ಅಪೊಸ್ತಲ್ 19 - गवली उनाई नियम

इफिसुस शहर गेन पौलुस

¹ जब अपुल्लोस कुरिन्थुस शहर गेन डा। मेटे पौलुस गलातिया एठा फ्रूगिया जिल्हा टे सेने लठ्ठाका इफिसुस शहर गेन हेन। एठा देटेन डीच अदा चेलाकू टे मिलातिंजके।

² डीचनी कोम्बारके, “चोच अमा नी विश्वास दोडो टेमो पवित्र आत्मा घाटाएन?” दिकुनी दियाटे मंडीके, “आलेनी मेटे पवित्र आत्मा गा घाटाऊ गा बारेन बान आजुमडूका।”

³ पौलुस दिकुटे कोम्बारके, “मेटे डाबोलटे अमा नी तुनी खिजा बपतिस्मा सावे?” दिकुनी मंडीके, “आलेनी डीच बपतिस्मा सावे जो यूहन्ना बपतिस्मा जिऊमिठाच जिऊ डा।”

⁴ पौलुस नी मंडीके, “यूहन्ना नी डी कुरकू के बपतिस्मा जीके। दिकुनी पापो दडा बंदोके एठा परमेश्वर गा कोनेन इखाटजे। पेनो डीचनी इस्राएल गा कुरकू टे मंडीके, कि दिकु यीशु लिंजेन विश्वास डोए जो दियागा बदोन हेजेवा, जो मसीह होय।”

⁵ जब डी चेलाकू येटेन समझोन हेन, मेटे दिकुनी प्रभु यीशु मसीह गा जीमू गेन बपतिस्मा सावे।

⁶ एठा जब पौलुस नी दिकु लिंजेन टी डोके, मेटे दिकु लिंजेन पवित्र आत्मा आगुरुके, एठा दिकु अलग्गो - अलग्गो भाषा मंडी एठा भविष्यवाणी दडा लज्जे।

⁷ इंकू सेबाई लगभग बारह कोरोकु डा।

⁸ मेटे पौलुस आराधना जगा गेन ओलेडो आफाई महिना टाएन बिना हिगरा मंडी लक्के। एठा परमेश्वर गा राज्य गा बारे गेन अमा इंज दडा एठा सामझातिंज लक्के।

⁹ पेनो जब अदाकु नी कुरकू नी जिद्दो टे दियागा बातो लिंजेन दिकुनी विश्वास दडा टे बान मेंके मेना, एठा कुरकू गा सम्मान इनी समूह के बुरा मंडी लज्जे। मेटे डीचनी दिकुके आराटे चेलाकूके अलग्गोकेकु, एठा हरेक दिन तुरन्नुस गा पाठशाला गेन बस विश्वासी डाईचो के शिक्षा जिऊ डा।

¹⁰ बरी साल टाएन इनी डाऊ लक्के डा। येटे टाएन कि आसिया जिल्हा गा थंदळ मिंकू चोच यहूदी कुरकू, चोच यूनानी कुरकू सेबाईकु नी प्रभु गा वचन के।

इफिसुस गेन शक्तीगा अचम्बो कामय

¹¹ एठा परमेश्वर पौलुस गा द्वारा शक्तीगा अचम्बो कामय घाले डा।

¹² येटे टाएन कि दास्ती एठा टोवल दियागा कोम्बोर टे वोजोटे डाटे बेमारकु लिंजेन येंडाए डा, एठा कुरकू बेमारी टे साजाए डा। एठा भूतोकुटे दिकु तालाटे ओट डा।

¹³ पेनो अदा यहूदी कोरोकु जो कुरकू के बल्लान ओठकु डा। येटेन दडा लज्जे कि दिकुन भूतोकुटे थंदळवा दिकु लिंजेन प्रभु यीशु गा जीमू येटेन मंडीटे दिकुके बल्लान ओठकु लज्जे, “जो यीशु गा प्रचार पौलुस दडावा होय, दियागा जीमू टे इंज आपेके दिकुके बल्लान हेजे गा हुकूम जेबा मेना।”

¹⁴ एठा स्क्किवा जीमू गा म्या यहूदी मुख्यायाजक गा सात कोन्कू डा, जो येनोगोका दडा डा।

¹⁵ पेनो भूतोकुटे नी जवाब जीके, “यीशु के इंज हाडाई होय, एठा पौलुस के भी हाडाई मेना, पेनो अमा जे होय?”

