ಅಪೊಸ್ತಲ್ 25 - गवली उनाई नियम

फेस्तुस गा मेरान

¹ आफाई दिन गा बदोन फेस्तुस राज्यपाल गा रुपोन यहूदी जिल्हा गेन हेन। आफाई दिन गा बादोन डीच कैसरिया शहर टे यरूशलेम शहर गेन ओले।

² मेटे मुख्यायाजक कुनी एठा यहूदी अगुवा गा मुख्या कुरकू नी दियागा सम्मान पौलुस लिंजेन आनोवा टोकाके।

³ एठा दियाटे विनंती डाटे पौलुस गा खिलाफ गेन येटेन बिचार के कि देटेन पौलुस के यरूशलेम शहर गेन हाकोलेनेच। चोयाकी दिकुगा योजना पौलुस के कोरान का घोगेजा गा डा।

⁴ फेस्तुस नी जवाब जीके, “पौलुस कैसरिया शहर गा कैदी होय, एठा इंज खुद जल्दीका देटेन चेलाके।”

⁵ डाबोलटे मंडीके, “आपे तालाटे जो मुख्या कुरकू होय, दिकु सेंग्गोन बो एठा अगर इनी कोरोनी चोच्का गलत कामय डाके होय, मेटे दिया लिंजेन आनोवा टोकाए।”

⁶ फेस्तुस यरूशलेम शहर गेन आईय्या या गेलजा दिन थंदळके कैसरिया शहर गेन ओले। एठा दूसरा दिन न्याय गा सिंघासन लिंजेन सुबानटे पौलुस के सा गा हुकूम जीके।

⁷ जब डीच हेके, मेटे जो यहूदी अगुवाकु यरूशलेम शहर टे हेके डा। दिकुनी आजू-बाजुन तेगेंटे दिया लिंजेन घोनेचका गहरा आनोवा येंडाके। डीके दिकु साबित डुका बान डा।

⁸ पेनो पौलुस नी जवाब जीके, “इंज्नी न मेटे यहूदी कुरकू गा नियम गा, न यरूशलेम गा मंदिर गा एठा न रोमी सम्राट कैसर गा खिलाफ तुनिका पापो डाके होय।”

⁹ मेटे फेस्तुस नी यहूदी अगुवाकु के खुशो गा इच्छाटे डीचनी पौलुस टे कोम्बारके, “चोच अमा चाहतावा होय कि यरूशलेम शहर के सेने। एठा देटेन इंजा सम्मान अमागा इनी फैसला तय डाए?”

पौलुस गा कैसर गा दुहाई जिऊ

¹⁰ पौलुस नी मंडीके, “रोमी सम्राट कैसर गा न्याय गा सिंघासन गा सम्मान टेगेनके मेना। एठा इनिका डी जगा होय देटेन इंजागा न्याय दडा होना। जैसा आपे अच्छा खिजाटे हाडाई होय, कि यहूदी कुरकू गा इंज्नी चोच्काभी गलत बान दडुका।

¹¹ अगर अपराधी मेना एठा घोगेज गा लायको तुनिका कामय डावे होय। मेटे गुजू गा घल्जी तैयारके मेना, पेनो जो बातो गा इंकू इंजा लिंजेन आनोवा तोटाकावा होय। अगर डे तालाटे तुनिका बातो सच्चो बान ठहरातिंजडुका टासो। मेटे जेका के इनी हाक बाऊ कि डीच इंज्के यहूदी अगुवाकु के टी गेन जीकेमी। इंज रोमी सम्राट कैसर टे बिनती दडावा होय, कि इंजा न्याय खुद रोमी सम्राट द्वारा डायु होना।”

¹² मेटे फेस्तुस नी मंत्रीकु गा पंचाती गा सेंग्गोन बिचार डाटे जवाब जीके, “आमनी रोमी सम्राट कैसर गा द्वारा न्याय दडा गा मंग डाके होय। मेटे आम दियागा मेरान का सेनेवा।”

अग्रिप्पा गा मेरान पौलुस

¹³ अदा दिन बिततिंजू गा बदोन अग्रिप्पा राजा एठा दियागा सानी बोकजाई बिरनीके नी कैसरिया शहर गेन हेंडो फेस्तुस टे मिलातिंजके।

¹⁴ दिकु घोनेच दिन थंदळ गा बदोन फेस्तुस नी पौलुस गा बारे गेन राजा के घाल्के, “म्या कोरो होय, डीचके फेलिक्स जेलेनका आराकेनेच होय।”

