ಅಪೊಸ್ತಲ್ 7 - गवली उनाई नियम

खाट पांचाती गेन स्तिफनुस गा भाषण

¹ मेटे खाटयाजक नी कोम्बाराके, “चोच इनी आनोवा सच्चो होय?”

² स्तिफनुस नी जवाब जीके, “हे डाईचो एठा जुना सनाकु आजुमे, आलेगा आजा दादा अब्राहम के दियागा हारान पुरान हेन डो सुबान गा पेला जब देटेन मेसोपोटामिया देशोन डा। मेटे तेजोमय परमेश्वर नी डीचके दर्शन जीके।”

³ परमेश्वर नी मंडीके, आम अमा देशो एठा अमा सगाकुटे ओडे डो डी देशोन सेंजू डीके इंज आमके घालेवा।

⁴ मेटे देटेन कसदि कुरकू गा देशो (बेबीलोन) टे ओटजे डो हारान पुरान थंदळ लज्जे। दियागा बाटे गा गुजू गा बादोन परमेश्वर नी डीचके डी पुराटे कोलाटे इनी देशोन सालेनेच डो थंदळकेनेच डेन आम थंदळवा होय।

⁵ डी टेमो परमेश्वर नी डीचके चोच्का संपत्ति बान जिडुका, बनकी नंगा दोडो गा भी डेन जगा ओटो भी बान जिडुका, एटे टाएन कि डी टेमो दियागा तुनिका कोणटे भी बान डा। फिरभी परमेश्वर नी करार डाके कि, इंज इनी देशो अमा एठा अमा बादोन अमा कोणकु टी गेन जेबा।

⁶ परमेश्वर नी इनी भी मंडीके, अमा कोणकु गा कुरकू दूसरा देशोन परदेशी होंगा एठा डी कुरकू दिकुके गुलाम आरुकुवा एठा उफुन साल टाएन दिकुगा सेंग्गोन बुरा व्यवहार डाएवा।

⁷ डाबोलटे परमेश्वर नी मंडीके, जो सेबाई जाटो गा दिकु भाग्य आरुवा एठा दिकुके इंज दण्डो जेबा। एठा डेगा दिकु डी देशो टे ओटटे इनिका देशोन हेजेवा डो इनिका जगान इंजा आराधना डाएवा।

⁸ परमेश्वर नी अब्राहम गा सेंग्गोन खतना गा करार डाके। बादोन जब इसहाक जनम डाएन मेटे इलाएरा दिन दियागा खतना डाके। एठा इसहाक नी हेजा कोणटे याकूब गा खतना डाके एठा याकूब नी हेजा बारह कोणकु गा खतना डाके।

⁹ कुल गा सनाकु नी हेजा डाईटे यूसुफ टे जुलू टे डीचके मिस्र देशो सेने मिंकू गा टीन म्या गुलाम गा रुपोन किजिकेनेच। पेनो परमेश्वर दियागा सेंग्गोन डा।

¹⁰ परमेश्वर नी यूसुफ के सेबाई सिनी टे आराटे मिस्र गा राजा फिरौन गा सम्मान कृपा एठा दिमाग जीके, फिरौन राजा नी यूसुफ के मिस्र देशो लिंजेन एठा हेजा सेबाई उरा लिंजेन राज्यपाल ठहरातिंज्केनेच।

¹¹ जब यूसुफ राज्यपाल डा मेटे सेबाई मिस्र देशो एठा कनान देशोन कळकी सोटके डा, इनी वाजाटे भारी सिनी ओटजे डा एठा आलेगा आजा दादाकुन आटा बान घाटाऊ डा।

¹² पेनो याकूब नी इनी आजुमटे कि मिस्र देशोन आनाजो होय, आलेगा आजा दादाकु के देटेन पेला बार सेनेवा डो आनाजो मोलाटे सा घल्जी मंडीके।

¹³ दूसरा बार जब दिकु आनाजो मोलाटे सा ओले, यूसुफ हेजा डाईचो टे सम्मान ओटजे एठा यूसुफ गा जाटो फिरौन राजा गेन मालूमजे।

¹⁴ मेटे यूसुफ नी हेजा बाटे याकूब एठा हेजा सेबाई सगाकु के जो पांचात्तर कोरोकु डा, मिस्र देशोन हेजे घल्जी खाबोर कुलके।

¹⁵ मेटे याकूब मिस्र देशोन ओले, एठा अदा टेमो गा बादोन देटेन याकूब एठा आलेगा आजा दादाकु गोएन।

¹⁶ दिकु याकूब एठा दियागा कोणकु गा म्हाळाके आलेगा देशो कनान गेन साले। एठा दिकुनी याकूब गा म्हाळाके डी कब्र गेन गळातिंज्के, डीके अब्राहम नी ठहरातिंजके किम्मत जीटे मोलाटे सावे डा। दिकुनी याकूब गा कोणकु के शेकेम शहर गा डी ओटेन गळातिंज्केकु, डीके याकूब नी हमोर गा कोणकुटे टे मोलाटे सावे डा।

¹⁷ “पेनो जब डी करार गा पुराऊ गा टेमो मेरान हेन, जो परमेश्वर नी अब्राहम टे डाके डा, मेटे मिस्र देशो गेन डी कुरकू बाळातिंजे। एठा घोनेच्कुका टाएन।

¹⁸ मेटे मिस्र देशो गेन दूसरा राजा आरोएन जो यूसुफ के बान हाडाई डा।

¹⁹ डीचनी आलेगा जाटो टे चाताराटे आलेगा आजा दादाकु गा सेंग्गोन एटे टाएन बुरा व्यवहार डाके, कि आंटे-बाटेकु इकुगा चफनीकुके टेटाप्पा बोचोएन ताकी दिकु घोयु।

²⁰ डी टेमो मूसा गा जनम डायेन। देटेन परमेश्वर गा नजरेन ठायका अच्छा डा। दियागा आंटे-बाटे नी उखुटे डीचके आफाई महिना टाएन पलातिंज्केनेच।

²¹ पेनो जब दिकु डीचके एठा बान उखुडुका मेटे दिकुनी डीचके उरा गा बल्लान डोकेनेच। मेटे फिरौन राजा गा कोंजाई टे नी डीचके बुलून सैय्येनेच एठा दियागा पालन-पोषान हेजा कोणटे रोंगो डाके।”

²² एठा मूसा के मिस्रीकु गा सेबाई कला इथूकेकु एठा डीच बातो-चितोन एठा कामय गेन शक्तीशाली डा।

²³ “जब मूसा चालीसो साल गा डायेन, मेटे दियागा मनेन हेजा इस्राएली कुरकू टे मिलातिंजू गा बिचार हेन।”

²⁴ देटेन डीचनी म्या इस्राएल गा कोरो गा सेंग्गोन अन्याय डाऊटे धोटे, डीचके बचातिंज्केनेच, एठा मिस्री थंदळ मिठाच के घोच्टे सतातींजके मिठाच गा बदला सैय्ये।

²⁵ डीचनी सोचातिंजके कि दियागा डाईचो टे समझातिंजेवा कि परमेश्वर दियागा टी टे दिकुगा उध्दार डाएवा, पेनो दिकुनी बान समजातिंजडुका।

²⁶ दूसरा दिन जब इस्राएल किंज इकिंजका टापान लक्के डा, मेटे देटेन आदिरजे, एठा इनी मंडीटे दिकिंजके बेल्लाऊ समझातिंजके किंज, कि हे डाईचो, आपेनी डाई-डाईकिंज होय इनिज-दिया लिंजेन चोया अन्याय दडावा?

²⁷ पेनो जो हेजा गा मेराकू लिंजेन अन्याय दडा डा, डीचनी डीचके इनी मंडीटे धक्का जीके, आमके जेनी आधिपाती एठा फैसला दडामिठाच ठहरातिंज्केमी होय?

²⁸ चोच जो रिती टे आमनी कोल्ली म्या मिस्री थंदळ मिठाच के घोच्केनेच चोच इंज्के भी घोगेच चाहतावा?

²⁹ इनी बातो आजुम्टेका देटेन हिगरायेन एठा इनिघल्जी देटेन मिस्र देशो टे मूसा साळुपजे एठा मिधान देशोन परदेशी आरुटे थंदळ लज्जे। एठा देटेन दियागा बरी कोणकिंज गा जनम डाएन।

³⁰ “मिधान देशोन मूसा चालीसो साल थंदळ गा बादोन मूसानी म्या स्वर्गदूत के डोकेनेच एठा परमेश्वर नी डी स्वर्गदूत गा द्वारा सीनई टुक्की गा डोंगोरेन जुलू मिनी झाळी गा आफो गेन दर्शन जीटे बातोवे।”

³¹ जब मूसानी जुलू मिनी झाळी के डोके जो राखो बान लक्के डा, मेटे डीच अचम्बोएन मेना एठा जब दोडो गा घल्जी मेरान ओले, मेटे प्रभु गा इनी आवाज आजुम्के,

