ಅಪೊಸ್ತಲ್ 10 - गवली उनाई नियमकुरनेलियुस गा दर्शन 1 कैसरिया शहर गेन कुरनेलियुस जीमू म्या कोरो डा, जो इतालियानी जीमू सेना दल गा मुख्या डा। 2 डीच परमेश्वर गा आराधना दडा डा, एठा हेजा सेबाई उराकु गेल्ला परमेश्वर टे हिगरा डा, एठा गिरबो यहूदी कुरकू के घोनेच दान जिऊ डा एठा बराबोर परमेश्वर टे प्रार्थना दडा डा। 3 म्या दिन डया गा अंदजो आफाई बाजान डीचनी दर्शन सपा रुपोटे डोके, कि परमेश्वर गा म्या स्वर्गदूत नी दियागा मेरान तलान हेन डो मंडीके, “हे कुरनेलियुस।” 4 कुरनेलियुस हिघराटे स्वर्गदूत टे कोम्बाराके, “हे स्वामी चोच होय?” डीचनी डीचके जवाब जीके, “अमा प्रार्थनानौर एठा अमा दान यादो गा घल्जी परमेश्वर गा सम्मान आदिरजे होय। 5 नका याफा पुरान कोरो के कुलटे शमौन के, जो पतरस मेंबा होय, हाकोलेच। 6 डी शमौन, कातळे गा धंधा दडामिठाच गा येटेन पाओना होय, दियागा उरा समुद्र गा धुरान होय।” 7 जब डी स्वर्गदूत डीचनी दियाटे बातो डावे डा, ओले मेना, मेटे डीचनी बरी सेवाककिंज, जो दियागा मेरान थंदळ डा, दिकु तलाटे म्या परमेश्वर गा आराधना दडामिठाच सिपाही डा दिकु आफाईकु के हाकोलेकु, 8 दिकुके सेबाई बातो घालटे याफा पुरान पतरस के सा घल्जी कुल्केकु। पतरस गा दर्शन 9 दूसरा दिन कुरनेलियुस गा द्वारा कुल्केकु मिंकू डी आफाई कोरोकु सेन्द्रा-सेन्द्रा पूरा गा मेरान आदिरजे, जब डया गा मेरान पतरस पदळी लिंजेन प्रार्थना दडा घल्जी ओले। 10 दियेन आटा रांगेन एठा डीच चोचका जोम चाहता डा, पेनो जब दिकु आटा तैयारी दडा लक्के डा, मेटे डीच बेसुद्दोएन एठा दर्शन दोडो लज्जे। 11 एठा डीचनी डोके, कि बदळा खुल्लायेन एठा म्या खाट चद्दार आचार रोंगो उफुन भी कोनाटे आखाके रेंगो पृथ्वी गा कोनेन आगुरू लक्के होय। 12 डेननी पृथ्वी गा सेबाई रोंगो गा उफुन नंगा मिंकू एठा ओटे टे गोसोरमिंकू जंतुकू एठा बदळा गा भूरिकु डा। 13 दियेन म्या आवाज आजुम्के, “हे पतरस बिडे, घोचकु एठा जोमे।” 14 पेनो पतरस नी मंडीके, “बाने प्रभु, चोलाकभी बाने, चोयाकी इंज्नी चोलाका तुनिका बिसोटो या खराबो चीजो बान जोम्डूका होय।” 15 डाबोलटे दूसरा बार दियेन आवाज आजुम्के, “जो चोचकाभी परमेश्वर नी चोखराके होय, डीके आम बिसोटो बाकी मंडी।” 16 आफाई बार येनोगोका डायेन, मेटे तुरुटो डी चद्दार बदळा लिंजेन ठुल्जेनेच। कुरनेलियुस गा उरान पतरस 17 जब पतरस हेजा मनेन बिचारेनके डा, कि इनी दर्शन गा मतलब चोच डाऊवा होय, मेटे डी कोरो किंज दिकिंजके कुरनेलियुस नी कुल्केकिंज डा, शमौन गा उरा गा पता लगातिंजटे दाराजोन हेंडो टेंगेंजे। 18 एठा हाकोटे कोकाम्बारा लज्जे, “चोच शमौन जो पतरस मेंबा होय, इंगान का पाओना होय?” 19 पतरस जो डी दर्शन लिंजेन सोचातिंज लक्के डा, कि पवित्र आत्मा नी दियाटे मंडीके, “डोगे, आफाई कोरोकु आमके घगाटा लक्के होय। 20 भलाका दिकु अलग्गो जाटो होय बिंदास बिंफीकीर टे दिकु सेंग्गोन सेंजू चोयाकी इंज्का नी दिकुके कुलकेकु होय।” 21 मेटे पतरस नी आगुरुटे डी कोरोकु टे मंडीके, “डोगे, जेके घगाटा आपे लक्के होय, डीच इंज्का मेना। आपेगा हेजे गा चोच वाजा होय?” 22 दिकुनी जवाब जीके, “कुरनेलियुस मुख्या जो धर्मी एठा परमेश्वर टे हिगरा मिठाच एठा सेबाई यहूदी कुरकू गा तालान जीमू के कोरो होय, डीचनी म्या चोखरा स्वर्गदूतकु टे इनी सुचना घाटावे होय, कि आमके हेजा उरान हाकोटे अमाटे शिक्षा आजुमे।” 23 मेटे डीचनी दिकुके तलान हाकोटे थंदळ गा जगा जीके। एठा दूसरा दिन दिकुगा सेंग्गोन ओले। एठा याफा पूरा गा डाईचो तलाटे अदाकु दियागा सेंग्गोन ओले। 24 आफाई दिन दिकु कैसरिया शहर गेन आदिरजे एठा कुरनेलियुस हेजा गा सगाकु एठा अच्छा सोप्तीकुके गोलाटे दिकुगा राह दोडो लक्के डा। 25 जब पतरस तलान हेजे लक्के डा, मेटे कुरनेलियुस नी दियाटे मिलातिंज्बे एठा नंगा साबटे दियागा नंगा साब्बे। 26 पेनो पतरस नी डीचके बिटकेनेच डो मंडीके, “टेंगेने, इंजा नंगा बाकी साब इंजभी म्या कोरो का मेना।” 27 दियागा सेंग्गोन बातो-चितो लठ्ठाका तलान ओले, एठा घोनेच्का कुरकू के गोलाका धोटे, 28 पतरस नी दिकुटे मंडीके, “आपेन मालूम होय, कि अलग्गो जाटो गा कुरकू सोप्ती दडा या दियागा इंगान सेने आले यहूदी कुरकू गा घल्जी नियम गा खिलाफबेन होय, पेनो परमेश्वर नी इंज्के घाल्ले होय, कि तुनिका कोरो के बिसोटो या खराबो बाकी मंडी। 29 इनिघल्जी इंज्के जब हाकोकेमी मेटे बिना चोचका मंडीका हेन। नका इंज कोकाम्बारावा कि इंज्के तुनी कामय घल्जी हाकोकेमी होय?” 30 कुरनेलियुस नी जवाब जीके, “उफुन दिन पेला इनिका टेमो, इंज इंजागा उरान डया गा आफाई बाजान प्रार्थना दडा लक्के डा, कि म्या कोरो चमकातिंजू कपळे उरीटे इंजा सम्मान हेंडो टेंगेंजे। 31 एठा डीच इंजाटे मंडी लज्जे, हे कुरनेलियुस, अमा प्रार्थना आजुम्के मेना होय, एठा अमा दान परमेश्वर गा सम्मान यादोके मेना होय। 32 इनिघल्जी जेकाकेका याफा पुरान कुलटे शमौन के जो पतरस मेंबा होय हाकोलेच। देटेन शमौन, कातळे गा धंधा दडामिठाच गा येटेन पाओना होय, दियागा उरा समुद्र गा धुरान होय। जब डीच हेजेवा, मेटे देटेन आपेके परमेश्वर गा कोनेटे म्या खाबोर घालेवा। 33 मेटे इंज्नी तुरुटो अमा मेरान कुरकू कुलकेकु, एठा आमनी भला डाके जो हेन होय। नका आले सेबाईकु येटेन परमेश्वर गा सम्मान के होय, ताकी जो चोचकाभी परमेश्वर नी अमाटे मंडीके होय डीके आजुमे।” कुरनेलियुस गा उरान पतरस गा शिक्षा 34 मेटे पतरस नी दिकुटे मंडीके, “नका इंजेन मालूमजेकी परमेश्वर जेका गा हिंजमान बाने, 35 बनकी सेबाई जाटो गेन जो परमेश्वर टे हिघरावा होय एठा धर्मिक कामय दडावा होय, डीच डीके मनेनबा होय।” 