ಅಪೊಸ್ತಲ್ 26 - गवली उनाई नियम

अग्रिप्पा गा मेरान स्पष्टीकरण

¹ अग्रिप्पा राजा नी पौलुस टे मंडीके, “आमेन खुद गा बारेन मंडी गा राजी होय।” मेटे पौलुस बरी भी कोनेन टी फैलातिंजटे जवाब जिऊ लज्जे।

² “हे अग्रिप्पा राजा, देटो बातो गा यहूदी अगुवाकु इंजा लिंजेन आनोवा टोटकावा होय। टैंज अमा सम्मान दिकुगा जवाब जिऊ गेन, इंज खुदके धन्य समझतिंजूवा होय।

³ कास मेंटो इनिघल्जी चोयाकी आपे तालान म्या मेन गुण होय, कि आपे यहूदी कुरकू गा सेबाई रितो-रिवाजनौर एठा हेळ-हेळके हाडाई होय। इनिघल्जी इंज बिनती दडावा मेना, आराम्बोटे इंजागा आजुमे।”

⁴ “डेंगो इंजागा चाल-चलन जब इंज सानीका डा, मेटे टे आपना कुरकू गा तालान एठा यरूशलेम शहर गेन देगो डा। येदेन सेबाई यहूदी कुरकू मालूम होय।”

⁵ दिकु कुरकू गवाही जिऊ चाहतावा होय, जब इंज जवान का डा, मेटे दिकु इंचे हाडाई होय। कि इंज फरीसि कोरो खीज थंदळके, जो कि आबुगा धर्म गा सेबाई टे कठोर समूह होय।

⁶ टैंज इंज परमेश्वर गा द्वारा आलेगा जुना सनाकुके जीके वादा गा आसा गा वोजीटे येटेन आनोवा गा रुपोन टेगेनके होय।

⁷ डीका वादा के पुराऊ गा आसा येंडाकेका, आलेगा बारह पित्रकु आलेगा सेबाई मन टे राटो-दिन परमेश्वर गा सेवा डाटे हेन होय। हे राजा इनी जो परमेश्वर नी डाके डा, डी आसा गा वाजा यहूदी धर्म गा सम्मा कुरकू गा मुख्या कोरो, इंजा लिंजेन आनोवा तोटाकावा होय।

⁸ मेटे पौलुस नी सेबाई यहूदी कुरकू टे कोम्बारके, आपे कुरकू विश्वास दोडोवा होय कि परमेश्वर गोएन मिंकू कुरकू के डाबोलटे जीटाकुवा होय, मेटे डाबोलटे आपे कुरकू इनी बातो लिंजेन विश्वास दडा टे इंकार चोया दडावा होय कि डीचनी यीशु के गोएन मिठाच जाटे जीटाकेनेच?

⁹ इंजभी समझतिंजके डा कि नासरत शहर गा थंदळ मिठाच यीशु गा जीमू गा खिलाफ गेन इंजेन घोनेच चोच्का दडा होना।

¹⁰ एठा इंज्नी यरूशलेम शहर गेन एगोका डाके। एठा मुख्यायाजककु टे हाक साटे घोनेच टे चोखरा कुरकू के जेल गेन येंडाकेकु। जब दिकु घोच्कु डा, मेटे इंजभी दिकुगा खिलाफ गेन आपना सम्मति जे डा।

¹¹ एठा हरेक आराधना जगा गेन इंज डीचके कासु जीटे यीशु गा खिलाफबेन डाएवा, येटे टाएन खीजो गा वोजीटे एगो पागल जे, कि दूसरा शहर गेन भी ओलेडो कुरकू के साततिंजकु डा।

¹² “जब इंज मुख्यायाजककु टे हाक एठा हुकूम पत्र साटे दमिश्क पूरा गेन चेल्के डा।”

¹³ मेटे हे राजा, कोरा गेन दया गा टेमो इंज्नी बदळा टे सूरज गा तेज टे भी ज्यादा तेजो मिनी म्या उजाला, आपना एठा आपना सेंग्गोन सेन्द्रामिठाच उफुन भी कोने चमकतिंजू टे डोके।

¹⁴ एठा जब आले सेबाईकु ओटे लिंजेन बोचोयेन। मेटे इंज इब्रानी भाषा गेन, इंजाटे मंडी डोन येटेन वाणी आजुम्के, “हे शाऊल, हे शाऊल, आम इंज्के चोया सतातिंजकोम्बा होय? आम इंज्के कासु जिऊ गा कोशिश डाटे आपना खुदके कासु जिऊ लक्के होय, डेनोगो म्या डोबा आपना स्वामी गा ठुथ्या गा खिलाफ पादयेचबा होय।”

¹⁵ इंज्नी मंडीके, “हे प्रभु, आम जे होय?” प्रभु नी मंडीके, “इंज यीशु होय, डीचके आम सतातिंजबा होय।”

¹⁶ पेनो अमा बिडे डो, आपना नंगा लिंजेन टेंगेने, चोयाकी इंज्नी आमके इनिघल्जी दर्शन जीके होय। कि आमके डी बातो गा भी सेवक एठा गवाही ठहरातिंजकोम्बा। जो अमा नी डोके होय, एठा दिकुगा भी दिकु घल्जी इंज आमके दर्शन जेबा।

¹⁷ इंज आमके आमगा कुरकू टे एठा अलग्गो जाटो गा कुरकू टे बचातिंजकोम्बा। दिकु मेरान इंज इनिघल्जी कुल्कोम्बा।

¹⁸ कि अमा दिकुगा मेट कुलकी, ताकी दिकु अंधकार टे उजाला गा कोनेन, एठा शैतान गा हाक टे परमेश्वर गा हाक गा कोनेन इखाट डे। मेटे परमेश्वर दिकुगा पापो के मापोएबा, एठा डी कुरकू गा सेंग्गोन म्या जगा घाटया, जो इनिघल्जी चोखरा हारुकेकू होय। चोयाकी दिकु इंज लिंजेन विश्वास दोडोवा होय।

¹⁹ इनिघल्जी हे अग्रिप्पा राजा, इंज्नी डी स्वर्गीय गा दर्शन पालान डाके।

²⁰ पेनो पेला दमिश्क पूरा गा, डाबोलटे यरूशलेम शहर गा थंदळ मिंकूके, मेटे यहूदिया जिल्हा गा सेबाई देशो गेन एठा अलग्गो जाटोकु गेन इंज्नी प्रचार डाके। कि मन बदलाए एठा परमेश्वर गा कोनेन इखाट टे कामयनौर के पक्का डाए।

²¹ इनी बातो गा वोजीटे यहूदी कुरकू इंज्के यरूशलेम गा मंदिर गेन उठाटे घोगेज गा कोशिश दडा डा।

²² पेनो परमेश्वर गा मददत टे इंज टैंज टाएन हारुके होय। एठा सानी खाट सेबाईकु सम्मान गवाही जिऊवा होय। इंज डी बातो के आराटे चोच्का बान मंडी, जो परमेश्वर गा कोनेटे मंडीमिठाच एठा मूसानी भी मंडीके कि डाऊ मिनी होय।

²³ कि मसीह के कासु तुटूल होना, एठा डीचका सेबाई टे पेला गोएन मिंकूटे जीटाटे, आबुगा यहूदी कुरकू एठा अलग्गो जाटो गा कुरकू तालान इनी घोषण दडा गा घल्जी कि दिकु बचातिंजूवा होय जो कि उजाला गा रोंगो होय।

²⁴ जब पौलुस इनी रोंगो टे जवाब जिऊ लक्के डा। मेटे फेस्तुस नी जोर टे मंडीके, “हे पौलुस, आम पागल होय। घोनेच शिक्षा नी आमके पागल केमी होय।”

²⁵ पेनो पौलुस नी मंडीके, “हे महा शक्तीशाली फेस्तुस, इंज पागल बाने, पेनो सच्चो एठा बुद्धि गा बातो मंडीवा होय।

²⁶ राजा भी दियागा सम्मान इंज बिना हिग्रटे मंडी लक्के होय, इनी बातो मालूम होय। एठा इंजेन विश्वास होय, कि इनी बातो गेन टे जेकाभी दियाटे बान उखुडुका। चोयाकी डीच घटना मेटे उखुटे बान दडुका।

²⁷ हे अग्रिप्पा राजा, चोच अमा परमेश्वर गा कोनेटे मंडीमिठाचकु गा विश्वास दोडोवा होय? हां, इंजेन मालूम होय, कि अमा विश्वास दोडोवा होय।”

²⁸ नका अग्रिप्पा राजा नी पौलुस टे कोम्बारके, “चोच अमा थोडसा समझातिंजटे इंज्के मसीह आरु चाहतावा होय?”

²⁹ पौलुस नी मंडीके “परमेश्वर टे इंज प्रार्थना इनी होय, कि थोडसा गेन, चोच घोनेच गेन, बस अमाका बाने। पेनो चोटो कुरकू टैंज इंजागा आजुम्बा होय, इंज इनी बंधन के आराटे दिकु इंजा रोंगो जू।”

³⁰ मेटे राजा एठा राज्यपाल एठा बिरनीके एठा दिकुगा सेंग्गोन सुबानमिंकू, दिकु सेबाईकु बिडजे टेगेंजे एठा ओले।

³¹ जब दिकु बल्लान चेल्के डा, दिकु म्याखोम बरखिंज टे मंडी लज्जे, “इनी कोरोनी गुजू गा दण्डो या जेल गेन सेने गा योग्य तुनिका गुना बान दडुका होय।”

³² अग्रिप्पा राजा गा फेस्तुस टे मंडीके, “अगर इनी कोरोनी इनी आसीडुका धारे कि रोमी सम्राट कैसर दियागा न्याय डाए। मेटे दिकु आरागु सकता डा।”