गलातियों 5 - गवली उनाई नियममसीह गेन आजादी 1 मसीह नी आलेके मूसा गा नियम टे आजादकेमी होय। इनिघल्जी आपे आपेगा आजादी के उठाका थंदळे। एठा नियम गा पालन दडा गा घल्जी आपे आपेका के डाबोलटे गुलाम आरु डाए बाकी। 2 इंज पौलुस आपेटे जो मंडीवा मेना, डीके ध्यान टे आजुमे, अगर आपे अलग्गो जाटो गा कुरकू परमेश्वर गा सम्मान धर्मी ठहरातिंजू गा घल्जी खतना डाएवा, मेटे मसीह नी जो डाके, दियाटे आपेन चोच्का फायदा बान डाऊ। 3 इंज डाबोलटे आपेके चेतावनी जेबा मेना कि हरेक कोरो जो हेजा गा खतना दडावा होय, डीके पूरा यहूदी मूसा गा नियम गा पालन दडा होना। 4 अगर आम खुदके धर्मी आरु गा घल्जी मूसा गा नियम लिंजेन निर्भर थंदळ चाहतावा होय, मेटे आपेनी मसीह टे आपना संबंध टुक्काके एठा परमेश्वर गा कृपा के आटके मेना होय। 5 पेनो परमेश्वर गा आत्मा आलेके डी धार्मिकता के हासिल दडा गा घल्जी, आसा गा सेंग्गोन इंतजार डाएवा होय डीके जिऊ गा वादा परमेश्वर नी आलेटे डाके डा, चोयाकी आले दिया लिंजेन विश्वास दडावा होय। 6 जब आले मसीह यीशु लिंजेन विश्वास दोडोवा होय, मेटे न खतना गा तुनिका महत्व होय एठा न दियागा आसर गा तुनिका महत्व होय। महत्व सिर्फ विश्वास गा होय, जो प्यार गा द्वारा कामय दडावा होय। प्यार द्वारा मूसा गा नियम गा पूरा डाऊ 7 आपे मसीह गा सेंग्गोन संबंध गेन येटो अच्छा खिजाटे उन्नति डाए लक्के डा। मेटे जेनी आपेके सम्मान बळातिंजटे रोकातिंज्के कि आपे सच्चो के बाकी ममानातिंज? 8 इनी शिक्षा परमेश्वर गा कोनेटे बान हेजे, डीचनी आपेके हेजा कोणकु डाऊ गा घल्जी हाकोलेमी। 9 येनोगो शिक्षा जो सच्चो बाऊ होय इनी खिजाटे फैलातिंजू लक्के होय, जैसा कि इनी कहावत मंडीवा होय, “थोळासा खमीर सेबाई लोखाके मिनी कोलोम के खमीर आरोएवा होय।” 10 इंज परमेश्वर लिंजेन विश्वास दडावा मेना, कि डीच आपेके लाबाळ शिक्षानौर लिंजेन विश्वास दडा टे बचातिंज डोकोम्बा। पेनो जो आपेके भुल्लाकोम्बा होय। डीच चाहे जेकाभी होय, परमेश्वर गा द्वारा दण्डो घाटाऊवा। 11 हे विश्वासी डाईचो, अगर इंज इनी प्रचार डाए कि कुरकू गा खतना डाकी चाले होना, मेटे इंज्के समस्यानौर गा सामना बान दडा होना। अगर इंज इनी प्रचार दडा सुरुका बाकी दोडो कि उध्दार सिर्फ मसीह गा क्रूस गा द्वारा का होय, मेटे जेकाभी नराजोऊ बाने। 12 अच्छा डाऊ कि जो कुरकू आपेके लाबाळ शिक्षा इथूवा होय, दिकु खुदके कोरोपणान बान आरुकी। 13 हे विश्वासी डाईचो, आपे हाडाई होय, कि आपे कुरकू आजादू गा घल्जी हाकोलेमी होय। इनिघल्जी आपे इनी आजादी के कोम्बोरा स्वभावनौर गा साधन बाकी आरु। पेनो प्यार टे इनिज-दियागा सेवा डाए। 