ಅಪೊಸ್ತಲ್ 21 - गवली उनाई नियम

यरूशलेम शहर गा यात्रा

¹ जब आलेनी दिकुटे बिदाटे समुद्र गा यात्रा सुरुके, मेटे सीधा कोरा टे कोस टुक्कीन हेन, एठा दूसरा दिन रुदुस टुक्कीन, एठा आलेनी पतरा टुक्कीन गेन आदिरजे।

² एठा म्या खाट डोंगा फिनीके शहर गेन सेने लठ्ठाका घाटाके, एठा आलेनी दिया लिंजेन पेळेचटे यात्रा सुरुके।

³ आले डाखोरया कोनेन साइप्रस टुक्की डोके। आले डीचके आराटे सीरिया जिल्हा गा कोनेन बाळतिंजूका लक्के, एठा सोर पुरान आदिरजे। चोयाकी देटेन खाट डोंगाटे ओझा आगुरू डा।

⁴ एठा चेलाकूके धोटे आले देटेन सात दिन टाएन थंदळके। दिकुनी पवित्र आत्मा गा इथूके पौलुस टे मंडीके कि यरूशलेम शहर के बान सेने।

⁵ सात दिन गा बदोन जब देटे टे आलेगा सेने गा टेमो हेन, मेटे आले देटे सेन्द्रा लज्जे। सेबाई जापाएकु एठा चाफनिकू नी आलेके पूरा गा बल्लान टाएन दिकेकु एठा आलेनी धुरान टोपेरे जेगाटे प्रार्थना डाके।

⁶ मेटे म्या दूसरा टे बिदाटे, आले मेटे खाट डोंगा लिंजेन पेळेन, एठा दिकु आपना-आपना उरान हिरायेन।

⁷ जब आले सोर पूरा टे सुरुके यात्रा डाटे, आले पतुलिमयिस पूरा गेन पोचातींज्के। एठा विश्वास डाईचो के नमस्कार डाटे दिकुगा सेंग्गोन म्या दिन थंदळके।

⁸ दूसरा दिन आले देटे टे सेन्द्रा टे कैसरिया शहर गेन हेन। एठा फिलिप्पुस जो अच्छा खाबोर प्रचार घगाला डा, दियागा उरा गेन ओले थंदळके। जो डी सात कोरोकु गा तालान टे म्याखोम डा दिकुके यरूशलेम शहर गेन कालम्के चेलाकूनी विधवाकु गा देखभाल गा घल्जी कालम्केकु डा।

⁹ दियागा उफुन कुंवारी कोंजाईकु डा। जो भविष्यवाणी दडा डा।

¹⁰ जब आले देटेन घोनेच दिन थंदळके। मेटे अगबुस जीमू गा म्या परमेश्वर गा कोनेटे मंडीमिठाच यहूदिया जिल्हा टे हेन।

¹¹ डीचनी आलेगा मेरान हेंडो पौलुस गा पट्टाके सैईय्ये। एठा हेजा गा टी नंगा टोलटे मंडीके, “पवित्र आत्मा येटेन मंडीवा होय, कि जो कोरो गा येटेन पट्टा होय, दियागा यरूशलेम शहर गेन यहूदी धर्म गा सम्मा कोरो गेल्ला इनिका रोंगो टे टोलेवा, एठा अलग्गो जाटो गा कुरकू गा टी गेन जीकोम्बा।”

¹² जब आलेनी इनी बातो आजुम्के, मेटे आले एठा देटे गा कुरकू नी पौलुस टे बिनती डाके, कि यरूशलेम शहर गेन बाकी सेने।

¹³ पेनो पौलुस नी कोम्बाराके, “आपे चोच दडावा होय, जाम-जाम टे इंजगा मन के कसोएवा? इंज मेटे प्रभु यीशु मसीह गा जीमू गा घल्जी यरूशलेम शहर गेन बाने बस तोटोलेन का गा घल्जी बनकी गुजू गा घल्जी भी तैयार होय।”

¹⁴ जब डीचनी बान मनातिंजे मेटे आले सेबाईकु येटेन मंडीटे कायोम जे, “प्रभु गा इच्छा पुरायु होय।”

