ಅಪೊಸ್ತಲ್ 17 - गवली उनाई नियम

थिस्सलुनीके पूरा गेन पौलुस एठा सीलास

¹ पौलुस एठा सीलास अम्फिपूलिस पूरा एठा अपुल्लोनिया पूरा लिंजटे थिस्सलुनीके शहर गेन हेके, तोटेन यहूदी कुरकू गा म्या आराधना जगा डा।

² एठा पौलुस हेजा गा रिती गा रोंगो दिकुगा मेरान ओले। एठा आफाई परमेश्वर गा चोखरा दिन पवित्र ग्रंथ टे दिकु सेंग्गोन अमा इंजबे।

³ एठा डेगा मतलब खुल्ला खुल्लाटे समझातींजकोम डा। कि मसीह गा दुख तुटूल, एठा गोएन मिन्कुटे जीटाऊ जरुरी डा, “इनिका यीशु दियागा बारेन इंज्नी प्रचार दडावा मेना, डीच मसीह होय।”

⁴ दिकु तालाटे घोनेचकुनी यहूदी कुरकू नी, एठा भक्त यूनानी अलग्गो जाटो कुरकू टे घोनेचकुनी एठा घोनेच्का मुख्या जापाएकु नी विश्वास डाके, एठा पौलुस एठा सीलास गा सेंग्गोन मिलातिंजे।

⁵ पेनो यहूदी धर्म गा सम्मा कुरकू नी जुलुगा वोजीटे हाटी गा कुरकू गा तलाटे चोटोका बुरा कोरोकु के आपना सेंग्गोन सावे, एठा गर्दी येंडाटे पूरा गेन दंगा मचातिंज लज्जे। दिकुनी यासोन गा उरा लिंजेन हामला डाटे पौलुस एठा सीलास के कुरकू गा सम्मान सा चाहता डा।

⁶ एठा दिकुनी बान घाटाडुका, दिकु येटेन चिल्लातिंजटे यासोन एठा चोटोकु विश्वासीकु डाईचो गा पूरा गा हाकिमकु गा सम्मान ओळटे सालेकु, “इनी कुरकू दिकुनी सेबाई दुनिया के परीशान डाके मेना होय, येटेन भी हेन होय।

⁷ यासोन नी दिकुके हेजा गा उरान थंदळ गा हुकूम जीके होय। इनी सेबाई सेबाईकु येटेन मंडीवा होय कि म्या एठा राजा होय, दियागा जीमू यीशु होय, एठा रोम राज्य गा रोमी सम्राट कैसर गा हुकूम गा खिलाफ दडावा होय।”

⁸ जब गर्दी गा कुरकू एठा पूरा गा हाकिमकु नी इनी बातो आजुम्के, मेटे दिकु घाबरातिंजे मेना।

⁹ एठा दिकुनी यासोन एठा बाकी कुरकू के जमानता लिंजेन आराकेकु मेना।

बिरीया पूरा गेन पौलुस एठा सीलास

¹⁰ विश्वासी डाईचो नी तुरुटो रातो का रातो पौलुस एठा सीलास के बिरीया पूरा गेन कुल्केनेच मेना। एठा दिकु देटेन पोचतिंजे यहूदी कुरकू गा आराधना जगा गेन ओले।

¹¹ इनी कुरकू नी मेटे थिस्सलुनीके शहर गा यहूदी कुरकू टे भला डा, एठा दिकुनी खाट आसा टे वचन मानेन के, एठा हारेक दिन पवित्र ग्रंथ गेन घागाटा लक्के कि इनी बातो एगोका होय, कि बाने।

¹² इनिघल्जी दिकुनी घोनेचकुनी, एठा यूनानी कुरकू गा तालाटे पक्काटे जीमू डाऊ लक्के जापाएकु टे एठा सनाकु टे घोनेचकुनी विश्वास डाके।

¹³ पेनो जब थिस्सलुनीके शहर गा यहूदी कुरकू मालूमजे, कि पौलुस बिरीया पूरा गेन भी परमेश्वर गा वचन घागालवा होय। मेटे देटेन भी हेंडो कुरकू के बायेखातिंजटे एठा हिग्रकु लज्जे।

¹⁴ मेटे विश्वासी डाईचो नी तुरुटो पौलुस के बिडाकेनेच मेना, कि समुद्र गा धुरान ओले मेना। पेनो सीलास एठा तीमुथियुस बिरीया पुरान का थंदळजे।

¹⁵ पौलुस गा मददत दडामिंकू डीचके दियागा सेंग्गोन एथेन्स शहर टाएन ओले। पेनो पौलुस इनी हुकूम गा सेंग्गोन दिकु कुरकू बिरीया पुरान हिराएन, कि सीलास एठा तीमुथियुस के जल्दी दियागा मेरान कुलकेच।

एथेस पूरा गेन पौलुस

¹⁶ जब पौलुस एथेन्स शहर गेन दिकुगा इंतजार दडा लक्के डा, मेटे शहर के मूर्ति टे भेट्टिके मिनी धोटे दियागा मन घोनेच नराजोयेन मेना।

¹⁷ इनिघल्जी देटेन आराधना जगा गेन यहूदी कुरकू एठा भक्त टे एठा चौक गेन जो कुरकू घाटाऊ डा, दिकुटे हारेक दिन हिंजमन दडा लज्जे डा।

