इफिसियों 6 - गवली उनाई नियम

आंटे-बाटे एठा चाफ्निकु

¹ चाफ्निकु! प्रभु गेन आपना आंटे-बाटे गा हुकूम मनातिंजे, चोयाकी इनी सही होय।

² “आपना आंटे-बाटे गा आदर डोए।” चोयाकी इनी पेला हुकूम होय डेगा सेंग्गोन म्या वादा भी जुळातिंजके मेना होय।

³ जो इनी खिजा होय, “कि अमा भला डायु, एठा आम धरती लिंजेन घोनेच दिन जीटा थंदळे।”

⁴ हे चाफ्निकु मिंकू, आपना चाफ्निकु गा खीजो बाकी भाळकातिंज डाए, बनकी प्रभु गा शिक्षा द्वारा एठा चेतावनी जिऊ लठ्ठाका दिकुगा पालन-पोषण डाए।

स्वामी एठा भाग्य

⁵ हे भाग्यकु, जो कुरकू दुनिया गा रोंगो आपेगा स्वामी होय, ध्यान टे दिकुगा सम्मान डाए। एठा हेजा पूरा मन टे हिगरा, एठा कपातिंजू लठ्ठाका दिकुगा आदर दडा लठ्ठाका, दिकुगा हुकूम मनातिंजे। जैसा आपे मसीह गा हुकूम ममानातिंज्बा होय।

⁶ आपे कोरोकु खुश दडा गा मकसद टे दिखावा गा घल्जी बाने, बनकी मसीह गा भाग्यकु गा खिजा येनेगो डाए, जो सेबाई दिल टे परमेश्वर गा इच्छा पूरा दडावा होय।

⁷ आपे खुशीटे खुद गा सेवा कामय डाए चाले, मनो आपे कोरोकु गा बाने, बनकी प्रभु गा सेवा दडावा होय।

⁸ चोयाकी आपे हाडाई होय कि हरेक कोरो, चाहे डीच भाग्य होय या आझाद होय, जोभी अच्छा कामय डाएवा, डेगा पुरस्कार डीच प्रभु टे घाटाएवा।

⁹ आपे जो स्वामी होय, भाग्यकु गा सेंग्गोन येनेगोका व्यवहार डाए। आपे धमकीनौर जिऊ आराकी, चोयाकी आपे हाडाई होय, कि स्वर्ग गेन दिकुगा एठा आपेगा बार्खिंज म्याका स्वामी होय, एठा डीच जेका गा सेंग्गोन पक्षपात बान दडा।

आत्मिक युध्द गा हथियार

¹⁰ इंज अंत गेन इनिका मंडीवा मेना, आत्मिक रुपो गेन प्रभु गा शक्तीशाली शक्तीटे मजबूत आरोए।

^11-13 आले कोरोकु गा खिलाफ बान लड़ाई लक्के होय। आले प्रधानकु टे, अधिकारीकु टे, अध्यात्मिक दुनिया गा अधिकारीकु गा खिलाफ एठा अंधरा एठा शक्तीनौर गा राजोमिंकू गा खिलाफ लड़ाई लक्के होय। इनिघल्जी सेबाई कवच उरिया जो परमेश्वर जेबा होय। डाबोलटे जब डी बुरा दिन हेजेवा होय, मेटे आपे शैतान गा चालनौर टे आपना बचाव डाए सकतावा होय। एठा जब लड़ाई स्यायुवा, मेटे भी आपे मजबूत थंदळवा।

¹⁴ इनिघल्जी आपे सच्चाई गा पट्टा रेवेटटे, एठा सही टे व्यवहार डाए। इनी झिलम उरी गा रोंगो होय।

¹⁵ एठा शांती गा अच्छा खाबोर घागल गा घल्जी आरी गा चप्पोल उरीटे टेंगेन थंदळे।

¹⁶ हारेक टेमो विश्वास के म्या ढाल गा रुपोन डोकी, येनेगा गा घल्जी कि आपे बुराई टे व्यवहार दडामिठाच शैतान गा द्वारा आराके मिनी सेबाई जुलू मिनी तीर टे बचातिंज ओडेन सफालुवा।

¹⁷ एठा उध्दार के म्या टूपी गा रुपोन मनातिंजटे, एठा परमेश्वर गा वचन तलवार गा रुपो मनातिंजटे सायोम, जो आत्मा आपेके जेबा होय।

¹⁸ इनी सेबाई प्रार्थना गेन डाए, परमेश्वर टे मदत आसे। एठा आत्मा गा अगुवाई गा घल्जी हर म्या मौका लिंजेन प्रार्थना डाए। इनी वोजीटे उशार थंदळे एठा चोलाकाभी हार बाकी मनातिंजू, एठा परमेश्वर गा सेबाई कुरकू गा घल्जी हमेशा प्रार्थना डाए।

¹⁹ एठा इंजा घल्जी भी प्रार्थना डाए, कि जब इंज घागल गा घल्जी तैयारुवा, मेटे परमेश्वर इंज्के म्या खाबोर जेबा, ताकी इंज हिम्मत टे घागल होना एठा अच्छा खाबोर गा उखु बातो घल्की होना।

²⁰ इनिजा गा घल्जी इंज साखळीनौर गेन जाकळातिंजटे राजदूत गा सम्मान सेवा दडा लक्के मेना। प्रार्थना डाए कि इंज, जो प्रकार इंज्के मंडी होना, डीका खिजा बिना हिगरा गा सेंग्गोन अच्छा खाबोर गा प्रचार डाकी होना।

आखरी नमस्कार

²¹ प्रभु गा सेंग्गो गेन प्रिय डाई एठा विश्वास लायको सेवक तुखिकुस आपे कुरकू के इनी सेबाई घालेवा, ताकी आपे भी चिनायाकी कि इंज टोनोगो मेना एठा चोच दडा लक्के मेना।

²² डीचके इंज्नी आपेगा मेरान इनिघल्जी कुल्केनेच होय, कि आपे आलेगा हाल चिनाया, एठा डीच मननौर के आरी-आरीएवा।

²³ इंज प्रार्थना दडावा मेना, कि आलेगा परमेश्वर बाटे एठा प्रभु यीशु मसीह गा कोनेटे सेबाई विश्वासी डाईचो के शांती एठा विश्वास गेल्ला प्यार जे।

²⁴ जो आलेगा प्रभु यीशु मसीह टे सच्चो प्यार दोडोवा होय, दिकु सेबेईकु लिंजेन कृपा डाऊ चाले।