2 ತಿಮೊತಿ 1 - गवली उनाई नियम

नमस्कार

¹ इंज पौलुस, परमेश्वर गा इच्छा गा रोंगो यीशु मसीह गा कलामके मिठाच चेला मेना। इंज्के डी हमेशा गा जीवन गा प्रचार दडा कुलकेमी होय, जो मसीह यीशु लिंजेन विश्वास दडा गा द्वारा परमेश्वर नी जिऊ गा वादा डाके होय। इंज इनी पत्र तीमुथियुस के ओल्बा मेना जो इंजा प्रिय कोण गा रोंगो होय।

² आलेगा परमेश्वर बाटे एठा प्रभु यीशु मसीह गा कोनेटे आपेन कृपा एठा शांती घाटाऊ चाले।

धन्यवाद एठा उत्सहित

³ इनी रातो-दिन आमके इंजा प्रार्थनानौर गेन यादो डाए लठ्ठाका परमेश्वर गा धन्यवाद दडावा मेना, इनिजगा सेवा इंज इंजागा आजा दादाकु गा रोंगो सापा मन डाएवा मेना।

⁴ इंजेन यादो होय कि आमनी चोटो मेट डा आडीके डा जब आबु अलग्गोएन डा, एठा इंजेन आपेटे मिलातिंजू गा भेबाव इच्छा होय, ताकी दिल खुशीटे भेट्टीयु।

⁵ इंजेन अमा डी बिनाखोटो विश्वास गा यादो होय, इनी प्रकार गा विश्वास अमा बबाए लोइस गेन एठा अमा आंटे युनीके गेन भी डा। इंजेन पक्का मालूम होय कि इनिका विश्वास आमेन भी होय।

⁶ इनी वोजीटे इंज आमके यादो जेबा मेना, कि डी वरदान गा पूरा रुपोटे इस्तमाल डाए जो इंजा टी दोडो गा द्वारा परमेश्वर नी आमके जीके होय।

⁷ चोयाकी परमेश्वर नी आलेके हिगरा गा आत्मा बान जिडूका, पेनो दियागा आत्मा आलेगा मननौर के मजबूत दडावा होय, दूसराकु टे प्यार दडा गेन मदत दडावा होय एठा आलेके काबू टे भेट्टी कोम्बा होय।

अच्छा खाबोर गा घल्जी सेरोम बाकी होना

⁸ इनी वोजीटे प्रभु यीशु गा गवाही कुरकू के गघाल टे सेरोम बाकी होना, एठा नका इंजा वोजीटे सेरोमजु होना कि इंज मसीह यीशु गा सेवा गा वोजीटे जेलेनके मेना। पेनो डी शक्तीके इस्तमाल डाए जो परमेश्वर नी आमके जीके होय एठा अच्छा खाबोर गा घल्जी इंजा सेंग्गोन कासु टूले।

⁹ परमेश्वर नी आलेगा उध्दार डाके एठा चोखरा जीवन बिबातातिंजा घल्जी हाकोकेमी, एठा येनेगो डीचनी आलेगा जुना कामय वोजीटे बाने, पेनो हेजा मकसद एठा कृपा गा वोजीटे डाके। हमेशा टे इनी परमेश्वर गा योजना डा, (कि आलेके प्रभु यीशु मसीह गा कृपा घाटायु होना।)

¹⁰ पेनो नका आलेगा उध्दार दडामिठाच मसीह यीशु जो आलेके आराकोम्बा होय इनी दुनिया गेन हेन एठा आले लिंजेन हेजा गा कृपा डाके, डीचनी गुजू गा शक्तीगा नाशो डाके एठा अच्छा खाबोर गा द्वारा आलेके हमेशा गा जीवन गा कोरा घाल्ले।

¹¹ इनी अच्छा खाबोर गा घल्जी परमेश्वर नी इंज्के कलामके मिठाच चेला, प्रचारक एठा गुरूजी भी ठहरातिंज्केमी।

¹² इनी वोजीटे इंज जेलेन कासुके भी टूलेवा मेना। पेनो इंज येनेटे सेरोमु बान डाऊ, चोयाकी इंज हाडाई मेना कि इंजा भारोसा जे लिंजेन मेना एठा इंजेन पक्का मालूम होय कि मसीह डीचनी इंज्के इनी देख-रेख सोपातिंज्के होय हेजा गा डाबोलटे हेजे गा दिन टाएन रक्षा डाए सकतावा होय।

विश्वास गा प्रति वफादार

¹³ जो सच्चो शिक्षा इंज्नी आमके इथूकेमी होय, दियाटे यीशु मसीह गा विश्वास एठा प्यार गेन पक्का आरुका थंदळे।

¹⁴ आलेन नी थंदळ मिनी पवित्र आत्मा गा शक्तीगा द्वारा सच्चाई गा जागली डाए, जो आमके जीके होय।

¹⁵ आम हाडाई होय कि आसिया जिल्हा गा चोटोका विश्वासी कुरकू नी इंज्के आराकेमी होय, दिकु तालाटे फूगिलुस एठा हिरमुगिनेस भी होय।

¹⁶ उनेसिफुरुस गा पीढी लिंजेन प्रभु दया डाए, चोयाकी डीचनी चोटोका बार इंजाटे हेन डो मिलातिंज्के एठा हिम्मत बळातिंज्के होय। डीच इंजा जेलेन थंदळ गा वोजीटे सेरोमडुका।

¹⁷ पेनो जब डीच रोम शहर गेन हेन, मेटे डीचनी खाट मेहनत टे घाटाटे इंजाटे मुलाखात डावे।

¹⁸ कि प्रभु उनेसिफुरुस लिंजेन न्याय गा दिन खाट दया डाए। आपे खुद हाडाई होय कि जब इंज इफिसुस शहर गेन डा मेटे डीचनी इंजा चोटो मदत डाके डा।