ಇಬ್ರಿಯ 2 - गवली उनाई नियम

उध्दार गा खाबोर गा महत्व

¹ इनिघल्जी आलेन जो खाबोर घाटाएन होय, डे लिंजेन अच्छा खिजा ध्यान जिऊ होना। कही येनोगो बाकी डाऊ कि आले सच्चाई टे भटकातिंजू।

² परमेश्वर गा खाबोर, जो स्वर्गदूतकु गा द्वारा जीके मेना, हमेशा सच्चो पक्काएन, एठा डी सेबाई कुरकू नी दिकुनी एनेगा पालन बान दडुका या डेका रोंगो बान दडुका एनेगा सही-सही दण्डो घाटाएन होय।

³ मेटे आले टोनोगो बचातिंजूवा, अगर आले डी महान उध्दार गा तिरस्कार डाएवा, डेगा एलान पेला खुद प्रभु यीशु गा द्वारा डाएन डा? जो कुरकू नी प्रभु यीशु के आजुम्केनेच, दिकुनी दिकुगा खाबोर के आलेगा घल्जी साबित डाके।

⁴ एठा सेंग्गोनका परमेश्वर नी भी इनिजगा गवाही जिऊ लज्जे कि चिन्हानौर, अचम्बो कामयनौर, एठा रेंग्गो-रेंग्गो खिजा गा शक्तीगा कामयनौर, एठा पवित्र आत्मा गा वरदाननौर गा हेजा गा इच्छा गा रोंगो कखाटिंज गा द्वारा हेजा गा खाबोर के सच्चो ठहरातिंज्केनेच।

मसीह मुक्तिदाता होय

⁵ परमेश्वर नी हेजे मिनी दुनिया के, डेगा बारेन आले चर्चा दडा लक्के होय, स्वर्गदूतकु गा हात टाल्लेन बान दडुका, पेनो कोंटे गा हात टाल्लेन डाके।

⁶ पेनो पवित्र ग्रंथ गा तुनिका जगा लिंजेन इनी ओल्के होय, “कोरोकु चोच होय, कि आम दियागा ख्याल डोए? डीच कोरो गा कोण चोच होय, कि आम दियागा परवाह डाए?”

⁷ आमनी डीचके स्वर्गदूतकु टे अदा टेमो गा घल्जी कम तखदार एठा डीचके महिमा मतलब आदर गा मुकूट उरिके। एठा हेजा गा टी गा कामयनौर लिंजेन डीचके हाक जीके होय।

⁸ आमनी सेबाई चोच्का कोरो गा हात टाल्लेनकेनेच। जब परमेश्वर नी सेबाई चोच्का दियागा हात टाल्लेनके, मेटे डीचनी चोच्काभी येनोगो बान आराडुका जो कोरो गा हात टाल्लेन बाने होय। आए टेमोन आले आए टाएन इनी बान दोडो, कि सेबाई चोच्का कोरो गा हात टाल्लेन होय।

⁹ पेनो आले इनी दोडोवा होय, कि यीशु अदा टेमो गा घल्जी स्वर्गदूतकु टे कम महत्वपूर्ण डा, इनी रोंगो डीच परमेश्वर गा कृपा टे हर म्या कोरो गा घल्जी गोएन। एठा चोयाकी डीचनी गुजू गा कासु ठुल्जे, इनिघल्जी परमेश्वर नी डीचके महिमा एठा आदर गा मुकूट उरिके।

¹⁰ परमेश्वर नी इनी सेबाई चीजो के आरुके एठा सेबाई चीजो के हेजा घल्जी संभलतिंजटे डोके होय, इनी वोजीटे, कि घोनेच कुरकू के हेजा गा महिमा गेन बेल्लाके कु, परमेश्वर नी इनी निर्णय सावे, कि प्रभु यीशु कासु टूलटे निर्दोष आरुयु, चोयाकी यीशु का होय जो दिकुके उध्दार गा कोनेन साकुवा होय।

¹¹ यीशु का सेबाई कुरकू के दिकुगा पापो टे चोखारकुवा होय, इनिघल्जी जो पवित्रकुवा होय एठा जो चोखरा आरुकुवा होय सेबाईकु गा बाटे म्याखोम का होय मतलब परमेश्वर। इनिका वोजीटे डीच दिकुके डाईचो एठा बोकजाईचो मंडीटे बान सेरोम।

¹² डीच परमेश्वर टे मंडीवा होय, “जो अच्छा कामय आमनी इंजा घल्जी डाके होय, डी इंज इंजागा डाईचो के घालेवा। इंज सभा गा तालान अमा गुणगान डाएवा।”

¹³ डीच इनी भी मंडीवा होय, “इंज आम-परमेश्वर लिंजेन पूरा भरोसा डोएबा”, एठा डीच डाबोलटे मंडीवा होय, “येटेन इंज डी कुरकू गा सेंग्गोन मेना, दिकुके परमेश्वर नी इंज्के जिलेकु होय, दिकु चफनीकू खिजा होय।”

¹⁴ चोयाकी परमेश्वर गा चफनीकू कोरोकु होय, मतलब जिलु एठा पचन टे आरुके मिंकू, मेटे कोण भी म्या कोरो आरोएन, चोयाकी बस म्याका कोरो आरुटे का डीच गुजू सकता डा, एठा गुजू गा द्वारा का डीच शैतान गा शक्तीके टुक्काए सकता डा, दियागा मेरान गुजू गा शक्ती डा।

¹⁵ एठा इनी खिजाटे यीशु नी दिकु सेबाईकु के आजादकेकु जो हर टेमो गुलामकु गा खिजा थंदळ डा चोयाकी दिकु गुजूटे हिगरा डा।

¹⁶ चोयाकी प्रभु यीशु मेटे स्वर्गदूतकु के बाने बांकी अब्राहम गा पीढी गा चिंता दडावा होय।

¹⁷ इनी वोजीटे दियेन होना डा, कि सेबाई बातो गेन हेजा डाईचो गा रोंगो आरोए, इनी रिती टे डीच आलेगा दयालु एठा विश्वास लायको उचा खाटयाजक गा रुपोन परमेश्वर गा सेवा डाकी होना। एठा इनी कि कुरकू के डी बलिदान गा द्वारा दिकुगा पापो टे माफी घाटायु होना, जो डीचनी उपलब्ध डाके होय।

¹⁸ चोयाकी डीचनी मुश्किलनौर एठा अंदजोनौर गा सम्मान डाके, इनिघल्जी डीच हाडाई होय कि डी सेबाई कुरकू गा मदत टोनोगो डाए जो अंदजोनौर गा सामना दडावा होय।