ಅಪೊಸ್ತಲ್ 27 - गवली उनाई नियमपौलुस गा रोम कुकूल 1 जब फेस्तुस राज्यपाल द्वारा इनी पाक्कायेन, कि आले खाट डोंगा द्वारा इटालीया जिल्हा गेन रोम शहर गेन सेने। मेटे दिकुनी पौलुस एठा अदा अलग्गो कैदीकु के भी सम्राट औगुस्तुस गा दल गा सुबेदार युलियुस गा टी गेन जीकेनेच। 2 अद्रमुत्तियुम शहर गा म्या खाट डोंगा लिंजेन जो आसिया जिल्हा गा धुरान गा जगा टे सेनेगें डा, डे लिंजेन डा गा कोरा टे द्वारा आलेनी आपना यात्रा सुरुके। एठा अरिस्तर्खुस जीमू गा जो मकिदुनिया जिल्हा गा थिस्सलुनीकियो शहर गा थंदळ मिठाच डा, डीच आलेगा सेंग्गोन डा। 3 दूसरा दिन आलेनी सैदा शहर गेन आकोळ टेपाके एठा युलियुस नी पौलुस लिंजेन हारिमनटे डीचके सोपतीकु गा येनेन सेंडाएकेनेच, ताकी दिकुटे जरुरत गा चीजो साले। 4 देटेन टे आलेनी डाबोलटे यात्रा सुरुके एठा सम्माटे कोयो हेजे गा वोजीटे, आलेनी साइप्रस द्वीप गा आदारटे सम्मान बाळतिंजजे। 5 एठा किलिकिया जिल्हा एठा पंफूलिया जिल्हा गा धुरान समुद्र गेन सेने टे मूरा शहर गेन आगुरुके, जो कि लूसिया जिल्हा गेन होय। 6 देटेन सुबेदार के सिकन्दरिया शहर गा म्या खाट डोंगा इटालीया जिल्हा गेन सेने लठ्ठाका घाटके। एठा डीचनी आलेके डी खाट डोंगा लिंजेन पेळेचकेमी। 7 जब आले घोनेच दिन टाएन आराम-आराम्बोटे सेन्द्रा टे मुश्किल टे कनिदुस पूरा गा मेरान आदिरके, इनिघल्जी कि कोयो आलेके सम्मान बान बाळतिंज डाए। आले सलमोने शहर गा सम्माटे क्रेते द्वीप गा आधार गेन बो। 8 एठा दिकुगा धुरा-धुराटे मुश्किल टे सेन्द्रा टे शुभलंगरबरी जीमू गा म्या जगान आदिरके। येदेटे लसया पूरा मेरान का डा। पौलुस गा सलाह नज़रअंदाज़ 9 जब घोनेच दिन बितातिंजे, एठा डा यात्रा गेन मुश्किल इनिघल्जी डाऊ डा। चोयाकी पश्यताप गा दिन गा तिवार स्याएन डा। एठा इनिका डीका मोसम होय, जब समुंद्र घोनेच खतरनाक जुवा होय। इनिघल्जी पौलुस नी दिकु सेबाईकु के इनी मंडीटे चेतवानी जीके। 10 “हे सज्जन, इंजेन एगो लगतिंजू लक्के होय, कि इनी यात्रा गेन तखलीफ़ एठा नुकसान, डाऊ मिनी होय। इनी नुकसान न बस सामोन एठा खाट डोंगा गा, पेनो आबुगा भी जान गा भी डाऊ मिनी होय।” 11 पेनो सुबेदार नी खाट डोंगा गा अध्यक्ष एठा खाट डोंगा गा मलिको गा बातो के पौलुस गा बातो टे खाटटे मानतिंजके। 12 शुभलंगरबरी जीमू गा बन्दरगाह रारम गा दिन गेन थंदळ गा घल्जी अच्छा बाऊ डा। इनिघल्जी घोनेचकुनी सलाह जीके कि देटेन टे सम्मान बाळतिंजे। अगर डाऊ टासो मेटे फीनिक्स बंदरगाह गेन आदिरटे रारम गा मोसम बितातिंजे। इनी मेटे क्रेते द्वीप गा धुरा गा म्या बंदरगाह होय। डेगा दारावाजा दक्षिण-पश्चिम एठा उत्तर-पूर्व दिशानौर गेन होय। समुद्र गेन तूफान 13 जब दक्षिण दिशा टे हल्का-हल्का कोयो हेजे लक्के। मेटे दिकुनी सचोके कि दिकुगा योजना गा रोंगो दिकु फीनिक्स बंदरगाह गेन आदीरजूवा। मेटे दिकुनी अकोळा तियुलके एठा क्रेते द्वीप गा धुरा-धुराटे समुंद्रटे सेने डोन सम्मान बाळतिंजे। 14 पेनो थोळासा टेमो गेन ओटे गा कोनेटे म्या खाट तूफान बिटजे, जो “उत्तर पूर्व” तूफान मेंबा होय। 15 मेटे तूफान खाट डोंगान ठाजे। मेटे खाट डोंगा तूफान गा सम्मान टिकतिंजडूका। इनिघल्जी आलेनी खाट डोंगा के कोयो गा मुराटे आराके। एठा इनी का रोंगो तुडोन ओले। 16 मेटे कौदा जीमू गा म्या सानीस द्वीप गा आधारेन तु-तुटे आले मुश्किल टे खाट डोंगा के काबून साले। 17 डाबोलटे खाट डोंगा गा कामय दडामिंकू नी, खाट डोंगा के इटाटे माठा टाएन टोलके। एठा दिकुनी इनी हिघराटे कि खाट डोंगा सुरतिस गा रिती गेन फसातिंजू बाकी, दिकुनी अकोळा के थोळासा इटान आगुरुटे खाट डोंगा गा सेंग्गो-सेंग्गोन कोयो गेन आराके। 18 एठा जब आलेनी तूफान टे घोनेच झाटका गा वोजीटे एठा धिकिली जोवे। मेटे दूसरा दिन दिकु खाट डोंगा गा सामना टेटप्पा लज्जे। 19 एठा आफाई दिन दिकुनी आपना टी टे खाट डोंगा गा सामना भी टेप्पाके। 20 जब घोनेच दिन टाएन न सूर्य न इफिलकु डोके, चोयाकी खाट तूफान चालुके डा। मेटे आखिरी गेन आलेगा बचातिंजू गा आसा स्याएन चलजे। 21 जब दिकु घोनेच दिन टाएन रांगेचका थंदळके। मेटे पौलुस नी दिकुगा ताला गेन तेगेंटे मंडीके, “हे सोपतीकु, आपेन होना डा कि आपे इंजा बातो मानतिंजटे, क्रेते द्वीप टे सम्मान का बान बाळतिंजू, मेटे इनी मुसीबात आबु लिंजेन बान हेजे डा, एठा न इनी नुकसान डाऊ डा। 22 पेनो नका इंज आपेके समझतिंजकोम्बा होय कि हिम्मत डोए। चोयाकी आपेटे जेकाभी जान गा नुकसान बान डाऊ। पेनो बस खाट डोंगा का। 23 चोयाकी परमेश्वर डेगा इंज होय, एठा डेगा सेवा इंज डाएवा होय। दियागा स्वर्गदूत नी गफान गा रातो इंजा मेरान हेके डो मंडीके। 24 ‘हे पौलुस, बाकी हिगरा! आमके रोमी सम्राट कैसर गा सम्मान टेगेन जरुरी होय। एठा डोगे जरुरी बाने होय, परमेश्वर नी सेबाईकु के जो आम सेंग्गोन यात्रा दडावा होय। दिकु सेबाईकु जीटाका थंदळवा।’ 25 इनिघल्जी हे सज्जन, हिम्मत डोए, चोयाकी इंज परमेश्वर लिंजेन विश्वास दोडोवा होय। कि डेनोगो इंजाटे मंडीके होय, येनोगोका डाऊवा। 26 पेनो आलेन तुनिका द्वीप लिंजेन थंदळ होना।” खाट डोंगा गा टूकऊ 27 जब चौदह रातो डाएन, एठा आले अद्रिया समुंद्र गेन भटकतिंजू लक्के डा। मेटे अदा रातो गा मेरान खाट डोंगा कामय मिंकू नी अंदाजोटे चिनाके कि आले तुनिका देशो गा मेरान आदिरु लक्के। 28 दिकुनी डा गा गहराई उम्नाके, दिकुनी डा के सैतीस मीटर गहराई डोके। थोडासा एठा सम्मान ओलेडो डाबोलटे डा गा गहराई उम्नाके, डाबोलटे डा के सत्ताईस मीटर गहराई डोके। 29 मेटे इनी हिगरा टे तुगन का घोटा टे धुक्कायु बाकी। दिकुनी खाट डोंगा गा टाउदेळ टे उफुन अकोळा येंडाके एठा जल्दी टे फेजेर गा इंतजार दडा लक्के। 30 पेनो जब खाट डोंगा गा कामय दडामिंकू खाट डोंगाटे ससाळूप चाहता डा। एठा खाट डोंगा गा जान बबाचातिंज मिठाच खाट डोंगा के साम्म गा कोनेटे अकोळा येंडा गा बहानाटे, समुद्र गेन आगुरोएन। 31 मेटे पौलुस नी सुबेदार एठा सिपाईकु टे, “अगर इनकू खाट डोंगा लिंजेन बान थंदळ, मेटे आपे भी बान बचातिंजू सकतावा।” 32 मेटे सिपाईकुनी धंडी म्हाटे खाट डोंगा के बोचोके। 33 जब फेजेरु गेन डा, मेटे पौलुस नी येटेन मंडीटे, सेबाईकु के आटा जोजोमेन बिनतीके। “टैंज चौदह दिन डाएन, कि आपे चिंता डाटे रांगेका थंदळके, एठा चोच्का आटा बान जोमडुका। 34 इनिघल्जी आपेके समझातिंज्कुवा मेना कि चोच्का जोमे, देटे आपेगा बचातिंजू डायु। चोयाकी आपे तालाटे जेका गा भी नुकसान बान डाऊ।” 35 एठा इनी मंडीटे डीचनी सोकळा साटे सेबाईकु सम्मान परमेश्वर गा धन्यवाद डाटे एठा तुकाटे जोजोम लज्जे। 36 मेटे एनेटे सेबाईकुन होशला घाटाएन, एठा आटा जोजोम लज्जे। 37 आबु सेबाईकु मिलातिंजटे खाट डोंगा लिंजेन बरी सेद्दी छेहत्तर कुरकू डा। 38 जब दिकु आटा जोमटे लाज भेटटेन। मेटे गुं के समुंद्र गेन टेप्पाटे खाट डोंगा के हलकया लज्जे। 39 जब दिन वोटजे, मेटे दिकुनी डी देशो के बान चीनडूका। पेनो म्या भुरु डोके डेगा चौरस धुरा डा। एठा बिचार के कि अगर डाऊ टासो इनी लिंजेन खाट डोंगा के जेगया। 40 मेटे दिकुनी अकोळा के खुलाटे समुंद्र गेन आराके। डीका टेमो डोंगा परदा गा धंदी के ढीलाके। एठा कोयो गा सम्मान सम्मा गा परदा माठान पेदेचटे धुरा गा कोनेन बो। 41 पेनो बरी समुद्र गा गोलाके मिनी रिती जगा दिकुनी खाट डोंगा के जेगाके। एठा खाट डोंगा गा सम्मा गा भागो भी मजबूत जे, एठा हिलतिंजडूका। पेनो खाट डोंगा गा टाऊ गा भागो डा गा लपानौर गा ताखात टे टूक्काऊ लज्जे। 42 मेटे सिपाईकुनी इनी बिचार डावे कि कैदीकु के घोच्कु। येनोगो बाकी डाऊ कि जेकाभी उयारटे साळूपजू। 43 पेनो सुबेदार नी पौलुस के बबाचातिंज गा इच्छाटे दिकुके इनी बिचार टे रोकतिंजके कु। एठा येटेन मंडीके, कि जो उजार सकतावा होय। पेला उजे डो धुरान आदिरटे वोटजू। 44 एठा बाकी तुनिका पाटली लिंजेन एठा जेका खाट डोंगा गा अलग्गो चीजो गा सहारा टे वोटजू। इनी रोंगो टे सेबाईकु बचातिंजे। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation