ಅಪೊಸ್ತಲ್ 20 - गवली उनाई नियम

मकिदुनिया शहर, यूनान शहर एठा त्रोआस शहर गेन पौलुस

¹ जब कल्ला रोकातिंजे, मेटे पौलुस नी चेलाकूके हाकोटे हिम्मत जीटे समझातिंजकेकु, एठा दिकुटे बिदाटे मकिदुनिया जिल्हा गा कोनेटे ओले।

² एठा डी सेबाई जिल्हा टेका एठा चेलाकूके हिम्मत जीटे देटेन यूनानी जिल्हा डीके अखाया जिल्हा भी मंडेबा होय डेन हेन।

³ जब आफाई महिना थंदळ टे डीच देटेन टे खाट डोंगा लिंजेन सीरिया जिल्हा गा कोनेन सेनेन डा। पेनो डीचनी आजुम्के कि अदा यहूदी धर्म गा सम्मा कोरो डीका कोरा गेन घोगेज गा योजना आरु लक्के होय। इनिघल्जी डीचनी मकिदुनिया जिल्हा टे सेने लठ्ठाका सीरिया जिल्हा सेने गा निर्णय डाके।

⁴ इनी यात्रा गेन बिरीया शहर गा थंदळ मिंकू पुरूर्स गा कोणटे सोपत्रूस एठा थिस्सलुनीकियो शहर टे अरिस्तर्खुस एठा सिकुन्दुस एठा दिरबे पूरा गा गयुस, एठा लुस्त्रा पूरा टे तीमुथियुस एठा आसिया जिल्हा गा तुखिकुस एठा त्रुफिमुस आसिया जिल्हा टाएन आलेगा सेंग्गोन यात्रा डावे।

⁵ इनी सोपतीकु यात्राकु आलेटे सम्मान ओले एठा त्रोआस जिल्हान आदिरटे आलेगा इंतजार दडा लज्जे डा।

⁶ पेनो आलिंज बरखिंज वोटे गा कोरो टे सेने लठ्ठाका फिलिप्पी शहर गा यात्रा डावे। अखमीरी सोकळा गा तिवार गा बदोन फिलिप्पी शहर टे खाट डोंगा लिंजेन पेळेचटे मोनाई दिन गेन त्रोआस जिल्हा गेन दिकुगा मेरान पोचातींजे एठा सात दिन टाएन डीगान का थंदळके।

यूतुखुस गा गोयन मिठाच जाटे जीटऊ

⁷ हाप्ताह गा पेला दिन जब आले प्रभु भोज गा घल्जी घोलाएन। मेटे पौलुस नी जो दूसरा दिन सेने गेन डा, डीचनी बातोवे एठा अदा रातो टाएन शिक्षा जिऊ लक्के डा।

⁸ जो छापरी लिंजेन आले म्याखठ्ठा के डा, डेन घोनेच दिवा जुलू लक्के डा।

⁹ एठा यूतुखुस जीमू गा म्या जवान खीळकी लिंजेन सुबान लठ्ठाका गहीरा दुनुमटे दोकलातिंजू लक्के, एठा जब पौलुस बातो लक्के डा मेटे देटेन दुनूम गा दोकलातिंजून आफाई छापरी टे बोचोयेन एठा डीचनी गोयेन।

¹⁰ पेनो पौलुस दियागा मेरान इटान आगुरुटे दियाटे घाठेन एठा खंडा मिलातिंजटे मंडीके, “घबरातिंजू बाकी, चोयाकी देटेन आए भी जीटाका होय दियेनका होय।

¹¹ एठा माठान ओलेडो सोकळा टुक्काके एठा दिकुनी डाबोलटे प्रभु भोज सावे एठा डी सेबाईकु नी बेल्लाटे आटा जोवे। दिन ओट टाएन बातो चितो का लक्के कि इटो गेन दिन पेळेन, मेटे डीच ओले।

¹² एठा दिकु डी जवानके जीटाका सालेनेच, एठा सेबाईकु भेबाव कुशोयेन मेना।”

त्रोआस शहर टे मीलेतुस शहर गा यात्रा

¹³ आले खाट डोंगा लिंजेन पेळेचटेका अस्सुस पूरा गा कोनेन सम्मान बळातिंजे, देटे टे आलेन पौलुस के सेंग्गोन साटे सम्मान बळातिंजे डा। पौलुस देटेन डा गा कोरा टे आदिरजे चोयाकी इनी डीचनी हेजा योजना गा रोंगो ओटे गा यात्रा डावे।

¹⁴ जब डीच अस्सुस पूरा गेन आलेन घाटाएन मेटे आले डीचके खाट डोंगा लिंजेन पेळेचकेनेच मितुलेने पुरान हेन।

¹⁵ दूसरा दिन देटेन टे यात्रा डाटे, आले खियुस पूरा गा मेरान टे सेने लठ्ठाका, सामुस पुरान पोचातींजे, एठा दूसरा दिन मीलेतुस पूरा गेन हेन।

¹⁶ पौलुस नी इफिसुस शहर गेन बान आगुरू गा फैसाला डाके, चोयाकी डीच आसिया जिल्हा गेन एठा ज्यादा टेमो बान बिबतातिंज चाहता डा। चोयाकी डीच जल्दी गेन डा, कि अगर डाऊ टासो, मेटे डीच पिन्तेकुस्त गा तिवार गा दिन यरूशलेम शहर गेन थंदळके।

इफिसुस शहर गा जुना सनाकुके शिक्षा

¹⁷ जब आले मीलेतुस शहर गेन आगुरुके, मेटे पौलुस नी इफिसुस शहर गा मसीह गा मंडली गा जुनाकु के हाकोलेकु।

¹⁸ जब दिकु दियागा मेरान हेन, मेटे दियाटे कोम्बाराके, “आपेन मालूम होय, कि पेलाका दिन टे जब इंज आसिया जिल्हा गेन आदिरजे, इंज हर टेमो आपेगा सेंग्गोन तुनिरोंगो थंदळके।”

¹⁹ मतलब खाट भोलाटे एठा मेट डा बोचो बोचोटे, एठा डी आंदाजोनौर गेन जो यहूदी दल गा सम्मा कोरो गा योजना गा वोजीटे जो इंजा लिंजेन हेन मेना, इंज प्रभु गा सेवा दडाका लक्के।

²⁰ एठा जो-जो बातो आपेगा फायदा गा डा, दिकुके घल्के एठा कुरकू गा सम्मान टिपीके एठा उरा-उरान ओलेडो सेबाईका घल्के।

²¹ बनकी यहूदी कुरकू एठा यूनानी अलग्गो जाटो गा कुरकू के ध्यान टे घाले लक्के कि परमेश्वर गा कोनेन मन बादलाए, एठा आलेगा प्रभु यीशु मसीह लिंजेन विश्वास डोए।

²² एठा नका इंज पवित्र आत्मा गा हुकूम गा पालान दडा गेन टोलाके मेना यरूशलेम शहर के सेनेवा, एठा बान मालूम, कि देटेन इंजा लिंजेन चोच बितातिंजू वा।

²³ बस येटेन कि पवित्र आत्मा हर पूरा गेन गवाही जी जीटे इंज्के मंडीवा होय, कि बंधान एठा तखलिफ अमा घल्जी तैयारके होय।

²⁴ पेनो इंज आपना जान के चोचका बान समझतिंजू कि डीके अच्छा चिनाया। बनकी येटेन कि इंज आपना साळूप के, एठा डी सेवा के पुरायेवा, जो इंज नी परमेश्वर गा कृपा गा अच्छा खाबोर लिंजेन गवाही जिऊ गा घल्जी प्रभु यीशु टे घाटाके होय।

²⁵ एठा नका इंज मालूम मेना, कि आपे सेबाई डे गेन परमेश्वर गा राज्य गा खाबोर घागल होय, आपे इंज्के डाबोल बान दोडो।

²⁶ इनिघल्जी टैंज गा दिन आपेटे गवाही जीटे मंडीवाकी, अगर आपेटे जेकाभी यीशु लिंजेन विश्वास डाके बिना गुजूवा होय, मेटे इंजा गलती बाऊ होय।

²⁷ चोयाकी इंज्नी आपेके डी सेबाईका घाल्के होय जो परमेश्वर चाहतावा होय कि आपे हाडाईयु।

²⁸ इनिघल्जी आपना एठा सेबाई गर्दी चौकासी डाए। जेटे पवित्र आत्मा नी आपेगा मुख्या ठहरातिंजकेमी होय कि आपे परमेश्वर गा मसीह गा मंडली गा जागली मिठाच। येटे गर्दी डीचनी हेजा गा पचना टे मोलाटे सावे होय।

²⁹ इंजेन मालूम होय, कि इंजा सेने गा बादोन आपेगा तालान लाबळ गुरूजी हेजेवा एठा विश्वासी कुरकू के घोनेच नुकसान जेबा। दिकु डी चीचारा मिठाच डोंगोर सिटा गा रोंगो थंदळवा जो मेंडाकू के घोचकुवा होय।

³⁰ येटे टाएन आपेगा आपना विश्वासी कुरकू गा समूह टे, येनोगो कुरकू हेजेवा, जो चेलाकूके आपना टाउन ओळकुवा तेळा मेळा बातो मंडीवा।

³¹ इनिघल्जी जाट्टो थंदळे, एठा यादो डाए कि इंज्नी आफाई साल टाएन रातो दिन मेट डा आडी आडीटे हार म्याखोम के चेतावनी जिऊ बान आराडुका।

³² एठा नका इंज आपेगा परमेश्वर के, एठा दियागा कृपा गा वचन के जे वा। जो आपेके आरुकोम्बा होय। एठा परमेश्वर आपेके देटेन विरासत जेबा, डीचके जिऊ गा वादा डीचनी डी सेबाई कुरकू टे डाके होय जो दियागा द्वारा चोखरा आरुके।

³³ इंज्नी जेका गा का चाँदी, सोना या कपड़े गा लालीचो बान दडुका।

³⁴ आपे आपेन का मालूम होय कि इनिका टी नी इंजा एठा इंजा सोप्तीकु गा जरुरी पुराके।

³⁵ इंज्नी आपेके सेबाई चोचकाभी डाटे टिपीके, कि इनी रिती टे आराम्बो डाटे डोन कामजोरकु के सम्भालतिंजकु, एठा प्रभु यीशु मसीह गा वचन यादो दोडो जरुरी होय। कि डीचनी खुद का मंडीके होय, साटे जिऊ धन्य होय।

³⁶ येटेन मंडीटे डीचनी ठोपरे जेगाके एठा दिकु सेबाईकु गा सेंग्गोन प्रार्थना डावे।

³⁷ मेटे दिकु सेबाईकु घोनेच जाम्के एठा पौलुस गा खांदा चीप्कातिंजटे डीचके चुम्मा जोमेच लज्जे।

³⁸ दिकु कास डाटे इनी बातो गा शोकी दडा डा। जो डीचनी मंडीके डा, कि आपे इंज्के डाबोल बान दोडो। एठा दिकुनी डीचके खाट डोंगा टाएन पोचातींज्केनेच।