³² “इंज अमा आजा दादाकु, अब्राहम गा परमेश्वर, इसहाक गा परमेश्वर एठा याकूब गा परमेश्वर होय।” मेटे मूसा हिगरा टे कपातिंजू लज्जे, येटे टाएन कि डीचके दोडो गा हिम्मत बानजे।

³³ मेटे प्रभु नी डीचके मंडीके, इंजा प्रति मन गघाल घल्जी आमगा नंगा टे बुट्टा कोलाकी, चोयाकी जो जगान आम टेंगेंके होय, देटेन चोखरा जगा होय।

³⁴ इंज्नी सच्चोका आलेगा कुरकू गा हालत के जो मिस्र देशो गेन होय, डोके होय। इंज्नी दिकुगा तळपातिंजू जाम आजुम्के होय। इनिघल्जी इंज दिकुके आरा घल्जी आगुरुके मेना। नका हेजे, इंज आमके मिस्र देशोन कुल्कोम्बा।

³⁵ “इनिज डीका मूसा होय डीचके इस्राएलकुनी इंकार केनेच डा।” एठा कुरकू नी मंडीके डा, आमके जेनी आले लिंजेन आधिपाती एठा फैसला दडामिठाच ठहरातिंज्केमी होय? डीचके का परमेश्वर नी आधिपाती एठा आरामिठाच ठहरातिंजटे डी स्वर्गदूत गा द्वारा डीचनी डीचके झाळीन दर्शन जीके डा, कुल्केनेच।

³⁶ इनिका कोरो मिस्र देशो एठा राटा समुद्रा एठा सुनसान जगान चालीसो साल टाएन अचम्बो कामय एठा चिन्हा घाले-घालेटे दिकुके कोलालेकू।

³⁷ येटेन डीका मूसा होय, डीचनी इस्राएली कुरकू टे मंडीके, परमेश्वर आपेगा डाईचो तलाटे आपे घल्जी इंजा रोंगो म्या परमेश्वर गा कोनेटे मंडीमिठाच टूलेवा।

³⁸ इनिका मूसा म्या अगुवा गा रुपोन आलेगा आजा-दादाकु सेंग्गोन डा जब सुनसान जगान गोलाके डा। जो कोरोनी डोंगोरेन मण्डली गा तलान स्वर्गदूत गा सेंग्गोन सीनई टुक्की लिंजेन बातोवे देटेनका मूसान जीवन जिऊ मिनी वचन घाटाएन एठा डीचनी डीके आले टाएन इडीले।

³⁹ पेनो आलेगा आजा दादाकु नी दियागा मनातिंज्दुका बाने बनकी डीके ठुकरातिंजटे मिस्र देशोन डाबोलटे चाहता डा।

⁴⁰ एठा दिकुनी मूसा डाईटे हारून टे मंडीके, आलेगा घल्जी येनोगो गोमेजके आरोएच जो आलेके मिस्र देशोन डाबोलटे सेने घल्जी अगुवाई डाए। चोयाकी येटेन मूसा जो आलेके मिस्र देशो टे कोलाटे सालेमी डा, आलेन बान मालूम कि दियेन चोच डाएन?

⁴¹ डी दिनेन दिकुनी कालोर गा म्या मूर्ति आरुके, डी मूर्ति गा सम्मान बलिदान पेळेच्के। एठा इकुगा टी गा कामय गेन ध्यानु लज्जे।

⁴² एनेटे परमेश्वर नी नराजोटे दिकुके बदळान सूर्य, चद्रमा एठा इफुलकूके इकुगा घोमेजकु गा रुपोन पूजा गा घल्जी आराकेकु। जैसा परमेश्वर गा कोनेटे मंडीमिंकू गा पुस्तक गेन ओल्के होय, हे इस्राएली कुरकूनौर, चोच आपे सुनसान जगान चालीसो साल टाएन जानवरकु बलि एठा आनाजो बलिदान इंज्के का पेपेळेच डा।

⁴³ आपेनी डेरा के आबुंजके डेन आपेगा गोमेच मोलेक गा मूर्ति एठा गोमेच रिफान गा इफिल गा फुटू डा। मतलब डी मूर्तिनौर के डीके आपेनी आराधना दडा घल्जी आरुके डा। इनिघल्जी इंज आपेके बेबीलोन शहर गा पारेन साकोम्बा डो सुबंकुवा।

⁴⁴ गवाही गा डेरा सुनसान जगान आलेगा आजा दादाकु गा तलान गेन डा। जैसा परमेश्वर नी ठहरातिंज्के, डीचनी मूसा टे मंडीके, जो आकार आमनी डोके होय डेगा रोंगो इनिके आरोए।

⁴⁵ घोनेच साल गा बादोन डीका डेरा आलेगा आजा दादाकु नी जुना जामाना टे घाटाटे यहोशू गा सेंग्गोन येटेन सालेनेच। जो टेमो कि दिकुनी डी अलग्गो जाटो गा कुरकू लिंजेन हाक घाटाएन। दिकुके परमेश्वर नी आलेगा आजा दादाकु गा सम्माटे ओटकेकु, एठा डी डेरा राजा दाऊद गा टेमो टाएन थंदळके।

⁴⁶ राजा दाऊद लिंजेन परमेश्वर नी कृपा डाके। इनिघल्जी डीचनी याकूब गा परमेश्वर घल्जी डेरा थंदळ गा बिनती डाके।

⁴⁷ पेनो दियागा कोणटे सुलैमान नी दिया घल्जी मंदिर आरुके।

⁴⁸ पेनो परमप्रधान टी गा आरुके मंदिर गेन बान थंदळ, जैसा कि यशायाह जो परमेश्वर गा कोनेटे मंडीमिठाच गा पुस्तक गेन ओल्के होय,

⁴⁹ परमेश्वर मंडीवा होय, स्वर्ग इंजा सिंघासन एठा पृथ्वी इंजा नंगा तला गा पिळा होय, इंजा घल्जी आपे तुनिका रोंगो मंदिर आरोएवा? एठा इंजा आराम्बो गा तुनी जगा होंगा?

⁵⁰ इंज्नी खुद स्वर्ग एठा पृथ्वी बरी भी जगान सेबाईका आरुके होय।

⁵¹ “हे जिद्दो, दियागा बातो आजुमटे इंकार दडामिंकू कुरकू, आपे हमेशा पवित्र आत्मा गा खिलाफ दडावा होय। जैसा आपेगा आजा दादाकु दडा डा, डेनोगोका आपे भी दडावा होय।

⁵² परमेश्वर गा कोनेटे मंडीमिंकू हारेक के आपेगा आजा दादाकु सतातिंजकेकू एठा दिकुनी डी परमेश्वर गा कोनेटे मंडीमिंकू गा घोच्केकु, दिकुनी धर्मी मसीह गा हेजे गा भविष्यवाणी डाके डा। एठा जब मसीह हेन मेटे आपेनी डीचके धोका जीके एठा घोच्केनेच।

⁵³ आपेनी स्वर्गदूत गा द्वारा ठहरातिंज्के मूसा गा नियम के घटायेन, पेनो डेगा पालन बान दाडुका।”

स्तिफनुस गा घोगेज

⁵⁴ इनी बातो आजुमटे यहूदी अगुवाकु नी खिजोएन एठा स्तिफनुस लिंजेन तिळींज रीरिगीट लज्जे।

⁵⁵ पेनो डीचनी पवित्र आत्मा टे भेट्टी टे स्वर्ग गा कोने डोके एठा परमेश्वर गा तेज एठा यीशु के परमेश्वर गा जेवना कोनेन टेंगेन धोटे

⁵⁶ मंडीके, “डोगे, इंज स्वर्ग के खुल्लाटे, एठा कोरो गा कोण के परमेश्वर गा जेवना कोनेन टेंगेनटे दोडोवा मेना।”

⁵⁷ मेटे दिकुनी खाट आवाज टे चिल्लातिंजटे लुटूर बंदोके, एठा म्या चित्तो दिया लिंजेन झापकातिंजे।

⁵⁸ यरूशलेम शहर गा बल्लान ओटजे डो घोटा लेलेचा लज्जे, एठा डीचके घोच्केनेच। स्तिफनुस लिंजेन आनोवा तोटाका कुरकू नी इकुगा झग्गा शाऊल जीमू म्या जवान गा मेरान कोलाटे डोके डा।

⁵⁹ एठा डी स्तिफनुस के घोटा लेचाएका लज्जे, एठा देटेन इनी मंडीटे प्रार्थना दडा लज्जे, “हे प्रभु यीशु, इंजा आत्मा के मनेन ने।”

⁶⁰ डाबोलटे ठोपरे जेगाटे खाट्टेका हाकोके, “हे प्रभु, इंकुके इनी पापो गा आनोवा बाकी तोटाका।” एठा इनी मंडीटे गोएन।