2 पतरस 3 - गवली उनाई नियम

प्रभु डाबोलटे हेजे गा दिन

¹ हे इंजा प्यारे विश्वासी डाईचो, इंज आपेके नका दूसरा बार पत्री ओल्बा मेना। इंज्नी आपेके इनी बरी पत्री इनिघल्जी ओल्के होय, ताकी जो बातो आपे पेलाटेका हाडाई होय, डेगा बारेन आपेके यादो जिऊ गा द्वारा इंज आपेगा मन गेन चोखरा बिचार के ओटकी होना।

² इंजा मकसद इनी होय, कि आपे डी वचननौर के यादो डोए, डेगा घोषणा पेलाका परमेश्वर गा कोनेटे मंडीमिंकू नी डाके डा। एठा इनी कि आपे डी हुकूमनौर के भी यादो डोए जो आलेगा प्रभु एठा उध्दार दडामिठाच गा कोनेटे हेन होय। आपेनी दियागा हुकूमनौर के आलेटे मतलब दियागा कलामके मिंकू चेलाकू टे आजुम्के होय, जो आपेगा मेरान खाबोर के साटे हेन डा।

³ सेबाई महत्वपूर्ण बातो इनी होय, कि आपे समझातिंजेवा होय कि आखरी टेमो टे साही अदा दिन पेला, अदा येनोगो कुरकू डूगुवा दिकुगा जीवन दिकुगा इकुगा बुरा इच्छानौर के ध्यानेन होय। दिकु मसीह गा डाबोलटे हेजे गा बिचार गा मजाक उळातिंजेबा।

⁴ एठा दिकु मंडेबा, “दियागा हेजा गा वादा सच्चो बाऊ होय! डीच चोलाकाभी बान हेजे! आले येनोगो मंडीवा होय चोयाकी जब टे मसीह अगुवा गोएन, जो घोनेच टेमो पेला थंदळ डा, तब मेटे सेबाई चोच्का डेनोगोका डेनोगो होय। चीजो डेनोगोका होय, जैसा दिकु हमेशा टे थंदळके होय, जब टे परमेश्वर नी दुनिया के आरुके होय।”

⁵ दिकु येनोगो मंडेबा चोयाकी दिकु जान बुजटे इनी बातो के बुभाल्ला दडावा होय, कि घोनेच टेमो पेला परमेश्वर गा हुकूम टे बदळा एठा पृथ्वी आरुके डा। डीचनी पृथ्वी के डा टे बल्लान ओटके एठा डीके डा टे अलग्गोके।

⁶ इनी डा गा द्वारा डीचनी डी दुनिया के नशोकेनेच, जो डी टेमो अस्तित्व गेन डा। डीचनी म्या खाट डा घामा कुलके एठा डीचनी पृथ्वी लिंजेन आडी साले एठा सेबाई जीटा जानवरकु नशोकेकु।

⁷ पेनो परमेश्वर डीका हुकूम गा द्वारा बदळा एठा पृथ्वी के जो नका टाकु होय, संभालतिंज डोए होय, ताकी सिंगेल टे दिकुगा नशोकु। डीच दिकुके डी दिन गा घल्जी दोडो लक्के होय, जब डीच न्याय डाएवा एठा डी कुरकू के नशोकुवा जो दियागा हुकूम पालन बान दडा होय।

⁸ हे इंजा प्यारे विश्वासी डाईचो, इनी म्या बातो के चोलाका बाकी भुबल्ला कि परमेश्वर गा घल्जी म्या दिन म्या हजार साल गा खिजा होय, एठा म्या हजार साल म्या दिन गा खिजा होय। दियागा घल्जी म्या दिन एठा म्या हजार साल सेबाई म्या बराबोर होय।

⁹ अदा कुरकू सोचातिंज्बा होय, कि प्रभु हेजा हिरा गा वादा के पुपारा गेन टेमो डाए लक्के होय। पेनो प्रभु डी खिजाटे टेमो बान दडा लक्के होय। बल्कि, डीच आपेगा बारेन आराम्बो दोडो लक्के होय। चोयाकी डीच जेकाकेभी नशो बान दडा चाहता। पेनो चाहतावा होय कि हर जेका हेजा मन के बदलाए एठा गलत कामय दडा बंदोकी, एठा दियागा मेरान हेयु।

