ಅಪೊಸ್ತಲ್ 11 - गवली उनाई नियमपतरस गा यरूशलेम गेन हिरा 1 सेबाई यहूदिया जिल्हान कलामके मिंकू चेलाकू एठा विश्वासी डाईचो नी इनी खाबोर आजोम्जे कि अलग्गो जाटो कुरकू भी नी परमेश्वर गा वचन मनातिंजेवा होय। 2 एठा जब पतरस यरूशलेम शहर गेन हेन, मेटे खतना डाएन मिंकू यहूदी विश्वासी कुरकू दिया लिंजेन आनोवा टोकाए लज्जे डा, 3 “आम अलग्गो जाटो कुरकू गा उरान ओले एठा दिकु सेंग्गोन आटा जोवे।” 4 मेटे पतरस नी दिकुके सुरुवात टे म्या गा बादोन म्या जो बातो कुरनेलियुस गा उरान डाएन डा, मंडी घाल्के, 5 “इंज याफा पुरान प्रार्थना दडा लक्के डा, मेटे इंज्नी बेसुद्दोटे म्या दर्शन डोके, कि म्या खाट चद्दार म्या आचार रोंगो उफुन कोनाटे आखाटेका, बदळा टे आगुरुटे इंजा मेरान हेन। 6 जब इंज्नी डे लिंजेन ध्यान डोके, मेटे पृथ्वी गा ओटेनौर एठा डोंगोर गा जानवरकु एठा गोसोरमिंकू जंतुकू एठा बदळा गा भूरिकु डोके। 7 एठा इनी आवाज भी आजुम्के, ‘हे पतरस बिडे घोज्कू डो एठा जोमे।’ 8 इंज्नी मंडीके, ‘बाने प्रभु, बिल्कुल बाने, चोयाकी तुनिका बिसोटो या खराबो चीजो इंजा चाभु चोलाकाभी बान सेंडुका।’ 9 एनेगा जवाब गेन बदळा टे दूसरा बार आवाज हेन, ‘जो चोचकाभी परमेश्वर नी चोखरा ठहरातिंज्के होय, डीके बिसोटो बाकी मंडी।’ 10 आफाई बार येनोगोका डाएन मेटे सेबाईका बदळा लिंजेन ओळजे। 11 सही डीका टेमो आफाई कोरोकु डी उरा गा सम्मान हेन डो टेंगेंके देटेन इंज थंदळके डा। दिकु कैसरिया शहर टे कुरनेलियुस गा द्वारा इंजा घल्जी कुल्लेकु डा। 12 मेटे पवित्र आत्मा नी इंज्के दिकुगा सेंग्गोन बिनफिखार टे सेने घल्जी मंडीके, एठा इनी तुरुई डाईचो भी इंजा सेंग्गोन ओले, डाबोलटे आले डी कोरो गा उरान ओले। 13 कुरनेलियुस नी घल्ले, कि इंज्नी म्या स्वर्गदूत के इंजा उरान टेंगेंटे डोकेनेच, डीचनी इंजाटे मंडीके, ‘याफा पुरान कोरोकु के कुलटे शमौन के जो पतरस मेंबा होय, हाकोलेच। 14 देटेन अमाटे येनोगो मंडेबा, दियागा द्वारा परमेश्वर आमके एठा अमा उरा गा सेबाई कुरकू बचातिंज्कुवा।’ 15 जब इंज बातो लज्जे, मेटे पवित्र आत्मा दिकु लिंजेन डीका रिती टे आगुरुके, जो रिती टे सुरुवात गेन पिन्तेकुस्त गा तिवार गा तलान आबु लिंजेन आगुरुके डा। 16 मेटे इंजेन प्रभु गा डी वचन यादोएन, जो डीचनी मंडीके, ‘यूहन्ना नी मेटे डा टे बपतिस्मा जीके, पेनो आपे पवित्र आत्मा टे बपतिस्मा घाटाऊवा।’ 17 इनिघल्जी जबकी परमेश्वर नी दिकुके भी डीका दान जीके, जो आलेन प्रभु यीशु मसीह लिंजेन विश्वास धोटे घाटाएन। मेटे इंज जे डा जो परमेश्वर के रोकातिंजेज डा?” 18 इनी आजुमटे, डी यहूदी विश्वासी कुरकू कायोमका थंदळजे एठा परमेश्वर गा बाडाई डाटे मंडी लज्जे, “मेटे परमेश्वर नी अलग्गो जाटो गा कुरकू के भी हमेशा गा जीवन गा घल्जी इकुगा पापो टे मन बादलाए एठा यीशु मसीह लिंजेन विश्वास दडा गा दान जीके होय।” अन्तकिया शहर गेन शाऊल एठा बरनबास 19 स्तिफनुस गा गोएन गा बादोन चोटोका विश्वासी कुरकू यरूशलेम शहर टे इंगान-हुगनजे एठा दिकु इखाट-इखाट फिनीके जिल्हा एठा साइप्रस द्वीप एठा अन्ताकिया शहर गेन आदिरजे। पेनो यहूदी कुरकू के आराटे तुनिका दूसराकु के परमेश्वर गा वचन बान घागल डा। 20 पेनो दिकु तलाटे अदा विश्वासी साइप्रस द्वीप थंदळ मिंकू एठा कुरेनी गा थंदळ मिंकू डा, जो अन्ताकिया शहर गेन हेंडो यूनानी कुरकू के भी प्रभु यीशु मसीह गा अच्छा खाबोर गा बातो घागल लज्जे। 21 एठा प्रभु गा शक्ती दिकु लिंजेन डा, एठा घोनेच अलग्गो कुरकू नी दिकुगा खाबोर लिंजेन एठा प्रभु यीशु मसीह लिंजेन विश्वास दडा लज्जे। 22 मेटे दिकुगा चर्चा यरूशलेम शहर गा मसीह गा मंडली गेन आजुमेन हेन, एठा दिकुनी बरनबास के अन्ताकिया शहर गेन कुल्केनेच। 23 डीच देटेन आदिरजे डो, एठा परमेश्वर गा कृपा के धोटे खुशोएन। एठा सेबाईकु के शिक्षा जीके कि तन-मन येंडाटे प्रभु गा विश्वास लायको आरुका थंदळकु। 24 डीच म्या भला कोरो डा। पवित्र आत्मा एठा विश्वास टे भेट्टिके डा। घोनेच कुरकू प्रभु गा मेरान सालेकु। 25 मेटे बरनबास अन्ताकिया शहर के आराटे शाऊल के घगाटा घल्जी तरसुस शहर गेन ओले। 26 जब देटेन शाऊल टे मिलातिंजे मेटे डीचके अन्ताकिया शहर गेन सालेनेच एठा येनोगो डायेन कि शाऊल एठा बरनाबस म्या साल टाएन मसीह गा मंडली गा सेंग्गोन मिलातिंजुवा एठा घोनेच कुरकू के प्रभु यीशु मसीह बारेन शिक्षा जिऊ लज्जे, एठा चेलाकू सेबाईकु टे पेला अन्ताकिया शहर गेन मसीह मेंके। 27 डीका दिनेन अदा विश्वासीकु जो यरूशलेम शहर टे अन्ताकिया शहर गेन हेन, दिकु परमेश्वर गा कोनेटे मंडीमिंकू डा। 28 दिकु तलाटे अगबुस जीमू परमेश्वर गा कोनेटे मंडीमिठाच टेंगेटे पवित्र आत्मा प्रेरणा टे इनी घाले लज्जे, “सेबाई दुनिया गेन खाट सुकाल हेजेवा,” एठा देटेन सुकाल सम्राट क्लौदियुस गा टेमोन बोचोएन। 29 मेटे चेलाकूनी निर्णय डाके कि हार म्याखोम आपना-आपना संपत्ति गा रोंगो यहूदिया जिल्हान मसीह गा विश्वासीकु के मदत डाए। 30 एठा दिकुनी येनोगोका डाके, बरनबास एठा शाऊल गा टीन जुनाकु गा मेरान डामा कुल्के। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation