ಅಪೊಸ್ತಲ್ 5 - गवली उनाई नियम

पवित्र आत्मा टे लाबळ मंडी

¹ हनन्याह जीमू म्या कोरो, एठा दियागा जापाएटे सफीरा नी अदा ओटे किजीके, जो दिकुगा डा।

² एठा डेगा भाव गा टे अदा हेजा घल्जी डोके, एठा इनी बातो दियागा जापाएटेन भी मालूम डा, एठा डेगा म्या भागो साटे कलामके मिंकू चेलाकूके जीके।

³ पेनो पतरस नी कोम्बाराके, “हे हनन्याह! जो शैतान नी अमा मन गेन पवित्र आत्मा टे लाबळ मंडी गा बिचार येंडाके होय। एठा आमनी अमा किजीके मिनी ओटे गा भाव गा म्या भागो अमा घल्जी डोके होय।

⁴ चोच किकीजी गा पेला डी ओटे अमा बाऊ डा? एठा जब किजेन डा मेटे डेगा भाव अमा कपजान बाऊ डा? अमा मनेन इनी बुरा कामय गा बिचार टोनोगो टे हेन? आमनी कुरकू टे बाने, पेनो परमेश्वर टे लबाळ मंडीके।”

⁵ इनी बातो आजुमटे का हनन्याह ओटेन बोचोएन, एठा डीच गोएन, एठा सेबाई आजुम मिंकून भेबाव हिगरा टे बोचोएन।

⁶ डाबोलटे जावनकु नी हेन डो दियागा म्हाळा आरुटे बल्लान सैय्ये डो गळातिंज्के।

⁷ अंदजोटे आफाई घंटा बादोन दियागा जापाएटे, जो चोचकाभी डायेन डा बान मालूम, तलान हेन।

⁸ मेटे पतरस नी दियाटे कोम्बाराके, “चोच आपिंज बर्खिंजनी डी ओटे एटोगेन का किजीके डा?” डीचनी जवाब जीके, “हां, एटोगेन का।”

⁹ पतरस नी दियाटे कोम्बाराके, “येटेन चोच बातो होय, कि आपिंज बर्खिंज प्रभु गा आत्मा गा अंदजो घल्जी म्याका सेंग्गोन राजेन? डोगे अमा साना के गगाळातिंज मिंकू दारोजोन का टेंगेंके होय, एठा दिकु आमकेभी बल्लान साकोम्बा।”

¹⁰ मेटे देटेन तुरुटो दियागा नंगा मेरान ओटेन बोचोएन एठा डीच गोएन एठा जवानकुनी तलान हेंडो डीचके गोएन का डोकेनेच, एठा बल्लान साटे दियागा सानाटे गा मेरान गळातींजकेनेच।

¹¹ यरूशलेम शहर गेन सेबाई मसीह गा मंडली लिंजेन एठा इनी बातो गा सेबाई आजुम मिंकून भेबाव हिगरा बाकायेन।

कलामके मिंकू चेलाकू द्वारा चिन्हा एठा चमत्कार

¹² कलामके मिंकू चेलाकू द्वारा घोनेच चिन्हा एठा अचम्बो कामय कुरकू गा तलान घाले डा, एठा मसीह सेबाई विश्वासी म्या चित्तो टे सुलैमान गा साफारीन गोलाऊ डा।

¹³ पेनो जो कुरकू नी आए टाएन यीशु लिंजेन विश्वास बान दोडुका डा, दिकु तलाटे जेकाभी विश्वासीकु गा सेंग्गोन जुळातिंजू गा हिम्मत बान डाऊ डा।

¹⁴ फिरभी जादा-टे-जादा विश्वासीकु प्रभु गेन हेंडो बेल्लाएन, एठा जापाएकु-सनाकु गा म्या खाट समुदाय आरोएन।

¹⁵ जो चोचकाभी कलामके मिंकू चेलाकू दडा लक्के होय डेगा वोजीटे कुरकू बिमारीकु के साळाक्कोन सब साटे, पारकोमनौर एठा चटाई लिंजेन गीटीचकु डा, ताकी जब पतरस हेनकी, मेटे दियागा साईली का दिकु तलाटे जेका लिंजेन बोचोयु।

