ಇಬ್ರಿಯ 3 - गवली उनाई नियम

मूसा विश्वास लायको भाग्य मसीह विश्वास लायको कोंटे

¹ इनिघल्जी हे विश्वासी डाईचो परमेश्वर नी आपेके स्वर्ग गेन हेजा गा सेंग्गोन बेल्लाऊ घल्जी हाकोलेमी होय। इनिघल्जी मसीह यीशु लिंजेन ध्यान जे, जो आलेगा घल्जी परमेश्वर गा अच्छा खाबोर गा संदेशो जिऊमिठाच एठा खाटयाजक होय।

² यीशु परमेश्वर गा प्रति विश्वास लायको डा। डीचनी डीचके इनी कामय दडा गा घल्जी कलाम्जेनेच डा। डीका खिजाटे, मूसानी विश्वास लायको टे डी सेबाई चोच्का डाके, जो परमेश्वर नी डीचके दडा गा घल्जी जीके डा।

³ चोयाकी जो खिजाटे उरा आरुमिठाच कोरो के उरा टेका येठाभी सम्मन घाटाऊवा होय। डीका खिजाटे यीशु मूसा गा तुल्न गेन घोनेच जादा सम्मन गा लायको होय।

⁴ चोयाकी हर म्या उरा गा तुनिका न तुनिका आरुमिठाच थंदळवा होय। पेनो जेनी सेबाई चोच्का आरुके डीच परमेश्वर होय।

⁵ मूसा मेटे परमेश्वर गा खटला गा सेबाई कुरकू गा घल्जी विश्वास लायको थंदळके। जो कामय डीचनी डाके डी सच्चोनका डी बातो गा उदाहरण होय जो परमेश्वर हेजे मिनी टेमोन डाएवा।

⁶ मसीह म्या कोंटे गा रोंगो परमेश्वर खटला गेन विश्वास लायको अधिकारी होय एठा डी खटला आले खुद होय। अगर आले हिम्मत टे गोलाऊवा होय, मेटे इनी आसा गेन घमंड दडा लठ्ठाका आखरी टाएन मजबूत टे पक्का थंदळे।

बान विश्वास गा प्रति चेतावनी

⁷ इनिघल्जी जैसा पवित्र आत्मा मंडीवा होय, “अगर आपे ‘टाइंज’ परमेश्वर गा आवाज आजुमे।

⁸ मेटे दियागा हुकूम आजुमेन इंकार बाकी दडा, जैसा आपेगा जुना सनाकु नी डाके। दिकुनी सुनसान जगान अंदजो गा टेमो परमेश्वर गा खिलाफ डाएका लक्के।”

⁹ देटेन आपेगा जुना सनाकु नी चालीसो साल टाएन इंजा महान कामयनौर के दोडो गा बादोन भी चुनौती जिऊ लठ्ठाका इंज्के चिनाकेमी डा।

¹⁰ इनी वोजीटे इंज डी टेमो गा कुरकू टे खीजो थंदळके, चोयाकी दिकुगा मन हमेशा भाटकातिंजुवा होय। एठा इंज्नी जो हुकूम जीके डा, दिकुनी डीके दडा टे बान मेंके।

¹¹ मेटे इंज्नी खिजोन हेंडो कासोम जोवे एठा मंडीके कि, “दिकु इंजा आराम्बो जगान मु बानेका।”

¹² हे इंजा विश्वासी डाईचो, चताराए थंदळे कि आपेन नी येनोगो बुरा एठा अविश्वासी मन बाकी होना। जो जीवन जिऊमिठाच परमेश्वर के बान मेने।

¹³ जब भी आपे पवित्र ग्रंथ के “टाइंज गा दिन” मंडी लठ्ठाका आजुम्बा होय, मेटे अच्छा खिजाटे जीवन बिबातातिंज गा घल्जी हर दिन इनिज-डीचके आरी-आरीजेच्का। एनोगो बाकी डाऊ, कि आपे तालाटे जेका पापो गेन फासतिंजटे जिद्दी आरुयु।

¹⁴ चोयाकी अगर आले आपना पेला विश्वास के आखरी टाएन सजाका आरुका डोएबा होय, मेटे आले मसीह गा बेल्लाऊ आरुका थंदळवा होय।

¹⁵ जैसा कि पवित्र ग्रंथ गेन ओल्के होय, अगर आपे “टाइंज” परमेश्वर गा आवाज आजुमे। मेटे दियागा हुकूम ममानतिंजटे इंकार बाकी दडा, जैसा आपेगा जुना सनाकु नी डाके। दिकुनी उजाळ जगान अंदजो गा टेमो परमेश्वर गा खिलाफ डाएका लक्के।

¹⁶ भला तुनी कुरकू नी परमेश्वर गा आवाज आजुमटे दियागा खिलाफ डाके? दिकु इस्राएल गा कुरकू होय दिकुनी मूसा अगुवाई डाटे मिस्र देशो टे बल्लान हेन डा।

¹⁷ एठा जेनी परमेश्वर के चालीसो साल टाएन खीजो डाके? दिकु इस्राएल गा कुरकू डा, दिकुनी सुनसान जगान पापो डाके एठा गोएन।

¹⁸ जब परमेश्वर नी मजबूत गा सेंग्गोन एलान डाके, कि दिकु चोलाकाभी डी ओटे गेन मु बाने देटेन इंज दिकुके आराम्बो जेबा। मेटे डीच पक्का रुपोटे डी कुरकू गा बारेन मंडी लक्के डा, दिकुनी दियागा हुकूम गा पालन बान दडुका डा।

¹⁹ इनी रोंगो आलेन मालूमजे, कि दिकुनी एने लिंजेन विश्वास बान दडुका। इनिघल्जी दिकु आराम्बो जगान मुडूका बाने।