ಅಪೊಸ್ತಲ್ 2 - गवली उनाई नियम

पवित्र आत्मा गा डाबोलटे

¹ यहूदी कुरकू गा पिन्तेकुस्त गा तिवार दिन हेन, मेटे दिकु सेबाई म्या जगान जमाके डा।

² एठा अचानक बदळा टे खाट धुंदळ गा रोंगो सेव-सेव गा आवाज आजुम्जे, एठा देटे सेबाई उरा देटेन दिकु सुबानके डा, गुंगजे।

³ मेटे दिकु सम्मान येनेगो सिंगेल ओटजे डेगा आकार गा चभू रोंगो डा, जो हेन डो दिकु तलाटे हर कोरोन रुकातिंजे।

⁴ एठा दिकु सेबाईकु पवित्र आत्मा टे भेट्टेन, जो रोंगो पवित्र आत्मा नी दिकुके वरदान जीके, डेगा रोंगो दिकु रेंग्गो-रेंग्गो भाषा गेन मंडी लज्जे।

⁵ डी टेमो परमेश्वर गा आदर दडामिंकू चोटोका यहूदी कुरकू डा। जो कि दुनिया गा हर म्या देशो टे तिवार ममानातिंज गा घल्जी हेन डा एठा यरूशलेम शहर गेन थंदळ लक्के डा।

⁶ जब कोयो गा रोंगों आवाज आजुम्के, मेटे गर्दी जमाएन एठा कुरकू घबरातिंजे। चोयाकी हर म्याखोम इकु-इकुका भाषा गेन चेलाकूके मंडीटे लक्के डा।

⁷ दिकु सेबाईकु बिचारजे डो एठा अचम्बो टे मंडी लज्जे, “चोच इंकू सेबाईकु गलील जिल्हान थंदळ मिंकू कोरोकु बाऊ होय?

⁸ मेटे येटेन चोच डाऊ लक्के होय, जो आले तलाटे हार म्याखोम इंकुके इकु-इकुगा भाषा गेन बातो टे आजोम लक्के होय।

⁹ आले तलाटे अदा कुरकू पार्थी जिल्हा टे होय, मेदी, एलाम कुरकू, मेसोपोटामिया, यहूदिया जिल्हा, कप्पदूकिया, पुन्तुस एठा आसिया,

¹⁰ एठा फ्रूगिया जिल्हा एठा पंफूलिया जिल्हा एठा मिस्र देशो कुरेन शहर गा मेरान लीबिया देशो गा अदा हिसा, इनी सेबाई देशो गा थंदळ मिंकू एठा रोम शहर टे हेजेमिंकू हिंदीळीमिंकू,

¹¹ मतलब यहूदी कुरकू, एठा अलग्गो जाटो दिकुनी यहूदी धर्म आरोएन डा, क्रेते द्वीप गा कुरकू एठा अरब देशो भी होय, पेनो इकु-इकुगा भाषा गेन दिकुटे परमेश्वर गा खापेट-खापेट कामय गा चर्चा आजोम लक्के होय।”

¹² दिकु सेबाईकु बिचारजे मेना, एठा घबरातिंजटे इनिज-दियाटे कोकाम्बरा लज्जे, “येटेन चोच डाऊ लक्के होय?”

¹³ पेनो दूसराकु नी मजाक उळातिंजटे मंडीके, “दिकुनी थोळासा येठाभी सिडू नुवे होय।”

पिन्तेकुस्त गा दिन पतरस गा भाषण

¹⁴ पतरस डी ग्यारह कलमके चेलाकू सेंग्गोन टेंगेंटे एठा खट्टेका मंडी लज्जे, “हे यहूदी कुरकू एठा हे यरूशलेम शहर गा सेबाई थंदळ मिंकू इनी चिनाए एठा इंजा आजुमे।”

¹⁵ जैसा आपेन सामझातिंजू लक्के होय, इनी कुरकू नशा गेन बाऊ होय, चोयाकी आएनी फेजेर गा नाऊ बजाके होय।

¹⁶ पेनो जो आलेगा सेंग्गोन डाएन होय, येटेन डी बातो गा पुराऊ होना होय जो योएल परमेश्वर गा कोनेटे मंडीमिठाच गा द्वारा पवित्र ग्रंथ गेन मंडीके मेना डा।

¹⁷ परमेश्वर मंडीवा होय, कि आखरी दिनेन येनोगो डाऊवा, कि इंज-इंजगा आत्मा सेबाई कुरकू के जेबा एठा आपेगा कोंकु एठा आपेगा कोंजाईकु भविष्यवाणी डाएवा एठा आपेगा जवानकु दर्शन डोगेवा, एठा आपेगा सना कोरोकु सपना डोगेवा।

¹⁸ डी दिनेन, इंज-इंजागा भाग्यकु एठा भागनीकुके इंजा आत्मा जेबा, एठा दिकु भविष्यवाणी डाएवा।

¹⁹ एठा इंज माठान बदळा गेन अचम्बो कामय एठा इटान ओटे लिंजेन चिन्हा, मतलब पचना एठा सिंगेल एठा धुंजा गा बदळा घालेवा।

²⁰ प्रभु गा दिन हेजे टे पेला सूर्य अंदराऊ एठा चंद्रा पचना गा रोंगो राटाऊवा। डी दिन खाट एठा महिमा टे भेट्टिटे डाऊवा।

²¹ एठा जो जेकाभी प्रभु गा जीमू रिमेवा, दिजेनका उध्दार घाटाऊवा।

²² “हे इस्राएली कुरकू इनी बातो आजुमे, कि नासरत पूरा गा यीशु म्या येनेगो कोरो डा, डीचके परमेश्वर गा द्वारा आपेगा सम्मान टिपिकेनेच मेना डा, डी चमत्कारनौर एठा अचम्बो कामयनौर एठा चिन्हानौर गा द्वारा जो परमेश्वर नी दियागा द्वारा डाके।” आम खुद हाडाई होय कि येटेन सच्चो होय।

²³ परमेश्वर गा द्वारा ठहरातिंज्के योजना एठा पेला गा ज्ञान रोंगो, डीच आपेगा टी गेन जीके मेना। आपेनी डीचके बुराई कोरोकु गा मदत टे खिलानौर खुटीटे क्रूस लिंजेन पेळेचटे घोच्केनेच।

²⁴ मेटे भी परमेश्वर नी डीचके गोएन गा बादोन डाबोलटे जीटाकेनेच। चोयाकी दिया घल्जी गुजू थंदळ संभाव बाऊ डा।

²⁵ चोयाकी राजा दाऊद मसीह गा बारेन मंडीवा होय, इंज प्रभु के हमेशा इंजा सम्मान दोडोका लक्के। चोयाकी देटेन इंजा डाखुरी कोनेन होय, ताकी इंज हिघरायु बाकी।

²⁶ इंज खुशीटे भेट्टिके मेना, एठा इंज अमागा बढाई दडाका लक्कूवा मेना, बानकी इंजा कोम्बोर भी आसा गेन आरुका थंदळवा।

²⁷ चोयाकी आम इंज्के पातल बान थंदळ डाए एठा न आमगा चोखरा कुरकू गा म्हाळाके सळातिंज डाए बाने।

²⁸ आमनी इंज्के जीवन गा कोरा घाल्ले होय, आम इंज्के अमा थंदळ गेन खुशीटे भेट्टी कोम्बा।

²⁹ “हे डाईचो, इंज डी कुलपति राजा दाऊद गा बारेन आपेटे हिम्मत गा सेंग्गोन मंडी सकतावा मेना, कि डीचनी मेटे गोएन मेना एठा गळातिंज्केनेच भी मेना एठा दियागा कब्र आए टाएन आलेगा येटेन आए टेमो होय।”

³⁰ देटेन परमेश्वर गा कोनेटे मंडीमिठाच डा, दिजेन मालूम डा कि परमेश्वर नी कसोम जोमटे दाऊद टे वादा डाके, “इंज अमा कोंकु तलाटे म्या कोरो के अमा सिंहासान लिंजेन सुबानेचबा।”

³¹ इनी चिनाटे कि हेजे मिनी टेमो गेन परमेश्वर चोच दडा लक्के डा, परमेश्वर नी दाऊद टे यीशु मसीह के जीवन गेन डाबोलटे हिरा गा बातो डावे। एठा दाऊद नी मंडीके, “आम इंज्के पातल गेन सळातिंज डाए बाने एठा न हेजा पवित्र कुरकू गा म्हाळाके सळातिंज डाए बाने।”