¹⁶ एठा डी कोरोनी दिजेन भूतोकुटे डा। दिकु लिंजेन लपकतिंजटे, एठा दिकुके काबू गेन साटे, दिकु लिंजेन येनोगो पिटाई डाके, कि दिकु भोगला एठा घायलटे डी उरा टे साळुपजे।

¹⁷ एठा येटेन बातो इफिसुस शहर गा थंदळ मिंकू यहूदी कुरकू एठा यूनानी कुरकू के भी मालूम्जे, एठा दिकु सेबाईकु लिंजेन हिगरायेन मेना। एठा प्रभु यीशु गा जीमू गा महिमा डाके।

¹⁸ एठा जो कुरकू नी विश्वास डोके डा, दिकुटे घोनेच कुरकू नी हेके डो खुलेआम आपना खुद गा बुरा कामय स्वीकार जे।

¹⁹ एठा जादू टोना दडामिंकू तलाटे घोनेच्कुका आपना-आपना जादू गा पुस्तक के म्या जगान के डो सेबाईकु सम्मान जुल्के। एठा जब दिकुगा भाव जोळातिंजके, जो पचास हजार चाँदी गा चिक्खा बराबोर (घोनेच्का डामा) ओटके डा।

²⁰ इनी रोंगो प्रभु गा वचन शक्तीगा सेंग्गोन फैलातिंजू एठा पक्का डोन पक्काएन।

²¹ जब इनी सेबाई बातो डायेन मेटे पौलुस नी पवित्र आत्मा द्वारा मकिदुनिया जिल्हा एठा अखाया जिल्हा गा विश्वासी कुरकू टे मिलातिंजू गा बदोन यरूशलेम शहर सेने गा फैसला डाटे मंडीके, “यरूशलेम शहर सेने गा बदोन इंज्के रोम शहर गेन सेने भी साही होंगा।”

²² इनिघल्जी आपना सेवा दडामिंकू तलाटे तीमुथियुस एठा इरास्तुस के मकिदुनिया जिल्हा गेन दिकुके आपना पेला कुलकेकु। एठा आम खुद का थोळसा टेमो गा घल्जी आसिया जिल्हा गेन थंदळके मेना।

इफिसुस गेन खिलाफबेन

²³ डी टेमोन मसीह गा समूह गा बारे गेन खाट हुल्लड माचतिंजे।

²⁴ चोयाकी दिमेत्रियुस जीमू गा म्या सोनार अरतिमिस यूनानी कुरकू गा देवी गा मंदिर गा चाँदी गा आकर हारू डा, डी आकरके हारूटे कीजे डा कारीगरके घोनेच फायदा डाए डा।

²⁵ दिमेत्रियुस नी हेजा गा कारीगरकु के म्याखठ्ठा गोल टे कोम्बारके, “हे डाईचो, आपेन मालूम होय, कि इनी कामय टे आलेन चोटो डामा घटौवा।

²⁶ एठा आपे दोडोवा एठा आजोमबा होय, कि बस इफिसुस शहर गेन का बाने, आसिया जिल्हा गा सेबाई गाँवेन इनी मंडी-मंडीटे इनी पौलुस नी घोनेच कुरकू के समझातिंजटे एठा भूल्लाकेकू भी होय। कि जो टी गा कारीगरी होय, दिकु ईश्वर बाने।

²⁷ एठा नका बस इनिका म्या बातो गा का हिगरा बाने। कि आलेगा कामय कामूवा। पेनो इनी बातो गा भी हिगरा होय कि कास देवी अरतिमिस गा मंदिर के भी बेकार सामझतिंजेवा एठा डीके सेबाई आसिया जिल्हा गेन एठा दुनिया कुरकू पुजावा होय, दियागा प्रभाव स्यागुवा।”

²⁸ सेबाई कारीगर येटेन आजुमटे खिजोटे भेट्टेन। एठा चिल्ला-चिल्लातिंजटे मंडी लज्जे, “इफिसि कुरकू गा अरतिमिस देवी महान होय!”

²⁹ एठा शहर गा अलग्गो चोटोका कुरकू नी चिल्लातिंजू आवाज आजुम्के एठा ओलेडो गर्दीन नी बेल्लाएन एठा शहर गेन कल्ला लज्जे। एठा कुरकू नी गयुस एठा अरिस्तर्खुस, मकिदुनिया जिल्हान थंदळ मिंकू कुरकू के जो पौलुस गा सेंग्गोन यात्रा दडा डा, दिकुके उठायेनेच मेना एठा तामशा उरा गेन सैय्येनेच।

³⁰ पौलुस भी तामशा उरा तालान सेनेवा डो कुरकू टे बातो गा चाहता डा। मेटे चेलाकूनी डीचके सेंन्दाई डुका।

³¹ आसिया शहर गा हाकिमकु टे भी दियागा चोटोका सोपतीकुनी दियागा मेरान मंडी कुल्के, एठा बिनती डाके, कि तामशा उरा गा तालान सेने डो आपना जान के ख़तरान बाकी येंडा।

³² तमाशा उरा गा तालान सेबाई कुरकू चिल्लातिंजू लक्के डा, तुनिका म्या चीजो गा बारेन एठा दूसरा चीजो गा बारेन चिल्लातिंजू लक्के डा। देटेन सेबाईका गळबोळ डा।

³³ मेटे गर्दी टे अदा कुरकू नी सिकन्दर के डीके यहूदी धर्म गा सम्मा कोरोनी तेगेंकेनेच डा, डीचके गर्दी गा सम्मान बळतिंजकेनेच। सिकन्दर नी कुरकू के कायोम थंदळ गा घल्जी टी टे इशाराटे, एठा कुरकू के सामझतिंज गा कोशिश डाके कि चोच डाऊ लक्के डा।

³⁴ पेनो जब दिकुनी मालूम्जेकी कि यहूदी कुरकू मसीह कुरकू गा रोंगो मूर्ति पूजा बान दडा। मेटे सेबाई टे सेबाईकु म्या आवाज गेन बरी घांटा टाएन चिल्लातिंजू लक्के, “इफिसि कुरकू गा अरतिमिस देवी महान होय।”

³⁵ मेटे पूरा गा मंत्री नी कुरकू के कायोम टेका मंडीके, “हे इफिसि कुरकू, हरेक जेकाभी हाडाई होय, कि इफिसुस शहर गा कुरकू महान देवी अरतिमिस गा मंदिर गा देखभाल दडा लक्के होय। दियागा मूर्ति बदळा टे बोचोके डा।

³⁶ इनिघल्जी जब इनी बातो गा इंकार बान डाऊ साकतावा। मेटे साही होय, कि आपे कायोम थंदळे, एठा बिना बिचार गा चोचका बाकी दडा।

³⁷ चोयाकी आपे डी कोरोकु के सालेकु होय, जो न मंदिर के लुलाटातिंज मिंकू होय, एठा न आलेगा देवी गा खिलाफबेन दडावा होय।

³⁸ इनिघल्जी दिमेत्रियुस एठा दियागा सोपतीकु गा कारीगरकु के जेकाटे अमा इंजा डाऊ टासो मेटे कचाहारी गेन सेनेवा होय। दिकुगा मुकद्दम गा न्याय दडा गा घल्जी कुरकू टाकाकु। कचाहारी गेन कुरकू अमा इंजा लिंजेन खिलाफबेन आनोवा येंडाएवा होय।

³⁹ पेनो अगर आपे तुनिका एठा बतो गा बारेन चोचकाभी कोकाम्बारा टासो, मेटे शहर गा पंचातीन फैसला डायेबा होय।

⁴⁰ चोयाकी इंजेन हिगरा होय कि आले रोमी सरकार गा द्वारा दंगा दडा गा आनोवा तोटाका गा खतरन होय। इनिघल्जी कि एनेगा तुनिका वाजा बाऊ, इनिघल्जी आले इनी गर्दी गा गोलाऊ गा तुनिका जवाब बान जीगु।”

⁴¹ एठा येटेन मंडीटे डीचनी पंचातीके बिडाके।