2 ಕೊರಿಂಥ 3 - गवली उनाई नियम

मसीह कुरकू जीटा पत्र

¹ चोच आले डाबोलटे आपना बढाई दडा लज्जे? चोच अलग्गो कुरकू गा खिजा इनी आलेगा घल्जी जरुरी होय कि आले आमके सिफारिश पत्र घाल्के या अमाटे आसिवे?

² आपे खुद का म्या पत्र गा खिजा डायु जो आलेगा घल्जी सिफारिश दडावा होय। आपेगा बदलातिंज्के मिनी जीवन आपेगा हर जेका पळातिंजेवा होय एठा आपेगा तालान आलेगा डाके मिनी कामयनौर के चिनाए सकतावा होय।

³ इनी सपा होय, कि आपे मसीह गा पत्री गा रोंगो होय, इनी पत्र आलेगा सेवकाई गा निकल होय, डीके साई टे बाने पेनो जीटा परमेश्वर गा आत्मा टे घोटा गा पाटीनौर लिंजेन बाने, पेनो कोरोकु गा दिल गा पाटीनौर लिंजेन ओल्के मेना होय।

पौलुस गा सेहेन

⁴ आले मसीह गा द्वारा परमेश्वर गेन आलेगा विश्वास गा वाजा इनी सेबाई गा बारेन आश्वस्त होय।

⁵ आले इनी बान मंडी होय कि आलेगा मेरान खुद टे चोच्काभी दडा गा सेहेन होय। पेनो परमेश्वर आलेके इनी सेहेन जेबा होय।

⁶ डीचनी आलेके परमेश्वर गा द्वारा जीकेमिनी उनाई करार गा सेवाक आरु गा सेहेन जिले होय। आले मूसा द्वारा ओल्के मिनी नियम गा सेवक बाने पेनो पवित्र आत्मा गा सेवक होय। चोयाकी मूसा द्वारा ओल्के मिनी नियम गा पालन बान दडा गा परिणाम गुजू होय पेनो पवित्र आत्मा जीवन जिऊवा होय।

परमेश्वर गा द्वारा जीकेमिनी पेला करार गा महिमा

^7-8 जब मूसा गा नियम जो घोटा गा पट्टीनौर लिंजेन ओल्के मेना डा, डी टेमो परमेश्वर गा महिमा ओटजे मेना। इस्राएली कुरकू लम्बा टेमो टाएन मूसा गा चेहरा गा कोनेन बान दोडुका चोयाकी डीच चमकातिंजू लक्के डा, हालाकी इनी चमकातिंजू लम्बा टेमो टाएन बान थंदळ डुका। इनिघल्जी अगर मूसा के जीकेमिनी नियम लिंजेन आधरित सेवकाई गुजू गा कोनेन सेनेवा होय, दियागा येनोगो महिमा डा, मेटे परमेश्वर गा आत्मा गा कोरा घागल गेन परमेश्वर गा द्वारा पेला जीकेमिनी उनाई करार गा हात टाल्लेन सेवा गा कामय एठाभी महिमा टे भेट्टिके मेना होंगा।

⁹ चोयाकी जब दोषी ठहरातिंजू मिनी करार महिमा टे भेट्टिके डा, मेटे पक्का रुपोटे परमेश्वर गा द्वारा जीकेमिनी उनाई करार जो हेजा कुरकू के धर्मी आरुकुवा होय एठाभी जादा महिमा टे भेट्टिके होय।

¹⁰ डी महिमा जो मूसा गा द्वारा जीकेमिनी पेला करार गा द्वारा डा, डी उनाई करार गा तुल्न गेन तेजोमय बान थंदळ डुका, नका तुनिका महिमा बाऊ होय।

¹¹ इनिघल्जी, जब मूसा गा द्वारा जीकेमिनी पेला करार, एटो तेजोमय डा, जो नका बाजुके मेना होय, मेटे उनाई करार देटेभी ठायका तेजोमय थंदळवा जो हमेशा गा घल्जी पक्का थंदळवा होय।

¹² इनिघल्जी येनोगो आसा धोटे आले हिम्मत गा सेंग्गोन मंडीवा होय।

¹³ आले मूसा गा सम्मान बाने डीचनी हेजा म्वार लिंजेन परदा येंडाके डा, ताकी इस्राएली कुरकू दियागा चेहरा लिंजेन महिमा गा तेजी के कामु लक्के मेंटो एठा आखरीन नी गायब लक्के मेंटो बाकी दोडो।

¹⁴ पेनो दिकु बेदिमाग आरोएन, चोयाकी टाइंज टाएन परमेश्वर गा द्वारा जीकेमिनी पेला करार गा नियम के पपाळातिंज टेमो दिकुगा दिलनौर लिंजेन डीका परदा सोडका थंदळवा होय। पेनो जब डीच मसीह गेन विश्वास दडावा होय, मेटे डीका परदा बाजुनेवा होय।

¹⁵ एठा टाइंज टाएन जब चोलाकाभी मूसा गा नियम पळातिंजेवा होय, मेटे दिकुगा दिल लिंजेन परदा सोडका थंदळवा होय, एठा इनिघल्जी दिकु इनिके पूरा खिजाटे बान समझातिंजेवा होय।

¹⁶ पेनो जब चोलाकाभी डीच प्रभु गेन विश्वास दडावा होय, मेटे डी परदा बिटजुबा।

¹⁷ प्रभु मेटे आत्मा होय, एठा जो तोटेन काभी प्रभु गा आत्मा, देटेन जुना करार टे आजादी होय।

¹⁸ आले सेबाईकु म्या आएना गा खिजा परमेश्वर गा महिमा के येनोगो चेहरानौर टे दर्शातिंजेवा होय डे लिंजेन परदा बान बोचोडुका होय। परमेश्वर आलेके रोजका बळातिंजू महिमा गा तेज जादाटे जादा आपना खिजा आरु लक्के होय। इनी प्रभु गा मतलब पवित्र आत्मा गा कामय होय।