ಅಪೊಸ್ತಲ್ 24 - गवली उनाई नियम

फेलिक्स गा सम्मान पौलुस

¹ मोनाई दिन गा बदोन हनन्याह खाटयाजक चोटोका यहूदी जुना सनाकु एठा तिरतुल्लुस जीमू गा तुनिका वकील के सेंग्गोन साटे कैसरिया शहर गेन हेन। दिकुनी राज्यपाल गा सम्मान पौलुस लिंजेन आनोवा टोकाके।

² जब पौलुस के हाकोकेनेच मेटे तिरतुल्लुस दिया लिंजेन आनोवा टोकाटे मंडी लज्जे, “हे महा शक्तीशाली फेलिक्स, अमा द्वारा आलेन जो खाट खुशी लगतिंजूवा होय। एठा अमा द्वारा टे इनी जाटो गा घल्जी घोनेचका बुराई टे सुधारतिंजू लक्के होय।

³ इनीच्के आले हारेक जगा एठा हारेक रोंगो टे धन्यवाद गा सेंग्गोन मानतिंजेवा होय।

⁴ पेनो इनिघल्जी कि इंज आमगा ज्यादा टेमो बान सा चाहतावा। इंज आमटे बिनती दडावा होय, कि हारिमनटे आलेगा म्या बरी बातो आजुमे।

⁵ चोयाकी आलेनी इनी कोरो के खिलाफबेन एठा दुनिया गा सेबाई यहूदी कुरकू गेन झगड़ा येंडा मिठाच एठा नासरी कुरकू समूह गा मुख्या होय।

⁶ डीचनी यरूशलेम गा मंदिर के बिसोटोए दडा चाहताके। मेटे आलेनी डीचके बंदी आरुकेनेच। आलेनी डीचके आपना नियम गा रोंगो दण्डो जीके धारे।

⁷ पेनो दल गा मुख्या लूसियास नी हेंडो डीचके हाक गा सेंग्गोन आलेगा टी टे रूतीएनेच।

⁸ एठा इनिज लिंजेन आनोवा टोकाके मिंकूके अमा सम्मान हेजे गा हुकूम जीके। इनी सेबाई बातो के दिकुगा बारे गेन आले दिया लिंजेन आनोवा टोकाएवा। आम खुद दियागा सच्चाई के मालूमेबा।”

⁹ यहूदी धर्म गा सम्मा कोरोकु नी भी दियागा सेंग्गो जीटे मंडीके, इनी बातो इनिका रोंगो होय।

फेलिक्स गा मेरान पौलुस गा जवाब

¹⁰ जब राज्यपाल नी पौलुस के मंडी गा घल्जी इशार जीके मेटे डीचनी जवाब जीके, “इंज इनी चिनाटे कि अमा घोनेच साल टे इनी राष्ट्र गा कुरकू गा फैसला दडामिठाच आमका होय। इनिघल्जी खुशीटे आपना जवाब जेबा होय।

¹¹ अमा खुद चीनया सकतावा होय, कि जब टे इंज यरूशलेम शहर गा मंदिर गेन आराधना दडा हेके। इंजेन बारह दिन टे माठान बान दडुका।

¹² दिकुनी इंज्के न यरूशलेम गा मंदिर गेन, न आराधना जगा गेन, न पूरा गेन जेकाटे आम-इंज डाटे या गर्दी गोलाटे डोकेनेच।

¹³ एठा न मेटे डी बातो के, दिकुगा बारे गेन दिकु नका इंजा लिंजेन दोषी येंडावा होय। चोच अमा सम्मान डी बातो के सच्चो सबित डाए साकता होय?

¹⁴ लेकिन इंज अमा सम्मान येटेन स्वीकार डाएवा होय, कि मसीह गा समूह गा गुरूजी हारूटे आपना जुना सनाकु गा परमेश्वर गा सेवा दडावा होय। डीके यहूदी अगुवा लाबाळ मंडीवा होय। पेनो जो बातो मूसा गा नियम एठा परमेश्वर गा कोनेटे मंडीमिठाच गा पुस्तक गेन ओल्के, इंज डी सेबाई लिंजेन विश्वास दोडोवा होय।

¹⁵ एठा परमेश्वर टे आसा दोडोवा मेना, जैसा इनी कुरकू खुद दोडोवा होय, कि धर्मी एठा अधर्मी बाएराके भी परमेश्वर गोएन मिंकूटे जीटाकुवा।

¹⁶ इनिघल्जी इंज आपे भी कोशिश दडावा होय, कि परमेश्वर गा एठा कोरोकु बार्या गा सम्मान इंजा निर्दोष थंदळकु।

¹⁷ घोनेच साल गा बदोन इंज आपना कुरकू के उपहार इदिवा, एठा परमेश्वर के बलिदान पेपेळेच, यरूशलेम शहर गेन हेके डा।

¹⁸ डी टेमो दिकुनी इंज्के यरूशलेम गा मंदिर गेन डोकेमी, जब इंज शुद्ध डाऊ गा रितो पुपारा लक्के डा। देटेन इंजा सेंग्गोन न तुनिका गर्दी डा, एठा न तो तुनिका रोंगो शोर डा। पेनो देटेन आसिया जिल्हा गा अदा यहूदी कुरकू डा दिकुनी दंगा डाके।

¹⁹ अगर दिकुन लगतिंजूवा होय कि इंज नी चोच्का गलत डाके होय, चोयाकी दिकुनी डोके कि यरूशलेम गा मंदिर गेन चोच डाएन डा। मेटे इंजा लिंजेन दोष येंडा गा घल्जी यहूदीकुन येटेन आम सम्मान होना डा।

²⁰ जो कोरो येदेन टेगेनके होय, खुद का घाले कि खाटसभा गा सम्मान दिकुनी इंजेन तुनी अपराध घाटाएन होय?

²¹ म्या मात्र दोष जो दिकु इंजा खिलाफ येंडा साकता होय, डीच येटेन होय जब इंज्नी दिकुगा तालान तेगेंटे हाकोटे मंडीके डा, ‘टैंज इंजागा आपेगा द्वारा न्याय डाए लक्के होय। चोयाकी इंज विश्वास दोडोवा, कि परमेश्वर डी कुरकू के जो गोएन होय डाबोलटे जीटाकु।’”

²² फेलिक्स नी जो इनी समूह गा बातो अच्छा टे मालूम डा। दिकुके इनी मंडीटे टालतिंजके, “जब पलटण गा सरदार लूसियास हेजेवा, मेटे आपेगा बातो गा निर्णय डाएवा।”

²³ एठा मुख्यानी हुकूम जीके, कि पौलुस के जागली घल्जी डोएचवा। पेनो दियागा सोपतीकुटे जेकाकेभी सेवा दडा टे बान रोकतिंजकु।

पौलुस गा फेलिक्स एठा दियागा जापाएटे बातो चितो

²⁴ थोळासा दिन गा बदोन फेलिक्स राज्यपाल हेजा जापाए द्रुसिल्ला के जो यहूदी जापाए डा। डीचके हेजा सेंग्गोन साटे हेन। पौलुस के हाकोटे डी विश्वास गा बारेन जो मसीह यीशु लिंजेन होय, दियाटे आजुम्के।

²⁵ जब पौलुस नी जो परमेश्वर गा सम्मान साही होय। डीच हेजा इच्छा लिंजेन काबुनकी एठा परमेश्वर गा द्वारा हेजे मिनी न्याय गा बारेन घागल सुरुके। मेटे फेलिक्स नी हिगरा डोन जवाब जीके, “इनी टेमो नी आम सेने। जब इंज मेरान टेमो थंदळवा, इंज खुद आमके होकोकोम्बा।”

²⁶ यानीकी, फेलिक्स डी बातो गा बारे गेन हिगरा डा। जो पौलुस नी मंडीके डा, डाबोलटे भी डीच अक्सर डीचके होको डा, एठा दियागा सेंग्गोन बातो दडा डा। चोयाकी दियेन आसा डा कि पौलुस जेल टे बल्लान ओट घल्जी डीचके चोच्का डामा जेबा।

²⁷ पेनो जब बरी साल बिटतिंजे। मेटे फेलिक्स गा जगान पुरकियुस फेस्तुस राज्यपाल हारोयेन। एठा फेलिक्स यहूदी कुरकू के खुशो गा इच्छाटे पौलुस के जेल गेन आराकी।