2 पतरस 2 - गवली उनाई नियम

विनाशकारी शिक्षा

¹ घोनेच टेमो पेला, येटेन इस्राएली कुरकू गा तालाबिचोन लाबाळ कुरकू डा जो आपना खुदके परमेश्वर गा कोनेटे मंडीमिठाच मंडी डा, इनी खिजा आपेगा तालान लाबाळ शिक्षानौर गा इथूमिंकू कुरकू भी टाकुकू। दिकु धीरे-धीरे आपेगा तालान मुवा एठा परमेश्वर गा बारेन आपेटे लाबाळ शिक्षा गा प्रचार डाएवा जो कुरकू के मसीह लिंजेन विश्वास दडा टे रोकातिंजकुबा। येटे टाएन कि दिकु मसीह के इकुगा प्रभु गा रुपोन ममानातिंज टे इंकार डाएवा, डीचनी दिकुके पापो टे आराकेकु। येनोगो दडा टे दिकु इकुगा मठान लिंजेन विनाश सेगेवा होय।

² घोनेचका कुरकू जो मंडीवा होय कि दिकु विश्वासी होय, दिकु इनी लाबाळ गुरूजीकु के सेरोम गा कामय गा नक्कल डाएवा, एठा अलग्गो कुरकू जो विश्वासी बाऊ होय, दिकु दिकुगा वोजीटे सच्चो गा कोरा गा खिलाफबेन डाएवा।

³ इनी लाबाळ गुरूजीकु लालीचो होंगा, एठा दिकु आरुके-आरुके मिनी कहानीनौर आजुमटे आपेके धोका जेबा, ताकी आपेटे डामा कामयजा होना। परमेश्वर नी घोनेच टेमो पेलाका निर्णय डाके मेना डा, कि डीच डी कुरकू के दण्डो जेबा एठा डीच येनोगो दडा गा घल्जी तैयार होय। डीच पक्का रुपोटे दिकुके नशोकुवा।

लाबाळ गुरूजी गा न्याय

⁴ आपे हाडाई होय कि घोनेच टेमो पेला जब अदा स्वर्गदूतकु नी परमेश्वर गा हुकूम गा उलंघन डाके, मेटे डीचनी दिकुके दिकुगा डाके मिनी कामय गा दण्डो जीके। डीचनी दिकुके नरक गेन टेप्पाकेकु, एठा दिकुके अंधरा जेलेन डी दिन टाएन डोकेनेच मेना होय, जब टाएन कि डीच दिकुगा न्याय डाएवा एठा दिकुके दण्डो जेबा।

⁵ आपे इनी भी हाडाई होय कि जब घोनेच टेमो पेला थंदळ मिंकू कुरकू नी परमेश्वर गा हिगरा बान मनातिंजडुका मेटे डीचनी डी बुरा कामयनौर के नजर अंदजो बान दडुका, जो दिकु दडा लक्के डा। बनकी डीचनी पूरा दुनिया के भेभेट्टी गा घल्जी डा कुलटे दिकुके येनोगो दण्डो जीके कि दिकु सेबाई नामुजटे नशोएन। पेनो डीचनी नूह गेल्ला डी इलार कुरकू के बचातिंज्केकु, दिकुनी परमेश्वर गा सेंग्गोन सही डाऊ गा बारेन घाल्के डा।

⁶ परमेश्वर नी सदोम एठा अमोरा शहरनौर के नशोके, दियाटे दिकु जुलटे होप आरोएन। डीचनी दिकुके चेतावनी जीके कि जो कुरकू दियागा हुकूम बान आजोम दिकुके इनी खिजाटे दण्डो घाटाऊवा।

⁷ पेनो एनेटे पेला कि डीचनी सदोम गा विनाश डाके, डीचनी लूत के जो म्या धर्मी कोरो डा, शहर टे ओटकेनेच एठा इनी खिजा डीचके बचातिंजेनेच। लूत भेबाव कासुके डा, चोयाकी सदोम गा कुरकू तुनिकाभी नियम के बान ममानातिंज डा एठा सेरोम गा कामय दडा डा।

⁸ लूत म्या धर्मी कोरो डा, पेनो डीच हर दिन बुरा कुरकू गा सेंग्गोन थंदळ डा, इनिघल्जी डीच डी बुरा कामयनौर गा वोजीटे कासु डा, दिकुके डीच दोडो एठा डा।

⁹ इनी सेबाई कामय जो परमेश्वर नी अतीत गेन डाके, दिकु आलेके इनी घागलवा होय कि जो कुरकू आत्मिक जीवन बिबातातिंज्बा होय, जब दिकु मुसीबत गेन थंदळवा होय, मेटे परमेश्वर पक्का रुपोटे दिकुके साजाका डोकुवा। एठा आले इनी भी पक्का डाए सकतावा होय कि डीच बुराई टे व्यवहार कुरकू के डी दिन टाएन हमेशा दण्डो जेबा, जब टाएन कि डीच सेबाई कुरकू गा न्याय बान दडा।

¹⁰ परमेश्वर सेबाई बुराई टे व्यवहार कुरकू के दण्डो जेबा, कास कारके डीच डी लाबाळ गुरूजीकु के पक्का रुपोटे दण्डो जेबा जो इकुगा कोम्बोर गा बुरी इच्छानौर रोंगो कामय दडा गा इच्छा दोडोवा होय एठा जो हेजा मठान परमेश्वर गा हाक के बान ममानातिंज होय। दिकु जिद्दी एठा घमंडी होय। महिमा टे भेट्टिके स्वर्गदूतकु गा बारेन बुरा मंडीवा होय।

¹¹ डाबोलटे भी स्वर्गदूत जो इनी लाबाळ गुरूजीकु टे चोटोका घोनेच महान एठा शक्तीशाली होय, डाबोलटे भी परमेश्वर गा सम्मान दिकुके बुरा- भला मंडीटे दोष बान येंडा।

लाबाळ गुरूजीकु गा बुरा कामय

¹² पेनो इनी लाबाळ गुरूजीकु डोंगोर जानवरकु गा खिजा होय। इनी जानवरकु के बान मालूम कि टोनोगो सोचातिंज होय एठा इंकुगा मकसद सिर्फ उठाऊका एठा गोजुका होय। इनी कुरकू चोच्काभी दडावा होय, जो इंकुगा मन गेन हेजेवा होय, एठा येटे टाएन कि इनी डी चीजो गा अपमान दडावा होय, जो इंकून समझातिंजून बान हेजे। डी कुरकू पक्का रुपोटे नशोऊबा।

¹³ दिकुगा नशो डी बुरा कामयनौर गा ईनाम होय जो दिकुनी डाके होय। डी दिन डया बुरा सुख-विलास गेन बोचोका थंदळ पसंद दडावा होय। दिकु आपेगा तालान म्या कलंक एठा दागो होय। दिकु धोका जिऊ गेन खुशी ममानातिंज्बा होय, जब कि दिकु आपेगा अच्छा आटा गेन आपेगा सेंग्गोन जोजोम-कखाफबा होय।

¹⁴ दिकु हर म्या जापाए गा सेंग्गोन आनोवा दडा चाहतावा होय, देटे दिकु दोडोवा होय। दिकु पापो दडा गा मौका घागटा टे चोलाका बान चूकागु। दिकु डी कुरकू के धोका जिऊवा होय, जो मसीह लिंजेन मजबूत टे विश्वास बान दडा, एठा दिकु दिकुके पापो दडा गा घल्जी बहकातिंजकुवा होय। दिकुगा हमेशा बळातिंजू मिंकू लालीचो इच्छा एठा घोनेच टे घोनेच चीजो के हासिल दडा गा लालीचो गा वोजीटे दिकु परमेश्वर गा द्वारा जीकेमिनी श्रपो गा भागीदारी होय।

¹⁵ दिकुनी सच्चो गा कोरा के आराके होय एठा दिकु भटकातिंजे होय, एठा दिकुनी डीका खिजा गा बुरा कामय दडा सुरुके मेना होय, जो कि बओर गा कोणटे बिलाम नी घोनेच टेमो पेला डाके डा। डीचनी गलत कामय डाटे डामा ककामय पसंद डाके।

¹⁶ पेनो परमेश्वर नी बिलाम के दियागा बुरा कामयनौर गा घल्जी दियागा गदळी गा द्वारा कल्लाकेनेच। बिना मंडी गा भी डी गदळी बिलाम टे म्या कोरो गा खिजा बातो डावे, जब बिलाम दिया लिंजेन सुबानटे राजाटे मिलातिंजू चेल्के डा। डीचनी डी टेमो परमेश्वर गा कोनेटे मंडीमिठाच बिलाम के बेवखुफी कामय दडा टे रोकातिंजेनेच।

¹⁷ इनी लाबाळ गुरूजीकु एगो डा गा झरना रोंगो होय जो ळोखोळजे होय एठा कोयो द्वारा उळातिंजटे बदळा गा सम्मान होय। परमेश्वर नी डी कुरकू गा घल्जी खोल अंधरा गा जागा तैयार डोके होय।

लाबाळ गुरूजीकु के धोका

¹⁸ जब दिकु कुरकू के शिक्षा जिऊवा होय, मेटे दिकु वोया एठा घमंड टे भेट्टी शब्दनौर गा इस्तमाल दडावा होय। दिकु कुरकू के घालेवा होय कि दिकु डी सेरोम मिनी कामय के डाए सकतावा होय, जो दिकुगा कोम्बोर दडा चाहतावा होय एठा दिकु डी कुरकू के डाबोलटे पापो दडा गा घल्जी भुल्लाकुवा होय, जो आए-आए येनोगो बुराई टे व्यवहार गा जीवन टे बचातिंजटे ओटके होय।

¹⁹ लाबाळ गुरूजीकु कुरकू के घालेवा होय, कि दिकु जो चोच्काभी दडा चाहतावा होय, डीके दडा गा घल्जी आजादके होय, हालाकी दिकु खुद गुलामकु गा खिजा होय, चोयाकी दिकुगा इकुगा पापोमय स्वभाव दिकुके पापो गा कामय दडा गा घल्जी मजबूर दडावा होय। चोयाकी एगो जेका कामय जो जेकाकेभी काबू दडावा होय, डीच दियागा भाग्य आरुवा होय।

²⁰ जब दिकुनी यीशु मसीह के आपना प्रभु एठा उध्दार दडामिठाच गा रुपोन चिनाएजेनेच, मेटे डी कुरकू दुनिया गा बुरा कामय टे बचातिंजटे ओटके। पेनो नका म्या बार डाबोलटे दिकु बुरा कामय दडा गेन लगातिंजे होय एठा दिकु बुरा कामय नका दिकुके काबू डोकुवा होय। इनिघल्जी नका मसीह के इंकार दडा गा बादोन दिकुगा आखरी हाल दिकुगा विश्वासी आरुटे पेला गा हाल टे भी बुरा डाएन होय।

²¹ इंजा मंडी गा मतलब इनी होय, कि परमेश्वर दिकुके घोनेच दण्डो जेबा, दिकुनी मसीह के चिचाना गा बावजूद आरागेच्बा हो। दिकुगा घल्जी अच्छा डाऊवा अगर दिकु चोलाका इनी हाडाई का बाने कि आपना जीवन के धर्मी तरीका टे बिबतातिंज गा चोच मतलब डाऊवा होय। नका दिकु हाडाई होय कि सही चोच होय, पेनो दिकुनी परमेश्वर गा डी हुकूमनौर के बान ममानतिंज, जो आले कलामके मिंकू चेलाकूनी दिकुके इथूकेकु डा।

²² दिकुनी जो डाके होय, बिल्कुल डीका बातो इनी बाएरा कहावत मंडीवा होय, “सिटा उलाएवा होय, एठा डाबोलटे डीके जोमेबा होय।” एठा, “जब तुनिका कोरो म्या सुकळी के अबुंजेच्बा होय, मेटे डी सुकळी डाबोलटे गटान लाळच-लुळीच्बा होय।”