इफिसियों 3 - गवली उनाई नियमअलग्गो जाटोकुन पौलुस गा सेवा 1 इनिघल्जी इंज पौलुस आपे अलग्गो जाटोकु के मसीह यीशु गा अच्छा खाबोर घागल वोजीटे जेलेन केटके मेना, एठा इंज आपेगा घल्जी परमेश्वर टे प्रार्थना दडावा मेना। 2 आपे कुरकू नी जरुर आजुम्के होंगा, कि आपे कुरकू गा भालाई गा घल्जी परमेश्वर नी हेजा गा कृपा गा सोए दडा गा रोंगो इंज्के अच्छा खाबोर घागल कामय जिले होय। 3 जैसा कि इंज्नी चिठ्ठी गेन पेला आपेके ओल्के डा, कि परमेश्वर नी खुद का इंजा लिंजेन डी भेदो के ओटके मेना होय। 4 डीके पळातिंजटे आपे कुरकू चिनाए सकतावा होय, कि इंज मसीह गा उखु बातो तोटे टाएन समझातिंजेवा होय। 5 डी भेदो ओले पीढीनौर गेन कोरोकु बान घालडुका डा, एठा नका परमेश्वर नी हेजा गा आत्मा गा द्वारा दियागा कलामके मिंकू चेलाकू एठा परमेश्वर गा कोनेटे मंडीमिंकू लिंजेन ओटकेनेच मेना होय। 6 डी भेदो इनी होय कि मसीह यीशु गा अच्छा खाबोर गा द्वारा यहूदिकु गा सेंग्गोन अलग्गो जाटोकु म्याका विरासत का हकदार होय, म्याका कोम्बोर गा अंगो होय एठा डी सेबाई चीजोनौर गेन दिकुगा हिस्सा होय, डीके जिऊ गा वादा परमेश्वर नी यहूदी कुरकू टे डाके डा। 7 परमेश्वर गा कृपा एठा दियागा महान शक्तीगा रोंगो इंज्के इनी मौका घाटाके, कि इंज डी अच्छा खाबोर के घागल गा घल्जी भाग्य आरुयु। उखु बातो गा मकसद 8 अगर भी इंज परमेश्वर गा सेबाई कुरकू गेन सेबाईकु टे सानी कोरो मेना, तोभी इंजा इनी कृपा डाएन, कि इंज अलग्गो जाटोकु के मसीह गा स्यागु बान मिनी डामा गा अच्छा खाबोर घालेवा। 9 एठा सेबाई कोरोकु लिंजेन डी भेदो ओटकी होना, कि डी भेदो गा सोए चोच होय। परमेश्वर नी सेबाई दुनिया के आरुके, एठा इनी भेदो के जमाना-जमाना टे उखु डोके डा। 10 नका परमेश्वर गा मकसद इनी होय, कि मसीह गा मंडली गा द्वारा, परमेश्वर गा बान स्यागु ज्ञान बान डूगु दुनिया गा आत्मानौर गा मुख्याकु एठा अधिकारीकु लिंजेन ओटकी होना डा। 11 परमेश्वर नी हमेशा जमाना टे जो मकसद हेजा मनेन डोके डा, डीचनी डीके आलेगा प्रभु यीशु मसीह गा द्वारा पूरा डाके। 12 चोयाकी आले मसीह गेन विश्वास दडावा होय, एठा इनी वोजीटे आले पूरा भारोसा गा सेंग्गोन हिम्मत टे परमेश्वर गा मेरान सेनेवा होय। 13 इनिघल्जी इंज आपे कुरकू टे बिनती दडावा मेना, कि आपे कुरकू गा घल्जी इंज जो मुसीबत सेहेने लक्के मेना, डेगा वोजीटे आपे हिम्मत बाकी हरातिंज, चोयाकी येनेन आपे कुरकू गा फायदा होय। मसीह गा प्यार 14-15 इनिघल्जी इंज डी परमेश्वर बाटे गा सम्मान ठोपरे जेगाटे इनी बिनती दडावा मेना, जो स्वर्ग गेन एठा पृथ्वी लिंजेन हरेक खटला गा सुबा होय, 16 इंज बिनती दडावा मेना, कि डीच हेजा गा महिमा गा डामा गा रोंगो आपेके इनी दान जे, कि आपे दियागा आत्मा टे आपना गा तालाबिचो कोरोपणान शक्ती घाटाटे शक्तीशाली आरुयु। 17 ताकी जैसा आपे मसीह लिंजेन विश्वास डाए चाले, डेनोगोका डीच आपेगा मन गेन थंदळजू। इंज प्रार्थना दडावा मेना कि परमेश्वर एठा इनिज दियाटे घल्जी आपेगा प्यार आपेके मजबूत कोम एठा आपेके पक्काकोम। 18 ताकी आपे सेबाईकु परमेश्वर गा कुरकू गा सेंग्गोन बेल्लाटे इनी समझातिंजा, कि मसीह आपेके चोटो ज्यादा प्यार दडावा होय। 19 इंज प्रार्थना दडावा मेना, कि आपे मसीह गा इनी प्यार के चिनाए जो कोरोकु गा समाझो टे बल्लान होय, ताकी आपेगा स्वभाव परमेश्वर गा पूरा स्वभाव खिजा आरुयु। 20-21 परमेश्वर जो हेजा डी शक्तीटे जो आलेगा तालान कामय दडावा होय, दियागा वोजीटे आले आलेगा आसी टे ज्यादा एठा आलेगा बिचार टे ज्यादा कामय दडा गा ताखत दोड़ोवा होय। मसीह गा मंडली गेन एठा मसीह यीशु गेन दियागा महिमा सेबाई पीढीनौर गा द्वारा हमेशा गा घल्जी डायु! आमीन। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation