2 ಕೊರಿಂಥ 10 - गवली उनाई नियम

आत्मिक युध्द

^1-2 मसीह गा कोमलता एठा दयालुता गा द्वारा, इंज पौलुस अमाटे बिनती दडा मेना कि इंजा हेजे लिंजेन इंज्के जिद्दो आरु गा घल्जी मजबूर बाकी दडा, चोयाकी अदा कुरकू मंडीवा होय। कि जब इंज आमगा सेंग्गोन थंदळवा मेना, मेटे नम्र एठा कोमल लुबा मेना, लेकिन जब इंज लेंक्कीनुवा मेना मेटे आमगा सेंग्गोन जिद्दीऊवा मेना। इंजेन याकिन होय कि इंज डी कुरकू गा सेंग्गोन जिद्दो टे निपटातिंजेवा मेना जो मंडीवा कि आले दुनिया गा हर म्या मकसदनौर टे कामय दडावा होय।

³ आले दुनिया गेन मेटे जरुर थंदळवा होय, पेनो आले दुनिया गा कोरोकु गा खिजा लडाई बान दडा।

⁴ आलेगा लडाई गेन इस्तमाल डाऊ मिनी हथियार दुनिया गा बाऊ होय, बनकी डी परमेश्वर गा हथियार होय डेन शक्तीटाकूनेच होय, देटे हर रोंगो गा शैतान गा शक्तीनौर के नाशोए सकतावा होय।

⁵ आले आलेगा सोचनौर एठा घमंड टे ओटजे मिनी डी सेबाई बातो गा नाशो डाएवा होय, जो परमेश्वर के हाडाई गेन आळा येंडाएवा होय। इनी हथियारनौर गा द्वारा दिमागमिठाच कोरोकु के मसीह गा हात टाल्लेन मनेन दडा गा घल्जी मजबूर दडावा होय,

⁶ कि जब आपे पूरा खिजाटे मसीह गा हुकूम आजुममिंकू आरुयु, आले हर म्या हुकूम बान ममानातिंज के दण्डो जिऊ गा घल्जी तैयार थंदळकु।

पौलुस गा हाक

⁷ आपे बस बल्ला रुपोटे दोडोवा होय जो मेट गा सम्मान सापा होय। अगर जेका समझातिंजेवा होय कि डीच मसीह गा होय, मेटे डीच डाबोलटे बिचार दडा लिंजेन इनी समझातिंजेवा कि जो खिजा डीच मसीह गा होय डीका खिजा आलेभी मसीह गा होय।

⁸ चोयाकी अगर इंज डी हाक गा बारेन एठाभी घमंड घालेकी, जो प्रभु नी इंज्के आपेगा विश्वास के बिबागळातिंज गा घल्जी बाने पेनो आपेगा विश्वास के बाबाळातिंज गेन मदद दडा गा घल्जी आलेके जिले होय, मेटे सेरोमु बाने मेना।

⁹ इनी इंज इनिघल्जी मंडीवा होय, कि पत्रीनौर गा द्वारा आपेके हिगरा मिठाच बाकी ठहरातिंजू।

¹⁰ चोयाकी आपेटे अदा कुरकू गा मंडी होय, कि इंजा पत्र काळक्को एठा असारदार होय, पेनो जब इंज खुद हेजेवा मेना, मेटे इंजा कोम्बोर लोकोम लगातिंजुवा होय एठा इंजा मंडी गा शक्ती बाने गा बराबोर होय।

¹¹ जो कुरकू इनी मंडीवा होय, दिकु एने लिंजेन बिचार डाए, कि आले लेंक्कीन थंदळ लठ्ठाका पत्रनौर गेन जो बातो ओल्बा होय, डेनोगोका आपेगा सम्मान आलेगा कामय भी डाऊवा।

पौलुस गा हाक गा धुरानौर

¹² चोयाकी आलेन इनी हिम्मत बाऊ कि आले खुदके दिकुगा सेंग्गोन तुल्न डाए। दिकु इकुगा का उमना दण्डो टे आपना खुदके चिचानावा होय एठा हेज खुद गा बढाई दडावा होय, एठा हेज खुदके इकु-इकुनका नापोटे इनिज-दियाटे तुल्न डाटे बेदिमाग ठहरातिंजेच्बा होय।

¹³ परमेश्वर नी आलेके जो कामय जिले होय, डेगा धुरानौर गा बल्लान घमंड चोलाकाभी बान दडा। पेनो डीका धुरा टाएन जो परमेश्वर नी आलेगा घल्जी ठहरातिंज्के होय। डेन आपे भी हेन मेना होय एठा डेगाका रोंगो घमंड भी डाएवा।

¹⁴ चोयाकी आले आलेगा कामय गा ईरिया टे बल्लान खुदके बबाळातिंज बान चाहता, येठाभी आले आपेगा जरुर टेका हेन डा। चोयाकी आलेनी पेला बार आपेगा एनेन मसीह गा अच्छा खाबोर गा प्रचार डाके।

¹⁵ एठा आले परमेश्वर गा द्वारा जीकेमिनी कामय गा ईरिया गा बल्लान दूसराकु गा मेहनत लिंजेन घमंड बान दडा। पेनो आलेन आसा होय, कि जैसा-जैसा आपेगा विश्वास बळातिंजुवाका डेनोगोका आले आपेगा वोजीटे एठाभी कुरकू टाएन आदिरेवा।

¹⁶ एठा आले आपेगा ईरिया टे बल्लान लेंक्की-लेंक्की गा ईरिया गेन भी अच्छा खाबोर घाल्के, बनकी आले दूसराकु गा ईरिया गा तालान आरु-आरुके कामयनौर लिंजेन घमंड डाए।

¹⁷ जैसा पवित्र ग्रंथ मंडीवा होय, “जो घमंड डाए, डीच प्रभु लिंजेन घमंड डाए।”

¹⁸ इनिघल्जी जो खुद गा बढाई दडावा होय, डीच बाने, बनकी दियागा प्रभु बढाई दडावा होय, डीचका प्रभु नजर गेन मनेन लायको होय।