ಇಬ್ರಿಯ 1 - गवली उनाई नियम

परमेश्वर आलेटे हेजा कोंटे गा द्वारा मंडीके होय

¹ परमेश्वर नी जुना टेमो गेन आलेगा जुना सनाकु टे घोनेच बार डाटे रेंग्गो-रेंग्गो खिजाटे परमेश्वर गा कोनेटे मंडीमिंकू गा द्वारा बातो डावे।

² पेनो इनी आखिरी दिनेन परमेश्वर नी हेजा कोंटे गा द्वारा बातो डावे। इनिज डीचका होय दियागा द्वारा परमेश्वर नी पूरा दुनिया आरुके, एठा डीचके परमेश्वर नी सेबाई चीजोनौर गा वारिश ठहरातिंज्केनेच।

³ कोंटे परमेश्वर गा महिमा गा उजालाके ओडेवा होय, एठा डीच हर रोंगो टे सेबाई टे महान परमेश्वर गा खिजा होय। एठा डीच हेजा शक्तीशाली वचन गा द्वारा, सेबाई दुनिया के कामय दडा गेन मदत डाएवा होय। कुरकू के दिकुगा पापो गा मापो घाटाऊ संभव आरोए, एठा येनेगा बावजूद स्वर्ग गेन तेजो टे भेट्टिके परमेश्वर गा जेवना एठा सिंघासन लिंजेन सुबांजे मेना।

⁴ एठा कोंटे गा पद स्वर्गदूतकु टे ऊँचा ठहरातिंज्के, चोयाकी जो जीमू डीचके वरिश आरुटे घाटाएन होय, डीच दिकुगा जीमू टे चोटोका येठाभी महान होय।

यीशु स्वर्गदूतकु टे कास

⁵ परमेश्वर नी हेजा तुनिकाभी स्वर्गदूतकु टे येनोगो बान मंडीडुका, “आम इंजा कोंटे होय, टाइंज इंज आमके इंजा कोण गा रुपो गेन ओटकोम्बा मेना” एठा डीचनी येनोगो भी हेजा तुनिका स्वर्गदूत टे बान मंडीडुका, “इंज दियागा बाटे आरुवा, एठा डीच इंजा कोण आरुवा”।

⁶ डाबोलटे परमेश्वर हेजा म्याका कोंटे के दुनिया गेन कुकूल लिंजेन मंडीवा होय, “परमेश्वर गा सेबाई स्वर्गदूत इनिजगा आराधना डाए”।

⁷ जब कि परमेश्वर स्वर्गदूतकु गा बारेन इनी मंडीवा होय, “डीच हेजा स्वर्गदूतकु के कोयो गा खिजा आरुकुवा होय, एठा हेजा भाग्यकु के भगा-भगा मिनी सिंगेल गा खिजा आरुकुवा होय।”

⁸ पेनो हेजा कोंटे गा बारेन, “हे परमेश्वर! अमा राज्य हमेशा टाएन आरुका थंदळवा एठा आम अमागा राज्य लिंजेन धार्मिकता गा हाक टे राज्य दडावा होय।

⁹ आम सही कामय दडा टे प्यार दडावा होय, पेनो बुरा कामय दडा टे खिजोऊवा होय, इनिघल्जी इंज, अमा परमेश्वर नी आमके कालामकेमी होय, एठा आमके आमगा सेबाई सोपतीकुटे बळातिंजटे खुशी एठा आदर जीके होय।”

¹⁰ डीच इनी भी मंडीवा होय, “हे प्रभु! सुरुवात गेन आमनी पृथ्वी के आरुकेनेच, एठा आमनी डी सेबाईका आरुके जो बदळा गेन होय।

¹¹ डी मेटे नाशोऊवा, पेनो आम हमेशा आरुका थंदळवा होय। डी सेबाई कपळेनौर गा खिजा जुनाऊवा।

¹² एठा आम डीके चद्दार गा रोंगो उगुरकोम्बा, डी कपळेनौर गा खिजा बदलातिंजूवा, पेनो आम बान बदलातिंजू, अमा जीवन गा चोलाकभी अंत बान डाऊ।”

¹³ परमेश्वर नी हेजा तुनिका स्वर्गदूत टे चोलाकभी बान मंडीडुका, “आम इंजा जेवना टी गा कोनेन आदर गा सेंग्गोन सुबने, जब टाएन कि इंज अमा दुश्मनकु के पूरा खिजाटे अमा हात टाल्लेन बाकी दडा।”

¹⁴ मेटे स्वर्गदूतकु गा थंदळ गा चोच मकसद होय? स्वर्गदूत दिकु होय जो परमेश्वर गा सेवा दडावा होय, एठा परमेश्वर दिकुके डी कुरकू गा देखभाल दडा गा घल्जी कुलकूबा होय, जो उध्दार घाटाऊमिनी होय।