¹⁵ अदा दिन गा बदोन आलेनी तैयारी के एठा यरूशलेम शहर के ओले मेना।

¹⁶ कैसरिया शहर गा भी अदा चेलाकू आलेगा सेंग्गोन बेल्लाएन। एठा मनासोन जीमू गा साइप्रस द्वीप गा थंदळ मिठाच गा उरान ओले। डीच सेबाईकु टे पेला गा चेलाकू तालाटे म्याखोम डा।

यरूशलेम शहर गेन पौलुस गा डाबोलटे हेजे

¹⁷ जब आले यरूशलेम शहर गेन पोचातींजे, मेटे विश्वासी डाईचो खाट खुशीटे आलेगा स्वागत डाके।

¹⁸ दूसरा दिन पौलुस आलेके साटे याकूब गा मेरान ओले, येटेन सेबाई जुनाकु घोलाएन डा।

¹⁹ मेटे डीचनी दिकुके नमस्कार डाटे, जो-जो कामय परमेश्वर नी दियागा सेवाकाई गा द्वारा अलग्गो जाटो गा कुरकू गेन डाके डा। म्या-म्या डाटे सेबाई घाल्के।

²⁰ दिकुनी येटेन आजुमटे परमेश्वर गा महिमा डाके, डाबोलटे दियाटे मंडीके, “हे डाई, आमेन हाडाई होय, कि यहूदी कुरकू तालाटे चोटोका हजार कुरकू नी विश्वास डाके होय। एठा सेबाईकु मूसा गा नियम गा पालान भेबाव ध्यान जीटे दडावा होय।”

²¹ डी यहूदी विश्वासी कुरकू के अमा बारेन घाल्के होय, कि अमा अलग्गो जाटो गा कुरकू गेन थंदळ मिंकू यहूदी कुरकू के मूसा गा नियम के बन ममानातिंज गा बारेन इथूवा होय एठा मंडीवा होय, कि आपना चाफ्निकु गा खतना बाकी डाए, एठा यहूदी न रिती रिवाज गा रोंगो बाकी सेन्द्रा।

²² मेटे डाबोलटे चोच डाएवा होय? कुरकू जरुर टेका आजोम्बा, कि आम येटेन हेन होय।

²³ इनिघल्जी जो आले अमाटे मंडीवा होय, डी डाए। आलेगा येनेन उफुन कोरोकु होय, दिकुन इनी मंडी अच्छा डाऊवाकी, “कि दिकुके डी मन्नत के पुपारा होना जो दिकुनी परमेश्वर गा सम्मान मनातिंजबे होय।”

नमस्कार

²⁴ दिकुके साटे दियागा सेंग्गोन आपना खुदके चोखरा दडा गा विधी पुराया। एठा दिकु घल्जी खर्चा जीके कि दिकु कपार टाकुलुकी। मेटे सेबाईकुन मालूमजुवा, कि जो बातो दिकुनी अमा बारेन मंडीके होय, दिकु गेन चोचकाभी सच्चो बाऊ होय। पेनो आम खुद भी मूसा गा नियम के मनातिंजटे डेगा रोंगो सेन्द्रावा होय।

²⁵ पेनो डी अलग्गो जाटो गा कुरकू गा बारेन दिकुनी विश्वास डाके होय। आलेनी इनी निर्णय डाटे ओल्टे कुल्के होय, “कि दिकु मूर्ति के बलिदान पेळेचके मिनी आटा बाकी जोजोम, एठा गर्दन दबतिंज टे घोचकेनेच जानवारकु गा पचना एठा जिलु बाकी जोजोम, एठा आनोवा बाकी दडा। इनी सेबाई बातो टे लेंक्कीन थंदळे मेटे आपेगा भला डाऊवा।”

²⁶ दूसरा दिन पौलुस नी डी कोरोकु गा सेंग्गोन ओलेडो आपना खुदके चोखारा के। मेटे डीच यरूशलेम गा मंदिर गेन ओले, इनी गघाल कि चोखाराऊ गा दिन चोला स्यागुवा, एठा दिकुटे हरेक गा घल्जी भार पेळेजेवा।

मंदिर गेन पौलुस गा जेलेन केडू

²⁷ जब दिकु सात दिन पुराऊ गेन डा, मेटे आसिया जिल्हा गा यहूदी कुरकू नी पौलुस के यरूशलेम गा मंदिर गेन धोटे सेबाई कुरकू के बायकातिंजकेकू, एठा पौलुस के उठायेनेच एठा चिल्लातिंजू लज्जे,

²⁸ “हे इस्राएली कुरकू मदत डाए, येटेन डीका कोरो होय, जो कुरकू गा एठा मूसा गा नियम गा, इनी जगा खिलाफबेन हर जगा सेबाई कुरकू के इथूकुबा होय। येटे टाएन कि यूनानी अलग्गो जाटो कुरकू के भी यरूशलेम गा मंदिर गेन साटे डीचनी इनी चोखरा जगा के बिसोटो डाके होय।”

²⁹ दिकुनी एगो मंडीके चोयाकी एनेटे पेला इफिसि कुरकू त्रुफिमुस के पौलुस गा सेंग्गोन पूरा गेन डोकेनेच डा। एठा समझातिंजू डा कि पौलुस डीचके यरूशलेम गा मंदिर गेन सालेनेच होय।

³⁰ मेटे सेबाई पूरा गेन हल्ला मचातिंजे, एठा कुरकू साळुपटे गोलायेन। पौलुस के उठाटे यरूशलेम गा मंदिर गा बल्लान ओळटे सालेनेच, एठा तुरुटो दारोजो बांदोके।

³¹ जब दिकु डीचके घोगेज चाहता डा। मेटे पलटण गा सारदार के खाबोर पोचातिंजके कि यरूशलेम शहर गेन घोनेच कुरकू हल्ला मचातिंज लक्के होय।

³² मेटे देटेन तुरुटो सिपाईकु एठा सुबेदारकु के साटे दिकु मेरान हेन। एठा कुरकू गा गर्दी नी पलटण गा सारदार के एठा सिपाईकु के धोटे पौलुस के मुमन्डा रोकतिंजके।

³³ मेटे पलटण गा सरदार नी पौलुस गा मेरान हेंडो डीचके उठायेनेच। एठा बरी सकळी टे तोटोल गा कि हुकूम जीटे कोम्कोम्बारा लज्जे, “येटेन जे होय, एठा इनिजनी चोच डाके होय?”

³⁴ पेनो गर्दी तलाटे जेका चोचका एठा जेका चोचका चिल्लातिंजू लक्के एठा जब हुल्लड गा मारे सच्चाई बान मालूम डुका, मेटे डीचके किल्लान सा गा हुकूम जीके।

³⁵ जब डीच पैरी लिंजेन पोचातींजे, मेटे येनोगो डायेन कि गर्दी के दाबातिंज गा मारे सिपाईकुन डीचके टूलटे सास बोचोयेन।

³⁶ चोयाकी कुरकू गा गर्दी इनी चिल्लातिंजटे दियागा पीछा लज्जे, “डीचके घोच्केच।”

³⁷ जब दिकु पौलुस के किल्लान सा गेन डा। मेटे पौलुस नी पलटण गा सारदार टे कोम्बाराके, “चोच इंज्के हुकूम होय कि इंज आपेटे चोचका मांडे?” डीचनी मंडीके, “चोच आपे यूनानी भाषा मालूम होय?

³⁸ चोच आम मिस्री देशो गा बाने, जो इनी दिन टे पेला सरकार गा खिलाफबेन दंगा डाटे उफुन हजार उकारावादीकु के डोंगोरेन सैय्येकु डा?”

³⁹ पौलुस नी मंडीके, “बाने, इंज मेटे म्या यहूदी कोरो होय! इंज किलिकिया जिल्हा गा तरसुस शहर गा थंदळ मिठाच होय। एठा इंज आमटे बिनती दडावा होय, कि इंज्के कुरकू टे बातो डाए।”

⁴⁰ जब डीचनी हुकूम जीके, मेटे पौलुस नी पैरी लिंजेन टेंगेनटे कुरकू के कायोम थंदळ गा घल्जी टी टे इशारा डाके। जब दिकु कायोमका थंदळजे, मेटे डीच इब्रानी भाषा गेन मंडी लज्जे।