¹⁵ जब यरूशलेम शहर गेन डा, मेटे मुख्यायाजककु एठा यहूदी कुरकू के यहूदी जुना सनाकु नी दिया लिंजेन आनोवा टोकाके एठा चाहता, कि दिया लिंजेन दण्डो गा हुकूम जिकी।

¹⁶ पेनो इंज्नी दिकुके जवाब जीके, कि रोमी कोरोकु गा इनी रितो बाने, कि तुनिका कोरो के दण्डो गा घल्जी जीकेच। जब टाएन मुन्जिरिम के आपना आनोवा तोटाका मिंकू गा सम्मान तेगेंटे आनोवा गा जवाब जिऊ गा मौका बान घाटडूका।

¹⁷ इनिघल्जी जब यहूदी अगुवाकु इंजा सेंग्गोन येटेन कैसरिया शहर गेन हेके। मेटे इंज्नी चोच्का टेमो बान दडुका। पेनो दूसरा का दिन न्याय गा सिंघासन लिंजेन सुबानटे, इंज्नी हुकूम जीके कि पौलुस के अदालत गेन सेगेच।

¹⁸ जब दियागा मुद्दई टेगेंजे, मेटे दिकुनी एगो बुरा बातो गा आनोवा बान, डेनोगो इंज समझतिंज डा।

¹⁹ पेनो दिकुगा तालान सिर्फ आपना धर्म के साटे एठा यीशु जीमू गा म्या कोरो गा बारे गेन चोच्का अमा-इंज डा। दियागा गोएन होय। लेकिन पौलुस विश्वास गा सेंग्गोन मंडीवा होय कि डीच जीटाका होय।

²⁰ चोयाकी इंजेन बान मालूम डा कि इनी बातो गा चिचना चोफारटे डाए, इनिघल्जी इंज्नी पौलुस टे कोम्बारके, “चोच आम यरूशलेम शहर गेन सेनेवा, कि देटेन इनी बातो गा फैसाला डायु।”

²¹ पेनो पौलुस नी मंडीके, “इंज रोमी सम्राट कैसर टे बिनती दडावा होय, कि इंजा न्याय खुद रोमी सम्राट द्वारा डायु होना। मेटे इंज्नी हुकूम जीके, कि जब टाएन डीचके सम्राट गा मेरान बान कुकूल, दियागा जागली डाए।”

²² मेटे अग्रिप्पा राजा नी फेस्तुस टे मंडीके, “इंजभी डी कोरो गा अजुमा चाहतावा होय।” डीचनी मंडीके, “अमा गफान आजुमेबा।”

²³ इनिघल्जी दूसरा दिन, जब अग्रिप्पा राजा एठा बिरनीके खाट धूमधाम टे हेके दल गा सरदारकु एठा पूरा गा मुख्या कुरकू गा सेंग्गोन दरबार गेन आदिरजे। मेटे फेस्तुस नी हुकूम जीके, कि दिकु पौलुस के सालेच।

²⁴ फेस्तुस नी मंडीके, “हे अग्रिप्पा राजा, एठा सेबाई कुरकू जो येदेन के आबुगा सेंग्गोन होय। आपे इनी कोरो के दोडोवा होय, डेगा बारे गेन सेबाई यहूदी कुरकू नी यरूशलेम शहर गेन एठा येदेन भी चिल्ला-चिल्लातिंजटे इंजाटे बिनती डावे, कि इनिजगा जीटा थंदळ अच्छा बाने।

²⁵ पेनो इंज्नी चीनया कि डीचनी एगो चोच्का बान दडुका कि घोजेच। एठा जब कि डीचनी खुद का सम्राट के गा न्यायलय गेन सेने गा अर्ज जीके होय। मेटे इंज्नी डीचके रोम शहर गेन कुकूल गा निर्णय सावे।

²⁶ पेनो इंज्नी दियागा बारे गेन तुनिका बातो बान घाटडूका कि सम्राट के ओल। कि इनिघल्जी हे अग्रिप्पा राजा इंज डीचके अमागा सम्मान सालेनेच होय, कि घाघट गा बदोन इंजेन चोच्का ओलगा घाटकु।

²⁷ चोयाकी बंदी के कुकूल एठा जो आनोवा दिया लिंजेन येंडाके, दिकुके बाकी घागल। इंजेन साही बान लागतिंजडूका।”