2 ಕೊರಿಂಥ 9 - गवली उनाई नियम

मदत गा प्रेरणा

¹ यरूशलेम शहर गा विश्वासीकु गा मदत गा घल्जी, डामा मदत कुलटे डाए लक्के मिनी सेवा कामय गा बारेन इंजेन आपे कुरकू के ओलगा तुनिका जरुरत बाऊ होय।

² चोयाकी इंज आपेगा इनी खिजा गा कामय के दडा गा इच्छाके हाडाई मेना। एठा इंज मकिदुनिया जिल्हा गा थंदळ मिंकूटे इनी मंडी लठ्ठाका घमंड दडावा मेना, कि अखाया जिल्हा गा मसीह गा मंडली मदत दडा गा घल्जी ओले साल टे तैयारके होय। आए टेमो गेन, इनी आमगा आरी डा डीचनी दिकु तालाटे घोनेच्कुके मदत दडा गा घल्जी उकसातिंज्केकु।

³ इंज तीतुस एठा दियागा सेंग्गो बरी डाईचो के आपेगा मेरान इनिघल्जी कुलेच लक्के मेना, कि आलेनी इनी विषय लिंजेन आपे कुरकू लिंजेन जो घमंड ओटके होय, डी बेकार बाकी ओट। इंज चाहतावा मेना कि आपे तैयार थंदळे, जैसा कि इंज्नी मंडीके डा।

⁴ कही येनोगो बाकी डाऊ कि मकिदुनिया जिल्हा गा अदा पेळामिंकू इंजा सेंग्गोन हेन डो इनी डोके कि आपे डामा मदत गा घल्जी तैयारके बाऊ होय एठा आलेके एठा आपेके भी सेरोमु होना बोचोवा, जब कि आलेनी इनी बारेन आपे लिंजेन येटो भरोसा टिपीके होय।

⁵ इनिघल्जी इंज्नी इनी विश्वासी डाईचो टे इनी अनुरोध दडा जरुरी समझातिंज्के, कि दिकु पेला आपेगा येनेन हेजे एठा येनोगो सोए डाए कि आमनी जो डामा गा मदत जिऊ गा वादा डाके होय, डी इंजा आदिरुटे पेला तैयाजू होना एठा डी भार आपेगा दबाव गा बाने, बनकी आपेगा दयालुपणा गा साबुत डायु।

अच्छा दान दाता

⁶ इनी बातो गा ध्यान डोए कि जो थोळा बिबीटवा होय, डीच थोळाका हिरबा होय एठा जो घोनेच बिबीटवा होय, डीच घोनेच हिरबा होय।

⁷ हर म्या कोरो खिजा मन गेन उठाके डेनोगोका दान जे, न कुरू-कुरू गा, एठा न दबाव टे, चोयाकी परमेश्वर लंडडा टे जिऊमिठाच टे प्यार दोडोवा होय।

⁸ परमेश्वर आपे कुरकू के जरुरतनौर टे भी जादा आशीर्वाद जे सकतावा होय, देटे हर बातो गेन एठा हर टेमो गेन, सेबाई चोच्का, जो आपेन जरुरी होय, आपेगा मेरान थंदळे, ताकी हर म्या भला कामय गा घल्जी आपेगा मेरान घोनेच चोच्का होना।

⁹ जैसा पवित्र ग्रंथ गेन ओल्के होय, “परमेश्वर नी दयालुपणा टे गिरबो के दान जीके होय, दियागा धार्मिकता हमेशा आरुका थंदळवा होय।”

¹⁰ परमेश्वर का होय, जो खिटी कोरो के बिबीट गा घल्जी बीजो एठा जोम गा घल्जी आटा जेबा होय, इनिका खिजा, डीच आपेके सोए जेबा, डीके बळातिंजेवा एठा आपेगा दयालुपणा गा आनाजो ओडेवा।

¹¹ इनी खिजा आपे कुरकू हर रोंगो गा डामा टे भेट्टिटे दयालुपणा तिटीपीन लायको डाऊवा। आपेगा दान, आलेगा द्वारा कुरकू गेन कखाटिंज डाऊ लठ्ठाका, परमेश्वर गा प्रति धन्यवाद गा वाजा आरुवा।

¹² चोयाकी इनी सेबाईकु सेवा गा कामय न बस परमेश्वर गा कुरकू गा जरुरतनौर के पूरा दडावा होय पेनो कुरकू गा कोनेटे परमेश्वर गा घोनेच धन्यवाद डाऊवा होय।

¹³ इनी दूसराकु के दान जिऊ गा सेवा गा कामय साबुत गा तौर लिंजेन मनातिंजटे कुरकू परमेश्वर गा महिमा डाएवा, कि आपे मसीह गा अच्छा खाबोर के मनातिंजटे दियागा लिंजेन विश्वास दडावा एठा बेल्लाऊ गा भावना टे दिकुगा एठा सेबाईकु गा दयालुपणा टे मदत दडावा होय।

¹⁴ दिकु आपेगा घल्जी परमेश्वर टे प्रार्थना डाएवा। दिकु आपेके प्यार दडावा होय, चोयाकी दिकु हाडाई होय, कि परमेश्वर नी आपे कुरकू लिंजेन खाट कृपा डाके होय।

¹⁵ हेजे आले परमेश्वर के दियागा उपहार गा घल्जी धन्यवाद जे डीके जेकाभी पूरा खिजाटे अच्छा टे बान घाले साकता।