³² इनिका यीशु के परमेश्वर नी जीटाकेनेच, दियागा आबु सेबाई गवाह होय।

³³ नका देटेन स्वर्ग गेन परमेश्वर गा डाखुरी कोने टी गेन कास सम्मान गा जगान सुबानके होय। एठा बाटे नी जैसा वादा डाके डा, डीचके पवित्र आत्मा जीके एठा डीचनी पवित्र आत्मा आलेके जिले होय, जैसा कि टाइंज आपे दोडोवा एठा आजुम्बा होय।

³⁴ चोयाकी दाऊद मेटे स्वर्ग लिंजेन बान पेळेचडुका पेनो देटेन खुद मंडीवा होय, “प्रभु परमेश्वर नी इंजा प्रभु टे मंडीके, इंजा डाखुरी कोनेन सुबने,

³⁵ जब टाएन इंज अमा दुश्मानकु के नम्र आरु एठा दिकुके अमा नंगा गा ईटा गा पिळा गा रोंगो आरुकुवा।”

³⁶ इनिघल्जी सेबाई इस्राएली कुरकू इनी बारेन पक्कायु, परमेश्वर नी इनिका यीशु के डीचके आपेनी क्रूस लिंजेन पेळेचकेनेच, प्रभु एठा मसीह बाएरा ठहरातिंज्के।

³⁷ जब कुरकू नी इनी आजुम्के मेटे दिकुनी खुदके ठायका आनोवा महसुसके एठा दिकु पतरस एठा दूसरा कलामके मिंकू चेलाकू टे कोकाम्बरा लज्जे, “हे डाईचो आले चोच डाए?”

³⁸ पतरस नी दिकुटे मंडीके, “मन बदलाए एठा आपे तलाटे हार म्याखोम आपे-आपेगा पापो गा मापो गा घल्जी यीशु मसीह गा जीमू टे बपतिस्मा सेगे, मेटे आपेन पवित्र आत्मा गा दान घाटाऊवा।

³⁹ चोयाकी येटेन वादा आपे एठा आपेगा कोंकूनौर एठा दिकु सेबाईकु लेंक्की-लेंक्की गा कुरकू घल्जी भी होय दिकुन प्रभु आलेगा परमेश्वर हेजा मेरान हाकोकुवा।”

⁴⁰ पतरस नी एठा घोनेच बातो टे गवाह जी जीटे दिकुटे बिनती डाके, कि आपना खुदके इनी पीढी टे बचातिंजे।

⁴¹ जो चोचकाभी पतरस नी मंडीके, जो कुरकू नी दिया लिंजेन विश्वास डाके, दिकुनी बपतिस्मा सावे, एठा डी दिन विश्वासकु गा समूह गेन अंदजोटे आफाई हजार कुरकू बेल्लाएन।

विश्वासीकु गा काखाटिंज जीवन

⁴² एठा दिकु कलामके मिंकू चेलाकू टे शिक्षा घाटाऊ एठा सेंग्गो दोडो डा, एठा प्रभु भोज (सोकडा एठा अंगूर गा रेस्सो प्रभु यीशु मसीह गा यादो घल्जी होय) गेन बेल्लाऊ डा एठा विश्वासीकु म्या सेंग्गोन इकुगा आटाजोम डा। एठा प्रार्थना गेन हमेशा थंदळका डा।

⁴³ यरूशलेम शहर गेन सेबाई कुरकू आदर एठा हिघराटे भेट्टेन, एठा अचम्बो कामयनौर एठा चिन्हा, जो कलामके मिंकू चेलाकू गा द्वारा ओटबा डा।

⁴⁴ सेबाई विश्वास दडामिंकू जमाऊ डा एठा जो चोचकाभी दिकु मेरान डा देटेन सेबाई काखाटिंज डा।

⁴⁵ दिकु इकु-इकुगा संपत्ति एठा सामोन किजि-किजीटे जैसा जेगा आवश्यकता डाऊ डा खातिंजे डा।

⁴⁶ एठा दिकु हारेक दिन म्या मन थंदळ टे यरूशलेम गा मंदिर गेन गोलाऊ डा, एठा उरा-उरा सोकळा तुटाक्का लठ्ठाका, खुशी एठा सच्चो दिल गा सिधाटे आटा जोजोम लक्कू डा।

⁴⁷ दिकु परमेश्वर गा स्तुति दडा डा, एठा सेबाई कुरकू दियाटे खुशोके डा। एठा जो कोरो गा उध्दार डाऊ डा दिकुके प्रभु हारेक दिन दिकु तलान बेल्लाकू डा।