ಅಪೊಸ್ತಲ್ 15 - गवली उनाई नियम

यरूशलेम गा चावळी

¹ अदा यहूदी विश्वासी कुरकू यहूदिया जिल्हा टे अन्ताकिया शहर गेन हेन एठा विश्वासी डाईचो के इथू लज्जे, “अगर मूसा गा रिती गा रोंगो आपेगा खतना बान डाऊ टासो मेटे आपेन उध्दार बान घाटाऊ।”

² जब पौलुस एठा बरनबास गा दिकुटे भेबाव भेद-भाव एठा हिंज-मान डायेन, मेटे येटेन ठहरातिंजके, कि पौलुस एठा बरनबास एठा दिकु तालाटे अदा कोरोकु इनी बातो गा बारेन कलामके मिंकू चेलाकू एठा जुनाकु के यरूशलेम शहर गेन सेंजू।

³ मसीह गा मंडली नी दिकुके बिडाकेकु। मेटे दिकु फिनीके शहर एठा सामरीया जिल्हा टे सेने लठ्ठाका सम्मान ओले। देटेन भी दिकुनी अलग्गो जाटो गा कुरकू के परमेश्वर गा अच्छा खाबोर घागल लठ्ठाका ओले, एठा सेबाई विश्वासी डाईचोन भेबाव खुशेन मेना।

⁴ जब दिकु यरूशलेम शहर गेन आदिरजे, मेटे मसीह गा मंडली एठा कलामके मिंकू चेलाकू एठा जुनाकु टे दिकुगा खुशीटे स्वागत डाके। पौलुस एठा बरनबास नी घाल्के कि परमेश्वर नी दियागा सेंग्गोन जेडो चोथान-चोथान कामय डाके डा।

⁵ पेनो फरीसि कुरकू गा दल टे जो कुरकू नी विश्वास डाके डा। दिकु तालाटे चोटोकूनी बिटजे डो मंडीके, “कि अलग्गो जाटो कुरकू के खतना दडा एठा मूसा गा नियम के मानतिंज गा हुकूम जिऊ होना।”

⁶ मेटे कलामके मिंकू चेलाकू एठा जुनाकु इनी बातो गा बारे गेन बिचार दोडो गा घल्जी जमाएन।

⁷ मेटे पतरस नी घोनेच हिंज-मान डाऊ गा बादोन टेंगेनटे जेडो दिकुके मंडीके, “हे डाईचो, आपेन मालूम कि घोनेच दिन डायेन, कि परमेश्वर नी आपे तलाटे इंज्के कालामजेमी, परमेश्वर नी इंजा वोजीटे अलग्गो जाटो गा कुरकू के अच्छा खाबोर घाल्के, ताकी दिकु डी वचन आजुमटे विश्वास डाएवा।”

⁸ “एठा मन गा चिचाना मिठाच परमेश्वर नी दिकुके भी आलेगा रोंगो पवित्र आत्मा जीटे, इनी टिपीके कि अमा कुरकू गा रुपोन मनेन जेनेच।

⁹ एठा विश्वास गा सेंग्गोन दिकुगा मन चोख्राटे आले गेन एठा दिकुन चोचकाभी फरक बाऊ डा।

¹⁰ मेटे नका आपे चोया परमेश्वर गा अंदजो दडावा होय, आलेगा यहूदी कुरकू गा नियम एठा रितो गा पालान दडा गा घल्जी इनी अलग्गो जाटो गा चेलाकू लिंजेन ओझा येंडा, डीके न आलेगा जुना सनाकु टूले डा एठा न आले टूलेवा होय।

¹¹ हां, एगो दडा अच्छा बाने होय। आलेगा विश्वास मेटे इनी होय प्रभु यीशु मसीह गा कृपा गा द्वारा आलेगा उध्दार डेनोगोका डाएन होय, डीका खिजा गो डी कुरकू गा डाएन, न कि मूसा गा नियम गा पालान डाटे।”

¹² मेटे सेबाई सभा कायोम थंदळ टे बरनबास एठा पौलुस गा बातो आजोम लज्जे, कि परमेश्वर नी दिकुगा गेल्ला अलग्गो जाटो गा कुरकू गेन चोथान-चोथान खाट चिन्हा एठा अचम्बो कामय घाल्ले।

याकूब गा फैसला

¹³ जब दिकुनी मंडी बानडोके, मेटे याकूब मंडी लज्जे, “हे डाईचो, इंजा आजुमे।”

¹⁴ शमौन पतरस नी समझातिंजके, कि परमेश्वर नी पेला टेमो अलग्गो जाटो गा कुरकू लिंजेन चोथान ध्यान डोके, एठा डी कुरकू तलाटे अदाकुके हेजा कुरकू आरु घल्जी कलमजेकु।

¹⁵ अलग्गो जाटो गा कुरकू इनी बदलवा टे डी बातो गा रेंगो होय। दियागा बारे गेन परमेश्वर गा कोनेटे मंडीमिठाचकु नी पवित्र ग्रंथ गेन घोनेच पेला ओल्के डा। जो इनी मंडीवा होय,

¹⁶ “येनेगा बादोन इंज हेजेवा, दाऊद गा राज्य जो दियागा दुश्मानकु डा द्वारा नशोकेकु होय डीचके डाबोलटे आरोएच्बा, एठा डीचके टेंगेंनेच्बा।

¹⁷ इनिघल्जी बाकी सेबाई कोरोकु, सेबाई अलग्गो जाटो गा कुरकू समेत, दिकुके इंज नी इन्जा कुरकू आरु घल्जी हाकोलेकु होय।

¹⁸ येटेन डीका प्रभु मंडीवा होय जो दुनिय गा ओटटे इनी बातो गा खाबोर जीटे हेन होय।

¹⁹ इनिघल्जी इंजा बिचार येटेन होय, कि अलग्गो जाटो गा कुरकू गेन टे जो कुरकू परमेश्वर गा मेरान हेजेवा होय। दिकुके इनी मंडीटे परीशान बाकी, कि दिकुके आलेगा यहूदी कुरकू गा नियम एठा रितो-रिवाज के मानतिंजे होना होय।

²⁰ पेनो आले दिकुके म्या चिठ्ठी ओल्टे इनी घागल गा घल्जी कुल्की, कि दिकु डी आटा के बाकी जोजोम डीके कुरकू नी मूर्ति गा लिंजेन पेळेचके होय। आनोवा बाकी दडा एठा गर्दन दबतिंज टे घोचकेनेच जानवारकु गा पचना एठा जिलु बाकी जोजोम।

²¹ चोयाकी जुनाकु टेमोन टे हरेक पुरान गेन मूसा गा नियम के इनी बातो गा प्रचार दडा लठठाका हेन, एठा हरेक परमेश्वर गा चोखरा दिन गेन आराधना जगा गेन डीका नियम के पाळतिन्जे डा।”

अलग्गो जाटो यहूदी विश्वासकु के चिठ्ठी

²² मेटे यरूशलेम शहर गेन सेबाई मसीह गा मंडली गेल्ला कलामके मिंकू चेलाकू एठा जुनाकु के अच्छा लगातिन्जे, कि आबुगा तालाटे चोटाका कुरकू के कालाम्कु, मतलब यहूदा जो बरसब्बस मंडीवा होय, एठा सीलास के जो डैचो गेन मुखिया डा। एठा दिकुनी पौलुस एठा बरनबास गा साथोन अन्ताकिया शहर कुल्केनेच।

²³ एठा दिकुनी इनी चिठ्ठी के इकुका सेंग्गोन सय्ये, “अन्ताकिया शहर एठा सीरिया शहर एठा किलिकिया जिल्हा थंदळ मिंकू डाईचो के जो अलग्गो जाटो गा कुरकू तालाटे होय, कलामके मिंकू चेलाकू एठा जुनाकु डाईचो गा नमस्कार!

²⁴ आलेनी आजुम्के होय, कि आले तलाटे चोटोकु का देटेन ओलेडो, आपेके इकुका बातो टे घाबरातिन्जे मेना, एठा आपेगा मन उलटाके होय, पेनो आलेनी दिकुके हुकूम बान जिडुका डा,

²⁵ इनिघल्जी आले सेबाईकु म्या इच्छान थंदळ टे इनी साही समझातिन्जके, कि आले अदा कुरकू कालाम्के टे इकुका प्यारे बरनबास एठा पौलुस गा साथोन आपेगा मेरान कुल्केकु।

²⁶ येटेन मेटे येनोगो कोरो होय, दिकुनी इंकुका जान आलेगा प्रभु यीशु मसीह गा जीमू गा घल्जी मुसीबात गेन येंडाकेनेच होय।

²⁷ एठा आलेनी यहूदा एठा सीलास के कुल्केनेच होय, जो खुद का हेजेवा डो आपेके इनी बातो गा बारेन घालेवा।

²⁸ पवित्र आत्मा के, एठा आलेके भी इनी अच्छा घाई लक्के होय, कि इनी जरुरी बातो के आरागे, आपे लिंजेन एठाभी ओझा बाकी येंडा।

²⁹ कि आपे मूर्ति के बलिदान पेळेचके आटा बाकी जोजोम, एठा गर्दन दबातिंजटे घोचकेनेच जानवारकु गा पचना एठा जिलु बाकी जोजोम, एठा आनोवा बाकी दडा। इनी सेबाई बातो टे लेंक्कीन थंदळे, तो आपेगा भला डाऊवा। सम्मान आम अच्छा डायु।”

³⁰ डाबोलटे दिकु बिदाटे अन्ताकिया शहर गेन पोचातींज्के, एठा सभा के म्या जगान धोटे दिकुके चिठ्ठी जीके।

³¹ एठा दिकु पाळातिनज्टे डी शिक्षा गा बातो टे घोनेच खुशेन मेना।

³² यहूदा एठा सीलास नी जो हेज्का परमेश्वर गा कोनेटे मंडीमिठाच डा, घोनेच बातो टे विश्वासकु डाईचो के शिक्षा जीटे पक्का केनेच।

³³ यहूदा एठा सीलास थोळासा दिन थंदळके मेटे विश्वासीकु डाईचो नी शांती गा आशीर्वाद जीटे यरूशलेम शहर गा यीशु मंडली गेन डाबोलटे हिरकेकु।

³⁴ (पेनो सीलास नी अन्ताकिया शहर गेन थंदळ गा फैसला डाके, इनिघल्जी यहूदा एकलाका यरूशलेम शहर गेन डाबोलटे हिराएन मेना।)

³⁵ पौलुस एठा बरनबास अन्ताकिया शहर गेन थंदळके मेना। एठा घोनेच कुरकू गा सेंग्गोन प्रभु यीशु गा वचन गा शिक्षा जिऊ डा एठा अच्छा खाबोर घागलवा मेना।

पौलुस एठा बरनबास गेन अमा इंज

³⁶ थोळासा दिन बादोन पौलुस नी बरनबास के मंडीके, “जो-जो पुरान गेन आलेनी प्रभु यीशु गा वचन घाल्के डा। हेजे, डाबोलटे डी पुरान सेने डो इंजा विश्वासीकु डाईचो के डोकु कि दिकु टोनोगो होय।”

³⁷ मेटे बरनबास नी यूहन्ना के जो मरकुस मंडीवा होय, साथोन सा गा बिचारबे।

³⁸ पेनो पौलुस नी डीचके साथोन सा अच्छा बान समझातिन्जू, जो पंफूलिया जिल्हा गेन दिकुटे अलग्गोयेन मेना डा, एठा कामाय कोनेन दिकुगा सेंग्गोन बांसेन्डूका।

³⁹ इनिघल्जी येनोगो अमा इंज डायेन, कि पौलुस एठा बरनबास म्या दूसरा टे आलगोयेन मेना। एठा बरनबास मरकुस के साटे डोंगा लिंजेन साइप्रस द्वीप गेन ओले मेना।

पौलुस गा दूसरा प्रचार यात्रा

⁴⁰ पेनो पौलुस नी सीलास के कालाम्केनेच मेना, एठा विश्वासकु डाईचो टे परमेश्वर के कृपा गेन जीके मेना मेटे अन्ताकिया शहर टे ओले।

⁴¹ एठा डाबोलटे दिकु सेबाई सीरिया जिल्हा एठा किलिकिया जिल्हा गेन ओले एठा मसीह गा मंडलीनौर गा विश्वासीकु के पक्काके होय।