36 आमेन डी खाबोर हाडाई होय जो परमेश्वर नी इस्राएल देशो गा कुरकू के जीके। डीचनी शांती गा बारेन अच्छा खाबोर घाल्के जो कुरकू के यीशु मसीह गेन विश्वास दडा गा द्वारा घाटाऊवा होय। डीच सेबाई कुरकू गा परमेश्वर होय। 37 डी वचन आमेन मालूम होय, जो यूहन्ना गा बपतिस्मा गा घागल गा बादोन गलील जिल्हा टे सुरुवात टे यहूदिया जिल्हान फैलातिंजे। 38 परमेश्वर नी तुनी रिती टे नासरत पूरा गा यीशु के पवित्र आत्मा एठा शक्तीटे सुनूम लेमेटके। डीच भलाई दडा डा, एठा सेबाईकु के जो शैतान गा सतातिंज्के मिंकू डा अच्छा दडा इखाटके, चोयाकी परमेश्वर दियागा सेंग्गोन डा। 39 आले डी सेबाई कामय गा गवाह होय। जो डीचनी यहूदी कुरकू गा देशो एठा यरूशलेम शहर गेन भी डाके, एठा यरूशलेम शहर गेन यहूदी अगुवाकु नी डीचके क्रूस लिंजेन लाटकातिंजटे घोच्केनेच। 40 पेनो परमेश्वर नी डीचके आफाई दिन गोएन मिठाच जाटे जीटाकेनेच, एठा ओटकेनेच भी होय। 41 सेबाई कुरकू नी डीचके बान दोडुका पेनो सिर्फ डी गावहकु लिंजेन जो इनिघल्जी परमेश्वर द्वारा पेलाटेका कलामकेकु डा, मतलब आले दिकुनी दियागा गोएन मिठाच जाटे जीटाऊ गा बादोन दियागा सेंग्गोन जोवे नुवे। 42 एठा डीचनी आलेके हुकूम जिले, कि सेबाई कुरकू तलान खाबोर घाले, एठा गवाही जे, कि यीशु डिच्का होय डीचके परमेश्वर नी जीटा एठा गोएन मिंकू गा फैसला दडामिठाच ठहरातिंज्केनेच होय। 43 दियागा सेबाई परमेश्वर गा कोनेटे मंडीमिंकू गवाही जिऊवा होय, कि जो जेकाभी दिया लिंजेन विश्वास डाएवा, दियेन पापो गा मापो घाटाऊवा। अलग्गो जाटोकु लिंजेन पवित्र आत्मा गा आगुरू 44 पतरस इनी बातो मंडी लक्के डा, कि वचन के सेबाई आजोम मिंकू लिंजेन पवित्र आत्मा आगुरुके। 45 एठा जोभी खतना डाएन मिंकू यहूदी विश्वासीकु पतरस गा सेंग्गोन हेन डा, दिकु सेबाई बिचारजे कि अलग्गो जाटो गा कुरकून भी पवित्र आत्मा गा दान जीके मेना होय। 46 चोयाकी दिकुनी दिकुके रेंग्गो-रेंग्गो भाषानौर मंडीटे, एठा परमेश्वर गा बाडाई दडा आजुम्के। एने लिंजेन पतरस नी मंडीके, 47 “चोच नका इंकुके डा गा बपतिस्मा साटे रुकातिंजकुवा होय, दिकुनी आलेगा रोंगो परमेश्वर गा कोनेटे पवित्र आत्मा घाटाएन होय?” 48 पतरस नी हुकूम जीके डी अलग्गो जाटो गा कुरकू के जो कुरनेलियुस गा उरान गोलाके डा यीशु मसीह गा जीमून बपतिस्मा जिऊ होना। मेटे दिकुनी दियाटे बिनती डावे, थोळासा दिन एठा आलेगा सेंग्गोन थंदळे, इनिघल्जी देटेन थोळासा दिन घल्जी थंदळजे। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation