ಅಪೊಸ್ತಲ್ 12 - गवली उनाई नियम

हेरोदेस गा हिंसा

¹ डी टेमो हेरोदेस राजा नी मसीह गा मंडली अदा कुरकू के ससातातिंज गा घल्जी दिकुके बंदी आरुकेकु।

² डीचनी कलामके चेला यूहन्ना गा डाईटे याकूब के तलवार टे घोच्केनेच।

³ जब डीचनी डोके कि दियागा येनेगो दडा टे यहूदी कुरकू खुशोऊवा होय, मेटे डीचनी पतरस के भी उठायेनेच। येटेन अखमीरी सोकळा गा तिवार गा टेमो डाएन।

⁴ हेरोदेस राजा नी पतरस के उठाटे जेलेन केटकेनेच एठा जागली घल्जी, उफुन-उफुन सिपाईकु गा उफुन दलनौर गा पहरा येंडाके। इनी इरादा टे कि फसह गा तिवार बादोन डीचके कुरकू गा सम्मान न्याय दडा सालेनेच।

पतरस गा जेलाटे आरागु

⁵ जेलेन पतरस गा पहरा घोनेच दिन टे डाऊ लक्के डा। पेनो मसीह गा मंडली दियागा घल्जी म्या मन टे लगातर परमेश्वर टे प्रार्थना दडा लक्के डा।

⁶ जब राजा हेरोदेस दियागा न्याय दडा गा घल्जी डीचके कुरकू सम्मान सेगेच लक्के डा, मेटे देटे म्या रातो पेला पतरस बरी साकळी टे टोलके डा, बरी शिपाईकिंज गा तलान गिटीच लक्के डा। एठा पहरादरकु दारोजोन जेल गा पहरा जिऊ डा।

⁷ मेटे अचानक प्रभु गा म्या स्वर्गदूत पतरस गा मेरान टेंगेंके एठा डी खुलीन उजाला चाम्कातिंजे, एठा डीचनी पतरस गा हाडे लिंजेन टी मुंडाटे डीचके बिटकेनेच, एठा मंडीके, “जल्लो बिडे।” एठा दियागा तीटे साकळी खुल्लाटे बोचोएन।

⁸ मेटे स्वर्गदूत नी दियाटे मंडीके, “कपळे एठा बुट्टा उरे।” डीचनी डेनेगोका डाके, डाबोलटे स्वर्गदूत दियाटे मंडीके, “अमा कुर्ता उरीटे इंजा टाऊटे हेजे।”

⁹ पतरस दियागा टाऊटे जेलाटे बल्लान हेन, पेनो बान मालूम डा, कि जो चोचकाभी स्वर्गदूत दडा लक्के होय, देटेन सच्चो होय, बनकी इनी समझातिंज्के, कि इंज दर्शन दोडो लक्के मेना।

¹⁰ मेटे दिकु पेला एठा दूसरा पहरा टे ओटजे डो डी लोखोंडो गा फाटाकोन आदिरजे, जो शहर गा कोनेन साकोम्बा होय। देटेन दिकु घल्जी हेज्का खुद का खुल्लायेन एठा दिकु ओठ्जेडो म्या गिली टे ओले, मेटे अचानक स्वर्गदूत डीचके आराटे ओले।

¹¹ मेटे पतरस नी हिम्मत टे मंडीके, “नका इंज्नी सच्चो चिनाए कि प्रभु नी हेजा गा स्वर्गदूत कुलटे इंज्के हेरोदेस गा हाक टे आराकेमी एठा यहूदी अगुवाकु गा सेबाई उम्मीदनौर टुक्काके।”

¹² इनी चिनाटे कि डीचके परमेश्वर नी बचातिंज्केनेच, देटेन यूहन्ना मरकुस दियागा आंटे मरियम गा उरान हेन। देटेन घोनेच चेलाकू घोलाएन डो प्रार्थना दडा लक्के डा।

¹³ जब डीचनी दरवाजा गा खीळी ठोट-ठोठके मेटे रूदे जीमू म्या भागनी हेन।

¹⁴ पतरस गा आवाज चिनाटे, डीचनी खुशी गा मारे फाटाको बान खुल्लाडुका। पेनो साळुपटे तलान ओले, एठा घाल्के कि पतरस दारोजोन टेंगेंके होय।

¹⁵ दिकुनी दियाटे मंडीके, “आम पागल होय।” पेनो डीच खाट्टेका मंडीके, एठा इनी बातोन आळाएन कि देटेन पतरस होय। मेटे दिकुनी मंडीके, “दियागा स्वर्गदूत होंगा।”

¹⁶ पेनो पतरस दारोजोन ठोट-ठोठका लक्के, इनिघल्जी दिकुनी दराजो खुल्लाके एठा डीचके धोटे अचम्बो डाके।

¹⁷ मेटे डीचनी दिकुके टी टे इशारा डाके, कि कायोम थंदळे। एठा दिकुके घाल्के, कि प्रभु नी तुनी रिती टे डीचके जेलाटे ओटटे सालेनेच होय। डाबोलटे डीचनी मंडीके, “याकूब एठा डाईचो के इनी बातो घाल्की।” मेटे देटे टे ओटजे डो दूसरा जगान ओले।

¹⁸ फेजेर के जेल गा सिपाईकुन भेबाव हालचाल डाऊ लज्जे, कि पतरस तुंगान ओले?

¹⁹ जब हेरोदेस राजा नी डीचके घगाटा गा हुकूम जीके, एठा घगाटान बान घाटाडुका, मेटे पहराकु गा सवाल कोम्बाराके एठा जब दिकु डीचके जवाब बान जिडुका मेटे डीचनी हुकूम जीके कि दिकुके घोच्कु। पतरस यहूदिया जिल्हा के आराटे कैसरिया शहर गेन ओलेडो थोळासा टेमो घल्जी थंदळ लज्जे।

हेरोदेस राजा गा किळा पेडाऊ डो गुजू

²⁰ हेरोदेस राजा सूर एठा सीदोन शहरनौर गा कुरकू टे भेबाव खिजोएन डा। इनिघल्जी डी शहरनौर गा कुरकू म्या मन बेल्लाटे हेरोदेस राजाटे मिलातिंजू घल्जी हेन। सेबाई टे पेला, डीचनी भलास्तुस टे मदत आसिवे जो कि राजा गा हेजा गा मदत दडामिठाच डा। मेटे डीचनी हेरोदेस राजाटे शांती दडा गा घल्जी मंडीके। चोयाकी दिकु इकुगा आटा गा पुपारा घल्जी राजा गा देशोन लिंजेन का डा।

²¹ जो दिन हेरोदेस राजा नी डी शहरनौर गा कुरकू टे मिलातिंजू गा योजना आरुके, डी दिन हेरोदेस राजा राजो गा कपळे उरीटे सिंघासन लिंजेन सुबंजे एठा दिकुके भाषण जिऊ लज्जे।

²² मेटे कुरकू हाको लज्जे, “इनी मेटे कोरो गा बाने गोमेच गा आवाज होय।”

²³ डीका टेमो प्रभु गा म्या स्वर्गदूत नी हेरोदेस राजा लिंजेन वार डाके, चोयाकी डीचनी परमेश्वर गा महिमा बान दडुका। मेटे दियागा कोम्बोर गेन किळाकु पेडायेन डो एठा गोएन।

²⁴ परमेश्वर गा वचन फैलातिंजे एठा विश्वासीकु गा संख्या बळातिंजू लज्जे।

²⁵ यहूदिया जिल्हान यहूदी विश्वासीकु गा मदत दडा घल्जी डामा जिऊ गा बादोन बरनबास एठा शाऊल यरूशलेम शहर टे अन्ताकिया शहर गेन हिराके। यूहन्ना मरकुस दिकुगा सेंग्गोन डा।