ಇಬ್ರಿಯ 11 - गवली उनाई नियम

विश्वास गा महत्व

¹ विश्वास डी बातो गा पक्का निश्चय होय, दिकुगा आले आसा दडावा होय एठा डी चीजोनौर गा अस्तित्व गा बारेन पक्का साबुत होय, आपेके आले बान दोडो।

² विश्वास गा वाजा आलेगा जुना सानाकु नी परमेश्वर टे कृपा घटाके।

³ विश्वास द्वारा आलेन मालूम होय, कि परमेश्वर गा शब्द व्दारा सेबाई दुनिया गा निर्माण डाएन होय, इनिघल्जी आले डी सेबाईकु जो दोडोवा होय, डेगा आरु डोके मिनी चीजोनौर टे बान दडुका होय।

⁴ विश्वास गा वाजा आदम गा कोणटे हाबिल नी हेजा डाईटे कैन टे घोनेच महान बलि पेळेचके। एठा डीका बलिदान गा द्वारा परमेश्वर नी इनी गवाही जीके कि हाबिल म्या धर्मी कोरो होय, चोयाकी परमेश्वर दियागा बलिदान से खुशोके डा, एठा लेकिन हाबिल गुजू गा बदोन भी, डीच हेजा गा विश्वास गा वोजीटे आले बातो डावे होय।

⁵ विश्वास गा वोजीटे हनोक जीमू गा म्या कोरो स्वर्ग गेन जीटाका टूलजेनेच, ताकी डीचके गुजू गा अनुभव बाकी डाऊ। इनी खिजा डीच डाबोलटे बान दोडुका। चोयाकी परमेश्वर नी डीचके टूलजेनेच डा। पवित्र ग्रंथ दियागा बारेन मंडीवा होय कि तुटूल गा पेला “डीचनी परमेश्वर के कुशोकेनेच डा।”

⁶ एठा विश्वास गा बिना परमेश्वर के कुकूशो, बान डाऊ होय। इनिघल्जी जो परमेश्वर गा मेरान हेजे चाहतावा होय, डीचके विश्वास दडा जरुरी होय, कि परमेश्वर होय एठा डीच डी कुरकू के ईनाम जेबा होय, जो डीचके घगाटावा होय।

⁷ नूह के परमेश्वर नी म्या डा गा आडी गा बारेन चेतावनी जीके, जो चोलाकभी डीचनी दोडुका बाने डा, डी विश्वास गा द्वारा डीचनी परमेश्वर गा हुकूम मनातिंज्के एठा म्या खाट डोंगा गा आरुके डेन डीच एठा दियागा परिवार बचातिंजे। एठा नूह विश्वास दडा गा पेला अदा कुरकू दिकुनी विश्वास बान दडुका, दिकुके दोषी ठहरातिंजके एठा डीच डी धार्मिकता गा हाकमिठाच आरुके, जो विश्वास लिंजेन आधारित होय।

⁸ विश्वास गा वोजीटे अब्राहम नी परमेश्वर गा हाको मनातिंजे, कि डीच डी देशोन सेने दियेन डी विरासत गेन हासिल मिनी डा। अब्राहम डी देशो गा घल्जी ओटजे मेना। दियेन इनी मालूम भी बाने डा कि डीच टुनगन चेल्के होय।

⁹ विश्वास गा वोजीटे दूसरा गाव गा खिजा करार गा देशो गेन अदा टेमो टाएन पेराके। हेजा कोन्टे इसहाक एठा कुरारटे याकूब गा रोंगो, जो दिकुगा सेंग्गोन म्याका वादा गा उत्तराधिकारी डा, डेरानौर गेन थंदळ लज्जे।

¹⁰ अब्राहम नी येनोगो डाके, चोयाकी डीच डी पक्का पाईय्या मिनी पूरा गा राह गेन डा, डीके आरुमिठाच परमेश्वर होय।

¹¹ भालाका डीच बुड्डा डा, सारा विश्वास गा द्वारा लाजू गेन शक्ती घाटावे। (एठा डीचनी म्या कोंटे के जनम जीके) चोयाकी दियेन विश्वास डा कि परमेश्वर हेजा करार गा रोंगो डाएवा।

¹² दियागा सानाटे अब्राहम अंदाजोटे गोएन डा, लेकिन डीच चोटोका कुरकू गा जुना साना आरोएन। आए टेमोन, दिकु बदळा गा इफिल गा रोंगो घोनेचकु होय एठा समुद्र गा धुरा गा रिती रोंगो बानउमनाऊ ओटो होय।

¹³ वादा गा फल घाटाएन बिना इनी सेबाईकु विश्वास दडा लठ्ठाका गोएन। पेनो दिकुनी डीचके लेंक्कीनटे डोके एठा दियागा स्वागत डाके। डीच खुदके पृथ्वी लिंजेन दूसरा गाव मतलब पावना ममानातिंज डा।

¹⁴ जो इनी खिजा गा बातो मंडीवा होय, दिकु इकु देशो गा घगाटान चालुके मेना होय।

¹⁵ अगर डी देशो गा बातो सोचातिंज्बा जो दिकु टाउन आराका बाएके डा, मेटे दिकुके देटेन हिरा गा मौका डा।

¹⁶ पेनो बाने, दिकु मेटे म्या उत्तम देशो मतलब स्वर्ग के घागाटा लक्के डा। इनिघल्जी परमेश्वर के डी कुरकू गा परमेश्वर मंडी गेन सेरोम बान हेजे। चोयाकी डीचनी मेटे दिकुगा घल्जी म्या पुराके आरुके होय।

¹⁷ जब परमेश्वर नी अब्राहम गा अंदजो साके, मेटे विश्वास गा वोजीटे अब्राहम नी हेजा कोणटे इसहाक के बलिदान पेपेळेच गा घल्जी जीकेनेच। डीचका दियेन परमेश्वर टे करार घाटाके डा, अब्राहम नी हेजा म्याका कोणटे के बलिदान पेपेळेच गा घल्जी तैयार जे डा।

¹⁸ एठा अगर का परमेश्वर नी दियाटे मंडीके डा, “इसहाक गा द्वारा का अमा पीढी बळातिंजुवा।”

¹⁹ गोएन मिंकूके भी जीटाकुवा होय। एठा म्या रोंगो टे साही रुपो गेन परमेश्वर नी हेजा कोणटे के डाबोलटे हासिलजेनेच।

²⁰ विश्वास गा वोजीटे इसहाक नी हेजा गा बरी भी कोणकिंज याकूब एठा एसाव गा हेजे मिनी टेमो गा घल्जी आशीर्वाद जीके।

²¹ विश्वास गा वोजीटे याकूब नी गुजू टेमो हेजा कोणटे यूसुफ गा बरी कोणकिंज गा तालाटे म्या म्याखोम के आशीर्वाद जीके एठा डीचनी हेजा सेंदरा मिनी छाळी गा सेन्दा गा सहरा झुकातिंजे परमेश्वर गा आराधना डाके।

²² विश्वास गा वोजीटे यूसुफ नी गुजू टेमो इस्राएली कुरकू के मिस्र टे ओट गा बारेन चर्चा डाके एठा येटे टाएन कि हुकूम भी जीके डा जब डीच देटे टे ओट टासो मेटे दियागा म्हाळानौर के भी सेंग्गोन सैय्ये।

²³ विश्वास गा वोजीटे मूसा गा आंटे-बाटे नी इनी धोटे कि सानी अच्छाका होय, डीचके जनम गा बादोन आफाई महिना टाएन उखुका डोकेनेच एठा डी राजा गा हुकूम के बान ममानतिंजटे हिघराडुका बाने।

²⁴ मिस्र देशो गा फिरौन राजा गा कोंजाई टे नी मूसा के पालन पोषण डाके। जब मूसा खाटजे डा, मेटे विश्वास गा वोजीटे डीच बान चाहता डा, कि कुरकू डीचके राजकुमारी गा कोणटे मंडे।

²⁵ डीचके पापो गेन थोळा दिन गा सुख भोगातिंजटे परमेश्वर गा कुरकू गा सेंग्गोन कासु भोगातिंजू येठाभी उत्तम लगातिंजे।

²⁶ एठा मसीह गा वोजीटे अपमान के मिस्र देशो गा भंडार टे खाट किमती समझातिंज्के, चोयाकी डीच हेजा गा ईनाम घाटाऊ गा राह दोडो लक्के डा।

²⁷ विश्वास गा वोजीटे डीचनी मिस्र देशो के आराके। डी राजा फिरौन गा खिजोटे हिघराडुका बाने, बनकी मजबूत आरुका थंदळके, मेंकी डीच बान डूगु परमेश्वर के दोडो लक्के डा।

²⁸ विश्वास गा वोजीटे मूसानी फसह गा तिवार गा विधीनौर गा पालन डाके एठा इस्राएल गा कुरकू के दराजो गा चौखुट लिंजेन पाठो गा पचना गा चेचेरसी गा हुकूम जीके, देटे पेला कोण गा नाशो दूत इस्राएलकु गा पेला कोणकु के घोगेच बाकी।

²⁹ विश्वास गा वोजीटे इस्राएल गा कुरकू नी राटा समुद्र के पारके, मेंकी डी लोखोळ ओटे डा एठा जब मिस्रीकु नी डेनोगोका दडा गा कोशिश डाके, लेकिन समुद्र डाबोलटे हेन एठा दिकुके तुटे सैय्येकु।

³⁰ जब इस्राएल गा कुरकू नी परमेश्वर लिंजेन विश्वास डाके एठा याई दिन टाएन यरीहो शहर गा बारेन पूरा इखाटके मेटे विश्वास गा वोजीटे डीच बोचोएन।

³¹ विश्वास गा वोजीटे राहाब जीमू रांडो अविश्वासीकु गा सेंग्गोन नाशोडुका बाने, चोयाकी डीचनी इस्राएल गा उखुटे मंडीमिंकू गा खुशीटे स्वागत डाके डा, जो यरीहो शहर के दोडो हेन।

³² इंजेन एठा चोच्का मंडी गा जरुरत बाऊ होय। अगर इंज गिदोन, बाराक, शिमशोन, यिप्ताह, दाऊद, शमूएल, एठा परमेश्वर गा कोनेटे मंडीमिंकू गा भी चर्चा डाए चाले, मेटे इंजा मेरान टेमो बान थंदळ।

³³ दिकुनी इकुगा विश्वास द्वारा राज्यनौर के हेजा हात टाल्लेनके, न्याय गा पालन डाके, वादा गा फल घाटाएन, कुलाकु गा चाभु बांदोके।

³⁴ एठा भगा-भगा सिंगेल हिरिज्के। दिकु तलवार गा धार टे बचातिंजे एठा कमजोर टे भी शक्तीशाली आरोएन। दिकुनी युध्दा गेन वीरता के टिपीके एठा दूसरा देशो सेनाकु के सळुपकेकु।

³⁵ अदा जापाएकु नी इकुगा गोएन मिंकूके डाबोलटे जीटाका डोकेकु, चोटोकु का मुंडा जोम्टे गोएन। चोयाकी दिकु आरागु गा घल्जी इकुगा विश्वास बान आरा चाहता डा, ताकी गोएनकी डाबोलटे जीटाऊ गा बादोन दिकु म्या घोनेच अच्छा जीवन हासिलजा होना।

³⁶ अदा कुरकू के उपासो एठा बल्खा गा सामना दडा बोचोएन, जबकी अदा कुरकू के सकळी टे टोलटे जेलेन येंडाकु मेना।

³⁷ अदा कुरकू घोटा टे घोच्केकु, अदाकुके आरीटे चिराकु के एठा अदाकु तलवार टे घोच्केकु मेना। अदा कुरकू गिरबो, अत्याचार एठा कासु गा शिकार आरुटे मेंडाकू एठा सिळीकु गा खाल ओळे, इंगान-हुगन भटकातिंजू लक्के।

³⁸ दुनिया दिकुगा लायको बान डा। दिकुके उजाळ जगान, टुक्की देशोन, गुफानौर एठा धरती गा गड्डानौर गा नंगा सुबा सा होना।

³⁹ दिकु सेबाईकु इकुगा विश्वास गा वोजीटे परमेश्वर गा खुशो दडामिंकू समझातिंजे। फिरभी दिकुके वादा गा फल हासिलडुका बाने।

⁴⁰ चोयाकी परमेश्वर नी आलेके नजर गेन धोटे म्या खाट योजना आरुके डा। डीच चाहता डा कि दिकु आलेगा सेंग्गोनका पूरा टाएन आदिरजे।