ಅಪೊಸ್ತಲ್ 23 - गवली उनाई नियम

¹ पौलुस नी खाटसभा गा कोने ध्यान टे डोके एठा मंडीके, “हे डाईचो, इंज्नी आए टाएन परमेश्वर गा घल्जी बिलकुल सच्चो मन टे जीवन बितातिंजबे होय।”

² पौलुस नी जो मंडीके डी आजुमटे हनन्याह खाटयाजक नी, दिकुके जो दियागा मेरान टेगेनके डा, दिकुके पौलुस गा म्वारेन थप्पडा मुन्मंडा गा आज्ञा जीके।

³ जब जेकानी पौलुस के थप्पडा मुंडाके मेटे पौलुस नी डीचके मंडीके, “हे ढोंगो, परमेश्वर आमके मुंडाकोम्बा। अमा मूसा गा नियम गा रोंगो इंजा न्याय दडा सुबानके होय, एठा डाबोल चोच मूसा गा नियम गा खिलाफबेन इंज्के घोगेज गा हुकूम जिऊवा होय?”

⁴ जो मेरान टेगेनके डा, दिकुनी कोम्बाराके, “चोच आम परमेश्वर गा खाटयाजक गा अपमान दडावा होय?”

⁵ पौलुस नी मंडीके “हे डाईचो, इंजेन बान मालूम डा, कि येटेन खाटयाजक होय। चोयाकी पवित्र ग्रंथ गेन ओल्के होय, ‘आपना कुरकू गा याजक के बुरा बाकी मंडी।’”

⁶ मेटे पौलुस नी इनी चिनाटे, कि अदा सदूकी कुरकू एठा अदा फरीसि कुरकू येटेन होय, खाटसभा गेन हाकोटे मंडीके, “हे डाईचो, इंज फरीसि मेना एठा फरीसि कुरकू गेन इंजा न्याय इनिघल्जी डाऊ लक्के होय, चोयाकी इंज आसा होय कि परमेश्वर गोएन मिंकू कुरकू के डाबोलटे जीटाकुवा।”

⁷ जब डीचनी इनी बातो मंडीके मेटे फरीसि कुरकू एठा सदूकी कुरकू गेन झगडा डाऊ लक्के डा। एठा सभा गेन फुट फाळेन।

⁸ चोयाकी सदूकी कुरकू गा येटेन विश्वास होय कि कुरकू डाबोलटे जीटऊ बाने, न स्वर्गदूत होय एठा न आत्मा होय। पेनो फरीसि कुरकू इनी सेबाई बातो के लिंजेन विश्वास दडावा।

⁹ मेटे खाट हल्ला माचतिंजजे एठा अदा मूसा गा नियम इथूमिंकू डा जो फरीसि कुरकू गा पलटण गा तालाटे डा, बिटजे डो येटेन मंडीटे झगड़ा लज्जे, “आले इनी कोरोन चोच्काभी दोष बाऊ। डाऊ सकतावा होय कि म्या आत्मा या म्या स्वर्गदूत नी दियाटे बातोवे होय।”

¹⁰ जब घोनेच झगडा डायेन, मेटे पलटण गा सरदार नी इनी हिगरा टे कि पौलुस गा टुकड-टुकड़ा बाकी डायु मेंड़ोन, पलटण गा हुकूम जीके कि इटान आगुरुटे पंचाती गा कुरकू तालान टे पौलुस के कोलाकेच, एठा किल्ला गेन सालेच।

¹¹ डी रातो प्रभु यीशु नी पौलुस गा मेरान हेंडो मंडीके, “हे पौलुस हिम्मत डोए, चोयाकी डेनोगो आमनी यरूशलेम शहर गेन इंजा गवाही जीके, येनोगोका आमके रोम शहर गेन भी गवाही जिऊ होना।”

पौलुस गा घोगेजा गा योजना

¹² जब दिन वोटजे, मेटे अदा यहूदी धर्म गा सम्मा कोरोकु नी म्यामूठोयेन एठा कासोम जोवे। जब टाएन आले पौलुस के घोच्केच बाने मेटे टाएन आटा बान जोजोम।

¹³ दिकुनी इनी कासोम जोवे डा, दिकु चालीसोकु टे एठाभी डा।

¹⁴ दिकुनी मुख्यायाजककु के एठा यहूदी जुना सनाकु गा मेरान हेन्ड़ो मंडीके, “आलेनी इनी कासोम जोवे होय, कि जब टाएन आले पौलुस के घोच्केच बाने मेटे टाएन आटा बान जोजोम।

¹⁵ इनिघल्जी नका खाटसभा गेल्ला पलटण गा सरदार के समझतिंजकोम, कि पौलुस के आपेगा मेरान सालेच। पौलुस के सभा गेन हाको गा मुख्या वोजीटे जानकरी हासिल दडा बाने, बनकी डीचके घोगेच गा होय।”

¹⁶ पेनो पौलुस गा भांजे नी आजुम्के, कि यहूदी कुरकू पौलुस के घोगेज गा योजना आरु लक्के डा। मेटे किल्लान ओलेडो पौलुस के घाल्के।

¹⁷ पौलुस नी सुबेदारकु टे म्याखोम के आपना मेरान हाकोटे मंडीके, “इनी जवानके पलटण गा सरदार गा मेरान सैय्येकेच, इनिज दियाटे चोच्का मंडी चाहतावा होय।”

¹⁸ इनिघल्जी सुबेदार पौलुस गा भांजे के पलटण गा सरदार गा मेरान सैय्येनेच एठा मंडीके, “कैदी पौलुस नी इंज्के हाकोटे बिनती डावे, कि इनी जवानके पलटण गा सरदार टे चोचका मंडी चाहतावा होय, इनिजके दिया मेरान सैय्येकेच।”

¹⁹ पलटण गा सरदार नी पौलुस गा भांजे टे टी उठाटे, डीचके अलग्गो सैय्येनेच डो कोम्बारके, “अमा इंजाटे चोच मंडी चाहतावा होय?”

²⁰ डीचनी मंडीके, “यहूदी अगुवाकु नी म्यामूठोके होय, कि आमटे बिनती डाए कि गाफन पौलुस के खाटसभा गेन सालेच। पौलुस के सभा गेन हाको गा मुख्या वोजीटे जानकरी हासिल दडा बाने, बनकी डीचके घोगेच गा होय।

²¹ हरीमन डेनोगो बाकी दडा येनोगो आमटे दडा गा घल्जी मंडेबा, चोयाकी दिकुटे चालीसोकु टे माठा कोरोकु पौलुस गा घोगेज गेन होय, दिकुनी इनी कासोम जोवे होय कि जब टाएन दिकु पौलुस के घोगेज बाने, मेटे टाएन चोच्का बान जोजोम। नका दिकु तैयारके होय एठा अमागा वचन गा थाथराह लक्के होय।”

²² मेटे दल गा मुख्यानी पौलुस गा भांजे टेके घालटे बिडाकेनेच, “जेकाटे भी बाकी मंडी कि आमनी इंज्के इनी बातो घाल्ले होय।”

पौलुस गा कैसरिया शहर गेन कुकूल

²³ दल गा मुख्याकु सुबेदारकु के हाकोटे मंडीके, “बरी सेद्दी सिपाईकु, सत्तर सवारी एठा बरी सेद्दी बारसी उठामिंकू सिपाईकु के कैसरिया शहर गेन सेने गा घल्जी तैयारी डाए, आम रातो गा आराई बजन ओडे।

²⁴ एठा पौलुस गा सवारी गा घल्जी घुळगी तैयारकी कि डीचके फेलिक्स राज्यपाल गा मेरान साजाका इडीकेच।”

²⁵ दल गा मुख्यानी इनी रोंगो चिठ्ठी भी ओल्के।

²⁶ “महा शक्तीशाली फेलिक्स राज्यपाल के क्लौदियुस लूसियास गा कोनेटे नमस्कार।

²⁷ इनी कोरो के यहूदी धर्म गा सम्मा कोरोकु नी उठाटे घोगेच बिचार के, पेनो जब इंजेन मालूमजे कि डीच रोमी कोरो होय, मेटे दल के साटे आराकेकु।

²⁸ एठा इंज मालूम डाए चाहता डा, कि दिकु लिंजेन तुनिरोंगो टे आनोवा येंडावा होय। इनिघल्जी डीचके दिकुगा खाटसभान सैय्येनेच।

²⁹ मेटे इंजेन मालूमजे, कि मूसा गा नियम गा आम इंजा बारेन दिया लिंजेन आनोवा टोकाएवा। पेनो घोगेज गा या थोथोला गा रेंगो दियेन तुनिका आनोवा बाऊ।

³⁰ जब इंज्के घाल्ले, कि दिकु इनी कोरो के घोगेज लक्के होय, मेटे इंज्नी तुरुटो डीचके आम मेरान कुल्केनेच। डी यहूदी कुरकू के दिकुनी दिया लिंजेन दोषी येंडाके होय दिकुके घाल्के।”

³¹ डीका रातो सिपाईकुनी जिले हुकूम के पुराके। दिकु पौलुस के यरूशलेम शहर टे सैय्येनेच एठा डीचके अन्तिपत्रिस शहर गेन सालेनेच।

³² दूसरा दिन दिकु सवारीकु पौलुस गा सेंग्गोन कैसरिया शहर सेने गा घल्जी आराटे सिपाई खुद यरूशलेम शहर गेन हिराके।

³³ दिकु कैसरिया शहर गेन आदिरटे राज्यपाल के चिठ्ठी जीके। एठा पौलुस के भी दियागा सम्मान तेगेंकेनेच।

³⁴ राज्यपाल नी चिठ्ठी पाळतिंजटे कोम्बाराके, “येटेन तुनी जिल्हा गा होय?” एठा जब चिनाये कि किलिकिया जिल्हा गा होय।

³⁵ एठा जब मालूमजे, कि किलिकिया जिल्हा गा होय। मेटे दियाटे मंडीके, “जब आमगा आनोवा टोकाके मिंकू यहूदी कुरकू हेजेवा। मेटे इंज आमगा फैसला डाएवा।” एठा डीचनी पौलुस के राजा हेरोदेस गा किल्ला गेन, पहिरा गेन दोडो गा हुकूम जीके।