¹⁰ पेनो मसीह पक्का रुपोटे डाबोलटे हेजेवा। डीच अचानक का डाबोलटे हेजेवा, जैसा तुनिका चोर अचानक का हेजेवा होय। डी टेमो बदळा गेन आवाज गा साडी सेंग्गोन, बदळा किरीजुवा। बदळा गेन सेबाई चोच्का, मतलब सूर्य, चंद्रा एठा इफिलकु पूरा खिजाटे सिंगेल टे नशोऊबा। डी दिन परमेश्वर डी सेबाई कामयनौर के ओडेवा जो कुरकू नी डाके होय, ताकी दिकुगा न्याय डाकी होना।

¹¹ इनी पक्का होय कि परमेश्वर सेबाई चीजो के इनी खिजाटे नशोएवा, मेटे आपे पक्का रुपोटे हाडाई होय कि आपेन टोनोगो व्यवहार दडा होना। आपेगा चोखरा चाल-चालन थंदळ होना एठा जो चोच्काभी आपे दडावा होय डेनका परमेश्वर खुशोयु।

¹² जब कि आपे डी दिन गा राह डोगे चाले, जब परमेश्वर दुनिया गा न्याय दडा गा घल्जी हेजेवा, मेटे डी दिन गा जल्लो हेजे गा घल्जी हेज कोनेटे कोशिश डाए। डी दिन, सिंगेल भळकतिंजुबा एठा बदळा के नशोएवा, एठा दियागा गर्मी बदळा गेन सेबाई चोच्का पिगलातिंजेवा।

¹³ पेनो आले उम्मीद दडा लक्के होय, कि परमेश्वर म्या उनाई बदळा एठा पृथ्वी आरोएवा जैसा डीचनी वादा डाके डा। देटेन सिर्फ धर्मी कुरकू थंदळवा।

झाट्टोका एठा तैयार थंदळे

¹⁴ इनिघल्जी हे इंजा प्यारे विश्वासी डाईचो, जब कि आपे इनी बातो गा डाऊ गा राह दडा लक्के होय, इनिघल्जी येनोगो जीवन बितातिंजे, जो परमेश्वर के खुशोएच्बा होय, एठा जो चोखरा एठा बिनादोष होना दियाटे शांती हासिलेवा होय।

¹⁵ आलेगा प्रभु गा आराम्बो के म्या मौका गा रुपोन डोगे, जो डीच आपेके हेजे मिनी न्याय टे बचातिंजू गा घल्जी जे लक्के मेना। इनी पौलुस नी भी, जो आलेगा अच्छा सोप्ती होय, आपेके म्या पत्र गेन डी ज्ञान गा उपयोग डाए लठ्ठाका ओल्के डा, जो परमेश्वर डीचके जेबा होय।

¹⁶ हेजाका सेबाई पत्रीनौर गेन जो डीचनी विश्वासी कुरकू के ओल्के हो, डीच इनिका खिजा गा बातो ओल्बा होय, जो डीचनी आपेके ओल्के होय। पेनो अदा बातो जो डीचनी हेजा पत्रीनौर गेन होय, दिकुके समझातिंजू कठिन होय। जो कुरकू नी अच्छा शिक्षा बान घाटाडुका होय, एठा दिकुके पक्का बान दडुका, कि दिकु चोच विश्वास दडावा होय। दिकु इनी कठिन बातो गा मतलब के गलत तरीका टे घालेवाका होय, डेनोगोका जैसा दिकु पवित्र ग्रंथ गा अलग्गो भागो के भी गलत तरीका टे घालेवा होय। येनोगो डाटे दिकु खुद का परमेश्वर गा द्वारा हेजा खुदके नशो डाऊ गा वाजा आरुवा होय।

¹⁷ इनिघल्जी हे इंजा प्यारे विश्वासी डाईचो, आपे पेलाटेका हाडाई होय कि इनी बातो डाऊवा। इनिघल्जी, ध्यान टे थंदळे, ताकी जो कुरकू नियमनौर के बान ममानातिंज दिकु आपेटे लाबाळ मंडीटे भाटकातिंज डाए बान। अगर आपे दिकुगा नक्कल दडावा होय, मेटे आपे डी सच्चो शिक्षानौर लिंजेन शक दडा सुरुएवा, डे लिंजेन आपेनी म्या टेमो मजबूत टे विश्वास डाके डा।

¹⁸ बनकी इनी खिजाटे जीवन बितातिंजे, कि आपे आलेगा उध्दार दडामिठाच यीशु मसीह गा प्रति एठा जादाटे जादा कृपा गेल्ला रुपोटे कामय डाए एठा इनी कि आपे डीचके एठा जादा अच्छा तरीका टे चिनाया होना। दियागा का महिमा नका एठा हमेशा डाऊ चाले। आमीन।