ಅಪೊಸ್ತಲ್ 28 - गवली उनाई नियम

माल्टा द्वीप गेन पौलुस गा स्वागत

¹ जब आले सेबाईकु साजा रुपोटे धुरा गेन आदिरजे। मेटे आलेन मालूम के कि इनी द्वीप गा जीमू माल्टा डा।

² एठा देटेन गा थंदळ मिंकू नी आले लिंजेन आलेगा अच्छा देखभाल डोके। चोयाकी साल एठा रारम गा वोजीटे दिकुनी सिगेल लाम्टाटे आलेगा स्वागत डाके।

³ जब पौलुस नी चाखन गा म्या गठी सिगेलेन लिंजेन डोके। मेटे म्या बिंज आचो गा वोजीटे वोटजेडो दियागा टी टेन गोदेन।

⁴ जब डी थंदळ मिंकू नी बिंजके दियागा टी टेन आखाटे डोकेनेच। मेटे इनकू गेन मंडीके, “सचमुच येदेन कोरो हत्यार होय, कि समुंद्र गा आडीटे बचातिंज जे होय। पेनो आलेगा देवी न्याय नी डीचके जीटा बान थंदळ डाए।”

⁵ मेटे डीचनी बिंजके सिगेल गेन झटककेनेच, एठा दियेन चोच्का नुकसान बान दडुका।

⁶ दिकु कुरकू येदेन इंतजार दडा लक्के, कि दियागा टी साळजूवा, डीच तुनिकाभी टेमो घोजुवा। पेनो जब दिकु घोनेच टेमो टाएन दोडो लक्के एठा डोके कि दियागा चोच्काभी नुकसान बान दडुका। मेटे एठाभी बिचार टे मंडीके, “येदेन मेटे तुनिका गोमेच होय।”

⁷ डी जगा गा आसो-पासो पुबलियुस जीमू गा डी द्वीप गा याजक गा वोटे डा। डीचनी आलेके आपना उरान सैय्येमी आफाई दिन टाएन आलेगा गा सेवा डाके।

⁸ पुबलियुस गा बाटे पक्काटे राँ एठा मुळा कासु गा बिमारीन डा। इनिघल्जी पौलुस नी दियागा मेरान खुलीन ओलेडो प्रार्थना डाके, एठा दिया लिंजेन टी धोटे डीचके साजाकेनेच।

⁹ जब एगो डायेन, मेटे डी द्वीप गा बाकी बिमारीकु पौलुस गा मेरान हेके, एठा साजाकेकु।

¹⁰ दिकुनी आलेगा घोनेच आदर डाके, आफाई महीन गा बदोन जब आले सेने गा घल्जी तैयारके डा। मेटे जो चोच्का आलेगा घल्जी जरुरी डा, खाट डोंगा लिंजेन डोके।

माल्टा द्वीप टे रोम गा कोनेन

¹¹ आफाई महीन गा बदोन आलेनी सिकन्दरिया शहर चेल्के खाट डोंगा लिंजेन यात्रा सुरुके। येदेन खाट डोंगा रारम गा वोजीटे इनी द्वीप लिंजेन का ठहरातिंजके डा। इनी खाट डोंगा गा सम्मा गा भागो लिंजेन जोळा घोमेजकिंज गा म्या चिन्हा डा।

¹² सुरकूसा शहर गेन अकोळा येंडाटे आले आफाई दिन टाएन थंदळके।

¹³ देटे टे सम्मान बाळतिंजटे आले रेगियुम पूरा गेन हेके। एठा म्या दिन गा बदोन दक्षिण टे कोयो लज्जे, मेटे दूसरा दिन पुतियुली शहर गेन हेके।

¹⁴ देटेन आलेके विश्वासी डाईचो घाटाके, एठा दिकुगा मंडीटे आले दिकुगा एनेन याई दिन टाएन थंदळके। दिकुनी यात्रा सुरुके एठा इनी रोंगो टे आले रोम शहर के चेल्के।

¹⁵ रोम शहर टे अदा विश्वासी डाईचो नी आजुम्के कि आले देटेन हेजे लक्के होय। एठा दिकु आलेटे मिलातिंजू एठा आलेके रोम शहर सा गा घल्जी अप्पियुस पूरा गा हाटी एठा आफाई सराए पूरा टाएन हेके। दिकुके धोटे पौलुस नी परमेश्वर गा धन्यवाद डाके, एठा घोनेचका होशला डोके।

¹⁶ जब आले रोम शहर गेन आदिरजे, मेटे पौलुस के म्या सिपाई गा सेंग्गोन जो दियागा जागली दडा डा, एकला थंदळ गा हुकूम डायेन।

पौलुस रोम शहर गेन

¹⁷ आफाई दिन गा बदोन डीचनी यहूदी कुरकू गा मुख्या कुरकू के हाकोलेकु, एठा जब दिकु म्याखाठ्ठयेन मेटे डीचनी मंडीके, “हे डाईचो, इंज्नी आपना कुरकू गा या जुना सनाकु गा रितो गा खिलाफ गेन चोच्का बान दडुका, डाबोलटे भी बंदी हारूटे यरूशलेम शहर टे रोमी सरकार गा टी गेन जीकेनेच।

¹⁸ दिकुनी इंज्के धोटे आरा चाहताके चोयाकी इंजेन गुजू गा लायको तुनिका आनोवा बाऊ डा।

¹⁹ पेनो जब यहूदी धर्म गा सम्मा कोरोकु इनिज खिलाफ गेन मंडी लज्जे। मेटे इंज्के रोमी सम्राट कैसर टे आसी बोचोयेन कि येदेन रोम शहर गेन इंजा न्याय डाए। येदेन बाने कि इंज्के आपना कुरकू लिंजेन तुनिका आनोवा येंडा डा।

²⁰ इनिघल्जी इंज्नी आमके हाकोलेमी होय, कि आमटे मिलातिंजकु एठा बातो चितो डाए। चोयाकी इस्राएली कुरकू गा आसा गा घल्जी, जो कि मसीह होय, इंज इनी साकळी टे टोल्के होय।”

²¹ दिकुनी दियाटे मंडीके, “न आलेनी अमा बारे गेन यहूदिया जिल्हा गा कुरकू टे चिठ्ठी घाटके। एठा न विश्वासी डाईचो टे जेकानी हेंडो अमा बारे गेन चोच्का घाल्ले, एठा न बुरा मंडीके।

²² पेनो आम बिचार चोच होय? डीका आले आमटे चाहतावा होय। चोयाकी आलेन मालूम होय, कि हरेक जगा इनी दल गा खिलाफ गेन कुरकू बातोवा होय।”

²³ मेटे डी यहूदी कुरकू नी पौलुस गा घल्जी म्या दिन ठहरातिंजके, एठा घोनेचका कुरकू दियागा एनेन गोलयेन। एठा डीच परमेश्वर गा राज्य गा गवाही जिऊ लठ्ठाका, एठा मूसा गा नियम एठा परमेश्वर गा कोनेटे मंडीमिठाच गा पुस्तक टे यीशु गा बारे गेन समज-समझतिंजटे फेजेर टे सिगुरूप टाएन घागल लक्के।

²⁴ मेटे अदाकु नी डी बातो के बातो लिंजेन जो पौलुस नी मंडीके विश्वास डोके। एठा अदाकु नी विश्वास बान दोडुका।

²⁵ जब दिकु हिकुका गेन म्याका बान थंदळ डुका। मेटे पौलुस गा इनी म्या बातो गा मंडीके लिंजेन ओले, “पवित्र आत्मा नी परमेश्वर गा कोनेटे मंडीमिठाच यशायाह गा द्वारा आपेगा जुना सनाकु टे साहीका मंडीके।

²⁶ ‘सेने डो इनी कुरकू टे मंडीके, कि आजुम्बा मेटे थंदळवा, पेनो बान समझतिंजू। एठा दोडोवा मेटे थंदळवा, पेनो बान चीनया।

²⁷ चोयाकी इनी कुरकू गा मन जेबोर, एठा दिकुगा लुटूर भेट्टिके होय। एठा दिकुनी आपना मेटके बंदोके होय। एगो बाकी डाऊ कि दिकु चोलकाभी मेट टे डोगे, एठा लुटूर टे आजुमे, एठा मन टे समझतिंजे, एठा इखाटदे, एठा इंज दिकुके साजाकु।’

²⁸ इनिघल्जी आपे चीनया, कि परमेश्वर गा इनी उध्दार गा कथा अलग्गो जाटो गा कुरकू गा मेरान कुलके होय। एठा दिकु स्वीकार रेवा।”

²⁹ जब डीचनी इनी मंडीके, मेटे यहूदी अधिकारी हिकुका गेन घोनेच आम-इंज दडा लज्जे, एठा देटे टे ओले।

^30-31 एठा पौलुस पूरा बरी साल आपना किराया गा उरा गेन थंदळके। जो दियागा मेरान हेजे डा, डी सेबाईकु टे मिलातिंजू लक्के। बिना तुनिका हिगरा एठा बिना तुनिका रुकावट गा परमेश्वर गा राज्य गा प्रचार दडावा एठा प्रभु यीशु मसीह गा बातो इथूलक्के डा।