2 ಯೊಹಾನ್ 1 - गवली उनाई नियम

कास जुनाकु गा कोनेटे कलाम्के मिंकूके नमस्कार

¹ इंज कास जुनाकु गा कोनेटे इनी पत्र परमेश्वर गा डी कलाम्के बाई एठा दियागा कोंकु जीमू ओल लक्के मेना, दिकुटे इंज सच्चो प्यार दडावा मेना। इंज्का बाने, बनकी दिकु सेबाई कुरकू भी प्यार दोडोवा होय, जो सच्चाई के हाडाई होय।

² इनी सच्चाई जो आलेन नी म्याका रोंगो थंदळवा, एठा हमेशा आलेगा सेंग्गोन कळाक्को आरु थंदळवा।

³ बाटे परमेश्वर, एठा दियागा गा कोणटे यीशु मसीह गा कृपा, दया एठा शांती डी कुरकू सेंग्गोन आरुका थंदळकु, जो प्यार एठा सच्चाई गेन जीवन बिबातातिंज्बा होय।

मसीह गा हुकूमनौर गेन सेंद्रा

⁴ इंजेन इनी धोटे भेबाव खुशी डाएन कि अमागा अदा कोंकु सच्चाई गा कोरान सेंद्रा लक्के होय, जो हुकूम आलेन बाटे परमेश्वर गा कोनेटे घाटाके होय।

⁵ नका, हे बाई! इंज आमके तुनिका उनाई हुकूम बाने बनकी डीका हुकूम ओले लक्के मेना, जो आलेन पेलाटेका घाटाएन होय, जब आलेनी मसीह गा टाऊटे सेंदरा सुरुके डा, कि इनिज-दियाटे प्यार डोए।

⁶ एठा प्यार गा मतलब इनी होय कि आले परमेश्वर गा हुकूमनौर लिंजेन सेंद्रा लक्कू। जो हुकूम आपेनी पेलाटेका आजुम्के होय, डे लिंजेन सेंद्राए एठा आपे हमेशा इनिज-दिया सेंग्गोन प्यार डोए।

मसीह दुश्मान गा धोकाटे ध्यान टे थंदळे

⁷ इंज आपेके इनी सेबाई बातो इनिघल्जी यादो जिऊ लक्के, चोयाकी घोनेच्का भुबल्ला मिंकू कुरकू दुनिया गेन फैलातिंजे होय, जो इनी बान ममानातिंज कि यीशु मसीह कोरो आरुटे दुनिया गेन हेन। अगर तुनिका कोरो येनेगो बातो मंडीवा होय, मेटे डी कोरो मसीह गा दुश्मान होय एठा कुरकू के भूबल्लावा होय।

⁸ इनिघल्जी आपे कुरकू ध्यान टे थंदळे, ताकी जो कामय आपे कुरकू नी परमेश्वर गा सेवा गा घल्जी डाके होय, डेगा ईनाम बाकी आट पेनो परमेश्वर टे डी कामय गा पूरा ईनाम घाटाएवा।

⁹ जो जेकाभी मसीह गा शिक्षा गेन बान थंदळ बनकी देटे बल्लान सेनेवा होय दियागा परमेश्वर गा सेंग्गोन रिश्ता बाने। पेनो जो जेकाभी दियागा शिक्षा गेन आरुका थंदळवा होय, दियागा रिश्ता बाटे परमेश्वर एठा कोणटे बर्खिंज गा भी सेंग्गोन होय।

¹⁰ अगर जेकाभी आपेगा मेरान हेजेवा होय एठा मसीह गा शिक्षा टे चोच्का अलग्गो इथूवा होय, डीचके न मेटे उरान हेजडाए एठा न स्वागत डाटे डीचके उत्सहित डाए।

¹¹ चोयाकी जो जेकाभी येनोगो कोरो गा स्वागत डाएवा होय, दिकु दियागा द्वारा डाके मिनी बुरा कामय गेन बेल्लाऊवा होय।

आखरी नमस्कार

¹² इंजेन एठाभी घोनेच्का बातो ओल होना होय, पेनो डी बातोनौर के इनी रोंगो टे पत्र गेन ओल बान चाहता। इंजेन आसा होय, कि इंज आपेगा मेरान हेजे एठा आपेगा सेंग्गोन सुबानटे बातो चितो डाए, देटे आले खुशी पुरायु होना।

¹³ परमेश्वर गा द्वारा कलाम्केमिंकू अमागा बोकजाई गा कोंकूटे आमके नमस्कार डाएवा होय।