¹⁸ मेटे दिकु गुरूजी जो इपिकूरी एठा स्तोइकी डाटे चीनया डा, दिकु गेन अदाकु दियाटे अमा इंज लज्जे। एठा अदाकु नी मंडीके, “इनी बुरा बातो मंडीमिठाच चोच मंडी चाहतावा होय?” पेनो अलग्गो कुरकू नी मंडीके, “देटेन अलग्गो गोमेच गा प्रचाराक मालूम बोचोवा होय,” चोयाकी देटेन यीशु गा एठा डाबोलटे जीटाऊ गा अच्छा खाबोर घागलवा होय।

¹⁹ मेटे दिकु डीचके आपना सेंग्गोन अरियुपगुस जीमू गा आराधना जगा गेन सैय्येनेच डो कोम्बराके, “चोच आले चिनाए सकतावा होय, कि इनी उनाई शिक्षा जो आम घालेवा होय, चोच होय?

²⁰ चोयाकी अमा अलग्गो बातो आलेके घागलवा होय, इनिघल्जी आले मालूम होना, कि येनेगा मतलब चोच होय?”

²¹ (इनिघल्जी कि सेबाई एथेस शहर गा थंदळ मिंकू कुरकू एठा परदेशी जो देटेन थंदळ डा, उनाई-उनाई बातो मंडी एठा आजोम गा बेदला एठा तुनिका कामय गेन टेमो बान बिबीतातिंज डा।)

अरियुपगुस गेन पौलुस गा शिक्षा

²² मेटे पौलुस नी अरियुपगुस जीमू गा आराधना जगा तालान गेन टेंगेंटे मंडीके, हे एथेस शहर गा थंदळ मिंकू कुरकू, इंज दोडोवा कि अमा हार बातो गेन गोमेचकु गा खाट मामानातींज मिठाच होय।

²³ चोयाकी इंज इखाट डोन आपेगा पुपाजाका चीजो के दोडो लक्के डा। मेटे म्या एगो वेदी भी डोके, डे लिंजेन ओल्के डा, “अनजान ईश्वर गा घल्जी।” इनिघल्जी डीके आपे बिना हाडाई आराधना दडावा, इंज आपेके दियागा अच्छा खाबोर घालेवा मेना।

²⁴ जो परमेश्वर नी दुनिया एठा दियागा सेबाई चीजो के आरुके, देटेन बदळा एठा दुनिया गा स्वामी आरुटे टी गा आरुके मिनी मंदिर गेन बान थंदळ।

²⁵ तुनिका चीजो गा जरुरात डाऊ गेन डीचके कोरो गा मददत गा जरुरात बाने होय। चोयाकी देटेन मेटे आपेका सेबाईकु के जीवन एठा सासो एठा सेबाई चोचकाभी जेबा होय।

²⁶ डीचनी म्याका कोरो टे सेबाई जाटो सेबाई पृथ्वी लिंजेन थंदळ घल्जी आरुके होय। एठा दिकुगा ठहरातिंजके टेमो एठा थंदळ मिंकू गा धुरानौर गा टोल्के होय।

²⁷ परमेश्वर नी एगो इनिघल्जी डाके ताकी कुरकू डीचके घटाएच डो टोटाजाटे, शायद दिकु दिया लिंजेन आसा धोटे दियागा मेरान आदीरजू होना। पेनो आए टेमोन, डीच आलेटे लेंक्कीन बाने होय।

²⁸ चोयाकी देटेन देण्का होय जो आलेगा जीटा एठा सेन्द्रा-इखाट गा वाजा आरुवा होय। एठा आलेके देटेन हारुकोम्बा होय जो आबु होय। साही डेनोगोका जैसा आपेगा शेहारीकु नी भी मंडीके होय, “आले मेटे डीका कोणकु गा होय।”

²⁹ इनिघल्जी परमेश्वर गा कोणकु आरुटे आलेके येटेन ससामझतिंज अच्छा बाने कि ईश्वरीय, सोना या चाँदी या घोटा गा रेंगो होय। जो कोरो गा कारीगारी एठा काल्पाना टे गळातिंजके मेना।

³⁰ इनिघल्जी परमेश्वर नी कुरकू हेळया गा टेमोन ध्यान बान जिडुका, पेनो नका हर जगा सेबाई कोरोकु के मन इखाट गा हुकूम जेबा होय।

³¹ चोयाकी डीचनी म्या दिन ठहरातिंजके होय, डेननी देटेन डी कोरो गा गेल्ला धर्म टे दुनिया गा न्याय डायेबा। डेननी डीचनी ठहरातिंजके होय एठा डीचके गोयेन मिठाच जाटे जीटाकेनेच, इनी बातो गा सेबाई कुरकू तालान साबित डाके होय।

³² गोएन मिठाच जाटे डाबोलटे जीटाऊ गा बातो गा आजुमटे घोनेचकु माजाक उळातिंजे लज्जे, एठा घोनेचकुनी मंडीके, “येटेन बातो आले अमाटे एठा चोलाकाभी आजुमेबा।”

³³ येने लिंजेन पौलुस दिकुगा तालाटे ओठ्जेडो ओले।

³⁴ पेनो अदा कोरोकु दियागा सेंग्गोन मिलातिंजे, एठा प्रभु लिंजेन विश्वास डोके। जेन दियुनुसियुस जो अरियुपगुस गा मुख्या डा। एठा दमरिस जीमू गा म्या जापाए डा, एठा दिकुगा सेंग्गोन एठाभी अदा कुरकू डा।