ಅಪೊಸ್ತಲ್ 1 - गवली उनाई नियम

¹ प्रिय थियुफिलुस, इंजगा पेला पुस्तक गेन इंज्नी आमके डी सेबाई बातोनौर गा बारेन ओल्के, डीके यीशु पेलाटेका दडा एठा इथू लज्जे।

² डीचनी डी कलामके मिंकू चेलाकूके दिकुके कलामकेकु डा दिकुके हुकूम जीके, पवित्र आत्मा गा शाक्ति टे डीच स्वर्ग गेन टूलजेनेच।

³ यीशु गा कासु तुटूल एठा गुजू गा बादोन घोनेचका पक्का सबूतनौर टे हेज खुदके दिकुके जीटाका टिपीके, एठा चालीसो दिन टाएन देटेन कलमके चेलाकून डूगु लक्के, एठा परमेश्वर गा राज्य गा बातो गा लक्केका डा।

पवित्र आत्मा गा वादा

⁴ म्या टेमो जब चेलाकू म्या सेंग्गोन डा दिकुटे मिलातिंजटे दिकुके हुकूम जीके, “यरूशलेम शहर के बाकी आरा, लेकिन डी दान के तरागे जो इंजा बाटे आपेके जिऊ गा वादा डाके होय, आपेनी इंज्के दियागा बारेन मंडीटे आजुम्के होय।

⁵ चोयाकी यूहन्ना नी मेटे डा गेन बपतिस्मा जीके होय, पेनो थोळा दिन गा बादोन परमेश्वर आपेगा सेंग्गोन थंदळ गा घल्जी पवित्र आत्मा के कुलेच्बा।”

⁶ बादोन जब कलमके चेलाकू डाबोलटे यीशु टे मिलातिंजे, मेटे दिकुनी दियाटे कोम्बाराके, “हे प्रभु, चोच इस्राएली कुरकू के आरा एठा आलेगा राज्यके डाबोलटे सुसाबना घल्जी अमा टेमो हेन होय?”

⁷ यीशु नी दिकुटे मंडीके, “डी टेमो चोला हेजेवा एठा डी चीजो चोला डाऊवा, इनी चिचाना गा जरुरत बाऊ।

⁸ पेनो जब पवित्र आत्मा आपे लिंजेन हेजेवा मेटे आपेन शक्ती घाटाऊवा एठा यरूशलेम शहर एठा सेबाई यहूदिया जिल्हा एठा सामरीया जिल्हा गेन, एठा सेबाई दुनिया गेन कुरकू के इंजा बारेन गवाही जेबा।”

यीशु गा स्वर्ग गेन सेने

⁹ इनी मंडीटे देटेन दिकुगा दोडो टेमो परमेश्वर नी डीचके स्वर्ग गेन टूलजेनेच, एठा म्या बदळा गा वोजीटे दिकु डीचके एठा बान दोडुका।

¹⁰ दियागा सेने टेमो जब दिकु बदळा कोने डेके-डेके दोडो लक्के डा, मेटे अचानक बरी कोरो किंज पुलूम कपळे उरीटे दिकुगा मेरान हेन डो टेंगेनजे।

¹¹ एठा दिकु मंडी लज्जे, “हे गलील जिल्हान थंदळ मिंकू कोरोकु, आपे चोया टेंगेनटे बदळा के दोडो लक्के मेना? इनिका यीशु, डीचके परमेश्वर नी आपेगा मेराटे स्वर्ग गेन सैय्येनेच होय, साही इनिका रोंगो डाबोलटे हेजेवा जो रोंगो आपेनी डीचके स्वर्ग गेन मनेन टे डोकेनेच होय।”

सामूह प्रार्थना

¹² जब स्वर्गदूत ओले मेना मेटे चेलाकू जैतून जीमू टुक्कीटे जो यरूशलेम शहर गा मेरान म्या चोखरा दिन गा लेंक्कीन डा, देटे टे यरूशलेम शहर गेन हिराएन।

¹³ एठा जब शहर गेन आदिरजे मेटे दिकु माठा गा खुलीन ओले, जो कलामके मिंकू चेलाकू देटेन टाकाकु डा, दिकु येटेनके डा-पतरस, यूहन्ना, याकूब, अन्द्रियास फिलिप्पुस, थोमा, बरतुल्मै, मत्ती, हलफईस गा कोंटे याकूब, शमौन जेलोतेस एठा याकूब गा कोंटे यहूदा इस्करियोती थंदळ डा।

¹⁴ इंकू सेबाईकु देटेन बार-बार जमाऊ डा एठा मनेन म्याका मकसद गा सेंग्गोन प्रार्थना दडा डा। यीशु गा आंटे मरियम एठा चोटोका जापाएकु दिकुनी यीशु गा मदद डाके डा एठा दियागा डाईकु भी म्या चित्तो थंदळ टे प्रार्थना गेन थंदळका डा।

म्या उनाई चेला गा चुनाव

¹⁵ डी दिन तलान जब अंदजोटे म्या सेद्दी इसा विश्वासी डाईचो गोलाके डा, मेटे पतरस दिकु तलान टेंगेनटे मंडी लज्जे,

¹⁶ “हे डाईचो, पवित्र आत्मा नी घोनेच टेमो पेला राजा दाऊद गा वोजीटे यहूदा इस्करियोती गा बारेन भविष्यवाणी डाके डा, जो कि यीशु के गिरापतर दडामिठाच कुरकू गा अगुवाई आरोएन। येटेन जरुरी डा कि यहूदा इस्करियोती गा बारेन पवित्र ग्रंथ गेन ओल्के मिनी पुरायु होना।

¹⁷ चोयाकी देटेन आले तलाटे म्याखोम डा, एठा इनी सेवाकाई गेन भी भेल्लायेन।”

¹⁸ जैसा आपेन मालूम होय, कि यहूदी अगुवाकु नी यहूदा इस्करियोती के डामा जीके डा जब डीचनी बुराई टे यीशु के धोका जिऊ गा वादा डाके। बादोन यहूदा इस्करियोती नी दिकुके डामा हिराके। एठा खुदके फांसी येंडाके, “एठा इनी वाजाटे दियागा कोम्बोर ओटेन बोचोएन एठा दियागा लाच चिराएन एठा दियागा सेबाई आतळी बल्लान हेन। इनिघल्जी यहूदी अगुवाकु नी डी डामा टे म्या खिटी मोलाटे सैय्ये।

¹⁹ यरूशलेम शहर गा सेबाई कुरकू एने बारेन चिनाये, इनिघल्जी डी कुरकू डी जगा के इकुगा भाषा गेन हकलदमा मतलब पचना गा खिटी मंडी लज्जे।

²⁰ दाऊद भाजन संहिता गा पुस्तक गेन ओल्बा होय, दियागा उरा उजळातिंजू, डेन जेका बाकी थंदळजू एठा दाऊद दूसरा जगा कोनेन इनी भी मंडीवा होय, जेका दूसरा दियागा अगुवा गा पद सैय्या।

²¹ इनिघल्जी इनी जरुरी होय कि म्या येनेगो कोरो कलामेच, जो हर टेमो आलेगा प्रभु यीशु मसीह सेंग्गोन जुळातिंज थंदळे।

²² प्रभु यीशु के यूहन्ना गा वोजीटे बपतिस्मा जिऊ टे साटे डीचके स्वर्ग गेन मनेन नेज टायेन-इनी कोरो आलेगा सेंग्गोन प्रभु यीशु गा डाबोलटे जीटाऊ गा गवाह आरोएन। साही होय कि दिकु तलाटे म्या कोरो आलेगा सेंग्गोन दियागा गोएन मिठाच जाटे जीटाएन गा गवाह आरुवा।”

²³ मेटे दिकुनी बरी जीमू गा सुझाव जिले, म्या यूसुफ जो बरसब्बस मंडीवा होय, डेगा मंडाई जीमू यूस्तुस होय एठा दूसरा कोरो मत्तियाह के।

²⁴ एठा इनी मंडीटे प्रार्थना डाके, “हे प्रभु, आम जो सेबाईकु गा मन हाडाई होय, येटेन ओडे कि इनी बार्खिंज गा तलाटे जेके कालाम्केनेच होय,

²⁵ कि डीच इनी सेवाकाई एठा कलामके मिठाच चेला गा पद सेगे, देटे आराटे यहूदा इस्करियोती हेजा ठहरातिंज्के जगान ओले मेना।”

²⁶ मेटे दिकुनी दिकुगा बारेन चिठ्ठीनौर येंडाके, एठा चिठ्ठी मत्तियाह गा जीमू लिंजेन ओटके, मतलब देटेन डी ग्यारह कलामके मिंकू चेलाकू गा सेंग्गोन उमनाएन मेना।