ಅಪೊಸ್ತಲ್ 3 - गवली उनाई नियम

लंगळा भिखारी गा सजाऊ

¹ पतरस एठा यूहन्ना डया गा आफाई बाजान प्रार्थना गा टेमो यरूशलेम गा मंदिर रेन चेल्के डा।

² म्या कोरो जो जनम टे लंगळा डा, डीचके कुरकू हारेक दिन मंदिर गा दरवाजा लिंजेन जो अच्छा फाटक मेंबा होय सुबनेच डा कि देटेन यरूशलेम गा मंदिर गेन सेने मिंकूटे भिको आसे।

³ जब डीचनी पतरस एठा यूहन्ना के यरूशलेम गा मंदिर गेन सेने टे डोकेकिंज, मेटे दिकिंजा टे भिको आसिवे।

⁴ पतरस नी यूहन्ना गा सेंग्गोन सीधा डीच कोने धोटे मंडीके, “आलिंज कोने डोगे!”

⁵ डीच थोळासा घाटाऊ गा असान दिकींज्के डेके-डेकेन दोडो लज्जे।

⁶ मेटे पतरस नी मंडीके, “चाँदी एठा सोना मेटे इंजा मेरान बाऊ होय, पेनो जो इंजा मेरान होय, डी आमके जेबा मेना। यीशु मसीह नासरी गा जीमू टे बिडे एठा सेंद्राए।”

⁷ पतरस नी दियागा डाखुरी टी उठाटे डीचके ठुल्केनेच। एठा तुरुटो दियागा नंगा एठा टोपरेन ताखात हेन।

⁸ डीच मठान उचटे टेंगेनजे एठा सेंद्रा इखाट लज्जे। सेंद्रा, मठान-उचटे, एठा परमेश्वर गा स्तुति दडा लठ्ठाका दिकुगा सेंग्गोन यरूशलेम गा मंदिर गा दरोमेन ओले।

⁹ सेबाई कुरकू नी डीचके सेंद्रा इखाट एठा परमेश्वर गा स्तुति दडा धोटे,

¹⁰ चिनाएनेच कि येटेन डीका लंगळा भिखारी डा, जो यरूशलेम गा मंदिर गा अच्छा फाटक गेन सुबानटे भिको आसी डा। डी घाटना टे जो दियागा सेंग्गोन डाएन डा, दिकु भेबाव अचम्बो एठा बिचारजे मेना डा।

सुलैमान गा झोपा पतरस गा खाबोर

¹¹ जब डीच पतरस एठा यूहन्ना के उठाकेकिंज डा, मेटे सेबाई कुरकू भेबाव अचम्बो लठ्ठाका सुलैमान गा डी छापरी गा मेरान साळुपटे हेन।

¹² इनी धोटे पतरस नी कुरकू टे मंडीके, “हे इस्राएली कुरकू आपे इनी कोरो लिंजेन चोया अचम्बो दडावा होय, एठा आपे आले कोनेन चोया डेके-डेकेन दोडो लक्के, कि मेनकी आलेनी आलेगा शक्ती या भक्ति टे इनिज्के सेंद्रा-इखाट गा लायको आरुकेनेच।”

¹³ अब्राहम, इसहाक एठा याकूब गा परमेश्वर, आलेगा जुना सनाकु गा परमेश्वर नी यीशु गा महिमा डाके, पेनो आपेनी डीचके घोगेच घल्जी यहूदी अगुवाकु गा टीन जीकेनेच। जब पिलातुस नी डीचके आरा गा बिचार डाके, मेटे आपेनी दियागा सम्मान यीशु गा इंकार डाके।

¹⁴ आपेनी चोखरा एठा धर्मी गा इंकार डाके। एठा चहतावा कि म्या घोगेच के आपेगा घल्जी आराकेच मेना।

¹⁵ आपेनी हमेशा गा जीवन गा पाजेर के घोच्केनेच लेकिन परमेश्वर नी डीचके डाबोलटे जीटाकेनेच एठा आले इनी बातो गा गवाह होय।

¹⁶ मसीह यीशु गा जीमून विश्वास गा वोजीटे इनी कोरो डीचके आपे हाडाई, डीचके आपे इनी टेमो दोडो लक्के होय ताखात जीके होय। इनी कोरो मसीह यीशु गा जीमू गेन एठा विश्वास गा द्वारा पूरा खिजाटे सजाएन होय, जैसा कि खुद डोगेवा होय।

¹⁷ “नका हे डाईचो, इंजेन मालूम होय कि आपेनी एठा अगुवाकु नी यीशु मलुमका बानटे घोच्केनेच चोयाकी आपे बान कि देटेन मसीह डा।

¹⁸ पेनो जो बातो के परमेश्वर नी सेबाई परमेश्वर गा कोनेटे मंडीमिंकू गा द्वारा पेला घाल्के डा, कि यीशु मसीह कासुटूलेबा एठा घोजेज्बा। डीचनी दिकुके सच्चोका डा टे टिपीके।

¹⁹ इनिघल्जी, मन बदलाए एठा परमेश्वर गा कोनेन हिरागे ताकी आपेगा पापो मापोकी, परमेश्वर आत्मिक शक्ती हेजेवा।

²⁰ एठा देटेन यीशु कुलेच्बा जो मसीह डीचके डीचनी आपेगा घल्जी पेलाटेका कलामकेनेच होय।

²¹ यीशु के स्वर्ग गेन डी टेमो टाएन थंदळ जरुरी होय, जब परमेश्वर डी चीजो के उनाई आरोवा जो डीचनी आरुके होय। घोनेच टेमो परमेश्वर नी कुरकू के इनी गघाल घल्जी चोखरा परमेश्वर गा कोनेटे मंडीमिंकू द्वारा येनेगो दडा गा वादा डाके।

²² जैसा कि मूसानी मंडीके, ‘प्रभु परमेश्वर आपेगा डाईचो तलाटे आपेगा घल्जी इंज रोंगो म्या परमेश्वर गा कोनेटे मंडीमिठाच के कुलेच्बा, जो चोचकाभी देटेन आपेटे मंडेबा, दियागा आजुमे।’

²³ पेनो हारेक कोरो जो डी परमेश्वर गा कोनेटे मंडीमिठाच गा बान आजुम, देटेन कुरकू तलाटे नशोकुवा।

²⁴ शमूएल टे साटे दियागा बादोन मिंकू टाएन जोभी परमेश्वर गा कोनेटे मंडीमिंकू नी बातो मंडीके दिकु सेबाईकु नी इनी दिन गा अच्छा खाबोर घाल्के होय।

²⁵ आपे सेबाईकु परमेश्वर गा कोनेटे मंडीमिंकू गा कोंकु एठा करार गा भागी मेना जो परमेश्वर नी आपेगा जुना सनाकु टे टोलके, जब डीचनी अब्राहम टे मंडीके, ‘अमा कोण गा द्वारा पृथ्वी गा सेबाई उरा आशीर्वाद घाटाऊवा।’

²⁶ परमेश्वर नी हेजा सेवाक के गोएन मिठाच जाटे जीटाटे सेबाईकु टे पेला आपेगा मेरान कुल्केनेच। ताकी आले तलाटे हर म्याखोम के आपना जीवन गा पापोमय तरीका टे परमेश्वर गा कोनेन ईखाडेन मदत डाए।”