¹⁶ यरूशलेम शहर गा आसो-पासो गा पुरानौर टे भी घोनेच कुरकू बिमारी एठा भूतोकु मुके सतातींजके मिंकूके कलामके मिंकू चेलाकू साकु डा, एठा दिकु सेबाईकु सजाऊ डा।

कलामके मिंकू चेलाकूके जेलेन केखेट

¹⁷ मेटे खाटयाजक एठा दियागा सेबाई सोपतीकु जो सदूकीयों गा समुदाए गा डा, दिकु कलामके मिंकू चेलाकू टे जुलू लज्जे। इनिघल्जी दिकुनी दिकुगा खिलाफबेन कामय दडा गा निर्णय डाके।

¹⁸ कलामके मिंकू चेलाकू उठाटे जेलेन केटकेकु।

¹⁹ पेनो रातो प्रभु गा म्या स्वर्गदूत नी जेल गा दारोजो उघळाटे दिकुके बल्लान ओटटे मंडीकेकु,

²⁰ “सेने, यरूशलेम गा मंदिर गेन टेंगेंटे, कुरकू के इनी हमेशा गा जीवन गा बारेन घाले।”

²¹ कलामके मिंकू चेलाकू ठायका फेजेरका यरूशलेम गा मंदिर गेन ओले एठा जैसा दिकुके स्वर्गदूत नी घाल्के डा शिक्षा जिऊ लज्जे। पेनो खाटयाजक एठा दियागा सोपतीकुनी हेन खाटसभा के एठा इस्राएली कुरकू गा सेबाई जुना सनाकुके गोलाकेकु, एठा जेलेन खाबोर कुल्के कि दिकुके साकु।

²² पेनो मंदिर गा जागली मिंकुनी देटेन आदिरजे डो दिकुके जेलेन बान दोडुका, एठा हिराटे घाल्के,

²³ “आलेनी जेलके खाट ध्यान टे बांदोटे, एठा जागली मिंकूके बल्लान दाराजोन टेंगेंटे डोकेकु। पेनो जब दारोजो उगळके, मेटे तलान जेका बान घाटाडुका।”

²⁴ जब यरूशलेम गा मंदिर गा जागलीमिंकू गा मुख्या एठा मुख्यायाजक कुनी इनी खाबोर आजुम्के, मेटे दिकुगा बारेन भारी चिंतान बोचोएन कि येनेगो चोच हाल डाऊवा।

²⁵ एटोगेन जेकानी हेंडो डीचके घाल्के, “डोगे, दिकुके आमनी जेलेन केटकेकु डा, डी कोरो यरूशलेम गा मंदिर गेन टेंगेंटे कुरकू के इथूलक्के।”

²⁶ जब दिकुनी इनी आजुम्के, मेटे यरूशलेम गा मंदिर गा जागलीमिंकू गा मुख्या जागलीमिंकू गा सेंग्गोन मंदिरेन ओले, देटेन ओलेडो कलामके मिंकू चेलाकूके खाट चावळी गा सम्मान सालेकु, पेनो जबरदस्ती टे बाने। चोयाकी दिकु कुरकू टे हिगरा डा, कि कुरकू घोटा लेचा-लेचाटे दिकुके घोचकुवा।

²⁷ जब दिकु खाटसभा गा सम्मान टेगेनके डा मेटे खाटयाजक नी दिकुटे कोम्बाराके,

²⁸ “चोच आलेनी आपेके हुशार टे घाल्टे हुकूम बान जिडुका डा, कि आपे इनी जीमू टे बाकी इथू? फिरभी आपेनी सेबाई यरूशलेम शहर के आपेगा शिक्षा टे भेट्टिकेकुवा होय एठा आपे इनी कोरो गा घोगेज गा आनोवा जबरदस्ती आले लिंजेन येंडा चाहतावा।”

