ಅಪೊಸ್ತಲ್ 13 - गवली उनाई नियम

बरनाबस एठा शाऊल गा कुकूल

¹ अन्ताकिया शहर गा मसीह गा मंडली चोटोका परमेश्वर गा कोनेटे मंडीमिंकू एठा गुरूजीकु डा। यानेकी बरनबास एठा शमौन दियागा दूसरा जीमू निगर डा। एठा लूकियुस कुरेनी, मनाहेम दियागा पालन-पोषण उफुन देशो गा राजा हेरोदेस गा सेंग्गोन डाएन डा एठा शाऊल।

² जब दिकु उपासो गेल्ला प्रभु गा आराधना दडा लक्के डा, मेटे पवित्र आत्मा नी मंडीके, “इंजा घल्जी बरनबास एठा शाऊल के इंजा सेवा दडा घल्जी अलग्गो किंज डेगा घल्जी इंज्नी दिकुके हाकोलेकु होय।”

³ मेटे दिकुनी उपासो एठा प्रार्थना डाटे एठा दिकु लिंजेन टी धोटे दिकुके परमेश्वर गा कामय दडा कुलकेकु।

पौलुस गा पेला घागल सेंदरा गा यात्रा

⁴ इनिघल्जी शाऊल एठा बरनाबस पवित्र आत्मा द्वारा अन्ताकिया शहर टे सिलूकिया बंदरगाह टाएन कुल्केकु। एठा दिकु डोंगा लिंजेन पेळेन डो साइप्रस द्वीप गा सलमीस बंदरगाह गेन आदिरजे।

⁵ देटेन आदिरजे डो, परमेश्वर गा वचन यहूदी कुरकू गा आराधना जगा गेन घाल्के। एठा यूहन्ना मरकुस दिकुगा मदत दडा घल्जी दिकुगा सेंग्गोन डा।

⁶ एनेगो बादोन दिकुनी सेबाई टुक्कीन म्या पुराटे दूसरा पूरा सेंदरा गा यात्रा डावे एठा आखरीन दिकु पाफुस शहर गेन आदिरजे। डेनेन दिकुन बार-यीशु जीमू गा म्या जादूगार घाटाएन जो यहूदी कोरो एठा लाबाळ भविष्यवाणी दडामिठाच डा।

⁷ देटेन राज्यपाल सिरगियुस पौलुस गा सेंग्गो जिऊमिठाच डा, सिरगियुस पौलुस म्या दिमागदार कोरो डा। राज्यपाल सिरगियुस नी बरनबास एठा शाऊल के हेजा गा मेरान हाकोटे परमेश्वर गा वचन चाहताके।

⁸ पेनो जादूगार एलीमास नी, दियागा जीमू का गा अर्थ होय जादूगार, डीचनी दियागा खिलाफबेन डाके एठा राज्यपाल सिरगियुस के यीशु लिंजेन विश्वास दडा टे रोराकातिंज चाहता डा।

⁹ मेटे शाऊल नी दियागा जीमू पौलुस भी होय, पवित्र आत्मा टे भेट्टिटे एलीमास जादूगार गा कोने डेके-डेकेन धोटे मंडीके,

¹⁰ “हे सेबाई खोटो एठा सेबाई चतुरुटे भेट्टिके शैतान गा कोणटे, सेबाई धर्म गा दुश्मान, चोच आम प्रभु गा सीधा कोरानौर के तेताळा बान आरा?

¹¹ नका डोगे, प्रभु अमा खिलाफबेन के होय। आम थोळासा टेमो टाएन अंधळा थंदळवा एठा सूर्या के बान दोडो।” एठा मेटे तुरुटो धुंदेन एठा अंधरा दिया लिंजेन घैय्ये, एठा डीच इगान-हुंगान इखाट लज्जे, ताकी जेका दियागा टी उठाटे दियागा मदत डाए।

¹² मेटे राज्यपाल सिरगियुस नी जो चोचकाभी डायेन डा, डीके धोटे एठा प्रभु गा शिक्षा टे अचम्बो टे प्रभु यीशु लिंजेन विश्वास डाके।

पिसिदिया जिल्हा गा अन्ताकिया शहर पौलुस गा शिक्षा

¹³ पौलुस एठा दियागा सोप्तीकु पाफुस शहर टे समुद्रा गा यात्रा सुरुके एठा दिकु पंफूलिया जिल्हा गा पिरगा शहर गेन आदिरजे। देटेन यूहन्ना मरकुस दिकुके आराटे यरूशलेम शहर गेन हिराएन।

¹⁴ पिरगा शहर टे सम्मान बळातिंजटे पिसिदिया जिल्हा गा मेरान अन्ताकिया शहर गेन आदिरजे। एठा परमेश्वर गा चोखरा दिन आराधना जगान ओलेडो सुबान्जे।

¹⁵ मूसा गा नियम एठा परमेश्वर गा कोनेटे मंडीमिंकूनौर पुस्तक गा पपाळातिंज गा बादोन आराधना जगा गा मुख्याकुनी दिकुगा मेरान खाबोर कुल्के, “हे डाईचो, अगर कुरकू गा शिक्षा गा घल्जी आपेगा मनेन चोच्का बातो टाकु टासो घाले।”

¹⁶ मेटे पौलुस नी टेंगेंटे दिकुके सशांती घल्जी तीटे इशाराटे मंडीके, “हे इस्राएली कुरकू, एठा परमेश्वर टे हिघरामिंकू, अलग्गो जटोकू, आजुमे,

¹⁷ इनी इस्राएली कुरकू गा परमेश्वर नी आलेगा आजा दादाकु के कालाम्जेकू, एठा जब इंकू मिस्र देशोन परदेशी आरुटे थंदळ डा, मेटे दिकुगा फायदा डाके। एठा दिकुके पराक्रमी शक्तीटे भुजानौरटे देशो टे बल्लान ओठ्लेकु।”

¹⁸ एनेगा बादोन एठा सुनसान जगान देटेन चालीसो साल टाएन दिकुगा सेहसेन का लक्के, दिकुनी बार-बार दियागा हुकूम गा उलंघन डाके।

¹⁹ एठा कनान देशोन सात जाटोकु गा नशो डा टे दिकुगा देशो अंदजोटे साळे उफुन सेद्दी साल गेन इस्राएल गा हाक गेन डाके।

²⁰ आलेगा आजा दादाकु दिकुगा आजा दादाकु मिस्र गेन इडी गा अंदजोटे उफुन सेद्दी पचास साल गा बादोन कनान लिंजेन हाक दोडो सुरुके। परमेश्वर नी शमूएल परमेश्वर गा कोनेटे मंडीमिठाच टाएन इस्राएल कुरकू लिंजेन राजो दडा घल्जी फैसला दडामिठाच आरुकेनेच।

²¹ डाबोलटे इस्राएल कुरकू नी इकु घल्जी म्या राजा मंग डावे। इनिघल्जी परमेश्वर नी दिकुके बिन्यामीन गा कोंणकु तलाटे कीश गा कोणटे शाऊल के जीकेनेच, जो चालीसो साल टाएन दिकुगा राजा आरुके।

²² डाबोलटे परमेश्वर नी शाऊल के पद टे बाजुन टे दियागा जगान दाऊद के राजा आरुकेनेच। दियागा बारेन परमेश्वर नी खुद मंडीके, “इंज्के म्या कोरो, यिशै गा कोणटे दाऊद इंजा मन गा रोगों घाटाएन होय। डीचका इंजा सेबाई इच्छा पुराएवा।”

²³ दियागा का कोणकु तलाटे परमेश्वर नी कसोम गा रोंगो इस्राएली कुरकू गा मेरान म्या उध्दार दडामिठाच, मतलब यीशु के कुल्केनेच

²⁴ दियागा हेजे टे पेला यूहन्ना नी सेबाई इस्राएली कुरकू के खाबोर घाल्के, कि सेबाई कुरकू के इकुगा पापो टे मन बबादला एठा परमेश्वर गा कोनेन इखाट एठा बपतिस्मा सा जरुरी होय।

²⁵ जब यूहन्ना बपतिस्मा जिऊमिठाच हेजा सेवा पुपारान डा, मेटे डीचनी मंडीके, आपे इंज्के चोच ससामझातिंज्बा होय? इंज मसीह बाऊ मेना! बनकी इंजा बादोन म्याखोम हेजेमिठाच होय, देटेन इंजा येठाभी खाट होय कि इंज्नी मेटे दियागा नंगा बुट्टा गा दोरा ईटी गा लायको बाऊ मेना।

²⁶ “हे डाईचो, आपे जो अब्राहम गा कोणकुटे होय। एठा परमेश्वर टे हिघरामिंकू, अलग्गो जटोकू, परमेश्वर नी आपेगा मेरान यीशु गा बारेन इनी खाबोर कुलके होय जो कुरकू बचातिंज्कुवा होय।

²⁷ यरूशलेम शहर गा कुरकू नी एठा दिकुगा अगुवाकु नी यीशु मसीह के बान चिनाडुका एठा न परमेश्वर गा कोनेटे मंडीमिंकू गा वचननौर के समझातिंज्के डीके दिकु हारेक परमेश्वर गा चोखरा दिन पपाळातिंज डा। इनिघल्जी दिकुनी डीचके आनोवा ठहरातिंज्केनेच एठा इनी रोंगो टे परमेश्वर गा कोनेटे मंडीमिंकू गा वचननौर के पुराके।

²⁸ दिकुनी घोगेच घल्जी गा लायको तुनिका आनोवा दियेन बान घाटाडुका, फिरभी राज्यपाल पिलातुस टे बिनती डाके, कि देटेन घोगेच होना।

²⁹ दिकुनी दियागा सेंग्गोन देटेन सेबाईका डाके जो पवित्र ग्रंथ दियागा बारेन मंडीवा होय, दिकुनी डीचके म्या क्रूस लिंजेन खिला खुटीटे घोच्केनेच एठा आगुरुटे कब्र गेन डोकेनेच।

³⁰ पेनो परमेश्वर नी डीचके गोएन मिठाच जाटे जीटाकेनेच,

³¹ एठा देटेन हेजा चेलाकूके जो दियागा सेंग्गोन गलील जिल्हा टे यरूशलेम शहर गेन हेन डा, घोनेच दिन टाएन डूगु लक्के डा। कुरकू गा सम्मान नका दिकु दिकुनी डीचके डोकेनेच गवाह होय।

³² आले आपेके डी वादा गा बारेन जो आजा दादाकु टे डाके डा, इनी अच्छा खाबोर घागलवा होय,

³³ कि परमेश्वर नी यीशु के गोएन मिठाच जाटे जीटाकेनेच डो हेजा गा इनी वादा आलेगा कोणकु घल्जी पुराके होय। जैसा कि भाजन सहिंता बाएरा गेन ओल्के होय, परमेश्वर नी मसीह गा बारेन घाल्ले, ‘आम इंजा कोण होय। टैंजका इंज अमा बाटे आरोएन मेना।’

³⁴ एठा दियागा इनी रिती टे गोएन मिठाच जाटे जीटाकेनेच गा बारेन भी, कि देटेन चोलाका बाकी सळातिंजू, डीचनी इनी मंडीके होय, ‘इंज दाऊद लिंजेन गा चोखरा एठा हमेशा आशीर्वाद वादा आपे लिंजेन पुराएवा।’

³⁵ दाऊद इनी बातो दूसरा भाजन सहिंता मंडीवा होय, ‘आम आमगा चोखरा कुरकू के सळातिंज डाए बाने।’

³⁶ चोयाकी दाऊद मेटे परमेश्वर गा इच्छा गा रोंगो हेजा टेमोन सेवा डाटे गोएन, एठा हेजा गा आजा दादाकुन बेल्लाएन, एठा साळातिंजेभी। इनिघल्जी आलेन मालूम कि दाऊद हेजा बारेन बान मंडी लक्के डा।

³⁷ पेनो देटेन यीशु गा बारेन बातो लक्के डा डीचके परमेश्वर नी गोएन मिठाच जाटे जीटाकेनेच, देटेन सळातिंज डाए डुका।

³⁸ इनिघल्जी हे डाईचो, आपे चिनायाकी यीशु गा द्वारा पापो गा मापो गा खाबोर आपेके जेबा होय।

³⁹ जो बातो टे आपे मूसा गा नियम गा द्वारा निर्दोष बान ठहरातिंजू मेंके डा, हार म्याखोम जो विश्वास दडावा होय देटेन यीशु गा द्वारा सेबाई पापो टे आरागुवा होय।

⁴⁰ इनिघल्जी ध्यान टे थंदळे, एनोगो बाकी डाऊ, कि जो परमेश्वर गा कोनेटे मंडीमिंकू गा पुस्तक गेन ओल्के होय, आपे लिंजेन भी हेयु।

⁴¹ ‘हे बुराई दडामिंकू, डोगे, अचम्बोयु, एठा घोयु। डो स्यायु। चोयाकी इंज आपेगा दिनेन म्या कामय डाएवा मेना, एनोगो कामय, कि अगर जेका आपे तलाटे दियागा चर्चा डाए, मेटे आपे चोलाका विश्वास बान दडा।’”

अन्ताकिया शहर गेन पौलुस एठा बरनाबस

⁴² जब पौलुस एठा बरनाबस आराधना जगा टे ओट लक्के डा, मेटे कुरकू दिकुटे बिनती दडा लज्जे, कि हेजे परमेश्वर गा चोखरा दिन इनी बातो डाबोलटे घाले।

⁴³ एठा जब आराधना जगा गा सभा डाएन चोटाका यहूदी कुरकू एठा यहूदी दल गेन हेनमिंकू भक्तकु तलाटे घोनेच कुरकू पौलुस एठा बरनबास गा टाऊटे ओले। दिकुनी दिकुके बातो टे समझातिंजकेकु कि परमेश्वर गा कृपा गेन मजबूत थंदळे।

⁴⁴ हेजे परमेश्वर गा चोखरा दिन पूरा गा अंदजोटे सेबाई कुरकू परमेश्वर गा वचन आजुमेन घोलाएन।

⁴⁵ पेनो यहूदी कुरकू नी गर्दी के धोटे नफरत टे भेट्टेन एठा बुराई डा टे पौलुस गा बातो गा खिलाफबेन मंडी लज्जे।

⁴⁶ मेटे पौलुस एठा बरनबास नी हिम्मत टेका मंडीके, “येटेन जरुरी डा, कि परमेश्वर गा वचन पेला आपेके घालेवाकी। पेनो जब कि आपेनी इनिजगा इंकार दडावा होय एठा खुदके हमेशा गा जीवन गा लायको बान ठहरातिंजू, मेटे नका आले अलग्गो जाटो गा कुरकू मेरान सेनेवा।

⁴⁷ चोयाकी प्रभु नी आलेके इनी हुकूम जिले होय, ‘इंज्नी आपेके अलग्गो जाटो गा कुरकू घल्जी उजाला ठहरातिंज्केमी होय, आपेन दुनिया गेन हार जगान कुरकू के उध्दार दडामिठाच गा बारेन घागल होना।’”

⁴⁸ इनी आजुमटे अलग्गो जाटो गा कुरकू खुशोएन, एठा परमेश्वर गा वचन गा बाडाई दडा लज्जे, एठा जोभी कुरकू हमेशा गा जीवन गा घल्जी ठहरातिंज्के डा, दिकुनी विश्वास डाके।

⁴⁹ मेटे प्रभु गा वचन डी सेबाई देशोन फैलातिंजू लज्जे।

⁵⁰ पेनो यहूदी अगुवाकु नी भक्त एठा गुण जापाएकु एठा पूरा गा खापेट कुरकू के भाळकातिंज्केकु। पौलुस एठा बरनबास खिलाफबेन डाटे भहेलातिंजटे दिकुके पूरा गा घेरा टे बल्लान ओटकेकु।

⁵¹ मेटे पौलुस एठा बरनबास नी इनी घागल गा घल्जी कि परमेश्वर नी दिकुके बान मनेन डुका एठा दिकुके दण्डो जेबा दिकुगा सम्मान आपना नंगा धुल्ला कुठाके। एठा दिकु इकुनियुम शहर गेन ओलेन।

⁵² अन्ताकिया शहर गेन चेलाकू खुशीटे एठा पवित्र आत्मा टे भेट्टेन।