ಇಬ್ರಿಯ 13 - गवली उनाई नियम

आले परमेश्वर के चोफर टे खुशोएच?

¹ डाईचो-बोकोजाईकु गा खिजा इनिज दियाटे प्यार डोए चाले।

² अजनबीकु गा खातिर धारी दडा यादो डोकी, चोयाकी इनिजगा वाजा अदा कुरकू नी अनजाने गेन आपना एनेन स्वर्गदूतकु गा खातिर धारी डाके होय।

³ कौदीकु गा येनोगो सुधी सेगेका, कि मेनकी दिकुगा सेंग्गो-सेंग्गोन आपे भी केटके होय, एठा दिकु लिंजेन अत्याचार डाए चालेवा होय, दिकुगा भी सुधी इनी समझातिंजटे सेगे चाले कि आपे दिकुगा कासुके आपेगा कोम्बोर गेन महसूसेवा होय।

⁴ ब्याह गा आदर डाए, एठा इनिज-दियागा प्रति विश्वास लायको आरुका थंदळे। चोयाकी परमेश्वर आनोवाकु, एठा राडी कुणा न्याय डाएवा।

⁵ आपे कुरकू डामा गा लालीचो बाकी दडा। जो आपेगा मेरान होय, देटे खुशो थंदळे, चोयाकी परमेश्वर नी खुद मंडीके होय, “इंज आमके चोलाकाभी बान आरा एठा आमके चोलाकाभी बान आरा।”

⁶ इनिघल्जी आले बेफिकार आरुटे मंडी सकतावा होय, “प्रभु इंजागा मदत दडावा होय, इंज बान हिगरा। कोरो इंजा चोच डाए सकतावा होय?”

⁷ जो आपेगा अगुवाकु डा, एठा दिकुनी आपेके परमेश्वर गा वचन घालके होय, डीके यादो डोए, दिकुगा स्वभाव के यादो दाटेका, कि दिकुनी इकुगा जीवन टोनोगो बितातिंज्बे, एठा इनी भी कि दिकु गुजू दम टाएन वफादार थंदळके, इनी वोजीटे आलेके दिकुगा विश्वास गा डोगा-डोगा दडा होना।

⁸ यीशु मसीह गफन एठा तैइंज एठा हमेशा-हमेशा म्याका खिजा होय। डीच चोलाका बान बदलातिंजू।

⁹ रेंग्गो-रेंग्गो रोंगो गा अलग्गो शिक्षा गा भुल्लाऊ गेन बाकी बाचो उत्तम इनी होय, कि आलेगा मन गा कृपा टे बाने, बनकी परमेश्वर गा कृपा टे बल हासिले। चोयाकी आटा गा सम्बन्धी विधीनौर गा पालन दडामिंकू के एनेटे लाभ बान दडुका।

¹⁰ लेकिन आलेगा मेरान म्या वेदी होय देटेन आराधना दडामिंकू याजककु के भी आटाजोम गा तुनिका हाक बाऊ होय।

¹¹ खाटयाजक परमेश्वर गा द्वारा जीकेमिनी पेला करार गा रोंगो डी बलि जानवरकु गा पचना पापोबलि गा घल्जी चोखरा जगा सेगेवा होय, लेकिन जानवरकु गा कोम्बोर थावळा टे बल्लान जुलेबा होय।

¹² इनी वाजा यीशु नी भी यरूशलेम शहर गा फटको गा बल्लान कासु भोगातिंजबे एठा गोएन, देटे डीच हेजा पचना गा द्वारा कुरकू के चोखरा आरुकु।

¹³ इनिघल्जी हेजे आले यहूदी नियम के आराकी एठा यीशु लिंजेन विश्वास डाए एठा दियागा सेंग्गोन बुराई सहेने।

¹⁴ चोयाकी इनी पृथ्वी लिंजेन आलेगा तुनिका स्थायी शहर बाऊ। आले मेटे हेजे मिनी टेमो गा शहर गा घगटा लक्के होय।

¹⁵ आले यीशु गा द्वारा आपना चाभु टे परमेश्वर गा स्तुति डाए लक्कू। डी बलिदान आलेगा चाभु टे ओटमिनी स्तुति होय, जो दियागा जीमू के मनेन दडावा होय।

¹⁶ आपे कुरकू इनिज-दियागा गा मदत दडा चोलाकाभी बाकी भुलाऊ चोयाकी इनी रोंगो गा बलिदाननौर टे परमेश्वर खुशोऊवा होय।

प्रार्थना गा बिनती

¹⁷ आपना अगुवा गा मनातिंजेच एठा दिकुगा हुकूमनौर गा पालन डाए, चोयाकी दिकु आपेगा आत्मा गा भालाई गा घल्जी रातो-दिन चिंता दडावा होय, एठा दिकुके इकुगा कामयनौर गा लेखा परमेश्वर के जिऊ होना, अगर आपे दियागा आजुमेबा मेटे डीच हेजा कामय खुशीटे डाए चालेवा, एठा अगर आपे बान टासो मेटे डीच इनी कामय के निराशो टे डाएवा एठा येनेटे आपेन चोच्काभी फायदा बान डाऊ।

¹⁸ आपे आलेगा घल्जी प्रार्थना डाएका चाले। आलेन विश्वास होय कि आलेगा मन सापा होय, चोयाकी आले हरेक परिस्थिति गेन सही आचरण दडा चाहतावा होय।

¹⁹ इंज कास रुपोटे इनिघल्जी आपे कुरकू टे प्रार्थना गा अनुमति दडावा मेना, कि इंज जल्दीका आपे कुरकू गा मेरान हेजु होना।

उपहार

^20-21 एठा नका, शांती गा परमेश्वर, डीचनी आलेगा प्रभु यीशु मसीह के मुर्दाकु टे जीटाकेनेच, आपेके तैयारकेमी ताकी आपे दियागा इच्छाके पुराकी। डीच आपेगा तालान मसीह यीशु गा शक्तीगा द्वारा डी सेबाई चीजोनौर के ओटकी चाले जो दियेन अच्छा घाईव्वा होय। यीशु हमेशा टे परमेश्वर गा द्वारा जीकेमिनी वादा गा द्वारा हेजा गा मेंडाकू गा म्या महान ताठया होय, दिकु लिंजेन हेजा गा पचना गा द्वारा चिक्खा येंडाके होय। दियागा महिमा हमेशा- हमेशा गा डाऊ लक्कू, आमीन।

²² हे इंजा विश्वासी डाईचो, इंज आपेटे बिनती दडावा मेना, कि आपे खुशी गा इनी खाबोर के आराम्बो गेल्ला आजुमे, चोयाकी इंज्नी आपेके घोनेच कम शब्दनौर गेन ओल्के होय।

²³ इंजेन आपे कुरकू के म्या खबर घगला होय। आलेगा डाई तीमुथियुस जेल टे आराकेनेच होय। अगर देटेन टेमो लिंजेन आदिरुवा, मेटे इंज दिकुगा सेंग्गोन आपेके मिलातिंजू हेजेवा।

²⁴ आपना सेबाई अगुवा एठा सेबाई चोखरा कुरकू के नमस्कार मंडे। इटाली देशो गा विश्वासी कुरकू आपेके नमस्कार मंडीवा होय।

²⁵ आपे सेबाईकु लिंजेन परमेश्वर गा कृपा आरुका थंदळकु। आमीन।