14 चोयाकी पूरा मूसा गा नियम इनी म्या हुकूम गेन पूराऊवा होय, “आपना मेराकुटे आपना रोंगो प्यार डाए।” 15 पेनो अगर आपे जानवरकु गा खिजा इनिज-डीचके गेगेटबा एठा चिचारावा होय, मेटे आपेके ध्यान टे थंदळ होना कि कही आपे इनिज-डीचके नाशोकेच बाकी। आत्मा एठा कोरो गा स्वभाव 16 इंज इनी मंडी चाहतावा मेना, आपे कुरकू पवित्र आत्मा गा अगुवाई गा खिजा सेंदरावाकी मेटे आपे आपेगा कोम्बोरा इच्छानौर गा पालन बान दडा। 17 कोम्बोरा स्वभाव मेटे पवित्र आत्मा गा खिलाफ दडावा होय, एठा पवित्र आत्मा कोम्बोरा स्वभाव गा खिलाफ दडावा होय। इंकिंज इनिज-दियागा खिलाफ होय। इनिघल्जी आपे जो अच्छा कामय दडा चाहतावा होय, डीके बान दडा होय। 18 अगर आपे पवित्र आत्मा गा अगुवाई गा रोंगो जीवन बिबातातिंज्बा होय, मेटे आपे मूसा गा नियम गा हात टाल्लेन बाने होय। 19 कोम्बोरा स्वभाव गा कामय सपा होय, मतलब आनोवा, गिदळी कामय, लुच्चापन, 20 डीच मूर्ति पूजा दडावा होय, डीच जादू-टोना दडावा होय, डीच हेजा सेंग्गो-कुरकू टे खीजो दडावा होय, डीच इनिज-दियाटे झागळा दडावा होय, डीच डी चीजो के घाटाऊ गा इच्छा दोडोवा होय, जो अलग्गो कुरकू गा मेरान होय। डीच जल्लो खिजाऊवा होय, डीच हेजा कोरा ओट गा घल्जी दूसरा कुरकू के इटान बोचोकुवा होय, डीच डी कुरकू के मनेन कु बाने देटे डीच सहमत बान डाऊ होय एठा सिर्फ डी कुरकू गा सेंग्गोन जुळातिंजुवा होय देटे डीच सहमत होय। 21 डीच इनिज-दियागा प्रति जुलू दोडोवा होय, डीच नशा दडावा होय, डीच डी खाट खाणानौर गेन सेनेवा होय देटेन कुरकू इकुगा रांगेच लिंजेन काबू बान दोडो, एठा डीच इनी खिजा गा अलग्गो सेबाई बुरा कामय दडावा होय। इंज आपेके चेतावनी जे लक्के मेना जैसा इंज्नी पेलाभी आपेके चेतावनी जीके डा, कि येनोगो कामय दडामिठाच परमेश्वर गा राज्य गा वारिश बान आरु। 22 पेनो पवित्र आत्मा गा द्वारा ओटमिनी गुण इनी होय, प्यार, खुशी, शांती आराम्बो, एठा दया, भालाई, विश्वास, 23 नम्रता, एठा संयम होय इनी खिजा गा व्यवहार लिंजेन पाबन्दी येंडा गा घल्जी तुनिका नियम बाऊ होय। 24 डी कुरकू जो उध्दार दडामिठाच मसीह यीशु टे संबंधित होय, दिकुनी इकुगा जीवन गा पापमय तरीकानौर के एठा दियागा बुरा लालिचोनौर एठा इच्छानौर के सेंग्गोन क्रूस लिंजेन पेळेचके मेना होय। 25 अगर आले आलेगा उनाई जीवन पवित्र आत्मा द्वारा परमेश्वर गा कोनेटे घाटाऊवा होय, मेटे इनिघल्जी आलेके पवित्र आत्मा गा रोंगो जीवन बिबातातिंज होना। 26 आलेन घमंड बाकी दडा होना, एठा आलेन इनिज-डीचके भभाळकातिंज बाकी होना एठा इनिज दियाटे जुलू बाकी होना। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation