गलातियों 3 - गवली उनाई नियम

विश्वास गा द्वारा धार्मिकता

¹ हे गलातियो जिल्हा गा बान समाझो कुरकू! जेकानी जरुर आपेके भाटकातिंज्केमी होय। आपेगा मेटनौर गा सम्मान सपा रुपोटे इनी घल्के मेना, कि यीशु मसीह क्रूस लिंजेन पेळेचकेनेच डा।

² इंज आपेटे बस इनी चिचाना चाहतावा मेना, कि आपेनी पवित्र आत्मा गा वरदान के चोच मूसा गा नियम गा पालन डाटे घाटावे, या विश्वास गा अच्छा खाबोर के आजोम गा द्वारा घाटावे?

³ चोच आपे कुरकू येटो बान समाझो होय, कि आपेनी जो कामय पवित्र आत्मा गा द्वारा सुरुके, चोच नका डीचके अमागा शक्तीटे स्यस्या चाहतावा होय?

⁴ एठा विश्वासी आरु गा बादोन आपेनी घोनेच कासु ठुल्बे। इंज सच्चोन आसा दडावा मेना कि इनी कासु तुटूल वोया बान डा।

⁵ जब परमेश्वर आपे कुरकू के आत्मा गा वरदान जेबा होय। एठा आपेन नी जो अचम्बो कामय गा कामय दडावा होय, मेटे चोच डीच मूसा गा नियम गा द्वारा कामय दडा गा वोजीटे येनोगो दडावा होय? पेनो डीच इनिघल्जी येनोगो दडावा होय कि आपेनी मसीह गा बारेन अजोम्के एठा दिया लिंजेन विश्वास डाके?

अब्राहम टे डाके मिनी वादा एठा विश्वास

⁶ पवित्र ग्रंथ गेन मंडीके मेना होय कि, “अब्राहम नी परमेश्वर लिंजेन विश्वास डाके एठा एनेटे डीच धर्मी मनातिंजे।”

⁷ इनिघल्जी आपे कुरकू इनी पक्का रुपोटे चिनाया, कि जो कुरकू अब्राहम गा खिजा परमेश्वर लिंजेन विश्वास दडावा होय, दिकुका अब्राहम गा कोणकुटे होय।

⁸ एठा पवित्र ग्रंथ गेन घोनेच टेमो पेला इनी ओल्के मेना डा, कि परमेश्वर विश्वास गा द्वारा अलग्गो जाटो गा कुरकू के धर्मी ठहरातिंज्कुबा। इनिघल्जी डीचनी पेलाटेका अब्राहम के इनी अच्छा खाबोर घाल्के कि “अमा द्वारा पृथ्वी गा सेबाई जाटोकु आशीर्वाद हासिलेवा।

⁹ इनिघल्जी जो डी खिजाटे परमेश्वर लिंजेन विश्वास दडावा होय, जैसा अब्राहम गा विश्वास डा, मेटे दिकु अब्राहम गा सेंग्गोन आशीर्वाद घाटाऊवा होय।”

नियम गा द्वारा श्रपो

¹⁰ पेनो जोभी कुरकू मूसा गा नियम गा कामयनौर लिंजेन भरोसा दोडोवा होय, दिकु म्या श्रपो गा हात टाल्लेन होय, चोयाकी ओल्के होय, “जो जेका नियम गा पुस्तक गेन ओल्के मिनी सेबाई बातो गा दडा टे पक्का बान थंदळ, दिकु श्रपो के होय।”

¹¹ इनी मेटे सपा होय, कि तुनिकाभी कोरो मूसा गा नियम गा वोजीटे परमेश्वर गा नजर गेन बान ठहरातिंजू, चोयाकी पवित्र ग्रंथ गेन ओल्के होय, “धर्मी कोरो विश्वास गा द्वारा जीवन हासिलेवा।”

¹² एठा मूसा गा नियम गा विश्वास टे तुनिका संबंध बाऊ होय, “पेनो जो इनी बातो गा पालन डाएवा, डीचके एनेका द्वारा जीवन हासिलुवा।”

¹³ मसीह आलेगा घल्जी श्रपो आरोएन, एठा इनी खिजा डीचनी आलेके मूसा गा नियम गा श्रपो टे आराकेमी, चोयाकी पवित्र ग्रंथ गेन ओल्के होय, “जो जेकाभी क्रूस लिंजेन लटकातिंजूबा होय, डीच श्रपो के होय।”

¹⁴ इनी इनिघल्जी डायेन, कि परमेश्वर गा द्वारा करार डाके मिनी अब्राहम गा आशीर्वाद, मसीह यीशु गा द्वारा अलग्गो जाटो गा कुरकू टाएन आदिरजे, ताकी आले मसीह गेन विश्वास दडा गा द्वारा डी वादा डाके मिनी पवित्र आत्मा के हासिलेवा।

पक्का वादा

¹⁵ हे विश्वासी डाईचो, इंज आपे कुरकू के साधारण जीवन गा उदाहरण जे लक्के मेना। जब बरी कोरो किंज गा तालान तुनिका वादा पक्का डाऊवा होय, मेटे न जेका डीके रद्डाएवा एठा न डेन जेका चोच्का जोळातिंज सकतावा होय।

¹⁶ नका, करार अब्राहम एठा दिकुगा खान्दन के जीके मेना होय। पवित्र ग्रंथ इनी बान मंडी “दिकुगा खान्दनकु के” मेनकी घोनेचकु के, बनकी“दिकुगा खान्दन के”, मेनकी म्याखोम केका, एठा डी खान्दन मसीह होय।

¹⁷ इंज जो आपेके ससामझातिंज चाहतावा मेना, डी इनी होय, कि जो करार परमेश्वर नी पेलाटेका पक्का डाके डा, डीके मूसा गा नियम उफुन सेद्दी तीसो साल गा बादोन हेन डो रद्दा बान डाए साकता, कि दियागा करार वोया ठहरातिंजू।

¹⁸ अगर परमेश्वर नी मूसा गा नियम गा पालन दडामिंकू कुरकू के कृपा जीके धारे, मेटे करार टे दियागा तुनिका संबंध बाने, पेनो परमेश्वर नी अब्राहम के डी आशीर्वाद जीके, चोयाकी डीचनी दियाटे पेला करार डाके डा।

नियम गा मकसद

¹⁹ मेटे तुनी मकसद टे मूसा गा नियम जीके मेना होय, इनिघल्जी कि कुरकू के मालूमजू कि दिकु चोटो पापी डा, पेनो मूसा गा नियम गेन जो कोण गा वचन जीके डा, दियागा हेजे टाएन इनी नियम जिऊ गेन हेन डा, परमेश्वर नी स्वर्गदूत गा द्वारा हेजा नियम मूसा गा मेरान कुल्केनेच, परमेश्वर एठा कुरकू गा तालान डीच तालाबिचो डा।

²⁰ तालाबिचो मेटे काम टे बर्खिंज गा तालान डाऊवा होय, पेनो परमेश्वर म्याखोम का होय। डीचनी अब्राहम गा सेंग्गोन हुकूम दडा लठ्ठाका जेकाकेभी तालाबिचो बान दोडुका।

²¹ मेटे चोच मूसा गा नियम परमेश्वर गा करारनौर गेन खिलाफ होय? बाने बिलकुल बाने! अगर येनेगो नियम गा एलान डाऊ डा, जो जीवन जिऊ मिनी गेन शक्ती डा, मेटे नियम गा पालन दडा गा द्वारा का कोरो धर्मी ठहरातिंजूबा।

²² पेनो पवित्र ग्रंथ इनी घागलवा होय, कि दुनिया गा सेबाई कुरकू पापो गा शक्तीगा हात टाल्लेन बंदी आरुकेकु होय, इनिघल्जी कि परमेश्वर नी विश्वास गा आधार लिंजेन जो वरदान जिऊ गा उनाई वादा डाके डा, डी यीशु मसीह लिंजेन विश्वास दोडोमिंकू के घाटाऊवा।

²³ मसीह गा हेजे टे पेला, आले यहूदी कुरकू के कैद गेन डोकेमी मेना डा एठा मूसा गा नियम आलेगा रक्षा दडा लक्के डा एठा डी विश्वास गा हेजे टाएन जो ओटमिनी डा, आले दियागा का बंधन गेन थंदळके।

²⁴ इनी खिजा मसीह गा हेजे टाएन मूसा गा नियम आलेके आलेगा कोरा घागल गा घल्जी एठा आलेगा देखभाल दडा गा घल्जी जीके मेना डा, देटे आले विश्वास गा द्वारा धर्मी ठहरातिंज्के।

²⁵ नका जबकी मसीह हेन मेना होय एठा आले दिया लिंजेन विश्वास डाए सकतावा होय, मेटे नका आलेन कोरा घागल गा घल्जी एठा आलेगा देखभाल गा घल्जी मूसा गा नियम गा जरुरत बाऊ होय।

कोणकु एठा वारिश

^26-27 जब आपेके मसीह गा जीमू टे बपतिस्मा जीके मेना, मेटे आपेनी मसीह गा उनाई जीवन के उरीये जैसा म्या कोरो उनाई कपळे के उरेवा होय। इनिघल्जी, आपे सेबाईकु परमेश्वर गा कोणकुटे आरोएन जब आपेनी यीशु मसीह लिंजेन विश्वास डाके।

²⁸ नका न मेटे यहूदी एठा यूनानी गेन तुनिका भेद-भाव होय, एठा न मेटे भाग्य एठा आजादी गेन तुनिका भेदो होय, एठा न मेटे सना एठा जापाए गेन तुनिका भेदो होय। आपे सेबाईकु यीशु मसीह गेन म्याजे होय।

²⁹ अगर आपे कुरकू मसीह गा होय, मेटे अब्राहम गा खान्दन होय एठा आपे परमेश्वर गा द्वारा करार डाके मिनी आशीर्वाद गा वारिश आरोएन होय।