2 पतरस 1 - गवली उनाई नियम

अच्छा कामय

¹ इंज, शमौन पतरस, मसीह यीशु भाग्य एठा कलामके मिठाच चेला इनी पत्र दिकु सेबाईकु के ओल्बा मेना दिकुनी आलेगा परमेश्वर एठा उध्दार दडामिठाच प्रभु यीशु मसीह गा धार्मिकता गा द्वारा आलेगा सम्मान कास विश्वास हासिलके होय।

² इंज प्रार्थना दडावा मेना, कि परमेश्वर आपेके एठा घोनेच टे घोनेच कृपा एठा शांती जे लक्के, जैसा-जैसा आपे परमेश्वर एठा आलेगा प्रभु यीशु गा ज्ञान गेन बाळातिंजूवा होय।

विश्वास गेन बाळातिंजू

³ एठा आलेगा परमेश्वर के चिचना गा परिणाम रुपो डीचनी आलेके डीच ईश्वरीय शक्ती जिले होय जो दियागा मेरान होय। इनिघल्जी आलेगा मेरान डी सेबाई होय, डेगा आलेन आत्मिक जीवन बिबतातिंज गा घल्जी जरुरी होय। डीचनी हेजा महिमा एठा भालाई गा वोजीटे आलेके हेजा कुरकू आरु गा घल्जी कालमकेमी होय।

⁴ डीका खाट शक्तीगा द्वारा, डीचनी आलेके किमती एठा घोनेच खाट वादा जीके होय ताकी दिकुगा द्वारा आले दुनिया गा बुरा ललिचोनौर टे आरायु सके जो कुरकू गा नाशो दडावा होय, एठा ईश्वरीय स्वभाव गा बेल्लायु होना।

⁵ आपे परमेश्वर गा स्वभाव गेन बेल्लाऊयु, इनिघल्जी आपेगा विश्वास गेन बाळतिंजू गा घल्जी आपेके हमेशा जो दूसराकु गा घल्जी अच्छा होय, डीका दडा गा कड़ा कोशिश दडा होना जो समझदारी टे व्यवहार दडा हाडाई होय।

⁶ आपेके समझदारी टे व्यवहार दडा गेन सेबाई बुरी बातो से बचातिंजू घल्जी आपना खुदके काबू गेन दोडो होना, डेगा सेंग्गो-सेंग्गोन मुसीबात गेन भी आराम्बो दोडो होना, एठा डेगा सेंग्गो-सेंग्गोन आपेन येनोगो तरीका टे जीवन बिबातातिंज भी होना जो परमेश्वर के खुशोएच्बा होय।

⁷ आपेके परमेश्वर के आदर जिऊ मिनी जीवन गा सेंग्गोन आपेके आपना विश्वासी डाईचो टे प्रीति भी दोडो होना एठा दियागा सेंग्गोन आपेके सेबाई कुरकू टे भी प्यार दडा होना।

⁸ अगर आपे घोनेच टे घोनेच इनी खिजाटे जीवन बिबतातिंजवा होय, मेटे आपे आलेगा प्रभु यीशु मसीह के चिनायेचवा, जो आपेके इस्तमाल एठा फलदायक आरुकोम्बा।

⁹ पेनो अगर जेका कोरो इनी खिजाटे जीवन बान बिबतातिंज, मेटे डीच म्या एगो कोरो गा खिजा होय, जो अंधळा होय। डीच भुलाएन होय कि परमेश्वर नी डीके डी पापो गा घल्जी मापोकेमी होय, जो डीचनी मसीह गेन विश्वास दडा टे पेला डाके डा।

¹⁰ इनी वोजीटे हे इंजा विश्वासी डाईचो, आपे इनी साबित दडा गा घल्जी कोशिश डाए कि परमेश्वर नी आए टेमोन आपेके हेजा गा प्रजा आरु गा घल्जी कालकेमी होय एठा हाकोलेमी होय। अगर आपे एगो डाएवा मेटे आपे पक्का रुपोटे परमेश्वर गेन विश्वास दडा गेन चोलाका बान होलेंज।

¹¹ एठा इनी कि परमेश्वर आपेगा हेजा राज्य गेन खाट आदर गा सेंग्गोन स्वागत डाएवा देटेन यीशु मसीह होय, जो आलेगा प्रभु एठा उध्दार दडामिठाच होय, जो हमेशा गा घल्जी राजा गा रुपो गेन राज्य डाएवा।

पतरस गा आखिरी टेमो

¹² हालाकी आपे पेलाटेका इनी बातो के हाडाई होय एठा मसीह गा बारेन सच्चो शिक्षानौर के मजबूत टे उठाके होय, जो आपेके आजुम्के होय, इंज आपेके दिकुगा बारेन यादो जू रोजोका जे चालेवा।

^13-14 आलेगा प्रभु यीशु मसीह नी इंज्के डी बातो के मंडी गा द्वारा पक्का डाके होय, कि इंज जल्दीका गुजूमिठाच मेना। इनिघल्जी इंजेन लगतिंजूवा होय कि इंजा घल्जी इनी सही होय, कि जब कि इंज आए भी जीटाका मेना, मेटे इंज आपेके इनी चीजो गा यादो जिऊ चाले।

¹⁵ इनिघल्जी इंज इनी बातो के आपेके घागल गा घल्जी आए ओलगा कामय लक्के मेना, ताकी इंजा गुजू गा बादोन आपे हर टेमो इनिज्के यादोएचवा।

मसीह गा महिमा गा दर्शन

¹⁶ जब आले कालम्के मिंकू चेलाकूनी आपेके आलेगा प्रभु यीशु मसीह गा शक्ती एठा डाबोलटे हेजे गा खाबोर घालके, मेटे आले आपेके चताराय टे चोच्का आरुके मिनी बातो बान घागल लक्के डा। बल्कि, आलेनी मसीह गा बळाई हेजा मेट टे डोके डा।

^17-18 आले दियागा सेंग्गोन डी चोखरा टुक्की लिंजेन डा, जब डीचके परमेश्वर बाटे गा द्वारा आदर एठा महिमा जीके। डी टेमो दियागा मेरान बळाई गेल्ला तेजो टे भेट्टिके मिनी परमेश्वर गा कोनेटे आवाज इनी मंडी डोन हेके, “इनिज इंजागा प्रिय कोण होय, दियाटे इंज खुशीके मेना!” आलेनी खुद स्वर्ग टे हेजे मिनी डी आवाज के आजुम्के।

¹⁹ इनिघल्जी आलेन नी परमेश्वर गा कोनेटे मंडीमिठाच गा द्वारा येलान खाबोर टे भी घोनेच पक्का भोरोसा होय। आम इने लिंजेन ध्यान जिऊ गा द्वारा अच्छा खिजाटे डाएवा, चोयाकी इनी म्या अंधरा जागा गेन चमकातिंजू मिनी दिवा गा खिजा होय जब टाएन कि दिन बान ओदडुका एठा फेजेर गा इफिल आपेगा दिलनौर गेन चमकातिंजूवा होय।

²⁰ पेनो इनी महत्वपूर्ण होय कि आपे इनी बातो के समझातिंजे कि पवित्र ग्रंथ गेन आपे परमेश्वर गा कोनेटे मंडीमिंकू गा जो वचन पापळातिंजवा होय, डीच सिर्फ तुनिका कोरो गा हेजा गा बिचार बाऊ होय।

²¹ चोयाकी जेकाभी भाविष्य वाणी चोलाकाभी कोरो टे दाडुका बाने। पेनो पवित्र आत्मा नी कुरकू गा मन के उभारा, जब दिकुनी परमेश्वर गा कोनेटे हेके मिनी खाबोर के मंडीके।