²⁹ मेटे पतरस एठा अलग्गो कलामके मिंकू चेलाकू जवाब जीके, “कोरोकु गा हुकूम टे खाट्टे परमेश्वर गा हुकूम गा पालन दडाका आलेगा कामय होय।

³⁰ आलेगा आजा दादाकु गा परमेश्वर नी यीशु के गोएन मिठाच जाटे जीटाकेनेच, डीचके आपेनी क्रूस लिंजेन लाटकातिंजटे घोच्केनेच डा।

³¹ डीचके का परमेश्वर नी प्रभु एठा उध्दार दडामिठाच ठहरातिंजटे हेजा गा जेवना टी टे खाट आरुकेनेच, ताकी इस्राएली कुरकू इकुगा बुरा सोच-बिचारनौर एठा कोरानौर टे परमेश्वर गा कोनेन मोराएन एठा दियागा द्वारा आपना पापो टे मापोएकेच होना।

³² आले इनी बातो गा गवाह होय एठा पवित्र आत्मा भी, डीके परमेश्वर नी डीचके जीके होय, जो दियागा हुकूम मनातिंजेवा होय।”

³³ जब चावळी गा मुख्याकुनी इनी आजुम्के मेटे दिकु कलामके मिंकू चेलाकूके घोगेच चाहता डा।

³⁴ पेनो गमलीएल जीमू म्या फरीसि कुरकू नी जो मूसा गा नियम गा गुरूजी एठा सेबाई कुरकू गेन आदर्णीय डा, खाटसभान टेंगेंटे कलामके मिंकू चेलाकूके थोळासा टेमो गा घल्जी बल्लान ओट गा हुकूम जीके।

³⁵ मेटे डीचनी कुरकू टे मंडीके, “हे इस्राएली कुरकू, जो चोचकाभी इनी कोरोकु टे दडा चाहतावा होय सोच बिचार टे डाए।

³⁶ चोयाकी इनी दिन टे पेला थियूभाग्य इनी दावा मेंबा डाकी इंजभी चोच्का मेना। एठा अंदजोटे उफुन सेद्दी कुरकू दियागा साथो जिऊमिंकू आरोएन। देटेन गोएन, दियागा ममानातिंज सेबाई कुरकू बिगळातिंजे एठा दिकुगा नामो निशान भी बान थंदळकु।

³⁷ डेगा बादोन श्रिगीनती गा दिनेन गलील जिल्हान थंदळ मिंकू यहूदा हेन एठा अदा कुरकू हेज कोनेन जेकू। पेनो देटेन गोएन एठा साथो जिऊमिंकूभी इंगन-हुगनजे।

³⁸ इनिघल्जी नका इंज आपेटे मंडीवा मेना, इनी कोरोकु टे लेंक्कीन का थंदळे एठा दिकुके एकलाका आराकु एठा सेंडाएकु, चोयाकी अगर येटेन योजना या कामय कोरोकु गा कोनेटे डाऊ मेटेनी उथुरुवा।

³⁹ पेनो अगर परमेश्वर गा कोनेटे होय, मेटे आपे डीके चोलाकाभी उथुरे बाने। कही येनेगो बाकी डाऊ, कि आपे परमेश्वर टे भी लडाई मिंकू ठहरातिंजू।”

⁴⁰ मेटे दिकुनी दियागा बातो मनातिंजे एठा कलामके मिंकू चेलाकूके हकोटे मुंडाके कु। एठा दिकुके इनी हुकूम जीके कि दिकु नका टे यीशु गा जीमू टे चोच्का बाकी मंडी एठा डाबोलटे दिकुके आराकेकु।

⁴¹ दिकु इनी बातो टे कुशोटे खाटसभा गा सम्माटे ओले मेना, कि आले यीशु गा खातिर अपमान सेसेन गा लायको ठहरातिंजे।

⁴² येनेगा हारेक दिन यरूशलेम गा मंदिर गेन एठा उरा-उरा गेन कलामके मिंकू चेलाकू लगातार इथू डा एठा अच्छा खाबोर घागल डा कि यीशु का मसीह होय।