2 ಕೊರಿಂಥ 7 - गवली उनाई नियम

¹ हे प्यारे विश्वासी डाईचो, इनी सेबाई वादा परमेश्वर टे आलेन घाटाएन होय। इनिघल्जी आले सेबाई आपना कोम्बोर एठा मन गा हर रोंगो गा बुराई गा कामयनौर के दडा बंदोकी, एठा परमेश्वर गा आदर दडा लठ्ठाका चोखरा जीवन बिबातातिंज घल्जी कोशिश डाए।

खुशी एठा पस्ताव

² आपे आलेटे आपेगा पूरा दिल टे प्यार डाए। आलेनी न जेकाटे अन्याय डाके, न जेका के बिगळातिंज्केच एठा न जेकाकेका भुल्लाकेनेच।

³ इंज आपे कुरकू के दोष जिऊ गा घल्जी इनी बान मंडी लक्के मेना। इंज्नी मेटे आपेके पेलाटेका मंडीके कि आले आपेटे पूरा दिल टे प्यार दडावा होय, आले आपेटे अलग्गो बान थंदळ चाहे आले जीटाका थंदळे या घोजे।

⁴ इंज आपे कुरकू टे खुल्लाटे बातोवा मेना। इंज आपे कुरकू लिंजेन भेबाव घमंड दडावा मेना। येनेटे इंजेन घोनेच खुशी घाटाऊवा होय एठा इंजा सेबाई मेहनत गेन खुशी लापावाका होय।

⁵ जब आले त्रोआस शहर के आराटे मकिदुनिया जिल्हान आदिरजे, मेटे आलेगा कोम्बोरके तुनिका आराम्बो बान घाटाऊ लक्के डा। आले हर खिजाटे तक्लिप टे बोचो लक्के डा। आलेगा उफुन भी कोनेन लडाईनौर डाऊ लक्के डा एठा आलेगा मन गेन हिगरा बोचो लक्के डा।

⁶ पेनो कासु कुरकू के तसल्ली जिऊमिठाच परमेश्वर नी, आलेके तीतुस गा हेजे टे तसल्ली जीके।

⁷ एठा तीतुस गा हेजे गा व्दारा का बाने, बनकी डी तसल्ली द्वारा भी, जो तीतुस के आपे कोनेटे घाटाएन डा। इंजाटे मिलातिंजू गा आपे कुरकू गा आरी, आपे कुरकू गा मन बबादला एठा इंजा प्रति आपे कुरकू गा चिंता गा बारेन दिकुनी आलेके घल्ले एठा येनेटे इंजा खुशी येठाभी बळातिंजे।

⁸ इंजेन इनी बातो गा अफसोस बाने डा कि इंज्नी आपेके जो गंभीर रुपोटे पत्र ओल्के डा, भलाका डी पत्र नी आपे कुरकू के कासु केमी टासो। इंजेन पेला बारेन पस्ताव डाएन जब इंज्नी डोके कि इनी पत्र नी आपे कुरकू के थोळा टेमो गा घल्जी दुखी केमी होय।

⁹ पेनो नका इंजेन खुशी होय। इंजेन इनिघल्जी खुशी बाऊ कि आपे कुरकून कासु गईय्ये, बनकी इनिघल्जी कि डी कासु गा वोजीटे आपे कुरकू नी पापो दडा आराटे परमेश्वर गा कोनेन मन येंडाके। आपे कुरकू नी डी कासुके परमेश्वर गा इच्छा रोंगो मनेन जे एठा इनी खिजा आपेके इंज कोनेटे तुनिका तक्लिप बान दडुका।

¹⁰ चोयाकी जो कासु परमेश्वर गा इच्छा रोंगो मनेन नेवा, डेगा परिणाम दिल बदलाव एठा उध्दार डाऊवा होय। येनेन पस्ताव बान बोचो। पेनो दुनिया कासु गा परिणाम गुजू डाऊवा होय।

¹¹ ध्यान जे कि परमेश्वर गा कोनेटे हेन कासुनी आपेनी चोच-चोच बदलाव डाके होय, येनोगो आरी भेट्टी जल्लो, आपना पक्षा सपा दडा गा येनोगो खाट इच्छा, अन्याय गा प्रति येनोगो खीजो, सिनी गा प्रति येनोगो ध्यान टे, इंजाटे मिलातिंजू गा येनोगो तेजो इच्छा, सेवा गा प्रति येनोगो आरी यानेकी बुराई के दण्डो जिऊ गा घल्जी येनोगो तेजो गा द्वारा आपेनी इनी साबितके कि सेबाई चोच्का सही-सही दडा गेन आपेनी चोच्काभी कमी बान आराडुका होय।

¹² आए टेमोन इंज्नी डी पत्र पक्का रुपोटे इनिघल्जी बान ओलडुका डा, कि इंज्के अन्याय दडामिंकू यानेकी अन्याय सेहेसेन मिठाच कोरो गा येठाभी चिंता डा, बनकी इंज्नी इनिघल्जी ओल्के, परमेश्वर आमके टीपे कि आपे कुरकू आलेगा चोटो चिंता दडावा होय।

¹³ येनेटे आलेन तसल्ली घाटाएन। इनी तसल्ली टे भी ज्यादा आले तीतुस गा खुशी धोटे येठाभी खुशीटे बिटजे, चोयाकी दियागा मन आपेगा वोजीटे येठाभी जादा खुशोएन मेना होय।

¹⁴ इंज्नी दियागा सम्मान आपे कुरकू गा बारेन घमंड गा बातो डावे, डेगा घल्जी इंजेन सेरोम बान होना बोचोवा। इंज्नी आपे कुरकू टे जोभी मंडीके डा, डी सच्चो लिंजेन आधरित डा। इनी रोंगो तीतुस गा सम्मान इंज्नी आपे लिंजेन घमंड दडा लठ्ठाका जो मंडीके डा, डी सच्चो ओटके।

¹⁵ एठा जब डीच दडावा होय कि आपे सेबाईकु नी दियागा बातो मनातिंज्के एठा हिघराटे कपातिंज लठ्ठाका दियागा स्वागत डाके, मेटे आपेगा प्रति दियागा प्यार येठाभी बळातिंजुवा होय।

¹⁶ इंज खुशी दडावा मेना, कि आपेगा कोनेटे इंजेन हर बातो गेन भरोसा डाऊवा होय।