इफिसियों 2 - गवली उनाई नियमगुजूटे जीवन गा कोनेन 1 पेला आपे आपेगा अपराधनौर एठा पापो गा वाजा आत्मिक रुपोटे गोएन मिठाच डा। 2 डी टेमो आपे इनी दुनिया गा रिती गा रोंगो जीवन बिबातातिंज डा, आपे परमेश्वर के बान चिचाना डा, एठा आपे शैतान गा रोंगो जीवन बिबातातिंज डा, जो बदळा गेन थंदळ मिठाच भूतो गा याजक होय। डीच आए भी दिकुगा दिल गेन कामय दडावा होय, जो परमेश्वर गा हुकूम गा पालन बान दडा। 3 इंकू सेबाईकु रोंगो आलेभी सेबाईकु गा पेला इकुगा कोम्बोर गा पापोमय स्वभाव गा रोंगो जीवन बिबातातिंज डा, एठा आले डीका डाए लक्कू डा, जो आलेगा बुरा इच्छानौर एठा बिचार आलेन दडा गा घल्जी मजबूर कोम डा। आले दूसराकु खिजा आपना स्वभाव गा वोजीटे परमेश्वर गा खीजो गा हात टाल्लेन डा। 4-5 पेनो परमेश्वर गा दया येटो ठायका होय, एठा दियागा प्यार येटो महान होय, कि जब आले आपना पापोनौर गा वोजीटे गोएन मिठाच गा रोंगो डा, मेटे परमेश्वर नी मसीह गा जीटाऊ गा वोजीटे आलेके जीवन जिले। परमेश्वर गा कृपा गा द्वारा आपेगा उध्दार डाएन होय। 6 परमेश्वर नी यीशु मसीह गा सेंग्गोन आले कुरकू के डाबोलटे मुर्दाकु टे जीटाकेमी एठा दियागा सेंग्गोन आलेके स्वर्गीय जगानौर गेन सुबांकेमी। 7 परमेश्वर नी यीशु मसीह गेन आले सेबाईकु लिंजेन इनी कृपा टिपीके होय। डीचनी इनी इनिघल्जी डाके कि दिकु हेजे मिनी टेमो गेन दुनिया गा कुरकू के टिपीकी, कि दियागा कृपा चोटो महान होय। 8-9 चोयाकी मसीह लिंजेन विश्वास दडा गा वोजीटे परमेश्वर गा कृपा गा द्वारा आपेगा उध्दार डाएन होय। इनी आपेगा अच्छा कामयनौर गा वोजीटे बाने, पेनो इनी परमेश्वर गा दान होय। ताकी जेकाभी एनेगा बारेन घमंड बाकी दडा होना। 10 चोयाकी परमेश्वर नी यीशु मसीह गा द्वारा आलेगा आरुकेमी होय, देटे आले डी अच्छा कामयनौर के डाए लक्कू, डीके दडा गा घल्जी परमेश्वर नी आलेके पेला टे तैयारकेमी होय। मसीह गेन म्या 11 यादो डाए, आपे जो जनम टेका अलग्गो जाटो होय, यहूदी कुरकू आपेके बिना खतना गा मेंटो मंडीटे चेचाळातिंज्बा होय, जो इकुगा खतना गा हालेन घमंड डाटे सोचातिंज्बा होय, कि दिकु परमेश्वर गा कुरकू होय। अगर का डी कुरकू दिल गेन बाने बनकी कोम्बोर गेन डाके मिनी खतना गा द्वारा खतना मिंकू मंडीवा होय। 12 डी टेमो आपे मसीह के हाडाई बान डा। आपे परमेश्वर गा कालाम्के मिंकू प्रजा इस्राएल गा कुरकू तालाटे बाने डा। एठा आपे परमेश्वर गा द्वारा डाके मिनी डी करारनौर गा वादानौर गा भागी बाऊ डा, एठा इनी दुनिया गेन बिना आसा गा एठा परमेश्वर गा बिना जीवन बिबातातिंज लक्के डा। 13 पेनो आपे जो पेला परमेश्वर टे लेंक्कीनके डा, नका मसीह यीशु गा क्रूस लिंजेन बलिदान गा पचना गा द्वारा मेरान सालेमी मेना होय। मसीह गेन म्या 14 चोयाकी मसीह नी खुद यहूदी जाटो एठा अलग्गो जाटोकु के म्या डाटे दिकुके मिलातिंज्केकु। डीचनी डी दुश्मनी गा दीवार के बोचोके, जो दिकुके अलग्गोकु डा। 15 मसीह यीशु नी हेजा गा गुजू गा द्वारा मूसा गा नियम गा सेबाई विधीनौर एठा नियमनौर के रद्द डाके, ताकी डीच यहूदी जाटो एठा अलग्गो जाटोकु के आबुगा सेंग्गोन म्या उनाई जाटो ओटटे मिलातिंजू डाकी होना। 16 मसीह नी हेजा क्रूस लिंजेन गुजू गा द्वारा बाएरा गा भी म्या कोम्बोर गेन परमेश्वर गा सेंग्गोन मिलातिंजटे एठा इनी खिजा दुश्मानी के नाशोके होय। 17 इनिघल्जी मसीह नी हेन डो अलग्गो जाटो के जो दियाटे लेंक्कीनके डा एठा यहूदिकु के जो दियागा मेरान डा, मिलातिंजू गा अच्छा खाबोर घाल्के। 18 चोयाकी मसीह द्वारा आले सेबाईकु भी म्याका पवित्र आत्मा गा द्वारा बाटे गा मेरान आदिरुवा होय। मसीह आलेगा कोपरा गा घोटा 19 इनिघल्जी नका आपे बल्ला गा कुरकू या अनजान बान थंदळ डुका, पेनो परमेश्वर गा कुरकू गा सेंग्गोन बेल्लाटे म्याका देशो गा एठा परमेश्वर गा खाटला गा कुरकू आरोएन होय। 20 आपे सेबाईकु बेल्लाटे परमेश्वर गा डी भवन गा रोंगो होय, डेगा पैय्या कलामके मिंकू चेलाकू एठा परमेश्वर गा कोनेटे मंडीमिंकू लिंजेन आरुके होय, एठा डेगा कोप्रा गा घोटा खुद मसीह यीशु होय। 21 यीशु मसीह गा द्वारा पूरा भवन म्या सेंग्गोन बेल्लाटे प्रभु गा घाल्जी चोखरा मंदिर गा रुपो सा लक्के होय। 22 दियागा का द्वारा आपे कुरकू भी इनी भवन गेन जुळातिंजुवा होय, देटे आपे पवित्र आत्मा गा द्वारा परमेश्वर गा घल्जी म्या पेळा गा जागा आरुके होय। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation