ಅಪೊಸ್ತಲ್ 22 - गवली उनाई नियम

गर्दी गेन पौलुस गा प्रचार

¹ “हे डाईचो एठा सनाकु, नका हारिमनटे इंजा जवाब आजुमे।”

² दिकु येटेन आजुमटे कि डीच दियाटे इब्रानी भाषा गेन मंडीवा होय, दिकु कायोम थंदळके। मेटे पौलुस नी मंडीके,

³ “इंज मेटे यहूदी कुरकू मेना, इंज जनम किलिकिया जिल्हा गा तरसुस शहर गेन डाएन। पेनो इंज्नी इनी पुरान गमलीएल गा नंगा गा मेरान सुबानटे शिक्षा हासिलजे, एठा जुना सनाकु गा नियम भी साही रितो टे इथूकेकु। एठा परमेश्वर गा घल्जी येनोगो धुन येंडाके डा, जैसा आपे सेबाईकु टैंज होय।

⁴ इंज नी कोरो एठा जापाए बार्खिंजके भी टोलटे, एठा जेलेन केटकु डा, एठा इनी समूह गा कुरकू के येटे टाएन सतातिंजकेकू, कि दिकुके घोच्केकु भी मेना।

⁵ इनी बातो गा सेबाई खाटयाजक एठा सेबाई यहूदी जुना सनाकु गा सेबाई पंचाती गवाही होय। कि दिकुटे इंज यहूदी डाईचो गा घल्जी चिठ्ठी साटे दमिश्क पुरान सेने लक्के डा, कि जो देटेन डाऊ दिकुके दण्डो जिऊ घल्जी टोलटे यरूशलेम शहर गेन सालेकु।”

मन बदलाऊ गा वर्णन

⁶ जब इंज यात्रा डाटे दमिश्क पूरा गा मेरान आदिरके, मेटे येनोगो डायेन कि दया टेमो आन्दजोटे अचानक म्या खाट उजाला बदळा टे इंजा उफुन भी कोनेन चमकातिंजे।

⁷ एठा इंज ओटे लिंजेन बोचोयेन, एठा इनी आवाज आजुम्के, “हे शाऊल, हे शाऊल, आमनी इंज्के चोया सातातिंजकोम्बा होय?”

⁸ इंज्नी कोम्बारके, “हे प्रभु, आम जे होय?” डीचनी इंज्के जवाब जिले, “इंज यीशु नासरी होय, डीचके अमा ससातातिंजबा होय।”

⁹ एठा इंजा सेंग्गोन डा, दिकुनी उजालाके नी डोके, एठा म्या आवाज आजोमके, लेकिन दिकु समझतिंजडूका कि आवाज नी इंजाटे चोच मंडीके।

¹⁰ मेटे इंज्नी कोम्बारके, “हे प्रभु, इंज चोच डाए?” प्रभु नी इंजाटे मंडीके, “बिडे डो दमिश्क पूरा गेन सेने, एठा जो चोच्काभी अमा दडा गा घल्जी ठहरातिंजके होय देटेन आमके सेबाईका घालेवा।”

¹¹ जब डी खाट उजाला गा वोजीटे इंजेन चोच्का बान डूगु लज्जे। मेटे इंज्नी इंजगा सोपतीकु गा टी उठाटे दमिश्क पूरा गेन हेन।

¹² “मेटे हनन्याह जीमू गा मूसा गा नियम गा रोंगो म्या भक्त कोरो डा।” जो डेगा थंदळ मिठाच सेबाई यहूदी कुरकू गेन ज्यादा जीमू डा। इंजा मेरान हेन,

¹³ एठा टेंगेनटे इंजाटे मंडीके, हे डाई शाऊल, डाबोल दोडो लज्जे। डीका टेमो इंजागा मेट खुल्लायेन एठा इंज्नी डीचके डोकेनेच।

¹⁴ मेटे डीचनी मंडीके, “आलेगा जुना सनाकु गा परमेश्वर नी आमके इनिघल्जी ठहरातिंजकेमी होय, कि आम दियागा इच्छाके चिनाए, एठा डी मसीह के डोगेच एठा दियागा आवाज आजुमे।

¹⁵ चोयाकी अमा डीच कोनेटे सेबाई कोरोकु गा सम्मान डी बातो गा गवाही होय, जो अमा नी डोके एठा आजुम्के।

¹⁶ नका चोया टेमो दडावा होय? बिडे, बपतिस्मा सेगे एठा दियागा जीमू साटे आपना पापो टे माफी घाट्यू।”

¹⁷ “जब इंज डाबोलटे यरूशलेम शहर गेन हेंडो यरूशलेम गा मंदिर गेन प्रार्थना दडा लक्के डा। मेटे दर्शन डोके।”

¹⁸ एठा डीचके डोके कि इंजाटे मंडीवा होय, “जल्दी डाटे यरूशलेम शहर टे सेने। चोयाकी दिकु कुरकू जो येदेन के होय, इंजा बारेन अमा गवाही बान मानतिंजे।”

¹⁹ इंज्नी मंडीके, “हे प्रभु दिकु इकुका हाडाई होय, कि इंज अमा लिंजेन विश्वास दोडोमिंकू के जेलेन केटकु डा एठा जगा-जगान आराधना जगा गेन मुंडाकु डा।”

²⁰ एठा जब अमा गवाही स्तिफनुस गा पचना आडे लक्के डा, मेटे भी इंज टेंगेन्के डा। एठा इनी बातो गेन सहमात डा, एठा दियागा घोगेचमिंकू गा कपळे गा राखावली दडा डा।

²¹ एठा प्रभु नी इंजाटे मंडीके, “सेंजू, चोयाकी इंज आमके अलग्गो जाटो गा कुरकू गा मेरान लेंक्की लेंक्कीन कुल्कोमबा।”

²² कुरकू इनी बातो टाएन दियागा आजोम लक्के। मेटे खाट आवाज टे चिल्लातिंजके, “डीचके घोजेच, दियागा जीटा थंदळ साही बाऊ!”

²³ जब दिकु चिल्लातिंज लक्के एठा कुर्ता के टेप्पाटे एठा आपना खीजो घगाला गा घल्जी बादळ गेन धुल्ला टेप्पाए डा।

²⁴ मेटे पलटण गा सुबेदार नी मंडीके, “इनिज्के किल्लान नी सैय्याकेच, एठा बाल्खामुन्डाटे पता लगातिंजे, कि इंज मलूमजेकी कि कुरकू तुनी वोजीटे दियागा खिलाफबेन येनोगो चिल्लातिंजू लक्के होय।”

²⁵ जब दिकुनी पौलुस के ख्यारयने टे टोलकेनेच मेटे पौलुस नी डी सुबेदार टे जो दियागा मेरान तेन्गेन्के डा कोम्बारके, “चोच येटेन साही होय, कि आपे म्या रोमी कोरो के बिना दोषी ठहरातिंजटे बाल्खा मुन्डाके?”

²⁶ सुबेदार नी इनी आजुमटे पलटण गा सरदार गा मेरान ओलेडो मंडीके, “अमा येटेन चोच चोथांबा होय? येटेन नी रोमी कोरो होय।”

²⁷ मेटे पलटण गा सरदार नी पौलुस गा मेरान हेंडो कोम्बारके, “इंज्के घाले, चोच अमा रोमी कोरो होय?” डीचनी मंडीके, “हां।”

²⁸ येटेन आजुमटे पलटण गा सरदार नी मंडीके, “इंज नी रोमी आरु गा हाक के घोनेच डामा जीटे घटयेन होय।” पौलुस नी मंडीके, “इंज्नी मेटे जन्म टे रोमी होय।”

²⁹ मेटे जो कुरकू डीचके चिचना लिंजेन डा, दिकु तुरुटो दियागा मेरान म्याधेळेनजे। एठा पलटण गा सरदार इनी चिनाटे कि येटेन रोमी कोरो होय। एठा डीचनी डीचके टोलकेनेच होय इनिघल्जी हिघारायेन।

महासभा गा सम्मान पौलुस

³⁰ दूसरा दिन देटेन साही-साही चिचना गा इच्छाटे कि यहूदी धर्म गा सम्मा कोरो दिया लिंजेन चोया दोष येंडा लक्के होय, इनिघल्जी पौलुस गा बंधान खुल्लाके। एठा मुख्यायाजककु एठा सेबाई खाटसभा के म्याखठ्ठाऊ गा हुकूम जीके। एठा पौलुस के साटे दिकु सम्मान तेन्गेकेनेच मेना।