गलातियों 6 - गवली उनाई नियम

सेबाईकु गा सेंग्गोन भलाई डाए

¹ हे विश्वासी डाईचो, अगर तुनिका कोरो पापो दडा लठ्ठाका डोके टासो, मेटे आपे जो पवित्र आत्मा गा अगुवाई गा रोंगो जीवन बिबातातिंज्बा होय, आरी गेल्ला गा सेंग्गोन डीचके धर्म गा कोरा लिंजेन हिरा गेन मदत दडा डाए। एठा आपे खुद भी ध्यान टे थंदळे, कही येनोगो बाकी डाऊ कि आपे भी अंदजो गेन बोचोवा।

² समस्यनौर गा सामना दडा टेमो इनिज-दियागा गा मदत डाए। इनी खिजा आपे खुद मसीह गा नियम गा पालन दडावा होय।

³ अगर आपेन लगातिंजुवा होय कि जेका गा का मदत दडा गा घल्जी आपे भेबाव महत्वपूर्ण होय, मेटे आपे सिर्फ आपना खुदके बेदिमाग आरोए लक्के होय। आपे येटो भी महत्वपूर्ण बाऊ होय।

⁴ आपे तालाटे हरेक के आपना खुदके स्वभाव गा चिचाना होना। अगर इनी अच्छा होय, मेटे जो चोच्काभी आपेनी डाके होय, डे लिंजेन घमंड डाए सकतावा होय, पेनो बिना तुनिका दूसरा गा सेंग्गोन येनेगा डे रोंगो डाके कि दिकुनी चोच डाके।

⁵ आले तालाटे हरेक आपना स्वभाव गा घल्जी जिम्मेदारी होय।

जीवन खिटी बिबीट खिजा होय

⁶ इनी जरुरी होय, कि जो कुरकू परमेश्वर गा वचन के इथूवा होय, दिकुके डी कुरकू टे घोनेच मदत घाटाऊ होना जो इथूलक्के होय।

⁷ आपना खुदके धोका बाकी जिऊ, चोयाकी जेकाभी चोलाकाभी परमेश्वर के मूर्खा बान आरु साकता।

⁸ अगर तुनिका कोरो हेजा गा इच्छानौर के पुराएवा होय मेटे डीचके हमेशा गा गुजू हासिलुवा। अगर डीच डी बातो के पुराएवा होय, जो पवित्र आत्मा चाहतावा होय, मेटे दियेन चोलाका हमेशा गा जीवन जे चालेवा।

⁹ आले भालाई डा-डाटे हिम्मत बान हारातिंजू, चोयाकी अगर आले मजबूत आरुका थंदळवा मेटे टेमो हेजे लिंजेन जरुर ईनाम घाटाऊवा।

¹⁰ इनिघल्जी जब टाएन आलेके मौका घाटाऊ लक्के होय, आले सेबाई कुरकू गा सेंग्गोन भलाई डाए चाले लज्जे, मेन तौर टे डी कुरकू गा, जो मसीह गेन विश्वास गा वाजा आलेगा डाई होय।

आखरी चेतावनी एठा शुभकामनाए

¹¹ इनी खापेट-खापेट अक्षरनौर के डोगे, जो इंज आपेके इंजा टी टे ओल लक्के मेना।

¹² जो कुरकू आपे लिंजेन खातना गा घल्जी दबाव येंडावा होय, इंकू डी कुरकू होय जो दिखावा दडावा होय (एठा कोम्बोर गा हाल लिंजेन घमंड दडावा होय)। डी कुरकू येनोगो इनिघल्जी दडावा होय, कि कुरकू के सिर्फ मसीह गा क्रूस गा प्रचार डाटे यहूदी कुरकू द्वारा सतातिंजू बाकी होना।

¹³ चोयाकी दिकु खतना डाके मिनी भी मूसा गा नियम गा पालन बान दडा, पेनो दिकु चाहतावा होय कि आपेगा खतना डाकी होना, ताकी दिकु दूसरा यहूदी कुरकू गा सम्मान घमंड टे इनी घाल्की होना कि आपेगा खतना दिकुगा वोजीटे डाएन होय।

¹⁴ अगर इंज घमंड दडावा मेना, मेटे इंज सिर्फ इनी बातो लिंजेन घमंड डाए, कि आलेगा प्रभु यीशु मसीह आलेगा घल्जी क्रूस लिंजेन गोएन। दियागा गुजू गा वाजा, इंज नका दुनियादारी इच्छानौर गा गुलाम बान थंदळडुका एठा नका इंकू तालाटे तुनिकाभी चीजो गा मेरान इंजा लिंजेन राजो दडा गा शक्ती बाऊ होय।

¹⁵ जेका गा का खतना डाएन टासो यानेकी बान दडुका होय टासो, येनेगा तुनिका महत्व बाऊ। महत्व इनी बातो गा होय, कि आले पूरा रुपोटे उनाई सृष्टि आरोयु।

¹⁶ दिकु सेबाई जो इनी नियम गा पालन दडावा होय, परमेश्वर गा सच्चो इस्राएल गा घल्जी, दिकु लिंजेन शांती एठा दया आरुका थंदळे

¹⁷ नका टे जेका इंज्के तक्लिप बाकी डाए। इंजा कोम्बोर लिंजेन जो दागो होय दिकु घालेवा होय कि इंज यीशु गा म्या कलामके मिठाच चेला मेना।

¹⁸ हे विश्वासी डाईचो, इंज प्रार्थना दडावा मेना कि प्रभु यीशु मसीह गा कृपा आपे सेबाईकु गा सेंग्गोन डायु। आमीन।