2 ತೆಸಲೊನಿಕ್ 2 - गवली उनाई नियम

पापो गा कोरो मतलब विनाश गा कोणटे

¹ हे विश्वासी डाईचो, नका आले आलेगा प्रभु यीशु मसीह गा डाबोलटे हेजे एठा दियागा सम्मान आलेगा गोलाऊ गा बारेन आपेटे बिनती दडावा होय,

² कि आपे तुनिका आत्मिक दर्शन या वचन या पत्री गा द्वारा जो कि म्हणजे आले कोनेटे होय, इनी समझातिंजटे कि प्रभु गा दिन हेन आदिरके होय, आपेगा मन अचानक होलेंजू बाकी एठा न आपे हिघराए।

³ जेका आपे तुनिकाभी रिती टे धोका बाकी जीयु होना। चोयाकी डी दिन तब टाएन बान हेजे, जब टाएन धर्म गा आरागु बान डायु एठा डीच पापो गा कोरो मतलब नाशो गा कोणटे ओट बाने होय, जो नरक गा हिस्सा होय।

⁴ डीच दिकु सेबाईकु गा जो हेज खुदके गोमेचकु मेंटो मंडेबा होय एठा दिकुगा पूजा डाएवा होय एठा हेज खुदके खाट ठहरातिंजेवा। येटे टाएन कि डीच परमेश्वर गा मंदिर गा तलान सेनेवा डो सुबानबा एठा हेज खुदके ईश्वर ठहरातिंजेवा।

⁵ आपेन पक्काटे यादो होय, जब इंज आपेगा सेंग्गोन डा, मेटे इनी सेबाई बातो इंज आपेके मंडी लक्कू डा?

⁶ नका डी बुरा कोरो आए टाएन ओटडुका बाने होय, चोयाकी अदा येनेगो होय जो डीचके रोराकातिंज्बा होय। पक्का रुपोटे आपेन यादो टाकु होय, कि डी चोच होय, जो डीचके रुकातिंजेचबा होय। इनिघल्जी जब परमेश्वर गा सही टेमोन बुरा कोरो ओटबा मेना।

⁷ चोयाकी बुरा कामय गा उखु बातो आए भी कामय दडावा होय, पेनो डी मेटे टाएन उखु थंदळवा जब टाएन खिलाफबेन दडामिठाच बान म्याधेळेनु।

⁸ मेटे डीच बुरा ओटबा, पेनो जब प्रभु यीशु हेजेवा, डीच डी बुराई टे व्यवहार के हेजा गा चाबु गा होलोम टे घोजेज्बा एठा हेजा गा डाबोलटे हेजे गा तेजोमय शक्तीटे राखोएच्बा।

⁹ डीच बुरा शैतान गा शक्तीगा सेंग्गोन हेजेवा एठा सेबाई रेंग्गो लाबाळ चिन्हा एठा अचम्बो कामयनौर के घालेवा,

¹⁰ एठा डीच सेबाई रेंग्गो गा अधर्म गा कामय डाटे डी जो परमेश्वर गा द्वारा नाशोऊवा होय। दिकु कुरकू के भाहकातिंज्कुवा होय, दिकु इनिघल्जी नाशोऊवा चोयाकी दिकुनी सच्चो टे प्यार बान दडुका देटे दिकुगा उध्दार डाऊ डा।

¹¹ इनिघल्जी परमेश्वर नी दिकुन नी म्या भाटकातिंजू मिनी शक्तीके कुलेवा कि डी लाबाळ लिंजेन विश्वास डाए।

¹² एनेगा गुण इनी होय कि जो कुरकू नी सच्चो लिंजेन विश्वास बान दडुका, पेनो अधर्म गा कामय प्रीति डोके, दिकु दोषी ठहरातिंजूबा।

मजबूत आरुका थंदळे

¹³ हे विश्वासी डाईचो, एठा प्रभु गा प्रिय कुरकू, आलेन प्रभु परमेश्वर के आपे कुरकू गा बारेन लगातार धन्यवाद जिऊ होना। परमेश्वर नी पेला फल गा रुपोन आपेके कलामजेमी, देटे आपे चोखरा दडामिठाच आत्मा द्वारा एठा सच्चाई गेन आपना विश्वास द्वारा उध्दार घाटाऊ चाले।

¹⁴ डीका मकसद गा घल्जी डीचनी आपेके आलेगा अच्छा खाबोर गा द्वारा हाकोकेमी, कि आपे आलेगा प्रभु यीशु मसीह गा महिमा गा हिस्सा होय।

¹⁵ इनिघल्जी हे विश्वासी डाईचो, जो-जो बातो आपेनी वचन या पत्र गा द्वारा आलेटे इथूके होय, डेन मजबूत थंदळे एठा पालन डाए चाले।

¹⁶ आलेगा प्रभु यीशु मसीह हेज्का, एठा आलेगा बाटे परमेश्वर, डीचनी आलेटे प्यार डावे एठा हेजा कृपा टे हमेशा शांती एठा उत्तम आसा जीके होय।

¹⁷ आपेके उत्साहितकोम एठा आपेके हर म्या अच्छा कामय एठा वचन गेन मजबूत कोम।