंजेन थंदळ टेमो हाको-हाकोटे एठा मेट डा आडी-आडीटे परमेश्वर टे प्रार्थना एठा बिनती डाके, जो डीचके गुजूटे बचातिंजेच डा एठा भक्तिपूर्ण जीके गा वाजा दियागा प्रार्थना आजुम्जे मेना।

⁸ यीशु नी परमेश्वर गा कोंटे मेना भी फिरभी, कासु सेहेन टे परमेश्वर गा हुकूम गा पालन दडा इथूके।

^9-10 डीच पूरा रुपोटे पक्का आरोएन एठा परमेश्वर नी मेलिकिसिदक गा खिजा डीचके खाटयाजक गा पद जीके, एठा डीच दिकु सेबाई कुरकू गा हमेशा गा घल्जी उध्दार गा वाजा आरोएन, जो दियागा हुकूम गा पालन दडावा होय।

आत्मिक अपरिपक्वता

¹¹ इनेगा बारेन घागल गा घल्जी घोनेच सेबाई बातो होय, पेनो दिकुगा बारेन अच्छा टे घागल मुश्किल होय। चोयाकी आपे परमेश्वर गा वचन गा बारेन इथू गेन आळसी आरोएन होय।

¹² हालाकी आपे लम्बा टेमो टे परमेश्वर गेन विश्वास दडावा होय, एठा नका आपेके आपेगा सोप्तीकुके इथूमिठाच आरु होना डा। फिरभी तुनिका दूसराके आपेके परमेश्वर गा बारेन सेबाई टे आसन बातो इथू गा जरुरत बोचो लक्के होय। येनोगो लगातिंजुवा होय जैसा आपे म्या सानी आरोएन होय, डीके आए भी दिडोम आनु गा जरुरत होय, चोयाकी डीच आटा बान चाफाट सकता।

¹³ चोयाकी जो दिडोम नुनूमिठाच डाऊवा होय, डीच सानी होय एठा धार्मिकता गा शिक्षा समझतिंजेन काबिल बाऊ होय।

¹⁴ आटा दिकुगा घल्जी होय जो विश्वास गेन परिपक्व होय, जो अनुभव गा द्वारा सही एठा गलत गा चिचना गेन लायको होय।